Alt Laeng Sei!

Guder Daag Blog Leser! Well do sin mir am en vun en anneres Yaahr. 2016 geht raus un 2017 kummt rei. Mir wisse gar net was der 2017 bringe waerd. Mir hoffe fer Fried, Glick, un Gedeihigkeit. So lang ass ich erinnere kann, hawwich es gut bekannte Lied “Alt Laeng Sei”gegliche. Ich weess net ferwas, vielleicht iss es die Melodie, vielleicht iss es die Wadde, odder yuscht es Gefiehl es ich fiehl wann ich es sing odder heer. Fer mei letschde Post vum Yaahr 2016, geb ich eich die Wadde un Chords zu dem Robert Burns sei gut bekanntes Lied: “Alt Laeng Sei”

Alt Laeng Sei

C                                         G

Soll alt Bekanntschaft nimmermehr,

C                        F

Bei uns errinnert sei?

C                               G

Soll alde Freindschaft nimmermehr,

F           G         C

Bei uns vergesse sei?

CHORUS:

C                                         G

Ach Nee, ach Nee, mei liewer Schatz,

       C               F

Fer alt laeng sei,

         C                           G

Nau nemme mir en guder Schnapps,

       F     G       C

Fer alt laeng sei.

C                                       G

Do iss mei Hand, mei liewer Schatz,

C                               F

Geb mir dei Hand mei Freind,

C                         G

Mir drinke jetz als noch en Schnapps,

F                G              C

Zu freehlich alt laeng sei!

C                                             G

Du waarscht doch immermehr mei Freind,

C                           F

Glaab mir, ich bin aa dein,

C                             G

Druff drinke mir zum Schluss en Schnapps,

F               G               C

Zu freehlich alt laeng sei!

C                             G

Adjee, adjee, leb wohl mei Schatz!

C                                 F

Fer freehlich alt laeng sei,

C                               G

‘Skennt sei, ‘swaer unser letschter Schnapps,

F                 G               C

Fer freehlich alt laeng sei! – CHORUS

Do iss en Audio Klip vun der Poscht: 

Ich winsch all mei Blog Lesers en halliches Nei Yaahr 2017!

Published in: on 31/12/2016 at 08:13  Comments (2)  

Grischtdaag 2016 un Nei Yaahr 2017 Reed!

Do iss en Link zu mei yaerhliche Video Reed:

Link zu Video!

Un do iss en Copie vun de Wadde:

Guder Daag liewe Blog Leser un Leit in YoutTube Land! Well es Yaahr iss widder rum un es iss Zeit fer mich en Grischtdaag un Nei Yaahr Video zu mache. Es fiehlt sich as ich letschdem Yaahr sei Video graad gemacht hab, awwer nee, zwelf Munet sin schunn vorbeigange.

So loss mich mit en katze Rickguck uff ee paar Dinge aafange, die im Yaahr 2016 gschehe sin.  Viel schlechde iss im 2016 gschehe. Vielleicht solle mir 2016 as es Yaahr vun Iwweraschinge benaame? Errinert dihr an Brexit? Der Trump?

Im Yenner hot es neie Grankheit gewwe: Zika. Viel Zeit sin vun Mosquitos gschtoche un sie hen die Grankheit grickt.

Im Hanning hot der Punxsatawny Phil der Grundsau sei Schadde net gsehne…es Friehyaahr waar graads um Eck rum. Awwer, der Phil waar net so richdig! ‘Sis waar arrig kalt. Oft hemmer Temperatures ghatt die Minus waare. In Matz drei Bombs sin in Brussels, Belgium nuffgange. 32 Leit sin gschtarewe un 250 waare verletzt.

Im Tschunn Great Britain hot gewaehlt raus vun der European Union zu kumme. Es waar as Brexit benaamt. Sell waar en arrig grosse Iwwerasching gewest. In Aagscht waare die Olympic Schpiele in Rio de Janiero, Brasil.

Im Oktower un im November waar en grosse TO DO do in Amerikaa. Mir hen en Elektion ghatt. Vielleicht hett dihr glee bissel vun es gheert? Am End hot der Donald Trump gewunne. Ya, der Trump, en Business Mann waerr unser 45th Bresident sei. Mir wisse nooch net wie sell gehne waerr. Ich kann sicherlich saage as viel Leit in Amerikaa sin froh un graad so viel Leit sin drauerig. Die Hillary Clinton hot meh Schtimme grickt, awwer der Trump hot die Electoral College gewunne. Nau muss er sei Actions schtelle wu sei grosse Maul iss!

Im Diesember hot es widder en Terror Aagriff gewwe, des mol waar es in Berlin, Deitschland un es waar uff en Grischtdaagsmarrick gewest. 12 Leit sin gschtarewe un viel Meh sin nooch in Grankehaus. En Mann hot en grosse Truck gschtole un hot es darrich der Marrick gfaahre.

Un 2016 hot net der End vun der grosse Grieg in Syria gsehne. 5 yaahre lang gebt es schunn Grieg do. Die Videos vun Syria sin arrig hatt aazugucke.

Viel bekannte un wichtige Leit sin im 2016 gschtarewe: David Bowie, Alan Rickman, Antonin Scalia, Harper Lee, Nancy Reagan, Merle Haggard, Prince, Muhammad Ali, Elie Wiesel, Gene Wilder, Arnold Palmer, Shimon Peres, Fidel Castro un John Glenn.

Fer ich un mei Familye, 2016 waar en gudes Yaahr. Mei Kinner sin gewaxe un mei Dochder schwetzt meh Deitsch yeder Daag. Der gleene Oscar kann endlich Wadde saage! Un mir hen en neie Hund, en Poodle mit dem Naame Miles grickt. Er kann aa Deitsch gut verschteh!

So nau iss die Zeit wann mer uff en abaddiches Bobbli denke. Grischtdaag iss viel meh as Gschenke, Beem mit Lichter, grosse Iems un scheene Lieder. Fer uns Grischtliche Leit, iss es en neie Aafang un der Aakumme vun unserem Herr. Unser Herr, der kummt um all unser Sinde wegzunemme.

Mei Winsche fer eich des Yaahr sin as mir do in re Welt Fried finne kennte, as Leit die ken Haus hen, en Blatz finne kennte, as die Leit die mitaus Arewet sin, en gude Tschopp finne kennte, as die Leit die grank sin, en Antwatt zu ihre Brobleme finne kennte. As die Lenner in re Welt die in Grieg sin, en ewige Fried finne kennte. Ich weess schunn as der Belschnickel net all mei Winsche vollende kennt. Awwer ich froog ihn ennihau.

Paersehnlich, will ich glee bissel meh saage. Sell kummt graad vun meinem Hatz: Ich bin so froh fer all die Unnerschtitzung as all mei Blog Leser, Facebook Freinde un annere Internet Freinde mich im Yaahr 2016 gewwe hen. Nadierlich waerr ich im 2017 widder neie Blog Poschts schreiwe un Videos mache. Nadierlich waerr ich so viel duhe as meeglich fer unsere scheene Schprooch zu behalde. Ich hoff as all vun eich mir mithelft.

Awwer fer nau saag ich eefach: Hallicher Grischtdaag un ich winsch eich en halliches, glickliches un gsundliches Nei Yaahr 2017. Bis Yenner, macht’s gut un schwetzt Deitsch.

Published in: on 22/12/2016 at 15:43  Comments (2)  

Minsfleesch Boi!

Guder Daag Blog Leser! Well, Grischtdaag kummt bald un fer viel Leit mehnt Grischtdaag Traditions. Vielleicht esst dei Familye eppes abbadiches fer Grischtdaag. Mir alle wisse as mir Deitsche esse Seifleesch un Sauergraut fer es Nei Yaahr. Mir hen viel Esse Traditions in unser Kuldur. In mei Familye hemmer Welschhinkel, Filse, Welschkann un viel meh fer Grischtdaag. Die sin all arrig gut awwer was ich die bescht gleich fer Grischtdaag iss Minsfleesch Boi. Mei Familye esst es yuscht fer Grischtdaag. Hett dihr aa schunn Minsfleesch Boi gesse? Wann es warem iss mit gude Vanilla Eis Rahm….aye yummer, iss sell awwer appeditlich! Des Woch will ich meinre Grossmudder ihr Reseet mit eich deele!

Minsfleesch Boi

1 Pund gekochte Rinsfleesch odder Haschfleesch

4-6 Winesap odder MacIntsoh Eppel

1 Kaschde Reseine

1 Kuppche Braunzucker

1 Kuppche Weisszucker

1 Teeleffel Sals

1/2 Kuppche Rum odder Brandewei (odder meh wann du warricklich warem sei witt)

Maahl der Fleesch, Eppel un Reseine. Gut riehre. Geb sell in dei Boideeg. Schpritz 2 Essleffel Mehl uff dem Fleesch. Mach der Boideckel druff. Baschd die Deckel mit Millich un Weisszucker. Back fer 50 Minudde bei 375°F bis braun.

67975_551415644886366_1916780807_n

En Schtick vun Minsfleesch Boi (mitaus Eis Rahm)

Published in: on 17/12/2016 at 06:44  Comments (2)  

Briefe an der Belsnickel!

Guder Daag Blog Leser! Well es iss yuscht zwee Woch bis Grischtdaag. So ‘sis widder Zeit fer mei yaehrliche Brief an der Belsnickel. Des Yaahr hawwich mei Facebrook Freinde eigelaade en Brief an der Belsnickel aa zu schreiwe. Do sin ihre Winsche:

“Gsundheit un Lieb iwwer die ganze Welt.” – die Lucy Gressley

“Belsnickel, sei so gut un mach, ass mei Daage 2017 all 25 Schtunn henn. Ich kennt selli 60 Minudde immer yuuse, eppes zu duh, ass ich abbadich gleich …un Belsnickel, ich winsch en PENNSYLVANISCH DEITSCH THEATER GROUP” – der Michael Werner

“Alsemol wann epper mich froogt, was ich vum Belsnickel hawwe wott, denk ich, ass es veileicht en “Dischbedat vun Indresst” iss, awwer will ich des Yaahr en frischi Kokonuss hawwe. Es letschdes Yaahr habbich rum gepaddelt all iwwer de 10,000 Islands mit mei beschte Freind Becca Munro , un hemmer so viel frische Kokoniss geese. Ich will aa en wennich See-Sei-Butzel hawee fer Sauerkraut mache. Immer so gut, fer en aldi Rezept verbess’re. Un hoffich, ass fer Belsnickel uns helfe watt, fer unser nei Haus in Yenner kaafe, ohne druwwel. Mir halde unsre Finger ggreitzt!” – der Patrick Donmoyer

“Ich winsch ass der Belsnickel viel vun mei Schtunne abzunemme deet. Die eensichschde Gelegeheede ass ich eenicheppes warricklich verrichde kann, sinn wann ich yuscht (odder schiergaar, odder net) genunk Zeit bleiwe hab. Wann ich net so viel Schtunne hett, kennt ich viel meh Arrewet faddich mache.” – der Kevin Sterner

“Fer der Grischtdaag, hab ich yuscht en Winsch. Ich winsch ass der Belsnickel waerret meim Broblem heere: Mir all wisse in die Pennsilfaanisch Deitsche Kuldur, unsere Familye iss arrig wichdich. Nau mei Grossmudder, in diesem Yaahr, hot en Dokter sie en Diagnosis gewwe: Schizophrenia. Sie iss yuscht iwwerdem siwwezich Yaahr alt. Ich winsch un hoff ass Grossmudder en gude Gesundheit hawwe kann, un das Schizophrenia Grankheet kann verbessere. Ich vun nau aa winsch an Grischtdaag dass mei grossmudder kann sich-selbscht waricklick erfreie. (Well nau, ich hab en Winsch ghatt, nau mei ensichschde Winsch hab zwee Winsche aagschtanne!) Ich winsch aa in die Pittsbarrick Schtadt mer kann en Pennsilfaanisch Deitsche G’sellschaft mache, awwer ich fihel ass es in die Pittsbarrick net so viel Pennsilfaanisch Deitsch Leit gebt! So, der Belsnickel, dieser Grischtdaag kannscht du mir en lot uff Pennsilfaanisch Deitsch Ess-sache bringe? (Verleicht mei zweette Winsch iss nix waert!)” – der Kolby Howell

“Liewer Belsnickel, ich will Schnee, sei so gut.” – die Deb Carden

So datt sin ee paar Winsche. Fer mich selwert, winsch ich Fried uff unsere Welt. Ich froog fer en gudes Yaahr fer unser Land un fer mei Familye. Dinge brauch ich net, awwer wann du Blatz in dei Sack hoscht, neie Instruments sin allsfatt Willkumm bei mir! Gross Dank liewer Belsnickel!

Ich hab des Post darrich die Woch gschriwwe un dann geschdrowed iss der Belsnickel zu mir kumme. Ich hab ihn en Kopy vun all die Briefe gewwe. Er hot sie mitgnumme un hot “Well, mir misse mol sehne” gsaat!

Published in: on 10/12/2016 at 05:57  Leave a Comment