2016 iss en Schalkyaahr!

Guder Daag Blog Leser! Ya, es Yaahr 2016 iss en Schalkyaahr. Es kummt yuscht ee Mol alle vier Yaahre un es iss widder do. Fer des Blog Poscht hawwich gewollt eppes iwwer der 29. Hanning zu schreiwe. Was iss alles uff sellem Daag bassiert? Do iss en katze Lischt vun wichdige Events uff em 29. Hanning:

1. 1504 – Der Christopher Columbus yuust sei Wissenschaft vun en Finschderniss am Mond selle Owed um die Insching zu iwwerweise  ihm Dinge zu gewwe.

2. 1796 – Der Jay Treaty gschwischich Amerikaa un England bringt zehe friedliche Yaahre gschiwischich die zwee Lenner.

3. 1916 – In Sudd Carolina, Kinner yinger as 14 Yaahre alt daerfe net meh in die Factories schaffe. Bevor waar es 12 Yaahre alt.

4. 1940 – Fer ihr Roll ass Mammy in “Gone with the Wind”, die Hattie McDaniel iss die aerschde Afrikan-Amerikaanerin um en Academy Award zu gewinne.

5. 1988 – Sudd Afrikaaner Archbischoff Desmond Tutu iss in Bressen gschickt mit 100 annere Paare darich en 5 Daage Anti-Apartheid Demonstration in Cape Town.

6. 1996 – Faucett Flight 251 iss in die Andes runnerkumme, all 123 Leit uff em Luftschiff sin gschtarewe.

Do iss en Lischt vun de wichtige Leit die sin am 29. Hanning gebore:

Baapscht Paul III (1468), Ann Lee, die Grinderin vun de Shakers (1736), Jimmy Dorsey, gut bekannte Musiker (1904), un die Dinah Shore, Saenger un Actress (1916).

Es gebt nix abbadiches fer der 29. Hanning in unser Deitsche Kuldur. ‘Sis yuscht en annere Daag im Yaahr. Awwer wie viel vun dihr schunn wisst, do in Amerikaa schtimme mir yede Schalkyaahr en neier Bresident ab…un so duhne mir widder des Yaahr in November!

Do iss en Audio Klip: 

 

Published in: on 27/02/2016 at 18:28  Comments (1)  

En Gedicht fer Feldi!

Guder Daag Blog Leser! Well heit iss der Daag fer die Liewe, Feldi. Ya heit iss en Daag der macht viel Mannsleit naerfich. Sie wunnere sich eb sie genug Rose odder Schokolaad gkaaft hen odder net! Fer des Feldi will ich en gut bekanntes Gedicht ins Deitsch iwwersetze. “A Red, Red Rose” waar vun dem Robert Burns in dem 18, Yaahrhunnert gschriwwe. Wann du en Fraa odder Bu des Feldi hot, saag selles Gedicht zu ihne. Vielleicht kannscht du dann en guter langer Boss griege!

En roti, roti Ros

O mei Lieb iss wie en roti, roti Ros

die neilich in Tschunn uffgwelle iss;

O mei Lieb iss wie die Melodie

die siesslich in schtimme gschpielt iss.

So schee bischt du, mei liewes Maedli,

so dief in Lieb bin ich;

un ich waerr dich nooch liewe, mei Lieb,

bis all die Seen uffgedrickelt sin.

Bis all die Seen uffgedrickelt sin, mei Lieb,

un die Schtee schmelse mit der Sunn weck;

ich waerr dich nooch liewe, mei Lieb,

as dem Lewe sei Sand schpringe solle.

Un mach’s gut, mei eegne Lieb!

Un mach’s gut fer ee Zeit!

Un ich waerr widderkumme, mei Lieb,

doch es waerr zeh dausend Meile.

Do iss en Audio Klip: 

Published in: on 14/02/2016 at 08:54  Comments (2)  

Faasnachts Mache!

Guder Daag Blog Leser! Well Dinschdaag iss Faasnachtdaag fer uns Deitsche. Un sell bringt nadierlich frische Faasnachts! Ich un mei Fraa misse uff Dinschdaag schaffe so mir hen unser Faasnachts heit gemacht. Des Woch will ich en Pickdergschicht Poscht schreiwe. Viel Gschpass bei aagucke un lese!

Ich winsch all vun mei Blog Leser en Hallicher Faasnacht!

Published in: on 06/02/2016 at 13:02  Comments (1)