Die Penn State University hot en Broblem!

Guder Daag Blog Leser! Heit waar ich am Kaffi drinke un mei Zeiding am lese un ich hab des Gschicht gelese. Ich hab es glee bissel luschdich gfunne un hab gedenkt as ich es fer eich iwwersetze daet. Fer die Leit die net wisse, Penn State University iss die greeschte University in Pennsylvaania. Sie hen baut 40,000 Undergraduates, 20,000 Graduates un meh in ihr World Campus Program. Mer daet denke as sie viele Brobleme hawwe misse mit so viel Leit uff ihr Campus. Awwer selle Woch sin die Schtudente net es Broblem, die Dauwe sin! Do iss en Iwwersetzung vun der Ardickel aus The Centre Daily Times:

Oh Mischt!

Nooch en Wooch mit annere Brobleme uff em Campus un aa en Feier in die Hammond Building, Penn State hot nooch uff en annere Gebei am Mittwoch ghatt zu baddere. Die Nittany Parking Deck hot en Schild: “Parkblatz iss zu.” So was waar letz? Schlechte Macadam? Hochwasser?

Nee, Dauwe.

Wann Veggel vun de gleiche Fedder zamme scheisse, kann sell en grosse Broblem mache.

Die Susan Bedsworth vun dem Office of Physical Plant (OPP) hot gsaat: “‘Sis net so schlimm wie en Alfred Hitchcock Movie, awwer die Veggel hen so viel Mischt gemacht as mir es Parkblatz zumache misse bis alles sauwer gemacht iss.”

Die Bedsworth hot gsaat as Parking Officials hen Servpro die Tschopp gewwe all die Dauwe Mischt weckzunemme. “Ich glaab es waerr zu bleiwe bis alles widder besser iss,” hot sie gsaat.

Die University waerr aa en Pest Management Company, Orkin, die Tschopp gewwe, um so en annere Broblem net in die Zukunft bassiere waerr.

Des iss net es aerschdes Mol as die Penn State Brobleme mit Veggel ghatt hot. Ee paar Yaahre zerick dausende vun Grappe hen uff em Shortlidge Schtross in de Beem ghockt. Sie hen aa en “Unsanitary Situation” gemacht.

Hoffetlich kenne die Leit an PSU es Broblem verbessere. Dauwe sin net so gross awwer sie kenne viel Mischt mache. ‘Sis allsfatt so, die gleenere es Kind iss, die lauter es iss…….

Do iss en Audio Klip: PSU hot en Broblem

rh=1#storylink=cpy

Published in: on 30/07/2015 at 06:24  Comments (2)  

Mit de Sei saafe!

Guder Daag Blog Leser! Die letschde zwee Woch hawwich luschdige Gschichte mit eich gedeelt. Des Woch hawwich en Gschicht in die Zeiding glese un ich will es mit eich aa deele. Mer waerr denke as des en “Schtorie” iss, awwer es iss warricklich bassiert! Do iss die Gschicht:

‘Ich gleich Sei’: Polis hen nackicher Mann gfunne, saafe in Scheier.

Mittwoch, Tschulei 15, 2015.

Die Associated Press

Millerschteddel, PA. (AP) – Die Polis hen en Mann mit Trespassing, offene Gsoffeheit un Unsittliche Exposchure angschuldigt nooch er uff en Noochbar sei Bauerei gfunne waar, nackich un waar am saafe mit de Sei.

Die Polis in Manor Taunschip, Lengeschder Kaunty, saage as 64 Yaahre Alte, der Larry Henry, hot ihne gsaat, “Ich gleich Sei” ass sie ihm in eener Seischeier gfunne hen uff em 26. Tschunn baut 10:15 am Owed.

Der Henry muss var dem Richter am 4. Auguscht sei. Sei Lawyer hot en Aaruf fer en Comment uff em Mittwoch net zerickgerufe. Die Polisbabiere zeige ass der Henry vun der Scheier schunn vier Yaahre zerick abgedriwwe waar. Eb vier Yaahre waar er aa am trespassing. Die Polis saage as der Henry hot wie Alkohol groche un hot zugewwe ass er en Sechs-Pack vun Bier mit de Sei gedrunke hot. Die Polis saage ass die Bier hot gut gebasst. Der Henry waar Hamm’s Bier am drinke!

Ich hoff die Polis hen aa mit de Sei gschwetzt. Nau was fer en Schtorie iss sell! Yuscht in Pennsylvaanisch Deitschland!

Do iss en Audio Klip: Ich gleich Sei.

Published in: on 18/07/2015 at 06:45  Comments (1)  

En annere Schtorie: “Flache Eppel”

Guder Daag Blog Leser! Letschde Woch hawwich en Schtorie vun dem Kevin Sterner aus Montgomery Kaunty gedruckt. Well er hot mich en zwette “Schtorie” gschickt un es iss zu gut net mit eich zu deele. So do iss dem Kevin sei zwette Schtorie: Flache Eppel.

Flache Eppel

Viele Yaahre zerick hawwich en Eppelbaam ghatt, awwer es hot nie viel Obscht gewwe.  Doch hawwich mei Meindt uffgemacht eppes zu duh.

Aerscht, hawwich die alde Neschtwarrick abgeschnidde, unn ball hen viel nei Nescht vun de Schtumbe aagefange zu waxe, graad unn lang.  Sie hen deel Blumme druff ghatt, unn ich hab paar Eppel grickt, awwer’s waar net genunk.

Ich hab doch deel Fertiliser aagemacht.  Ich hab mit Geilemischt aagefange, mit deel Miracle Grow zammegemischt waar, deel gepulverte Viagra…nee, waart en Minutt…sell waar fer mei Gummere…sell iss en annere Schtorie, ass ich eich en annere Zeit verzehle muss…unn aa en Vaddel Teeleffel Bruumveggelmischt, ass mei guder Freind der Dick Savidge hot mir gerode.

Dann hawwich es uff die Nescht gschmiert, un mit rodi Schnur eigebunne, un hab “Heeli, Heeli, Hinkeldreck” iwwer sie gsaagt.  Well, net lang schpeeder gebt’s so viele Blumme uff die Nescht ass sie graad zammegedrickt waare.  Sie waare so eng gedrickt ass die Ieme kennde net neischaffe fer die Blumme zu beschtawwe.  Sie hen die Blumme mit ihre Schtecker neizuhewwele browiert, awwer sie hen sell net duh kenne.

Doch hawwich mich selwert duh misse.  Ich hab deel Eppelblummestaab gesammelt, un ich hab een vun de Duhhickies grickt, ass sie die verdrehte Grummbiere zu mache yuuse.  Es schnitt en Grummbier in ee groossi Schpeiral.  Ei, es schtellt der “Grumm” in “Grummbier”!  Ich hab des uff die Nescht gschtellt un rum un rum, nuff un runner geduh ass wie’n glee Bluug fer’s Blummestaab zu blantze.

urlWell’s hot recht gut gschafft.  Ich hab so viele Eppel grickt.  Wisst dihr, wann viele Eppel uffem gleich Nascht waxe, griege sie flache Seide wu sie sich gegeseidich beriere?  Well, mei Eppel waare so eng gedrickt iwwer die Nescht ass sie ganz flach waare sinn!

Noh hawwich paar flache Eppel zu mei Freind, der Steve Jobs naus in California gschickt.  Unn sell, liewe deitsche Leit, waar die Aagewwing fer’s Apple iPad.

Flache Eppel!  Sell iss mei Schtori

Do iss en Audio Klip: Flache Eppel

Published in: on 11/07/2015 at 06:01  Comments (4)  

En “Schtorie” fer eich!

Guder Daag Blog Leser! Well des Woch waar der gut bekannte Kutzeschteddel Folk Fescht in Kutzeschteddel, Pennsylvaania. Alle Yaahr hen sie alles mit Deitsche Kuldur un unsre Schprooch zu duh. Fer die Schprooch gebt es zwee grosse Dinge: es Schreiwers Fescht un en Liegner Contest. Des Woch will ich fer eich en Entry vun em Liegner Contest gewwe. Selle “Schtorie” waar vun dem Kevin Sterner verzaehlt. Viel Gschpass bei lese:

Bisskatzemischt Kaffi  

Ich weess net eb dihr devun gheert hedde, awwer’s gebt en Gedier in sudoscht Asien ass en Ziwwetkatz heest.  Es schtellt sich heraus ass wammer zu denne Kaffibuhne fiedere deet, was raus kummt macht es bescht Koppche Kaffi in der Welt.
Nau, yeder epper wunnert sich wie sell am aerscht ausgefunne waar.  Velleicht waar es en Woge.  Awwer was iss hatter auszufiggere iss wie der zwette Kall eigschwetzt waar.  “Nee, ‘siss warricklich gut!  Browwier’s emol!”
Ennihau, es watt en grosses Ding, un heidesdaags bezaahle Leit nuff zum sechs hunnert Daaler fer en Koppche Ziwwetkatze Kaffi.  Wann ich sell gheert hab, hawwich was zu duh gewusst.
Nau, Ziwwetkatze sinn hatt zu finne in Montgomery Kaundi, awwer ich hab glese ass sie zimmlich gleich as Bisskatze sinn, un mir henn blendi vun denne dorum.  Es muss yuscht schaffe.
Doch hawwich paar Bisskatze gfange, unn zu denne Kaffibuhne gfiedert. Ich hab Paar Schtunne gewarte, fer die ihri Bisness zu duh, un hab bissel uffgebraut fer der Kaffi Klatsch am Faulkner Schwamm UCC Karrich.  Ich hab deel Starbucks Babierkoppche grickt, un hab mei Bisskatze Mischt Kaffi unnerzuschiewe browiert.
Well, sell waar net zu gscheidt.  Browiert des NET daheem!  Der Kaffi waar net arrig, unn die elde Weibsleit henn sich net zu viel begraemt.  Awwer loss mich eich saage, eenich Bisskatze Schtink ass ins Maul kummt, muss endlich vum hinnerscht End rauskumme.
Fer zwee Woche hawwich nix als Tamattensaft gedrunke misse.  Em Dockder sei Ordning.  All recht, es waar warricklich en “restraining order”, awwer doch.
Noh binnich nimmimeh en Geizhals gwest.  Ich hab Paar waahrliche Ziwwetkatze kaaft, unn hab waahrlich Ziwwetkatze Kaffi zu mache aagfange.  Es waar en gross Glick, SO gut der Kaffi waar.  Loss mich eich saage, es gebt ken Ersatz fer en Ziwwetkatz.
Awwer ich hab ken sechs hunnert Daaler fer en Koppche verlange kenne deet, ass ich hett niemand was es waar verzehle kenne. Noh hawwich gedenkt, was annere Esssache besser watt, wann’s darrich en Ziwwetkatz geht?
Well, Yudekasche henn recht gut gschafft, awwer yeder epper henn gedenkt ass mei Yudekaschebois Melassichriwwelbois waar.  Abbadich die Micke!  Losst uns nix iwwer die Schnitz unn Knepp schwetze.  Gewiss net die Seimaage.  Abbadich net der Pannhaus!
Der Sauerkraut, nau, sell hot am Bescht gschafft, ass es bissel schtinkich iss ennihau.  Die Ziwwetkatze kenne arrig viel Sauerkraut fresse, unn sie gleiche es recht gut, doch bin ich Sauerkraut wie en Narrischer am Eikanne.
So wann dihr darrich Montgomery Kaundi faahre deetet, unn en Zeiche fer en Karrich Iems mit Seifleesch un Sauerkraut sehne deetet, kummt dihr rei un browiert es!  Awwer wann dihr vorbei faahre deetet, macht eire Maschienefenschdre uffgerollt!
Sell waar arrig gut gschriwwe Kevin! Ich weess net was die Liege sin un was die Waahrheet iss!
Do iss en Audio Klip: En Schtorie
Published in: on 03/07/2015 at 14:22  Comments (1)