Deitsche Gottesdinscht!

Guder Daag Blog Leser! Uff em 10. September iss eppes abaddiches gschehe. Mei heem Kaerrich, die Becker’s St. Peter’s Luddrische Kaerrich in Molltown, Baricks Kaunty hot en deitsche Gottesdinscht gfeiert. Des Yaahr iss unser 150 Yaehrlichfesscht as en Gmee, so mir hen viel verschiddliche Dinge geblannt fer es Yaahr. Nadierlich weil mir en alde deitsche Gmee sin, hawwich gedenkt as en deitsche Gottesdinscht en gudi Idea waerr. Fer die letschde paar Munet hawwich alles geblannt. Ich hab der Parre Richard Miller gfroogt eb er breddiche daete, un er hot nadierlich “ya” gsaat. Fer abaddiche Myusick hawwich die Dolpehock Saenger Chor grickt un die wunnerbaar Carol Dieffenbach Kanter as Ariyelschpieler grickt. Der Daag waar arrig hees in en alde Kaerrich mitaus Air Conditioning…awwer schwitze kummt aa vun Gott, gell?

Ich hab alles uff Video geduh un die Link iss do: Gottesdinscht Video

Do iss die Ardning vun der Gottesdinscht:

Aafangslied: Nau Danke mir all Gott

Gloria Patri

Kyrie

Invocation

Griess: Der Herr sei mit eich. – Un mit deinem Geischt.

Daagesbet: Darrich dei Watt, ewiger Gott, iss alles gemacht warre, un du hoscht uns dei Odem gewwe. Darrich die Watt, ewiger Gott, waar der Graft des Doddes weggenumme; Grischt iss ufferschtanne aus em Graab un mir hen neie Lewe darrich Ihm mit der Graft vom heiliche Geischt. Loss uns so lewe in unser Wadde un in was mir duhne un schaffe ass mir zu der Welt weise kenne ass du bei uns bischt un du allee bischt der Herr; darrich Yesus Grischtus, unser ufferschtanden Herr bede mir. Amen.

Dolpehock Saenger Chor: ‘Sis en Kaerrich in Daal. – Gott iss mei Freind in ganze Yaahr. – Wu kennt ich hie?

Die aerschde Schrift: Die Offenbarung 21:1-5 – Noh hab ich en neie Himmel un en neie Aerd gsehene. Der aerscht Himmel un die aerscht Aerd waare vergange, un’s waar kenn See meh. Un ich, der Johannes, hab die heilich Schtadt es Nei Yerusalem gsehne runner kumme aus em Himmel. Sie waar gerischt wie en Braut ass sich schee aageduh hot fer ihre Mann. Noh hab ich en laude Schtimm vum Himmel gheert saage: “Guck mol, nau iss die Wuhning vun Gott bei die Mensche, un er soll bei ne lewe. Sie selle sei Leit sei, un Gott selwert soll bei ne sei, un ihre Gott sei.” Gott soll all es Aagewasser aus ihre Aage butze. Es soll nimme Schtarawes oder Heiles, oder Brilles, oder Schmatze meh gewwe, fer die alde Sache sin vergange. Der wu uff em Dron hockt hot gsaat, “Guck mol, ich mach alles nei.” – Die Wadde aus der Heiligen Schrift – Gott sei Lob un Dank!

Psalem 137:1-4 – 1 An die Rewwere vun Babylon henn mir ghockt un gheilt wu mir an Zion gedenkt henn. 2 Datt uff die Weidebeem henn mir unser Harfa anne ghanke. 3 Datt, sellie ass uns gepackt un weggschleppt henn, henn uns gsaat: “Sing uns en Lied vun Zion.”4 Wie kenne mir em Herr sei Lied singe in en fremdes Land?

Die zwette Schrift: Genesis 12:1-4 – Der Herr hot gsaat zum Abram: “Verloss dei Vadderland, un dei Freindschaft un die Familye deim Vater; un zieh an en Land wie ich dich weiss. Ich waerr dich en mechtiges Volk mache, un will dich segne, un will dei Naame hoch hewe, un du sollscht en Sege sei. Ich will segne die dich segne, un verfluche die dich verfluche, un in dir selle alle die Familye vun iwwer der Welt Gsegnet sei. Abram hot em Herr sei Befehl gfolyet un iss gezoge, hot aa em Lot mit genumme vun Haran. Abram waar 75 Yaahre alt wie er sei Heemetland verlosse hot. – Die Wadde aus der Heiligen Schrift – Gott sei Lob un Dank!

Evangelium: Yohannes 14:1-6 – Habt kenn Bang. Glaabt in Gott un glaabt aa an mich. In meim Vadder seim Haus gebt’s viel Wuhnbletz. Wann des net so waerr, hett ich’s eich schunn gsaat. Datthie geh ich fer eich der Blatz reddi mache. Un wann ich datthie geh fer eich der Blatz reddi mache, will ich zerickkumme un eich hole, so ass wu ich bin, datthie kennt dihr aa sei. Un wu ich hiegeh, der Weg datthie wisse Ihr. Noh saagt der Thomas zu em: “Herr, mir wisse net wu du hiegehscht. Wie kenne mir der Weg datthie wisse?” Yesus hot em gsaat: “Ich bin der Weg, un die Wohret, un’s Lewe. Nimmand kummt zum Vadder eksept darrich mich.” – Der Evangelium sei Watt. – Lob sei dir, Grischt.

Breddiche: Parre Richard Miller

Dem Daag sei Lied: “Yesus, wie en Hieder, fiehr uns.”

Dolpehock Saenger Chor: Laafe in es Sunnelicht vun sei Lieb. – Bringe nei die Schaep. – Loss Friede sei uff die Aerd.

Glaabensbekenntnis: Ich glaab an Gott, der Vater Allmechtich, da wu Himmel un Aerd gemacht hot.  Un an Yesus Grischtus, sei eensichter Soh, unser Herr. Er waar aagfanga bei der Grefta vum Heiliche Geischt, Gebore vun da Yungfraa Maria, gepeinicht unnich em Pontius Pilatus, gegreitzt, gschtarewe un waar begrawwe;  nunnergange zu der Helle.  Am dritte Daag widder uffgschtanne vum Dodde; nuffgange zum Himmel, un hockt uff em recht Hand vun Gott, der almechtige Vater.  Er kummt widder ass en Richter vum der Lewendiche un die Dodde. Ich glaab an den Heiliche Geischt, die Heiliche Grischtliche Karich, die Gemeeschaft  der Heiliche, vergebnis vum Sinder, es ufferschtehes vun die Dodde, un en ewiges Lewe.  Amen.

Bede: Herr, erbarme dich. – Grischt, heer uns.

Friedensgriess: Den Friede des Herr sei allezeit mit eich. – Un mit deinem Geischt. – Friede sei mit dir.

Dem Herr sei Gebet: Unser Vadder im Himmel, maag die Naame heilig sei. Dei Reich soll kumme. Dei Wille soll geduh warre uff der Aerd, graad wie im Himmel. Unser daegliches Brot geb uns heit. Un vergeb uns unsere Schulde, so wie mir annere ihre Schulde vergewwe. Un fiehr uns net in Versuchung, awwer erlees uns vun Iwwel. Deins iss es Reich, un die Graft, un die Harrlichkeit in ewichkeit. AMEN.

Benediction: Dolpehock Saenger Chor

Segen: Derr Herr segne dich un behiede dich. Der Herr losse sei Angesicht iwwer dir lichten un sei dir gnaedig. Der Herr erhewwe sei Angesicht uff dich un schenke dir Friede. Amen.

Es Ausgangslied: “Er fiehrt mich.”

Sendung: Geht hie im Friede der Herr. – Gott sei ewiglich Dank.

 

 

Published in: on 16/09/2016 at 05:31  Comments (3)  

The URI to TrackBack this entry is: https://deitscheblog.wordpress.com/2016/09/16/deitsche-gottesdinscht/trackback/

RSS feed for comments on this post.

3 CommentsLeave a comment

  1. Hot dei Parre sei breddiche aa uff Deitsch geduh? Wenn scho, verleicht kannscht du es mit uns mitdeile! Un wenn nit, verleicht kannscht du es uff Deitsch iewwersetze un es ebbefalls mit uns mitdeile!

  2. Jack, der Parre hot sei Breddiche uff Deitsch mit aa glee bissel Englisch rei. Ich hab ken Copy vun sei Breddich. Awwer wann du die Video aaguckscht, du kannscht es heere. Hoffetlich, sell helft. Mach’s gut, Bu!

  3. Hallo Doug,

    I glaub Dei Planung isch wirkli g’lunge! Die Worde duhne mi a‘ mei ehemalige Stellung as Organischd vun d’r alde St. Matthäus Kirch‘ uff d’r Nordseide vun Pittsburgh. Jed’n Sunndaag hän mer uff Deutsch g’betet, g’sunge, un e wunnerschöne Predigt vum Herrn Paschdor Rudi aus Danzig (jetzt glaaw’i sei Heemetstädtle wird doch Gdansk g’nannt, un seit’m II. Weltkrieg isch se e Deel vun Polen, gell net?). Sei Deutsch isch klor un deitli‘ g’wä, un sei G’sicht hot schier wie seller vun Mose im Alde Teschdament g’strahlt! Nu, im Johr 1985 isch sell awwer zu Ende g’ange, weil unser äldeschdes Mitglied, Herr Zadoch, g’storwe isch. Die annere hot bis 1995 zwoimol im Johr Deutsch a’g’bote (die sog. Deutsche Vereinigte Evangelische Kirche von Birmingham, uff Englisch hot se d’n Name „Birmingham United Church of Christ“ g’trage. I bin au dort Organischd g’wä, un jetzt gibt es nur e bissele Deutsch also au zwoimol im Johr in d’r Stadtmitte, awwer die Kirche dort isch koi deutsche Stammkirche—leid’r.)

    Nu, was Du alles machschd, um die Kuldur un Sitte zu erhalde, isch net nur lobenswert, `sisch ja wunnerbar! Mach nur weiter. Mer äldere Leit hän leid’r net so viel Kraft un Energie mehr, awwer na, mer duhne au uns’r bissele. Du bisch jung an Johre, alt a‘ Weessheet, un sell macht ja `n grossen Unterschied aus.
    Schönschde Herbschdgrüsse an Di, Dei liewwe Ehefrau, an Estella un Oscar au—un a‘ dei „vierbeinig’s Familienmitglied“ au!

    Dei

    Jim (Jakob) Kramer
    Seller Pittsburgher Kerl.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: