Yaage!

Guder Daag Blog Leser! Well, geschder waar Danksfescht, so nau sin mir voll mit gude Esse un Drinke. Fer viel Deitsche iss Mundaag aa en Feschtdaag. Do in Pennsylvaania iss Mundaag der aerschde Daag fer Hasch yaage mit en Flint. Viel Schule waerre zu un viel Leit waerre net schaffe. In Blatz vun sell, waerre sie ihre aarensch Gleeder aaduhe un in der Busch laafe um en grosse Hasch zu schiesse. Letschde Summer hawwich en Lied fer mei Baend gschriwwe. Es waar iwwer die verschiddliche Yaagezeite do in Pennsylvaania. Heit will ich yuscht die Wadde mit eich deele. Ich hoff as dihr es gut finne waerrt. Viel Gschpass bei lese!

Yaage

1. Uns Deitsche hen en Tradition,

‘Sis kummt vun dem alde Heemet schunn.

Mir gehne draus un suche,

wilde Fleesch zu schiesse.

Chours:

‘Sis widder Zeit zu yaage,

wann ich un mei Flint geh laafe.

Uff gegleedert in aarensch sei,

so es gebt ken letze Schiesserei!

2. Es Yaahr fangt schunn frieh aa,

wann mir gehne mitaus der Fraa.

Mir gobbele un glucke wie en Narr,

yuscht fer en Welschhinkel mit en Bart. – Chorus

3. Oktower kummt, en scheeni Zeit,

Dann suche mir weit un breit.

Mit unserem Hund am schpringe,

Haase un Pheasants zu finne. – Chorus

4. Am End es Yaahr kummt der Hasch,

‘sis kalt un schneeig im Busch.

Mir hocke uns in Beem un denke,

un wann es ken gebt, dann mir drinke. – Chorus

Wann dihr aa in der Busch am Mundaag geht, winsch ich eich viel Glick! Schiess en grosse!

Do iss en Audio Klip: 

Published in: on 27/11/2015 at 14:37  Comments (1)  

En Gebet fer Paris un unsere Welt.

Guder Daag Blog Leser. Heit iss Sunndaag un as viel vun eich schunn wisst, waar es en schreckliche Wochend in Europe un abbadich in Paris, Frankreich. Uff em Freidaagowed hot die ISIS widder en Aagriff uff umschuldiche Leit geduh. Meh as 120 Leit sin gschtarewe, vun Bombe un Schiesserei. Gschichte in die News heitzudaage kumme zu oft var. Zidder 2001 iss soddiche Gschichte en Schtick vun unsere Welt, bedrauerlichewees. All zu oft iss es hatt die richdige Wadde zu finne un zu saage. Was kann mer saage? Was soll mer saage? In soddiche Situations dreh ich mich widder an mei Gott um Antwatte zu griege. Ich weess as der Gott net directe Antwatte gewwe waerr, awwer ich kann ihn frooge. Heit geb ich eich en Gebet fer Fried in unsere Welt. Hass un Retaliation sin aa net die Antwatt. Mir gucke fer der Daag wann Fried un Lieb endlich uff re ganze Welt kumme kann. Do is en katze Gebet fer Fried:

Gnaediche Gott,

Mir bede fer Fried in unsere Welt seller Daag. Mir gewwe zu dir all wer schaffe fer Fried un en End zu Terrorism, un die wer schaffe um Recht un Gerechtigkeit uffzuhalde.

Mir bede fer en End zu Bang, fer Dreeschde un Unnerschtitzing an all wer erleide. Fer Schtill in unsere Schtroosse un Schtedde, so Leit in Sicherheit un Fried lewe daerfe.

Bring Ruh un Fried in all die Hatze vun de Leit in Paris des Daag. In dei Baremhatzichkeit, heer unsere Gebede nau un allsfat. Amen.

CTukshqVEAAZdHX

Published in: on 15/11/2015 at 08:07  Comments (2)  

Yaage in Pennsylvaania – en Aadenke!

Guder Daag Blog Leser! Eb ee paar Woch hawwich en Blog Poscht iwwer Schpotyaahr gschriwwe. Der naegschde Daag hawwich en E-Poscht grickt vun epper der sei Schpotyaahr Gschichte mit mir deele gewollt hot. Sei Gschicht iss aa aus dem Pennsylvaanisch Deitschland kumme. Ich hab ihn gfroogt eb ich sei Gschicht mit eich deele kennt. Zum Glick hot er ya gsaat. So do iss dem Jake sei Schpotyaahr Aadenke:

Ich hab dei Blog iwwer Schpotyaahr arrig gut gegliche. Es hot mich uff mei Kindheit in Pennsylvaania aageheemelt. Yaage mit meim Daadi iss mei bescht Aadenke. Er waar en “crack” Schiesser. Ee Yaahr, wann mer 12 Ringnecks schiesse darf, hot er sei 12 grickt mit yuscht 12 Schitze. Endlich as ich baut 16 Yaahre alt waar, kennt ich so gut wie ihn schiesse. Ich kann die Geruche vun dem Busch un die Felder noch gut erinnere.

Mei Bruder un ich hen oft gsaat ass der Daadi yuscht en “Fleesch Yaeger” waar. Wann der Daag vorbei waar, un mir waare allsfatt nooch im Feld, daet der Daadi en Hinkel schiesse wann “die Sunn in sei Aaage waar.” Ee Daag, wann ich net mitgeyaagt hab, hawwich ihn gsehne mit en Game Warden am schwetze. Henkel Fedder hen vun sei Wammes rausgschteckt awwer der Warden hot sie net gsehne!

Ee Yaahr sin mir nooch Wyoming gange um Mule Hasch zu yaage. Mir hen der Daadi die Ehre gewwe die aerschde Schitz zu nemme. Mir hen en scheene grosse Hasch gsehne un er hot gschosse. Der Hasch iss weggschprunge un mir hen viel gelacht. Nadierlich hemmer gedreht sei Hemmerschwanz abzuschneide. Ich hab die annere Leit gsaat ass ich der Hasch nooch dem Schitz net gsehne hab. So mir hen ihn gsucht un ya, mir hen ihn gfunne, graad wu der Daadi ihn zu letscht gsehne hot. Der Daadi hot ihn graad gschwichich die Aaage gschosse!

Der Daadi waar en Mitglieder vun en Lager in Nadd-Barricks Kaunty. Der Lager waar newwich ee paar alde Deitsche Bauereie. Ee Mariye waare mir mit en Bauer datt am schwetze. As mir am schwetze waar, hemmer ee paar Hasche gsehne. Der Daadi hot sei Flint gnumme un iss weckgschprunge. Ya, er hot widder en scheener Hasch gschosse. Er hot allsfatt arrig viel Glick bei Yaage ghatt.

Heitzudaag kenne mir wilde Pheasants net meh in Pennsylvaania yaage. Mer kann sie net meh finne. Vielleicht hot es eppes zu duh mit all die Chemicals ass die Bauere yuuse, wennicher Bauerland, ken meh Fensleine, un all die neie Heiser die in die letschde paar Yaahre gebaut waar etc. etc.

Nau wuhn ich in Tennessee. Nadierlich yaage mir aa do, awwer ‘sis net wie es in PA waar. Ich vermiss selle gude alde Zeite arrig viel. – Der Jake

Gross Dank Jake fer dei Gschicht. Ich bin aa oft mit meim Daadi, Grossdaadi un Bruder geyaagt. Die sin aa arrig wichdig Aadenke fer mich.

Do iss en Audio Klip: Yaage im Schpotyaahr

Published in: on 07/11/2015 at 08:07  Leave a Comment