En Draen Gedicht!

Guder Daag Blog Leser! Des Woch hawwich eppes abbadiches! Ee paar Daage zerick hawwich en EPoscht vun en Fraa grickt. Sie hot mich gsaat ass sie en aldes Gedicht in Deitsch hot. Es waar vun ihrem Gross-grossdaadi in de 1890s gschriwwe. Sie hot mich gfroogt eb ich es Gedicht ins Englisch fer die Familye iwwersetze kennt. Nimmi in ihre Familye kenne Deitsch lese odder schwetze un sie hot mich in Internet gfunne. Nadierlich hawwich YA gsaat!

unnamed

Der Charles un die Pauline uff ihre Hochzich.

Heit will ich (mit ihr Erlaabnis) es Gedicht uff mei Blog poschde. Des iss es aerschdes Mol ass selles Gedicht rausgewwe waerr. Die Familye hot mich selle Information iwwer der Schreiwe gewwe:

Der Charles sein Eldre waare Auswannere aus Deitschland. Sie hen Hochdeitsch net mit de Kinner gschwetzt. Sie hen gewollt ass die Kinner Englisch so schtarrick wie meeglich lanne kennte. Die Familye hot viel Waert uff Lanning un Bicher gschtellt. Die Familye hot Deitsch aa net gschwetzt so der Charles hot gemisst es vun sei Noochbere odder Mitarewere gelannt. Der Charles hot fer der Draen Kumpanie gschafft. Oft hot er gemisst draus vun Pennsylvaania zu reise…abbadich nooch de Mittwescht. Ass er in Wisconsin waar hot er die Pauline gedroffe, un sell waar sell. Er hot sie gheiert un iss in Prentice, Wisconsin gbliwwe.

Der Charles kennt net Deitsch lese so er hot gschriwwe mit ee paar Hochdeitsche Wadde un aa mit viel Englische Ausschlagge. Ich hab es graad vorgedragge wie er es gschriwwe hot. Do iss es Gedicht:

Des faren in der train in Pennsylvania Dutch

(1)

Sis ales hendig eingerecht in unsre gute zeit

Es braucht sich nimand bloge onles er is net sgit

Der Stim dut alles for de leit is ust was ich mehn

Und wan mer ergets hinget so fart nur in der train.

(2)

Es war net so gut for alter zeit des sag ich foner naus

Es macht ferlicht del alte bes doch sag ich frei heraus

Sie sind geloffe al der weg fon funf bis fufst meil

Un far die ebes reicher war sin gange uf die geil.

(3)

Sis net so in unsre zeit fart jeder wan er kan

Und wer gar neme lauft der ist en gentleman

Jetz fart mer in der engine cars es is an eisner gaul

Der snauft und hicts wi anders fie doch siht mer gar kin maul

Er wert nit mich und wan er springt a hunert tozand meil

Doch hat er shon der forzug for aler andre geil.

(4)

Der train is imer zimlig fol mit aler sorte leit

Adel die sind gar heslig dum und andre sing zu sgit

Es gebt uf gebuste gentlest der swarze und der weise

Und ledes fon der rechte sort was sin die doch so neis.

(5)

Der fartz hans hockt in sinen sits sei tiget uf in hut

Er meht er wers gans ale was felt er doch so gut

An pare sist net weit eweg der macht a shon gesicht

Dor dribe ist so a roter kerl guckt grad wie an licht

Und weiter draus ist noch an par uf irem hochzeit trip

Die bleibe a net arig lang do wet ich a ein fib.

(6)

Do ist ein weibsmensh mit irm Kind es grust ihm dul und dab

Die cars get merg wertig Starg was rased is doch der stab

Mer wert fold rick fon kop zu fus mit cole esh un smog

Und ales nimt mer gnedig an for a zimliger gute joge.

(7)

Die train donert durch berg und dahl ein libe lange Stund

Und wans amol durch an tunnel geht dan siht mer gar kin sun

Mer mus a immer entstig sein sie springt ab fon der ban

Oder drift ferlicht ein rinds stick fie was gibts dan deno.

(8)

Dan gibt en wester exedent es ist ales ganz ferkert

Die weibs leit were unmechtig die mans leit sind fer stert

Der engineer blost merderlich der engine det druf los

Das springt sie wie die alte ku was gibt ir dock an stos.

(9)

So en stos der ist mer nit gewusst er makt ein dab und dumb

A del slage berzelbaum und kome net reht rum

Und andre stehn uf hend und fis und halte fest am flor

Und jeder wusst er wer dahehm aus derer gros gefar.

(10)

So geht des faren in der train ich hies es arig schon

Mer grickt ke kop we fon der hitz und a ke steife bek

Mer kauft sie tiget foner naus dan is mer al Ok

Und was is heist Tickets if you please dan reicht mer an ewe hi.

Charles C. Brauch

Mauch Chunk

Carbon Co.

Pa.

Do iss en Audio Klip: 

 

Published in: on 21/05/2016 at 05:47  Leave a Comment  

Mudderdaag!

Heit iss en wichdige Feierdaag…der Mudderdaag. Fer was hen mir selle Feierdaag? Ich glaab des Frooge iss arrig leicht zu antwadde. Die Mudder hen en Daag im Yaahr fer sie weil die annere 364 Daage sin Arewetdaage fer sie. Ich kann ganz sicher saage ass es niemand gebt die so wichdig iss ass dei Mudder….Gell?

Yuscht denk mol was sie alles fer dich gemacht hot! Sie hot dich fer nein Munet lang in ihre Bauch gedraage. Dann hot sie viel Schmatze ghatt um dich in re Welt zu bringe. Dann hot sie die naegschde 18 Yaahre ihre Lewe fer dich gewwe….fellig. Sie hot fer dich gekocht, dei Gleeder gwesche, sie hot dich iwwer all gfaahre um Dinge zu duh. Hot sie eenichmol geglaagt? Mei nicht.

Mudderdaag is nau hatt fer mich. Ich hab mei Mudder in Auguscht 2006 verlore. Sie hot Grebs in ihre Draagsack ghatt. Sie waar bloss fer drei Munet grank bis sie gschtarewe iss. Es macht mich allsfaat bedauerlich wann die Mudderdaag widder rumkumme.

Ich hoff as alle vun eich eppes schee fer dei Mudder heit duh! Nemm sie zu en Essblatz odder koch sie eppes! Un mach fer schurr ass du sie en grosse Boss gebscht!

Published in: on 08/05/2016 at 04:58  Comments (1)