Grischtdaag un Nei Yaahr Reed!

Guder Daag Blog Leser! Do kummt mei yaehrliche Grischtdaag un Nei Yaahr Reed Video Blog Poscht. Sei so gut un klick mol uff die Link:

Grischtdaag un Nei Yaahr Reed

Ich winsch eich en Hallicher Grischtdaag un en glickliches Nei Yaahr 2016! Mir sehne uns im Nei Yaahr!

Published in: on 22/12/2015 at 09:36  Leave a Comment  

Liewer Belsnickel!

12. Diesember 2015

Liewer Belsnickel,

Wie bischt? Ich hoff as alles gut mit dir iss. Do iss mei Brief an dir fer seller Grischtdaag. Des Yaahr waar ich en arrig guder Bu. Ich hab all mei Rechninge zu rechte Zeit bezaahlt. Ich hab mei Taxes an die IRS  bevor Abrill 15 gschickt. Ich hab im Friehyaahr un in Schpotyaahr abgschtimmt. Ich hab viel Zeit mit meinre Familye gebrocht. Ich waar en guder Mann zu meinre Fraa un en guder Daadi zu mei Kinner gewest. Was meh muss ich duh? Ich weess as normally schreibt yuscht Kinner Briefe an dich awwer ich hab gedenkt as des Yaahr waerr ich es aa duh.

So nau do iss mei Winschlischt:

1 – En neie Motorcycle. Ya, ya, ich weess as ich schunn een hab, awwer zwee in die Gratsch waerre besser. Oh, un nadierlich meech ich en annere BMW hawwe, sei so gut, ken Harley!

2 – En neie Mandolin. Ich kennt arrig scheene Myusick schpiele wann ich en Gibson F Mandolin hett.

Ok. Ich weess es waerr vielleicht hatt die zwee Dinge zu bringe, so vielleicht soll ich en neie Lischt schreiwe. Do iss en Winschlischt fer unsere Welt un unseres Land in Blatz vun yuscht was ich paersehnlich will:

1 – An End zu ISIS un Terrorism. Die Welt braucht Fried. So lang as ISIS am laafe sin, waere es ken Fried gewwe.

2 – An End zu Aarmut. Zu viele Familye lewwe un wuhne mit nix. Viele Kinner griege net genunk Esse un misse in en kaltes Haus schloofe. Bring Tschops un Geld zu de Leit die sie brauche.

3 – En Gfiehl vun Zammeheit in unseres Land. Amerikaa iss gschplitt. Mer iss entwedder Rot odder Bloh. Un mer darf net in de Mitt sei. Ich will en Land hawwe wu Leit mitenanner schwetze kenne. Zamme sin mir greftiger as vunenanner.

Nau datt iss aa en Lischt. Liewer Belsnickel, mach was du kannscht. Un wann mei Lischt zu viel iss, dann bring ich yuscht en Aarensch un ee paar Walniss.

Hallicher Grischtdaag,

Der Doug

Do iss en Audio Klip: 

Published in: on 12/12/2015 at 06:46  Comments (2)  

Die Adventzeit!

Guder Daag Blog Leser! Well ich hoff as alle vun eich en gude Danksfescht ghatt hett. Mei waar gut un nadierlich hawwich zu viel gesse! Alles waar so appeditlich. Dann bin ich in der Busch gange um en Hasch zu schiesse, awwer sell waar nix so gut gange. Ich hab ken gsehne! Nau sin mir schunn in Diesember un sell meehnt as es widder Advent iss.

Der Advent iss die Zeit in em Karrichyaahr bevor dem Grischtdaag. Der Advent iss en Zeit fer die Leit zu rischde un waarde fer em Yesus sei Gebott uff em Grischtdaag. ‘Sis aa em neien Karrichyaahr sei Aafgang.

Die Zeitlaaf kann mit em Adventkalenner gezaehlt. Des iss en Iewing die vun Hochdeitsche Ludderaaner geintroduced waar. Der Advent faangt uff em viert Sunndaag var Diesember 25th aa. Es gebt allsfatt vier Sunndaage in Advent. Viel Leit hen aa en Adventsgranz mit vier burbel Kerze un en rosa Kerz in em Mitt.

In em Latin Schprooch heesst es Adventus, un sell kummt vun em Griesche Watt parousia, sell waar normally fer die Zwette Kumme vun Grischt geyuust. Fer Grischde, der Advent iss en Denkseckli fer allebeed die Waardezeit vun em Hebrews fer es Gebott vun ihrem Erlesser un aa fer die Waardezeit vun Grischde fer em Grischt sei Zerrickkum.

Die Lesungen un die Laerne darich der Advent iss eft uff der Zwette Kumme zu rischde un aa uff der aerschde Kumme vun Grischt aazudenke. Sei aerschde Kumme iss er as Erlesser kumme, un sei zwette Kumme waerd er as Richder kumme.

En dypical Karrichlied fer die Adventzeit is O Kumm O Kumm Emanuel. Ich hab gedenkt es waer schee wann ich die aerschde Vaersch ins Deitsch iwwersetz, so do iss es:

O Kumm O Kumm Emanuel 

Un errede gfangene Israel

Die do drauere in leedmiedichliche Exil

Bis em Gott sei Soh scheint

Frehe! Frehe! Emmanuel

Soll zu dir kumm, O Israel.

Do iss en Audio Klip: 

Published in: on 05/12/2015 at 06:40  Comments (2)