Schpuckowed

Guder Daag Blog Leser! Well, heit iss der Schpuckowed. Do in Amerikaa gehne die Kinner vun een Haus zu en anner in en Koschtum. Sie suche Kandy un Schokolaad un saage “Trick or Treat.” Des iss aa der Owed vun Schpucke un Hexe. Viel Leit glaawe as denowed die Dode zerickkumme kenne un uns bsuche. Ich hab gedenkt fer heit en alde Deitsche Gedicht waerr gut. So do iss en Gedicht vun der Louise Weitzel. Viel Gschpass bei lese!

Schpuck

Ebmols kann ich net schlofe,

Un ich winsch, ich haett en Licht.

Es guckt ee wennich schpuckich,

un ich mehn, ich seh en Gsicht.

Die Schadde sin so zackich,

un grinsich in der Eck,

un ich drick hatt die Aage zu,

un winsch sie waerre weg.

Wann der Mond scheint darrich die Fenschder,

un ganz dunkel iss es net,

mehn ich ebmols, ass eppes schteht,

yuscht newwich an meim Bett.

Die Mammi saagt, ‘sis Dummheit,

wann ich waer en guder Bu,

daet mich in der Nacht nix baddere,

un schteere in der Ruh. 

Der Daadi dutt yuscht lache,

saagt, es gebt nix in der Nacht,

ixcept die Boi un Kuche,

ass mich ebmols wackrich macht.

Ich winsch all mei Blog Leser en Hallicher Schpuckowed. Ich hoff as eich viel Kandi grickt!

Published in: on 31/10/2015 at 14:30  Comments (5)  

Pennsylvanisch Deitsch: En Documentary

Guder Daag Blog Leser! Heit hawwich eppes abbadiches mit eich zu deele. Mei guter Freind, der Michael Werner, unser liewer Hiwwe wie Driwwe Mann, hot en neie Documentary Film gemacht as er do in Pennsylvania im Schpotyaahr 2014 waar. Der Film iss baut 30 Minudde un alles iss uff Deitsch. Do iss en Link zu der Video:

PA Deitsch: En Documentation

Viel Gschpass bei gucke!

Published in: on 17/10/2015 at 06:26  Comments (5)  

Schpotyaahr iss nau do bei mir!

Geschder bin ich uffwacker, un es waar mir glee bissel kiehl im Haus. Ich bin nausgange fer meie Zeiding zu griege, un ich hab Acht uff  de Bledder ghatt. Sie waare rot, gehl un aarensch. Sell muss schunn Schpotyaahr sei. Ich gleich Schpotyaahr arrig viel. Ich weess net ob es mei Leiblingsyaahreszeit is odder net, awwer ich gleich es.

In em Nummidaag hawwich viel draus in mei Hof geduh. Ich hab mei Graas gemaeht. Ich hoff as sell waar die letschde Mol fer es Yaahr, awwer yuscht mol sehne! Nooch em Graasmaehe, hab ich Bledder vun meine Maebel- un Eechebaam uffgepickt. Es hot net so viel gewwe…die Beem sin nooch voll, awwer ee paar sin schunn nunnerkumme. As ich mit de Bledder am schaffe waar, hawwich die sunderbaare Geruch groche. Die Bledder in Schpotyaahr hen ihr eegne Geruch…un es is siess zu meinre Naas.

As ich faddig mit meine Bledder waar, hawwich in im Blummeland geschafft. Ich hab vier Grisanthymums gkaaft. Die waare arrig voll mit Blumme un sie waare so farewevoll. Ich hab die newwe em Haus geblanst. Ich hab aa ee paar Dullebaane, Oschderblumme un Krokuses geblanst. Ich hoff as die in Friehyaahr uffkumme! Yuscht mol sehne!

Schpotyaahr is aa die Zeit fer Ebbel, Ebbelseider un Karebse. Kiehler Owede un sonnige Daage…die sin so schee, Gell? Nau is aa die Zeit fer die Kinner uff ihre Spuckowed Koschtume zu denke. Ich hab aa en Idea ghatt fer Spuckowed. Ich waerr meh iwwer sell schpaeder schreiwe. Ich hoff as alle vun eich aa Schpotyaahr gaarn hawwe. Schreib mich en Comment un loss mich mol wisse fer was dihr Schpotyaahr gleicht!

Un nooch eppes: Letschde Woch is alles uff meinre Hochzich gut glaafe! Es Wedder waar wunnerbaar un mir hen ken Probleme ghatt!

Do is en Audioklip: Es muss Schpotyaar sei!

Published in: on 11/10/2015 at 06:41  Comments (4)