Pennyslvaania en Reesziel fer Hochdeitsche?

Guder Daag Blog Leser! Des Woch hawwich en Nei-ichkeede Gschicht im Guckbax gsehne. Die Poconos (en Gegend in Nadd-Oscht Pennsylvaania) hen en Blann. Sie wolle Hochdeitsche Leit eilaade. Die Idea iss ass die Poconos en Reesziel fer Hochdeitsche sette sei. Die Commercial saagt as es gebt viel in de Barriye zu duh, viel in de gleene Schteddel zu seh un viel zu erfaahre. Die Commerical waar alles uff Hochdeitsch gemacht un waerr in Hochdeitsche Guckbaxe schpiele.

Do iss en Link zu der Commercial: Die Poconos Commercial

Ich finn des en arrig guti Idea. Awwer ich hab en bessere Idea. Ich denk as Pennsylvaanisch Deitschland soll aa so en Commercial mache. Unser Gegend iss fer schurr en Reesziel fer Hochdeitsche! Denk mol nooch: es gebt unser Schprooch, alde Esse vun dem alde Land, alde Architechture un aa unsere Deitsche Kuldur! Hochdeitsche kenne do kumme um vielleicht alde Freindschaft zu finne. Sie kenne iwwer uns lanne. Pennsylvaanisch Deitschland guckt viel wie der Palz aus, die Hochdeitsche waerre da heem fiehle.

Die Pennsylvaanische Regiering iss arrig dumm wann sie so was net duht. Ich hab oft vun Hochdeitsche im Internet gheert die nooch Pennsylvaania reese wolle. Viel devun sin schunn dohie kumme. Wann sie mich zum aerschde Mol schreiwe, geb ich sie viel Bletze zu seh. Sie sin allsfatt eiferich dohie zu kumme, unsere Schprooch zu heere, die Hex Signs zu seh, Amisch Leit zu dreffe unser Esse zu browiere. Ich denk as mir hocke uns uff en Goldgrube!

Viele Amerikaaner fliege nooch Deitschland um es Land vun ihre Voreldre zu seh. Mir fliege datt un gewwe viel Geld aus. Mir bleiwe in Hotels, esse in Essbletz, kaafe Souveniers un so weider. Die Hochdeitsche waerre so was aa do duhne wann sie kumme!

Was denkt dihr? Soll Pennsylvaanisch Deitschland so was mache? Solle mir Pennsylvaanisch Deitschland en Reesziel fer Hochdeitsche mache? Ich saag YA!

Do iss en Audio Klip: PA as en Reesziel

Published in: on 29/05/2015 at 15:36  Comments (7)  

Schparregraas!

Guder Daag Blog Leser! As viel vun eich schunn wisst, alle Yaahr blans ich en Gaarde. En Lewe mitaus frische Gaardesach iss ken Lewe! Well nau iss Moi schunn vorbei un ich hab es aerschdes Ding vun meim Gaarde gepickt: Schparregraas. Schparregraas iss allsfatt die aerschde Gaardesach ass ich alle Yaahr griege. Ich hab gedenkt ass vielleicht des Yaahr waerr es glee bissel schpeeder kumme wege der harte Winder, awwer nee, do waar es zu der rechten Zeit.

asparagus

Nooch so en Winder, wie mir do in Pennsylvania ghatt hen, iss eppes frisch un grien arrig appeditlich. Ya ich hab grien gsaat. Wisst dihr as die Leit in Deitschland aa Schparregraas gaarn esst? Awwer ihre Schparregraas iss weiss! Fer uns Amerikaaner iss sell eppes anneres….weisse Schparregraas. Ich hab schunn viel weisse Schparregraas in Deitschland gesse un ich kann ehrlich saage ass es arrig gut iss. Sie esse es mit en Raahmbrieh….arrig gut. Wann es Schparregraaszeit iss in Deitschland hat yede Restaurant Schparregraas uff ihre Esszeddel.

Sell iss ee Weg as die Hochdeitsche ihre weisse Schparregraas esst!

Sell iss ee Weg as die Hochdeitsche ihre weisse Schparregraas esst!

Fer mich frische Schparregraas iss die bescht! Ich gleich es in en Brodpann mit viel Budder un glee bissel Sals un Peffer. Es iss aa arrig gut uff em Grill. Viel Leit do in Amerikaa gleiche Schparregraas Supp, es iss gut awwer ich gleich mei Schparregraas eefach gekocht. Mer kann warricklich es Friehyaahr, der Grund un die Sunn schmacke.

Gleicht dihr Schparregraas zu esse? Wie gleicht dihr es? In en Supp, uff dem Grill odder in der Brodpann? Odder gebt es annere Wege es zu koche? Schreib mir mit deinre Reseet!

Do iss en Audio Klip: Schparregraas

Published in: on 17/05/2015 at 06:15  Comments (3)  

En neies Buch zu lese un kaafe!

Guder Daag Blog Leser! Ich bin arrig schtolz do zu poschde iwwer mei neies Buch: Schtimme aus’m Kaerrichhof. Des Buch iss en Series vun 30+ katz Gschichte vun dem Lloyd Moll. Der Moll hot die Schtories in de 1940s fer die Allentown Morning Call gschriwwe. Ich hab sie versammelt un dann in Englisch iwwersetzt. Viel vun de Gschichte sin iwwer echde Dinge aus unsre Gschicht. Fer selle Schtories hawwich “Historical Notes” gschriwwe. Die Schtories sin so schee gschriwwe, du waerrscht lache, schmunzele, un brille.

9781601264558_1024x1024

Des Buch iss gut fer epper der Detisch schunn lese un verschtehe kennt. Es iss aa gut fer epper der Deitsch lannt. Un es iss aa gut fer epper der ken Deitsch verschteht weil all die Schtories aa in Englisch gewwe sin. Der Moll hot uns warricklich en Fenschder in der Vergangenheit gewwe. Der Moll waar een vun de wichdigschde Deitsche Schreiwer un aa een vun de Beschde.

All die Schtories sin iwwer die Idea as epper darrich en Kaerrichhof laafe kennt un mit de Dode schwetzt. Die Dode kumme zerick as Schpucke un verzaehle ihn ihre Leweslaaf. Manniche Schtories sin vun em friehe 1700s un annere kumme aus de 1800s. Mir heere vun Leit die mit de Insching gefochde hen, mit de Britisch darrich unsere Unabhaengigskeitgrieg waar un aa Schtories vun dem Lewe in en gleene Deitsche Schteddel.

Wann sell inderessant zu dir iss, kannscht du selles Buch do kaafe: Schtimme aus’m Kaerrichhof

Published in: on 08/05/2015 at 06:48  Comments (1)  

1915!

Guder Daag Blog Leser! Im Abril, uff em 27. waerr mei Grossdaadi 100 Yaahre alt gewest sei. Er waar im Yaahr 1915 in de Schadde vun de Blohbarriye in Barricks Kaunty, Pennsylvaania, gebore. Er waar der Soh vun en Detische Bauerefamilye. Ich hab gedenkt es waerr inderessant iwwer sei Gebottsyaahr zu schreiwe. So was iss alles in em Yaahr 1915 gschehe?

Yenner:

13 – En Aerdbeewing in Avezzano, Italien, es waar 6.8 uff der Richter Scale. Meh as 30,000 Leit sin gschtarewe.

19 – In dem aerschde Welt Grieg: Hochdeitsche Zeppelins hen die Schteddel vun Great Yarmouth un King’s Lynn in England gebombt.

25 – Aerschde Ufer zu Ufer lang-schtreck Telephone Aaruf. Der Alexander Graham Bell in Nei Yarrick Schtadt hot sei Freind der Thomas A. Watson, in San Francisco, California aagerufe.

Hanning

8 – Der Movie, The Birth of a Nation, vun dem D. W. Griffith, iss zum aerschde Mol in Los Angeles gezeigt.

Birth_of_a_Nation_theatrical_poster

Matz

26 – Die Vancouver Millionaires hen die Stanley Cup gege die Ottawa Senators: drei Schpiele zu null gewunne.

Abril

11 – Charlie Chaplin’s Movie The Tramp iss rauskumme. Sell iss es aerschde Mol as er sei bekannte Character in en Movie gschpielt hot.

Charlie-Chaplin-Kim-Möller-Webdesign

Moi

6 – Der Baseballschpieler, Babe Ruth, schlagt sei aerschde Home Run fer die Boston Red Sox.

7 – Aerschde Weltgrieg: Es RMS Lusitania iss gsunke. En hochdeitsche U-Boot (U-20) in die Atlantisch, sudd-wescht vun Ireland, hot es geduh. 1,198 Leit sin gschtarewe.

RMS_Luisitania

Tschunn

5 – Die Weibsleit in Denmark un Iceland kenne zum aerschde Mol abschtimme.

Aagscht

5–23 – Zwee grosse Hurricanes hen Galveston, Texas un New Orleans, Louisiana gschlagge. Meh as 275 Leit sin gschtarewe.

Galveston_Hurricane_1915_wrecked_home

September

7 – Der Cartoon Zeichner, John B. Gruelle, macht die aerschde Raggedy Ann Bopp.

Oktower

13 – Die Boston Red Sox schlagge die Philadelphia Phillies, 4 Schpiele zu 1 in die 12th Welt Series vun Major League Baseball.

Dem Franz Kafka sei Buch, The Metamorphosis (“Die Verwexlung”) iss in Deitschland rauskumme.

Diesember

25 – Aerschde Weltgrieg: Englanner un Hochdeitsche Soldaate rufe en unofficial Fried fer Grischtdaag aus. Die Soldaate sin raus aus de Graewer kumme un hen glee bissel Fuussballe in “No Man’s Land” mitenanner gschpielt.

Bekannte Leit die im 1915 gebore waare:

Zero Mostel, Amerikanische Schpieler

Billie Holiday, African-Amerikanische Saengerin

Harry Morgan, Amerikanische Schpieler

Orson Welles, Amerikanische Schreiwer un Moviemacher

Arthur Miller, Amerikanische Schreiwer

Frank Sinatra, Amerikanische Saenger un Schpieler

Bekannte Leit die im 1915 gschtarewe sin:

Booker T. Washington, Amerikanische Schulmeeschder

Wichdige Dinge in em Yaahr 1915:

Es beliebschde Lied: Jelly Roll Blues

Jelly_Roll_Blues_1915

Der Woodrow Wilson waar der Bresident vun Amerikaa.

Woodrow_Wilson-H&E

Der Alfred Wegener schreibt sei Theory vun Pangea.

Published in: on 02/05/2015 at 08:11  Comments (1)