Advent: en drittes Vorleses!

Guder Daag Blog Leser! Well ‘sis so weit kumme as es die dritt Woch vun Advent do iss. Ich bin ready fer es Grischtkind zu bewillkumme, ich hoff as eich aa ready seid. Mir misse allsfatt nooch an Gott glaawe un die grosse Pickder vun sei grosse Gschenk fer uns seh un denke. Ich winsch eich en hatzvoller Woch un Fried uff unsre Welt.

Lukas 2: 26-45

Un im segschde Munet iss der Engel Gabriel vun Gott in en Schteddel in Galilea gschickt warre, as Nazareth heesst, zumme Meedel, as mit me Mann naames Joseph verschproche waar un Maria gheesse hot. Der Engel iss zu re kumme un hot gsaat: “Ich griess dich, du Seelichi! Der Herr iss mit dir.”

Awwer sei Wadde hen sie verschrocke un sie hot gedenkt: Was fer en Gruss iss des? Un der Engel hot re gsaat: “Farricht dich net, Maria; du hoscht Gnaade bei Gott gfunne. Nau meind, du sollscht schwanger warre un en Buh griege un du sollscht em der Naame Yesus gewwe. Der soll en Grosser waare un en Soh vum Heechschte heesse, un Gott der Herr will em der Droon vun seim Vadder Daavid gewwe. Er soll en Keenich iwwers Haus Yakob in Ewichkeit sei un sei Reich soll ken End hawwe.”

Noh hot die Maria em Engel gsaat: “Wie kann des sei? Ich hab yo mei lewe nix mit me Mann zu duh ghatt.” Der Engel hot re geantwatt: “Der Heilich Geischt soll iwwer dich kumme un die Graft vum heechschte Gott soll dich iwwerschadde. Dewege soll es heilich Wese, as vun dir kummt, Goddes Soh heesse. Un die Elisabeth, weescht, as in deinre Freindschaft iss, draagt aa en Buh unnich em Hatz un iss schunn alt. Nau geht sie schunn im segschde Munet, die wu die Leit gsaat hen, sie waerr unfruchtbaar. Bei Gott iss ken Ding unmeeglich.”

Un die Maria hot gsaat: “Ya, ich duh, was der Herr heesst. Es soll mer so geh, wie du gsaat hoscht.” Un der Engel hot sie verlosse.

Net lang druff hot sich die Maria gschwint uff der Weg in die Barriye nooch re Schteddel in Yudea gemacht, iss ins Haus vum Zacharias kumme un hot die Elisabeth gegriesst. Wie die Elisabeth ihre Gruss gheert hot, iss es Kind in ihrem Leib ghupst. Un die Elisabeth iss voll vum Heiliche Geischt warre un hot laut gerufe: “Seelich bischt du as Weibsleit un seelich iss die Frucht vun deim Leib! Wuher kummt mer’s Glick, as meim Herr sei Mudder zu mer kummt. Weescht, wie ich dei Gruss gheert hab, iss es Kind in meim Leib aus Freed ghupst. Seelich bischt du, weil du geglaabt hoscht. Was dir der Herr gsaat hot, soll vollfillt waerre.”

Do iss en Audio Klip: 

Published in: on 16/12/2017 at 06:15  Leave a Comment  

Advent: en zwettes Vorleses!

Guder Daag Blog Leser! Well letschde Woch hawwich en katze Schtick aus em Bibel fer die aerschde Woch vun Advent gewwe. Des Woch will ich eich en zwette Schtick gewwe. Nau Diesember iss schier gaar halb rum. Ich muss nooch ee paar Gschenke fer mei Familie kaafe. Ich weess net wann sell gemacht sei waerr! Hett dihr schunn alles fer eier Grischtdaag kaaft? Unser Vorleses fer die zwette Woch in Advent kummt vun em Lukas sei Buch, Kabiddel 3. Net vergesse liewe Blog Leser, Advent iss die Zeit wann mer uff en neie Aafang denke solle.

Lukas 3: 1-6

Im fimfzeede Yaahr vum Kaiser Tiberius seinre Haarschaft, wie der Pontius Pilatus Govener in Yudea waar, der Herodes Tetrarch in Galilea, un Annas un Kaiphas Hohebrieschder, iss en Bfehl Gottes zum Yohannes, em Zacharias sei Soh, in die Wilderniss kumme, un er iss iwwers ganz Land um der Yordaan rumgange un hot die Daaf gebreddicht, as meent, wann Sinde uns verleet sin, waare sie uns vergewwe.

Des schteht im Buch vum Yesaye gschriwwe, wu er saagt:

Des iss en Schtimm vumme Breddicher in der Wilderniss:

Macht em Haar sei Weg zerecht, un macht sei Schtroosse in Adder. Yedes Daal soll gehowwe waare un yeder Barrick un Hiwwel runnergermacht. Was grumm iss, soll ewe waare, un was net graad iss, soll en eewner Weg waare. Alles was lebt, soll der Heiland Gottes sehne.

Ich guck freehlich uff em Daag wann alles nei gemacht waerre. Seid dihr ready? Net yuscht fer Grischtdaag un die Feierdaagezeit, awwer sin eier Seele aa ready fer die neie Aafang? Kaaft eier Gschenke un backt eier Kichli awwer ab un zu denkt mol uff die grosse Grund fer der kummende Feierdaag!

Do iss en Audio Klip: 

Published in: on 09/12/2017 at 06:51  Leave a Comment  

Advent: en aerschdes Vorleses!

Guder Daag Blog Leser! Die Advent Zeit iss widder do. Sunndaag ist der aerschde Sunndaag vun Advent. As viel vun eich schunn wisst, der Advent iss die vier Woch eb Grischtdaag. Normally sin die Leseschticke fer Advent Denkzeddele an em Gott sei Verschpreches as er sei Soh zu re Aerd schicke waerrd un sei Soh waerrd die Leit ewige Lewe bringe. Fer die naegschde vier Woch, will ich vier verschiddliche Vorleses gewwe. Unser aerschdes Vorleses kummt vun em Lukas sei Buch, Kabiddel 25:

“Un in der Sunn, em Mond un de Schtanne soll mer Zeeche sehne, un in der Welt solle die Leit vergelschdert sei un net wisse, was sie duh sotte, weil die Wasserwelle so wiescht brause. Un die Mensche solle aus Farricht schier umkumme un weil sie so waarde misse, bis allerhand Schreckliches iwwer die gans Welt kummt, un aa die Himmelsgreft solle wackliche warre.”

“Dann sehne sie der Menschesoh in re Wolk mit grosser Graft un Bracht kumme. Wann all des aafangt, guckt nuff in der Himmel un hebt eier Kepp, weil eier Erleesung neecher kummt. Un er hot ne en Gleichnis verzeehlt. Guckt seller Feigebaam aa un aa die annre Beem. Wann sie ausschlagge un ihr’s sehne, wissen dihr, as der Summer schier gaar do iss. So iss es aa, wann ihr des all sehne aagfange, ihr solle wisse, as es Reich Gottes schier gaar do iss. Ferhaftich, saag ich eich, die do Tschenereeschen soll net vergeh, bis all des gschehe iss.”

“Der Himmel un die Aerd solle vergeh, awwer mei Wadde vergehn net. Awwer hiet eich, as eier Hatz net schwer ward darrichs Fresse, Saufe, un es Sarriye ums Esse un seller Daag iwwer eich kummt wie en Fallschtrick. Seller Daag kummt yo unversehne iwwer all die Mensche in der Welt. Fer sell halt Wacht un beet, as ihr schtarrick warre solle un vun all dem weckgschpringe kenne, as gschehne soll, un as ihr var em Menschesoh schteh solle.”

Bis naegschde Woch, bleibt Gsund un schafft net zu hatt!

Do iss en Audio Klip: 

Published in: on 01/12/2017 at 18:52  Comments (1)  

Die Soldaate ihr Daag!

Guder Daag Blog Leser! Heit iss en Feierdaag do in Amerikaa. All Yaahr uff em elfde November is Soldaade Daag. Es is en official Feierdaag, es gebt ken Poscht un viele Gschefde sin zu.

Soldaade Daag waar aerscht in 1919 as Armistice Daag benaamt awwer in 1938 hot der Bresident Roosevelt der Naame verennert zu Soldaade Daag. Der 11. Nofember 1918, waar der Aerschde Welt Grieg sei letschde Daag: wann Fried endlich zu Europa kumme is. Deitschland, Amerikaa, England und Frankreich hen die Schiesserei gschtoppt.

Schunn zidder 1938 gebt es all Yaahr Schtrutze un Gedechtnis Zeremonies in vielen Schtedt. All Druppe vun de Amerikaanische Soldaade sin erinnert: die Armee, die Navy, die Marines, die Luftarmee un die Koast Bewaare. As ich en Kind waar, bin ich all Yaahr uff meiner Schtadt sei Zeremonie gange. Es hot allsfatt viel Soldaade aus re Zwette Welt Grieg un Soldaade aus em Korean un Vietnam Griege gewwe. Heitzudaage hemmer neie Soldaade do in Amerikaa: Mannsleit un Weibsleit die in Irak un Afghanistan gfochde hen.

Mir sin all so dankbaar fer all die Leit die fer unser Land gfochde hen. Mitaus was sie gemacht hen, waerre unser Land net was es heit iss. Unsere Freiheit is vun selle Soldaade ihre Kurasche un ihre Aagschtalde versichert. Soldaade Daag iss zu mir wichdig weil mei Grossdaadi hot in re Navy in re Zwette Welt Grieg in re Pazifick gfochde un meinre Grossmudder ihr Bruder waare in re D-Day Invasion umkumme. Ich bin arrig schtolz auf was mei Voreldere gemacht hen.

Ich hoff ass heit all vun meine Blog Lesers en Soldaat bedankt hen. Wann dihr es nooch net gemacht hett, sei so gut un macht es so schnell wie meeglich. Die Soldaade bedaerfe es.

Published in: on 11/11/2017 at 07:31  Comments (1)  

Schpuckowed!

Guder Daag Blog Leser! Well, Dinschdaag iss der Schpuckowed. Do in Amerikaa gehne die Kinner vun een Haus zu en anner in en Koschtum. Sie suche Kandy un Schokolaad un saage “Trick or Treat.” Des iss aa der Owed vun Schpucke un Hexe. Viel Leit glaawe as denowed die Dode zerickkumme kenne un uns bsuche. Ich hab gedenkt fer heit en alde Deitsche Gedicht waerr gut. So do iss en Gedicht vun der Louise Weitzel. Viel Gschpass bei lese!

Schpuck

Ebmols kann ich net schlofe,

Un ich winsch, ich haett en Licht.

Es guckt ee wennich schpuckich,

un ich mehn, ich seh en Gsicht.

Die Schadde sin so zackich,

un grinsich in der Eck,

un ich drick hatt die Aage zu,

un winsch sie waerre weg.

Wann der Mond scheint darrich die Fenschder,

un ganz dunkel iss es net,

mehn ich ebmols, ass eppes schteht,

yuscht newwich an meim Bett.

Die Mammi saagt, ‘sis Dummheit,

wann ich waer en guder Bu,

daet mich in der Nacht nix baddere,

un schteere in der Ruh. 

Der Daadi dutt yuscht lache,

saagt, es gebt nix in der Nacht,

ixcept die Boi un Kuche,

ass mich ebmols wackrich macht.

Ich winsch all mei Blog Leser en Hallicher Schpuckowed. Ich hoff as eich viel Kandi grickt!

Published in: on 27/10/2017 at 08:09  Leave a Comment  

Der Butzemann!

Guder Daag liewer Blog Leser! Well, ‘sis nau Schpotyaahr do in Pennsylvaania, en abaddiche Zeit. En Zeeche vun Schpotyaahr iss der Butzemann. Viel Leit duhne Butzemenner uff ihre Bortsch fer Dekoration. Ich hab des katzi Gedicht im Ehr vun dem Butzemann gschriwwe.

Der Butzemann

Do schteht er drausse im Gaarde,

der Summer lang hot er die Grawwe abgschreckt.

Er waert dem Grossdaadi sei alde Flannellhemd, 

un Hosse die net meh laafe kennt.

Un vielleicht en alde Schtrohhut, so ass die Sunn ihm net brennt.

Nau iss es Schpotyaahr, des iss fer schurr, 

die Sunn kummt schpeeder nuff un geht frieher nunner.

Die Bledder sin so schee un farewevoll, der Wind iss yo kiehler.

Doch datt schteht der Butzemann, immer am wache,

‘sis Zeit fer Eppelseider drinke un aa Karebse schneide.

Bald duhne sich die Kinner uff um Candy zu griege,

awwer der gude alde Butzemann bleibt eefach datt am schtehe. 

Do iss en Audio Klip: 

 

Published in: on 06/10/2017 at 16:21  Comments (1)  

Der grosse Emu Grieg!

Guder Daag Blog Leser! Well, des Woch kumm ich zu eich mit en Gschicht. As viel vun eich schunn wisst, bin ich en grosse Gschicht Fan. Eb ee paar Daage hawwich en Gschicht gheert, un ich hab es net geglaabt…awwer, ya, es iss en wahri Gschicht! Hett dihr schunn vun dem Grosse Emu Grieg vun 1932 gheert?

Der Grosse Emu Grieg iss in 1932 in Australia gschehe. Es hot Casualties gewwe, die Mensche waare gut gewehrt mit gude Flinde, awwer mir, die Leit, hen des Fechd verlore.

Noch em aerschde Welt Grieg, Soldaate vun Australia sin heemkumme un sin zerick zu ihre alde Tschopps as Bauern gange. Es Lewe waar hatt un in 1929 iss der Breis vun Weeze arrig nunnergange. Es waar arrig schlimm in Wescht Australia. Dann im 1932, baut 20,000 Emus sin kumme fer ihre Erziegezeit. Die hen gudi Felder un Bletze gefunne in Wescht Australia un sin datt gebliwwe.

hqdefault

Emus in Wescht Australia

All die Bauern hen zu re Regiering beglaagt ass sie en grosse Nusens waare. Die Minister vun Defense hot eigschitmmt un hen die Bauere Lewis Machine Flinde mit viel Kuggele gewwe. Der Major Meredith vun re Seventh Heavy Battery vun der Royal Australian Artillery iss aa datt kumme um zu helfe.

Der Grieg hot in November vun em Yaahr 1932 aagfange un es waar erwaart ass es en leichte Gewinn sei soll. Emus sin unglaablich supel. Sie hen sich in Grubbse un hinnich Beem verschteckelt. Datt kennte die Soldaat ken reine Schuss mache. Die Emus hen aa gemaerickt as wann sie yuscht weit weg genunk bleiwe, waare die Lewis Flinde net genaa genunk um ihne zu dreffe. Die Lewis Flinde hen aa viel Druwwel mit Faschtwaere un wann sie en Emu gedroffe hen, hen sie net zu viel Schaade geduh. Ee Emu waar fimf Mol gschosse un iss weiter fattgschprunge.

Ee Soldaat hot gsaat ass der eenzigschde Weg en Emu dotzumache waar “schiess es darrich es Gnick wann ihr Maul zu waar” odder “darrich der Maul wann es uff waar”. In en Ambush Unnernemmung, Soldaate hen baut 1,000 Emus umgeringt, awwer noch yuscht 12 Runde gschosse waare, die Flinde hen widder gejammt un die Emus sin fattgschprunge.

content-1492444700-emu-war

In em End, mit 9,860 Kuggele gschosse, yuscht 900 Emus waare dot, des meehnt ass die Soldaate hen en 1:10 Hit Rate ghatt. Endlich hen die Emus die Gegend verlosse, awwer yuscht wann es ken meh Esse gewwe hot.

Der Major Meredith hot schpeeder gsaat, “Wann mir en Military Division vun de Veggel hawwe daete, kennte mir eenich Army in re Welt feese. Sie kenne gege Machine Flinde geh wie Tanks.”

Ya, die Leit hen der Grosse Emu Grieg verlore. Schpeeder in Parliament hot en MP gfroogt eb eenich epper en Medal griege soll. Ya, hot en annere MP gsaat, die Emus.

Heitzudaage, iss die Emu en beschitzte Vogel.

Do iss en Link zu en Video (uff Englisch) um meh zu lanne:  https://youtu.be/w9G6WCsfoow

Do iss en Audio Klip: 

Published in: on 16/09/2017 at 05:25  Comments (1)  

Die Schaffleit ihr Daag!

Guder Daag Blog Leser! Der Schaffdaag in Amerikaa iss en Feierdaag uff der aerschde Mundaag in September. Es ehrt die Amerikaanische Arewet Reging un die Contributions die die Schaffleit gemacht hen zu der Graft, der Gedeihing, un der Gsundheit unser Land.

Schaffdaag waar zugschproche vun der Central Labor Union un die Knights of Labor. Die Knights hen die aerschde Schtrutz in New York City georganized. Nooch der Haymarket Metzling in Chicago uff em 4. Moi, 1886, Bresident Grover Cleveland hot Bang ghatt as Schaffdaag uff em aerschde Moi kennt en Gelegeheit sei um die Metzling zu erinnere. So, im Yaahr 1887, der Feierdaag in Amerikaa waar nooch September gezogge. Kanada feiert aa in September awwer es gebt meh as 80 annere Lenner die feiere uff em aerschde Moi.

Die aerschde paar Schaffdaage hen Schtrutze mit Picnics. Der Feierdaag iss die unofficial End vun em Summer un viel Kinner misse zerick in die Schul geh. Fer die gut gegleederd Leit, net vergesse as nooch em Schaffdaag soll mer net meh weisse Gleeder aahawwe.

Was macht eier Familye uff Schaffdaag? Hoscht du aa en Picnic? Fer mei Leser in Deitschland, hen die Hochdeitsche Schaffleit en Daag mitaus Arewet?

Published in: on 02/09/2017 at 05:11  Comments (5)  

Tomaets uffduh!

Guder Daag Blog Leser! Des Woch bring ich eich en “Freie Versch” Gedicht. Letschde Woch un des Woch hawwich Tomaets uffgeduh, un die Wadde sin zu mir kumme:

Tomaets uffduh!

Frisch vun dem Gaarde gepickt.

Der Grund abgewischt un in der Eimer gelegt.

Gschaelt un gschnidde.

Die Ball Jars koche, der Schtiem uff mei Brille. 

Heisse Bumpse rausgenumme un mit re rode briehiche Aern vollgemacht. 

Die Deckli aagezoge un widder in es heisse Wasser geleget.

20 Minudde koche.

Rausgenumme, zwee Lumpe in de Hend.

Harich mol, datt geht die POP! 

Schteh losse.

Reddi fer der Kiehlkeller.

Frische Tomaets wann der Schnee fliegt un der Winderwind blosst. 

Ahhhh.

 

 

Published in: on 19/08/2017 at 06:20  Comments (1)  

Nadd Korea: Was iss letz?

Guder Daag Blog Leser! Well mer kann net die News gucke odder heere mitaus eppes iwwer Naad Korea zu heere odder zu sehne. Awwer was wisse mir eigetlich iwwer dem Land? Ich hab gedenkt ass vielleicht waerr es gut glee bissel iwwer ihre Gschicht des Woch zu schreiwe.

Dem Nadd Korea sei voll Naame iss The Democratic People’s Republic of Korea (DPAK). Es liegt in Asia gschwischich Sudd Korea un Russia. Es hot 25 Millyonen Leit un die Haaptschtadt iss Pyongyang.

1280px-Flag_of_North_Korea.svg

Die Faahne vun Nadd Korea

Vun 1910 bis 1945 waar ganz Korea en Schtick vun der Kaiserreich vun Japan. Nooch dem Zwette Welt Grieg, waar Korea in zwee Schticke gschpalt. Es nadd Schtick waar vun de Soviets gemanaget un es sudd Schtick waar vun Amerikaa gemanaget. In 1950, hen die Nadd Korea Leit browiert es sudd Schtick zu nemme. Des hot der Korea Grieg ausgesetzt un der Grieg iss bis zum 1953 gefochde. Am End hot es yuscht en Fried gewwe awwer ken Treaty. So die zwee Lenner sin so gebliwwe. Es Nadd waar Communist un es Sudd waar en Democracy.

Der aerschde Haaptman vun Nadd Korea waar der Kim Il-sung un er waar an der Macht bis 1994. Nooch sei Dod, sei Soh, der Kim Jong-il, hot die Graft iwwergenumme. Er waar der Haaptman bis sei Dod im 2011.  Die Kims hen viel Geld an die Military ausgewwe un net so viel Geld an ihre Leit gschpendt. Es hot aa ee paar schlechte Yaahre mit viel Hungersnot gewwe. Viel Leit sin gschtarewe. Die Regiering iss arrig oppressive. Es gebt ken Freie Press odder Freiheit vun Schwetze. Alles kummt vun re Regiering. Im Yaahr 2006, hot Nadd Korea sei aerschde Nuclear Test gemacht. Im Diesember 2011, nooch Jong-il sei Dod, iss sei Soh, der Kim Jong-un an die Macht kumme un er iss allsfatt noch datt. Des Yaahr hot der Jong-un viel meh mit sei Nuclear Brogramm gemacht un hot es weiter entwickelt. Des hot viel Stress zu re Welt gebrocht. Mir wisse net was er duhne waerr. Sie saage ass er nau vielleicht en Inter-Continental Ballistic Missile hot! Des Woch hot der Bresident Trump grefdiche Wadde mit Nadd Korea geyuust.

_95387046_a6a0d699-62f8-4eec-9ec4-e8d0047cb3a3

Der Haaptman, der Kim Jong-un

Annere Lenner in re Welt un die United Nations hen viel Sanctions uff Nadd Korea gschtellt, awwer es macht nix aus zu dem Jong-un. Ich bed ass Fried rauskumme waerr un ken Missiles waerre gschosse sei.

Do iss en Audio Klip: 

Published in: on 11/08/2017 at 15:39  Comments (3)