Die National Park Service iss 100 Yaahre alt!

Guder Daag Blog Leser. Des Dunnerschdaag, der 25. Aagscht, waar en grosse Gebottsdaag fer die National Park Service. 100 Yaahre zerick waar die Park Service gegrindet. imgresDie National Park Service iss antwattlich fer die Iwwerseh fer all National Parks un National Monuments. Die Service gheert zu der Department of the Interior un letschdes Yaahr hot sie en Budget vun $2.9 Billyonen. Sell iss viel Geld, awwer denk mol an wie viel Land un Bletz sie unnerschtitze!

Es gebt ee paar wichdige Leit in die Gschicht vun National Parks un die National Parks Service:

01-e1414718011490

John Muir: der John Muir waar een vun der aerschde “Conservationists” in Amerikaa. Er hot alles aagfange mit sei Ruf fer die Behiede vun dem Yosemite Daal in nadd-Kalifornia. Er hot viel Bicher iwwer Nadur un der Nadur ihr Graft iwwer uns Leit gschriwwe. Er waar aa een vun de aerschde Mitglieder vun der Sierra Club. Er hot gsaat: “Die Bariye rufe un ich muss geh.” un “Alli-epper braucht Scheeheit wie Brot, Bletz in zu schpiele un zu bede, wu Nadur kann heele un gewwe Graft zu Kareber un Geischt.”

MTE1ODA0OTcxNzcxOTg3NDY5

Theordore Roosevelt: Mir kenne ihn as der 26. Bresident. Er waar aa wichdig in die National Parks Aafang. Im Yaahr 1906 hot er die Antiquities Act gemacht un die hot 18 National Monuments behiedet. Er hot aa 5 National Parks gemacht un meh as 50 Veggel Reserves un 150 National Busche gemacht. Er hot gsaat: “Gediere un die Beem kenne net schwetze, so mir misse un mir waerre.”

Stephen_Mather_1916

Stephen Mather: der Mather waar der aerschde Director vun der NPS. Bevor 1916, der Mather waar en Millyonaire. Er hot sei Geld in Advertising gemacht. Business waar wichdig zu dem Mather awwer Nadur waar aa. Im 1916, Bresident Woodrow Wilson, hot der Mather as Director vun der neie NPS gemacht. Un was en gude Idea sell waar. Er waar der rechte Mann fer die Tschopp. Es waar der Mather der hot die National Parks gemacht as mir sie heitzudaage kenne. Der Mather hot die Parks Yuuser freindlich gemacht, un mit sell, hen Leit die Parks bsucht.

Die National Parks Service iss antwattlich fer iwwer 400 Bletz (59 National Parks) un hot baut 22,000 Schaffleit. Die Parks sin do fer all Amerikaaner. Amerikaa waar es aerschde Land mit National Parks, un mir kenne arrig schtolz sei fer sell. Do in Pennsylvaania, es gebt viel National Parks Service Bletz. Do iss en Link um meh zu lanne!

Fer mich paersehnlich, die Parks sin arrig wichdig. Ich hab viel Parks schunn bsucht un ich waerr meh Parks erlewe. Sie saage unser Gschicht un zeige alles was gut in unserem Land iss. Wann du nooch net en Park bsucht hoscht, geh! Sie kenne dich en neie Sicht gewwe.

Hallicher Gebottsdaag National Park Service!

Do sin ee paar Pickders vun National Parks die ich bsucht hab:

Do iss en Audio Klip: 

Published in: on 27/08/2016 at 05:50  Comments (1)  

En Documentary iwwer uns!

Guder Daag Blog Leser! Geschder hawwich en E-Poscht vun en Freind grickt. Was ich gelese hab, hot mich iwwerrascht. Es hot en Link zu en Ardickel iwwer en neier Film. Die Amanda Beard-White, die in Hannover, PA gebore waar, iss nau en Filmmacher. Sie hot gewollt en Film iwwer die Deitsche zu mache. “Zu viel Leit denke as Deitsch iss yuscht Amisch. Ich will en Film mache iwwer uns, die non-Amische Deitsche.” – Beard-White. Dem Film sei Naame iss: “Pennsylvania Dutch: An American Story.” Es laaft 90 Minudde un soll in Schpotyaahr 2016 rauskumme.

Do iss en Link zu der Ardickel: Deitscher Film

Published in: on 20/08/2016 at 05:46  Comments (1)  

Schmierkaes Boi!

Guder Daag Blog Leser! Des Woch bring ich eich en alde Familye Reseet: Schmierkaes Boi. Ich weess net wie alt des Reseet iss, awwer ich weess schunn as mei Gross-grossmudder hot es aa gebackt. Nau mei Gross-grossmudder waar 100% Deitsch, so ich denk as des Reseet aa en alde deitsche Reseet sei kennt. Wann ich des Boi backe, iss es allsfatt gegliche. So browier es mol! Ich denk dihr waerrt es aa gleiche.

2 Koppche Schmierkaes

46796_568784839816113_827148256_n

Sell iss wie es guckt wann es faddich iss. 

2 Oier

1 Koppche Zucker

Budder, so gross wie en Walnuss

1 Petz Sals

1/2 Koppche Millch (duh des am End rei)

4 Suppeleffel Mehl

Riehr alles in en Schissel zamme. Back in en 9 Zoll Boideller in en ungebackne Boideeg bei 375 Graad fer 20 Minudde, dann bei 350 Graad fer baut 35 Minudde. Mer kann es waarem esse, awwer es iss aa arrig gut kalt.

So leicht iss es un ‘sis so appeditlich! Gut Glick bei Backe! Loss mich mol wisse wann dihr es browiert!

Published in: on 07/08/2016 at 07:34  Comments (4)