Nau bischt du draa!

Guder Daag Blog Leser! Des Woch hawwich eppes bekannt zu mache. As viel vun eich schunn wisst, alles Yaahr gebt es es gut bekannte Kutzeschteddel Folks Fescht in Tschulei. Un alles Yaahr uff em Fescht gebt es en Schreiwerfescht un en Liegner Contest. Des Yaahr waerre allebeed Dinge widdergschehe. So nau hett dihr die Meeglichkeit eppes uff Deitsch zu schreiwe un vorlese. Do iss die wichdige Information fer allebeed.

Schreiwersfescht: Tschulei 5 um 1:30pm. Des Yaahr iss es 10. Yaehrlichsfescht fer es Schreiwersfescht, sell iss eppes! 10 Yaahre vun arrig gude Schtories, Gedichte, un Witze. Wann du mitmache witt, schreib mol en EPoscht an der Dr. Bill Donner – donner@kutztown.edu mit der Subject: Schreiwersfescht odder mit dem Telephone: 610-972-4976.

Liegner Contest: Es gebt en Liegner Contest zwee Mol des Yaahr uff em Fescht: Tschulei 6 un 9 um 1:30pm.

Un wann dihr net mitmache wollt, dann kennt dihr eefach uff es Fescht kumme. Es Fescht geht vun em 2 bis 10 Tschulei. Do iss en Link fer meh Information: Kutztown Folk Fescht Website. Ich waerr datt sei fer es Schreiwersfescht, vielleicht waerr ich dihr seh!

 

Published in: on 30/04/2016 at 12:03  Comments (2)  

Der Simon Snyder

Des Dinschdaag iss Primary Lecktion Daag do in Pennsylvaania so heit hawwich Bolitiks uff mei Meind. Fer selle Poscht will ich eppes iwwer der Simon Snyder, unser aerschde deitscher Governor, schreiwe.

SimonSnyder

Der Snyder ass Governor

Der Simon Snyder waar uff em 5. November 1759 in Lancaster gebore. Er waar der dritte Governor vun Pennsylvaania un hot drei Terms vun 1808 bis 1817 ausgedient. Er waar en Jeffersonian-Democrat un hot aa drei Terms as Schwetzer vun dem Pennsyvlaania Haus ausgedient. Eb er in Bolitiks gange iss, waar er en Businessmann. Er waar en Gaerwer un hot aa en Kunnemiehl ghatt.

Sei Friehlewe

Sei Eldere waare der Anton Schneider un die Angesa Krämer (nee Knippenberg) Schneider. Sei Eldere sin nooch Amerikaa im Yaahr 1744 kumme. Im Yaahr 1784, der Snyder iss nooch Selinsgrove gange wu er sei Kunnemiehl ghatt hot. Sei Haus in Selinsgrove (121 Nadd Marktschtross) iss uff der National Register of Historic Places. Nadierlich hot der Snyder yuscht Deitsch mit seinre Eldere gschwetzt.

brewing

Dem Snyder sei Mansion. Heit iss die Selins Grove Brauerei.

Im Yaahr 1790 hot er die Elizabeth Michael gheiert. Zamme hen sie zwee Kinner ghatt. Die Elizabeth iss im Yaahr 1794 gschtarewe. Der Snyder hot gschwind die Catherine Antes im Yaahr 1796 gheiert un zamme hen sie fimf Kinner ghatt.

Zeit ass Governor

Im Yaahr 1808 hot er gege Federalischts gewunne. Mir wisse ass fer viele Deitsche, die Federalischts der Feind waare. Der Snyder hot die Deitsche Schtimme gebraucht un zum Glick hot er zwee Dinge in sei Eck: er waar aa en Deitscher un er waar ken Federalischt. Im Yaahr 1812, der Snyder hot aagerode die Haaptschtadt vun Lancaster nooch Harrisbarrick hiezuziege. Er hot gede

196px-Simon_Snyder_Signature.svg

Sei Unnerschrift

nkt ass Harrisbarrick meh in die Mitt vun Pennsylvaania waar. Die General Assembly hot sei Vorschlack zugschproche. Der Snyder hot der Grieg vun 1812 unnerschtizt. Nooch em Grieg, der Snyder waar besunne ass en Vice-President Kandidaat fer der James Madison, awwer der Snyder hot ‘nee’ zu sell gsaat.

Am End sei Lewe un in de Yaahre schpeeder

Der Snyder iss vun Typhoid Fieber in Selinsgrove uff em 9 November 1819 gschtarewe. Er iss in die Alt Luddrische Karrichhof in Selinsgrove begraabt. Nooch sei Dod sin ee paar Dinge in sei Naame noochgenaamt: Snyder Kaunty, Snyder Avenue in Philadelphia, un Snyder Hall an der Pennsylvania State University.

10611522_119257813165

Sei Graabschtee in Selinsgrove

Do iss en Audio Klip: 

 

Published in: on 23/04/2016 at 07:44  Leave a Comment  

Zwee neie Bicher fer uns!

Guder Daag Blog Leser! Heit will ich eppes mit eich mitdeele. Neilich sin zwee Bicher iwwer Pennsylvaanisch Deitsch un die Deitsche Leit rauskumme. Dihr kennt allebeed im Internet kaafe….wie alles! Heit will ich eich die Links gewwe um sie zu kaafe un en katze iwwerblick fer die zwee Bicher.

5149auPeQrL._SX331_BO1,204,203,200_

 

Pennsylvania Dutch: The Study of an American Language vun dem Dr. Mark Louden. Der Louden, en Brofessor in Wisconsin un Schwetzer vun der Mudderschprooch, nooch Yaahre un Yaahre vun Research hot en arrig gudes Tschopp geduh. In meh as 500 Bledder hot der Louden en vollschtendiche Gschicht vun unsre Mudderschprooch gewwe. Er schreibt iwwer die Schprooch un wie es gewaxt hot, unsere Literature, un die wichdige Leit die alles geduh hen. Er schreibt vun unser Blatz in Amerikanische Gschicht aa. Ich hab selles Buch graad faddich gelese, un ich kann ehrlich saage ass es arrig gut iss.

 

978-0-271-07118-3mdSerious Nonsense: Groundhog Lodges, Versammlinge, and Pennsylvania German Heritage vun dem Dr. William Donner. Der Donner, en Brofessor in Kutzeschteddel, PA, hot viel Research geduh iwwer wie mer uns zammekumme. Es Buch gebt der Leser en Blick in unsere Kuldur die die Tourists nimmi sehne. Es Buch saagt vun Versammlinge un Grundsau Lodges un wie sie in de 1930s aagfange hen. Es Buch schwetzt iwwer unsere Identity un wie unser Identity vielleicht in die Zukunft ennere waerr.

Sei so gut un klick mol uff die Links um meh iwwer die Bicher zu lanne. ‘Sis allsfatt gut wann Leit iwwer uns, unsere Kuldur, un unsere scheeni Schprooch schreiwe. Ich waerr aa saage: “Gut geduh Mark un Bill! Un gross Dank fer dei Arewet!”

 

 

Published in: on 09/04/2016 at 07:06  Comments (1)  

77th Barricks Kaunty Versommling!

Guder Daag Blog Leser! Alle Yaahr uff em Oschdermundaag feiere die Deitsche Leit in Barricks Kaunty, Pennsylvaania ihre Versommling. Ich bin en Barricks Kaunty Bu, gebore un uffgewaxse, so nadierlich bin ich aa dabei. Wie frieher, hawwich en Video iwwer die Versommling gemacht un do iss en Link fer zu gucke:

77th Barricks Kaunty Versommling

Viel Gschpass bei aagucke!

Published in: on 01/04/2016 at 05:35  Leave a Comment