Widder in dem Busch!

Guder Daag Blog Leser! Well sin mir all voll vun Geschder? Ich weess ass ich bin. Wie allsfatt, hawwich zu viel gesse….awwer alles waar so gut! Nau ‘sis Zeit fer en anner Feierdaag fer viel Leit do in Pennsylvaania: der aerschde Daag vun Haaschyaage! Uff Munndaag waerrd viel Leit in der Busch mit ihre Flinte geh um en grosse Hasch zu schiesse. Ich waerr aa eens vun des Drupp sei. ‘Sis en alde Tradition fer uns Deitsche. Viel Schule waerre zu un viel Leit waerre net schaffe. In Blatz vun sell, waerre sie ihre aarensch Gleeder aaduhe un in der Busch laafe. Letschdes Yaahr hawwich en Lied fer mei Baend gschriwwe. Es waar iwwer die verschiddliche Yaagezeite do in Pennsylvaania. Heit will ich yuscht die Wadde mit eich deele. Ich hoff as dihr es gut finne waerrt. Viel Gschpass bei lese!

Yaage

1. Uns Deitsche hen en Tradition,

‘Sis kummt vun dem alde Heemet schunn.

Mir gehne draus un suche,

wilde Fleesch zu schiesse.

Chours:

‘Sis widder Zeit zu yaage,

wann ich un mei Flint geh laafe.

Uff gegleedert in aarensch sei,

so es gebt ken letze Schiesserei!

2. Es Yaahr fangt schunn frieh aa,

wann mir gehne mitaus der Fraa.

Mir gobbele un glucke wie en Narr,

yuscht fer en Welschhinkel mit en Bart. – Chorus

3. Oktower kummt, en scheeni Zeit,

Dann suche mir weit un breit.

Mit unserem Hund am schpringe,

Haase un Pheasants zu finne. – Chorus

4. Am End es Yaahr kummt der Hasch,

‘sis kalt un schneeig im Busch.

Mir hocke uns in Beem un denke,

un wann es ken gebt, dann mir drinke. – Chorus

Wann dihr aa in der Busch am Mundaag geht, winsch ich eich viel Glick! Schiess en grosse! Un wann du Glick hoscht, sei so gut un schick mir en Pickder vun dei neie Trophy!

 

Published in: on 25/11/2016 at 18:02  Comments (1)  

In was verdrauscht du aa?

Guder Daag Blog Leser! Well, des Woch iss endlich die grosse Lecktion do in Amerikaa. Gott sei Dank! Ich hab warricklich genung vun alles ghatt. Es Guckbax iss voll mit schlechde Commercials un yeder Daag grick ich vier bis fimf Dinge vun Kandidaade in mei Mailbax. Nadierlich der Bresident Fecht iss heess. Der Donald un die Hillary sin wie zwee Kaader…allsfat am yammere un gratze. So die grosse Froog iss: in wem verdrauscht du aa? Die Republikaaner un die Demokraate saage ass ihre Kandidaat besser iss. Fer mich paersehnlich, schtell ich mei Verdraue in was Gott in dem 121. Psalem saagt. Vielleicht wann meh Leit aa ihre Verdraue in de Wadde vun sellem Psalem schtelle daete, waerre mir ok sei. Graad in Zeit fer die Lecktion iss der 121. Psalem:

Ich waerr mei Aage zu de Hiwwele uffhewwe –

vun wu kummt mei Helfe? 

Mei Helfe kummt vun dem Herr,

der der Himmel un die Aerd gemacht hot.

Er waerr net erlaawe dei Fuus gemuckt zu sei;

er, wer dich bhaldet, waerr net schloofe.

Guck, er, der Israel bhaldet,

soll net schlummer un aa net schloofe.

Der Herr iss dei Bhalder;

der Herr iss dei Schadde uff dei rechde Hand.

Die Sunn soll dich net am Daag schlagge, 

un aa net der Moond am Nacht. 

Der Herr soll dich vun all Iwwel behiede;

er soll deine Seel behiede.

Der Herr soll dei Rausgeh un dei Reigeh behiede,

vun des Zeit un aa in die Ewigkeit.

Wer gewinnt am Dinschdaag, gewinnt. Mir beede fer Fried un Gedeihigkeit in unser Zukunft. Nau geh naus, schtimm ab, un sei schtolz ass mir in so en Land wuhne wu mir mitaus Verfolgkeit abschtimme kenne.

Do iss en Audio Klip: 

Published in: on 05/11/2016 at 16:54  Comments (3)