Ole Bull!

Guder Daag Blog Leser! As viel vun eich schunn wisst, ich gleich Motorcycle zu faahre. Ich gleich abbadich im Schpotyaahr zu faahre. Die Luft iss glee bissel kiehler un die Bledder sin so farewevoll. Des Woch hawwich die Meeglichkeit ghatt, fer en Reid zu geh. Ich hab gepickt nooch Ole Bull Schtaat Park zu faahre. ‘Sis baut een un halwer Schtunnd vun mei Haus un der Weg datt iss arrig schee. Der Weg: Route 144, geht darrich der Busch un iwwer viel Bariye. Ole Bull Schtaat Park iss in Potter Kaunty, PA. Die grosse Frooge sin, wer waar der Ole Bull un fer was hot er en Schtaat Park mit sei Naame? Well die Gschicht find ich arrig inderessant.

Der Ole Bornemann Bull waar uff dem 5. Hanning, 1810 in Bergen, Norway gebore. Sei

800px-ole_bull_playing

Der Ole Bull am Geig schpiele.

Daadi hot gewollt as er en Parre waerr awwer der Ole hot vun yung aa die Geig gut schpiele gekennt. Er hot aa in Deitschland un Frankreich gelebt. Bis 1828 waar er schunn en Virtuoso. Er hot dausende vun Concerts gewwe. In England hot er 274 Concerts im Yaahr 1837 selwer geschpielt! Der Bull iss arrig bekannt gewest un hot viel viel Geld verdient.

Der Bull hot Amerikaa oft bsucht. Im 1852 hot er 120,000 Acker fer $10,000 in Pennsylvaania kaaft. Er hot en neie Kolonie gegrindt: Nei Norway. Die Kolonie hot vier Schtedt ghatt: Nei Bergen (nau Carter Camp), Oleana, Nei Norway, un Valhalla. Der heechschte Barrig waar der Valhalla, un es iss datt wu er en Castle (Nordjenskald) gebaut hot. Es waar nimmi faddich gebaut. Eventually die Kolonie iss zu nix gange weil es hot ken gude Grund gewwe fer bauere. Die Kolonies hen yuscht ee Yaahr ausgedauert.

Ole Bull Schtaat Park iss nau wu Nei Norway waar. Die Norwegians sin net zerick nooch Norway gange, awwer im Blatz vun sin sie nooch Minnesota un die Dakotas gange. Im 2002, es Land Norway hot en Gedechtnis im Ehr vun dem Ole zu Pennsylvaania gschenkt.

Do sin ee paar Pickders vun mei Motorcycle Reid nooch Ole Bull Schtaat Park:

 

Do iss en Audio Klip: 

 

Published in: on 22/10/2016 at 06:21  Comments (1)  

Keith Haring: Deitscher Kunschtler!

Guder Daag Blog Leser! Iwwer de Yaahre hot es viel deitsche Kunschtler gewwe. Manniche sin gut bekannt unnich uns Deitsche, awwer es gebt een Kunschtler, der arrig gut bekannt in re ganze Welt iss: der Keith Haring. Er hot ken deitsche Folkskunscht gemacht, sondern Modern Kunscht, awwer er hot deitsche Blut!

Der Keith waar in Reading Grankehaus uff dem 4. Moi, 1958, gebore. Sei Eldre hen in Kutzesschteddel gewuhnt un datt iss wu der Keith uffgwaxse iss. Nooch der High School hot er an der Ivy School of Professional Art in Pittsbarrig un an der School of Visual Arts in Nei Yarrick Schtadt schtudiert. Der Haring hot gsaat as der Walt Disney, der Dr. Seuss, un der Charles Schultz hot ihn beeiflusst. “Bis dem Haring sei 16. Gebottsdaag, sei Eldre, der Allen un die Joan – dief gewatzelt in viel Gschlechte vun de Pennsylvaanisch Deitsche – hen gedenkt ass der Keith ‘Haywire’ gange iss.” – vun dem Keith Haring Foundation Biography. keith-haring1

Sei Kunscht waar en Antwatt zu de Nei Yarrick Schtadt Schtross Kuldur vun de 1980s. Es hot die Concepts vun Gebott, Dod, Sexuality, un Grieg ausgedrickt. Dem Haring sei Kunscht waar oft schwer Bolitisch un sei Imagery waerr en weit bekannte Visual Schprooch vun de 20. Yaahrhunnert.

Sei Kunscht iss in viel Museums um re Welt, uff Gleeder, in Kalenner, un in Murals uff Schtrosse um re Welt. Der Haring iss uff em 16. Hanning, 1990, vun AIDS gschtarewe. Ass en Feier vun sei Lewe, die Madonna hot ihr aerschde Nei Yarrick Concert vun ihre World Tour en Benefit Concert fer Harings Gedechtnis gemacht un hot all die Proceeds vun de Kaarde zu AIDS Charities gewwe.

Um meh iwwer dem Haring zu lanne, klick mol do: The Keith Haring Foundation

Yuscht ee paar vun sei Kunscht Schticke:

 

 

Do iss en Audio Klip: 

 

Published in: on 08/10/2016 at 06:33  Leave a Comment