Eppes vun en Fan!

Guder Daag Blog Leser! Des Woch will ich eppes abbadiches mit eich deele. Letschde Woch hawwich en Email vun der Faith Martin grickt. Sie hot mich gschriwwe um Dankeaa zu saage. Sie hot mei YouTube Videos un des Blog gfunne un nau iss am Deitsch lanne. Ich hab sie zerickgschriwwe un hot sie gfroogt eb sie eppes uff Deitsch schreiwe daet. Zum Glick hot sie YA gsaat. So do, fer es aerschdes Mol, iss eppes vun der Faith Martin in unsere scheene Mudderschprooch:

Mei Naame iss die Faith Martin. Ich bin siwwezeh Yaare alt, un ich bin PA Deitsch am lanne. Well ich hab Grammar Videos uff YouTube vun dem Douglas Madenford gfunne, un mei Maem hot gsaat, “Du kannscht Deitsch fer die Schul schtudie.” (Mei Familye dutt Schul an Heem.) Die Videos sin en guti Aart Deitsch zu lanne. Es iss glee bissel hatt, awwer ich waerr besser un besser. Alle Daag, schwetz, lees, un schrieb ich Deitch fer en halver Schtunnd.

Mei Maem kann Deitsch begreife, awwer sie kann net Deitsch schwetze. Awwer mei Grosseldere sin Deitsch. Sie sin froh ass ich am lanne bin. Ebmols, lache sie an mei Deitsch, weil es gschpassich klangt. Mei Accent iss net recht. Mei Daadi iss net Deitsch. Der anner Daag, hab ich zu ihm gsaat, “Wie bischt du?” Awwer, er hot gsaat, “Mach’s gut!” Selli sin die eensichscht Wadde er wisst. Ich hab arrig viel gelacht. Nau das ich Deitsch schwetz, kenne mei Brieder un Schweschdere aa en glee bissel.

Des iss ferwas ich will Deitsch lanne: die eldere Leit kenne Deitsch schwetze, awwer ihre Kinner kenne net. Ich will es naegscht Gschlecht Deitsch schwetze, weil PA Deitsch en wichdicher Batt vun unser Heritage iss. Deeler Daag, waerr ich mei Kinner Deitsch lehre. Mir misse die Schprooch lewich behalde.

Nau ich denk as die Faith en arrig guder Tschop geduh hot! Ich winsch sie gut Glick in die Zukunft! Witt du aa eppes fer mei Blog schreiwe? Ich waerr es fer schurr drucke! Schick mir yuscht en Email an: busterpa@yahoo.com

Do iss en Audio Klip: 

Published in: on 27/01/2017 at 18:44  Comments (3)  

Es Yaahr mitaus en Summer!

Guder Daag Blog Leser! As viel vun eich schunn wisst, bin ich en grosse Gschichte Fan. Des Woch will ich eich en coole Schtick aus unsre Gschichte bringe. Es Yaahr 1816 iss gut bekannt as es Yaahr mitaus en Summer. Awwer wie schlecht waar es eigetlich?

Was exactly es seltsame Wedder verursacht hot, wisse mir nau: Volcanic Activity. Awwer im 1816 hen die Leit net gewusst. Vun 1812 bis 1814 hot es vier Volcanic Eruptions gewwe un sie hen viel Esch un Schtaab in die Luft gschtellt un die Temperatures um re Welt sin nunnergange. Die Uffblosse vun Mount Tambora im 1815 waar een vun de mechdichschtichsde Uffblosse in Welt Gschichte un hot meh Schtaab in die Luft gebracht. Des Schtaab hot Solar Hitz gschpiggelt un es Wedder waar kiehler as Normal. Die Esche un Schtaab hen aa oft Newwel gewwe un die Leit hen oft arrig scheene Sunneuffgenge un Sunneunnergenge gsehne.

chichester_canal_1828

Chichester Canal vun J.M.W. Turner – Do kenne mir so en Sunneuffgang im Kunscht sehne.

Schnee in Tschunn hot Drifts vun 18 Zoll hoch in Philadelphi gewwe! In de Nei England Schtaate, Tschulei un Aagscht hen Temperatures so nidder as 40 Graad gewwe. Es Kalt waar so schlecht as gfrorne Veggel sin vum Himmel uff die Schtrosse vun Montreal gfalle un Gdiere die zu lang drausse waare, hen zum Dod gfrore. Uff dem 20. Aagscht en Schnee Schtarem iss darrich Nei England gange un es hot was gleene Blanze die nooch iwwerlebt hen, dodgemacht, un Schnee uff 26. September hot all die Eppel gfrore. Esse waar so raar as die Preise gedoppelt un gedreifacht hen. Der Preis vun Hawwe iss vun $0.12 en Buschel im 1815 ($1.57 heit) zu $0.92 en Buschel im 1816 ($12.98 heit) gschteigt!

052616-year-without-a-summer-volcanoes

Annere Naame fer es Yaahr waare: “Achtzehhunnert un Gfrore zum Dod” un “Es Aarmut Yaahr”. Awwer es waar net allsfatt eiskalt. Die Temperatures daete schteige un dann ganz gschwind nunnerfalle. In Tschulei un Aagscht, hot es Eis uff Wasserlecher un Rewwer in naddwescht Pennsylvaania gewwe.

Ich hoff as mir waerre net so was in unsre Lewwe erlewwe! Ich gleich Summer, un ich kann net lewe mitaus gude frische Gaardesache vun meim Gaarde! So nau, sei so gut, un saag en Bed as es ken meh Volcanic Activity gebt!

Do iss en Audioklip: 

 

Published in: on 14/01/2017 at 06:22  Comments (2)