Mei Breddich vun Nei Bethel Karrich!

Guder Daag Blog Leser! Letschter Sunndaag waar ich eigelaade nooch scheene Kempton,Barricks Kaunty. Fer was? Die Nei Bethel Karrich hot ihr yaahrlicher Deitscher Gottesdinscht ghatt, un ich hab die Breddich gewwe. Ich waar arrig demiedich gfroogt zu sei, un ich hab hatzlich ya gsaat. Nei Bethel iss en arrig alde Karrich im Schadde vun de Bloh Bariye in Nadd-Barricks Kaunty. Die Gemee iss meh ass 250 Yaahre alt! Do iss en Link zu ihre Gschicht: Nei Bethel Karrich.

13716000_1383615151666407_1862099149462610805_n

Die Breddiche Schrift waar: Lukas 10: 38-42

Un wie sie widder gange sin, iss er in en Schteddel reikumme. Datt waar en Fraa naamens Martha un sie hot ihn in ihrem Haus uffgenumme. Sie hot en Schweschder ghatt, ass die Maria gheesse hot, un die hot allsfatt bei Yesus seine Fiess ghockt un hot sei Wadde aagheert. Die Martha hot arrig viel zu duh ghatt fer es Esse zu mache un iss zu ihm kumme un hot gsaat: “Herr, froogscht du net, fer was mei Schweschder mich alleenich schaffe losst? Saag ihr, sie soll aa eppes duh!” Awwer der Herr hot gantwaddet: “Martha, du duhscht viel Mieh aa. Yuscht ee paar Dinge sin gebraucht – gewiss yuscht eens. Die Maria hot es gut Deel genumme un des soll mer vun re net wecknemme.”

Do iss mei Breddich:

Loss uns bede, liewer Gott, loss die Wadde vun unsere Leftse un die Gedanke in unsere Hatze sei ewig in dei Naame. Amen.

Well, guder Mariye liewe Leit. ‘Sis en abselutt Blessier und Segne, um do mit eich demariye zu sei, un mit eich zu aabede in unsere scheene un so wichdige Mudderschprooch, Deitsch. Ich will mit zwee Gschichte aafange.

En Parre iss zu en Nursing Heem gange um mit en alde Gemeemitglied zu dreffe. As er datt ghockt hot, hot er en Schissel vull vun Grundniss newwich ihre Bett gesehen, un er hot eens genumme. Weil sie gschwetzt hen, hot er eens nooch en annere gesse. Un am End hot er die ganze Schissel leer gemacht.  Der Parre hot gsaat, “Aye Mum, es dutt mir leed awwer ich hab all die Grundniss gesse!” “Sell iss ok,” hot sie gsaat. “Sie daete yuscht datt bleiwe, mitaus mei Zaeh, lutsch ich yuscht die Schokolaad weg un duh sie in die Schissel.”

En alde Paar sin in en Maschine Accident gschtarewe. Die allebeed waare 85 Yaahre alt un waare fer 60 Yaahre gheiert. Sie waare in arrig gute Gsundheit weil die allsfatt gsundliche Esse gesse hen un hen viel gexercised. Ass sie zu de Pearly Gates kumme sin, hot der Sankt Peter ihnne zu ihre Mansion genumme. Es waar arrig gross un hot so en scheeni Kich, en grosse Schloffschtubb, un en Baad mit en Jacuzzi aa ghatt! Sie hen so “ooh” un “ahhh” gsaat. Der alde Mann hot der Peter gfroogt wie viel alles koschde daete? “Es koschdet nix,” saagt der Peter, “mir sin im Himmel.”

Dann sin sie drausse gange un datt waar en Championship Golf Course. Sie daerfe Golf jeder Daag schpiele. Der alde Mann hot der Pater gfroogt, “Was koschdet die Green’s Fees?” Der Peter saagt, “Mir sin im Himmel, du musscht net bezaahle um zu schpiele.”

Dann sin sie in es Clubhouse gange un es hot en iwwermaessiche Buffet mit Esse vun der ganze Welt gewwe. “Wie viel zu esse?” froogt der alde Mann. “Fer was kannscht du sell net verschteh? Des iss Himmel, alles iss frei!” hot der Peter mit glee bissel Aeryenis gsaat. “Well, wu sin die Low Fat un Low Cholesterol Dische?” hot der alde Mann schichderlich gfroogt.

Der Peter saagt, “Sell iss die beschde Schtick….du kannscht so viel wie du witt un was ewwer du witt esse. Du waerrscht nimmi dick sei un du waerrscht nimmi grank sei. Des iss Himmel.”

Mit sell, der alde Mann iss ausgeflippt, er hot sei Hut nunner gschmisse un hot uff es gchumpt, der hot wie en Wilde gegrische. Der Peter un sei Fraa hot browiert ihn zu ruhiche. Sie hen ihn gfroogt was letz waar. Der alde Mann hot zu seinre Fraa geguckt un hot gsaat, “Des iss all dei Fehler. Wann es net fer dei verdammte Bran Muffins waerre, kennt ich do schunn 10 Yaahre zerick gewest sei!”

Ya, Esse. So en wichdige Schtick in unsere Lewe.

Ich lieb zu koche. Zidder ich en yunge Bu waar, hawwich gegliche Esse zu koche. Ich hab so viel Cooking Shows wie meeglich gsehne. Ich hab gewollt allsfatt eppes Neies lanne. Aa, bin ich en A1 Type Personality. Alles muss geplannt sei un alles muss ausgelget sei. Ich gleich Iwwerraschinge gaar net. A1 Personalities gehe gut mit koche. En guder Koch rischdet achtsammlich en Iems. Ingredients misse gekaaft sei, Gaardesache misse gschnitte un ghackt sei, un dann endlich iss en Iems zammegebracht. Viel hatte Arewet un Liewe gehne in selle Process. Ass der Koch, wisse mir, as mir welle all die Leit die uff em Disch sin, unser Iems zu gleiche.

Ass ich vorher gsaat hab, ich lieb zu koche. Mei yingere Bruder, uff die annere Hand, gleicht es net. Er gleicht uff em Disch zu hocke un zu esse was ewwer zu ihm gewwe iss. Sell ermaahnt mich an die Gschicht vun der Maria un der Martha. Die Martha hot gewisst ass sie viel zu duh hot um en Iems fer unser Herr zu rischde. Sell iss ken gleenes Ding. Kannscht du vorschtelle: Yesus kummt zu deinre Dier un saagt: “Ich gleich bleiwe fer Owedesse.” Was waerr darrich der Kopp geh? Aerschd: was waerr ich koche? Daet der Yesus gude Deitsche Koche gleiche? Daet er Seimaage odder Bot Boi gleiche? Daet der Yesus Pannhaas esse? Die grossere Froog iss, was daet er uff es esse, Ketchup odder Syrup? Paerseehnlich, denk ich ass der Yesus en Ketchupman iss.  Wann der Yesus fer Owedesse kummt, meh as Esse daete uff dei Meind sei. Du waerrscht die gute Deller un Kuppche rausbringe. Es Dischduch muss sauwer un gebiggelt sei. Es Haus muss gefegt un abgewischt sei. Dei Ziel waerr die beschde Iems un Erfaahring meeglich gewwe. Ich mehn, kumm mol, sis’ Yesus! Un all sell iss arrig viel Arewet.

Ich kann arrig gut mit der Martha haersaage. Ich waerr aa in en Frenzy sei um die beschde Iems mit am greeschde Summ vun Liewe meeglich zu rischde. Un ich bin sicher ass ich aa bees sei waerr mit der Maria. Sie waar datt yuscht am hocke, un net am helfe.  ‘Sis leicht fer uns sellre Gschicht haerzusaage. Uns Deitsche sin fer unsere hattschaffigkeit gut gekannt. Mir eschtimere harte Arewet un richde Leit bei was sie duhne, un net bei wie viel Geld sie hen. Fer mich, een vun die heechschde Kambliments iss, “er iss en hattschafficher Kall.” So widder, dreh ich zu der Martha. Datt iss sie, in der Kich, hatt am schaffe um en Iems fer ihr Herr zu rischde.

Awwer was saagt Yesus am End der Gschicht? Gebt ihm Lob an der Martha fer ihr hatte Arewet? Nee, er lobt die Maria. Yesus saagt, “Yuscht ee paar Dinge sin gebraucht – gewiss yuscht eens.” Wie dabber daete mir as die Martha behave? Wie viel un uns daete duhe was die Maria geduh hot? Ich weess, ass ich frieher gsaat hab, waerr ich die Martha sei.  Awwer mir misse nimmi die Wichdigkeit verliere vun was der Maria aa geduh hot.

Yesus saagt, “Gewiss, yuscht ee Ding iss gebraucht.” Browier mol dei deitschi Grossmudder uff em Danksfescht odder Grischtdaag, odder bei en Samschdaag Familye Owed zu saage: “Gramem, kocht yuscht ee Ding!” Datt geht unsere siwwe Sieese un siwwe Sauere graad aus em Fenschder. Mei Grossmudder waerr en Hannschlack hawwe, wann es yuscht ee Ding uff em Disch gewwe. Awwer schwetzt Yesus warricklich iwwer yuscht ee Esse Ding? Nee, er schwetzt iwwer Liewe. Un Liewe soll allsfatt die Main Ingredient bei yeder Iems sei. Esse iss mit Liewe gerischdet, un yede gute Iems, regardless vun dem Gschmack, iss mit Liewe bei dem Disch gedeelt. Denk zerick zu deinre Familye Versammlinge. In die End, macht es warricklich aus was uff em Disch iss odder wer am Disch iss? Ich kann 5 Schtunn in die Kich verbringe um en grosse Iems zu koche, un selle Iems waerre in 30 Minudde gesse. Awwer selle 30 Minudde sin wichdiger ass die 5 Schtunn es hot genumme um alles zu rischde. In die End, was iss wichdiger uff dei Familyedisch, es physical Esse odder es geistliche Esse?

Unseres Land iss in Druwwel. Es gebt viele Brobleme heitzudaage. In Blatz vun Hass, brauche mir meh Liewe un Mitleid. Mir misse mitenanner schwetze un vun enanner lanne. Ich bed fer unseres Land un unser Volk awwer mir kenne es net lehnich duhe, mir brauche dem Gott sei Helfe.

Yesus ermaahnt uns so gut mit der Gschicht vun Martha und Maria as aaheere mit enanner un mit enanner zammezukumme iss was wichdig iss. Ich waerr aushalde koche zu liewe. Un ich waerr frehlich Iems fer mei Familye rischde. Awwer ich waerr aa drachde die Zeit an der Disch zu gleiche, Gschichte zu heere, Witze zu verzaehle un die Leit um mei Disch zu liewe.

Yesus laadt uns zu seinem Disch yeder Daag ei. Geh datt mit me leere Bauch un geh fatt mit me volle Hatz. Sei wie die Maria un zeig mol Liewe.

Amen.  

Do iss en Audio Klip: 

 

Published in: on 22/07/2016 at 07:58  Comments (3)  

Dem Mann sei beschde Freind!

Guder Daag Blog Leser! As viel vun eich schunn wisst, bin ich uff en Bauerei uffgwaxe. Nadierlich hemmer allsfatt en Hund ghatt. En Bauerei mitaus en Hund iss ken Bauerei! Dann bin ich fattgange um uff der College zu geh. Fer vier Yaahre hawwich ken Hund in mei Lewe ghatt. Dann wann ich faddich mit re Lanning waar, hawwich widder en Hund grickt, en Golden Retriever mit dem Naame, Sadie. Sie waar en arrig guder Hund, siess, ruhich un liebvoll. As sie gschtarewe iss, bin ich viele Yaahre mitaus en Hund gewest.

Im Yaahr 2010 bin ich gheiert un hab en Haus kaaft. Die Yaahre sin zimmlich schtarrig vorbei geloffe. Dann sin mei zwee Kinner kumme. Un widder sin die Yaahre vorbeigange. Ich muss ehrlich saage, es Lewe waar so busy, ass ich zu mir selwert gsaat hab, mir hen ken Zeit fer en Hund. Ich kann net glaawe ass ich so gedenkt hab. Fer es letschde Yaahr odder so, mei Dochder hot alle Owed fer en Hundli gebetet. Ich hab gewusst ass es Zeit waar widder en Hund zu hawwe.

Fer die letschde paar Woch bin ich im Internet gange um en Hundli zu finne. Es Broblem iss ass nau ass ich elder bin, hawwich Allergies gege Pet Dander. Ich weess net ferwas, awwer so iss es. ‘Sis so schlimm, ass ich net in en Haus gehe kann wann sie en Katz hen. So ich hab gemisst en Hypoallergenic Hund zu finne. Es gebt ee Paar Breeds die so sin. Ich hab aa gewollt en grosse Hund, ich gleich sie viel besser as gleene Hunde. Zum Glick hawwich mei Research geduh un en guder Breed gefunne: en Standard Poodle, odder as sie in Hochdeitsch saage: en Keenichspudel.

Endlich geschder sin mei Dochder ihre Bede geantwattet. Mir hen en Breeder in Clearfield Kaunty gfunne die Hundli hot. Mir sin een un en halb Schtunn gefaahre um unser neie Freind zu griege. Mir hen mei Dochder vollig iwwerascht ass sie heem vun der Day Care kumme iss.

Nau hemmer der Klang vun vier haarige Dobe im Haus, un so siess en Klang iss es. En Haus mitaus en Hund iss net so vollschtendich ass en Haus mit en Hund.

IMG_4953

Mei Familye mit unserem neie Hund: der Miles.

Do iss en Audio Klip: 

 

 

Published in: on 09/07/2016 at 06:18  Comments (1)  

Yankee Doodle!

Guder Daag Blog Leser! Ich will mit des aafange: Hallicher Gebottsdaag Amerika! Ya, Mariye iss mei Land 240 Yaahre alt un sie guckt allsfatt nooch yung zu mir. Ich waar die letschde 11 Daage in Deitschland so ‘sis siess widder heem zu sei un zu feiere. Des Woch will ich en katze Poscht schreiwe. Fer ee paar Daage hot en guder Leser mir en EPoscht gschickt. Er hot mich gfroogt Yankee Doodle in Deitsch zu iwwersetze. Weil Mariye der 4. Tschulei iss, find ich sell en gude Idea! So do iss es in Ehre vun Amerika ihr Gebottsdaag:

Yankee Doodle

Yankee Doodle iss zur Schteddel gange,

Reidet uff en Pony,

Hot en Fedder in sei Hut gschteckt

Un hot’s Macaroni genaamt!

Chorus:

Yankee Doodle hald es uff,

Yankee Doodle dandy,

Meind die Myusick un die Schritt,

Un mit de Maedle sei hendich.

Des reimt net so gut uff Deitsch awwer mer kann es ennichau singe! Ich winsch all mei Leser en wunnerbaar 4. Tschulei. Hett viel Gschpass uff eiere Picknicks, esst viel un drinkt ee paar Biere uff dem John Adams, dem Thomas Jefferson, un dem Benjamin Franklin. Sie daete arrig gaarn aa mitdrinke wann es meeglich waar!

Published in: on 03/07/2016 at 05:10  Comments (2)