Des iss meim Daadi sei Welt!

Guder Daag Blog Leser! Ich bin net Gadolisch awwer wann der Baapscht, der Francis, eppes saagt, normally heer ich vun sell. Frieher im Yaahr hot der Francis gsaat as der 1. September soll en Daag vun Bede fer Achtgewwe vun der Erschaffing sei. Ich denk as unsere Welt braucht viel Bede. Mir, as Mensche, sin net allsfatt die beschde Achtgewwer fer unsre Aerd. Awwer ich muss saage as uns Deitsche sin vielleicht glee bissel besser Achtgewwer as annere Druppe vun Leit. Viele vun uns sin Bauere. Die Bauere wisse wie wichdig die Gsundheit vun der Aerd iss. Awwer, drauerlich, gebt es viele viele Leit die net gut Achtgewwer sin. Die grosse Eel Kumpanis mache viel Dreck uff em Grund un unnich em Grund. Oft schmeisse Leit Chemicals in unsere Rewwers un in die Oceans. Es gebt yuscht ee Welt, mir misse besser achtgewwe. So ich saag YA zu dem Baapscht sei Aaruf fer Bede.

Es gebt en arrig gut bekanntes Lied, es heescht “Sell iss meim Daadi sei Welt.” Vielleicht kennt dihr des Lied schunn. Es schwetzt vun unsere Welt un wie mir uff es Lewe solle. Ich hab gedenkt as in Ehr vun Dinschdaag un der Daag vun Bede fer Achtgewwe vun der Erschaffing, waerr ich selles Lied ins Deitsch iwwersetze.

Des iss meim Daadi sei Welt – vun dem Maltbie Babcock, 1901

Des iss meim Daadi sei Welt,

un zu mei heeriche Ohre,

All Nadur singt, un um mich ringt

Die Myusick vun de Spheres.

Des iss meim Daadi sei Welt:

Ich ruhg mich in es Gedenk

Vun Schtee un Beem, vun Himmel un See;

Sei Hend die Wunner hen gschafft.

————————————————

Des iss meim Daadi sei Welt,

Die Veggel ihre Lieder nuffmache,

Es Mariyelicht, die Moiblumm weiss,

Saage ihre Macher sei Lob.

Des iss meim Daadi sei Welt:

Er scheint in all was schee iss;

In dem rapplene Graass, ich heer ihm vorbeigeh;

Er schwetzt zu mir iwwerall.

———————————————-

Des iss meim Daadi sei Welt.

O, loss mich nimme vergesse,

Es Gedenk vun Letz iss oft arrig schtarrick,

Der Gott iss nooch der Herrscher.

Des iss meim Daadi sei Welt:

Ferwas soll mei Hatz drauerich sei?

Der Herr iss Keenich; loss die Himmel ringe!

Der Gott regiert; loss die Aerd froh sei!

———————————————-

Do iss en Link fer die Melodie vun sellem Lied zu heere: Des iss meim Daadi sei Welt

Ich hoff as uff em Dinschdaag dihr aa kennt ee paar Minudde nemme um uff unsere Aerd zu denke un bede.

Do iss en Audio Klip: Sell iss meim Daadi sei Welt

Published in: on 30/08/2015 at 12:11  Leave a Comment  

En neies Schulyaahr!

Guder Daag Blog Leser! Well ‘sis em Aaguscht sei End un dihr wisst was sell mehnt: es Schulyaahr muss widder aafange. Ya fer viele Kinner in Amerikaa naegschde Woch iss die letschde Woch vun Freiheit! Dann misse sie widder in die Schul geh um viel zu lanne un uff die grosse Standardized Tests sich uffzurischde. Ya, ken meh Zeit fer schwimme oder Schports zu schpiele. Nau misse sie widder in en Schreibdisch hocke un lese un schreiwe.

Fer mich iss es aa en neier Aafang. Des Yaahr waerr mei 14. Yaahr as Schulmeeschder sei. Ich kann nooch gut errinnere uff mei aerschdes Yaahr. Ich waar glee bissel naerfich awwer ich hab gedenkt as ich die Welt ennere kennt. Ich hab gedenkt as mei Schtudente arrig gscheit un hattschaffig sei waerre. Mann hawwich en rilpsiche Uffwacke grickt! Es aerschde Yaahr waar arrig hatt awwer ich hab viel gelannt. Nau kann ich saage as ich en alde Veteran bin. Un ich bin arrig ready en neies Yaahr widder aazufange. Mol sehne was es Yaahr bringt, awwer ich weess schunn as es waerr viel Arewet, viel Babiere rechtzumache un aa glee bissel Schtress….awwer en Schulmeeschder iss mei Rolle. Ich glaab arrig viel ass des mei Aarufe ins Lewe iss.

Weil es die Zeit iss fer en neies Schulyaahr gewwe ich eich selle alde Gedicht: Schuldaage. Es waar im 1907 vun dem Will Cobb un Gus Edwards gschriwwe. Uff Deitsch reimt es nadierlich net awwer ‘sis doch en scheenes Lied.

Schuldaage

Schuldaage, Schuldaage,

Liewe alde Goldene Regel Daage.

Lese un Schreiwe un Rechle

Gelaernt zu dem Lied vun en Hickeri Schtock.

Du waarscht mei Keenichin in Gadu,

Ich waar dei bleeder, baarfussiger Bu.

Un du hoscht uff mei Daafel gschriwwe, “Ich lieb dich, Joe”

Wann mir yuscht Kinner waare.

Do iss en Audio Klip: Schuldaage

Published in: on 20/08/2015 at 15:17  Leave a Comment  

Ich waar im Guckbax!

Guder Daag Blog Leser! Heit waar ich widder da heem in Barricks Kaunty fer uff der Pennsylvania German Hour Brogramm zu sei. Der Patrick Donmoyer hot mich eigelaade un ich bin frehlich datthiegange! Do iss en Link zu dem Brogramm:

Die Pennsylvania German Hour on BCTV – Aagscht Brogramm

Viel Gschpass bei gucke!

Published in: on 07/08/2015 at 16:44  Comments (2)