Bekannte Letschde Wadde!

Guder Daag Blog Leser! Des Woch hot en Freind vun mir en Link gschickt: Letschde Wadde vun de Bresidents. Ich hab sell arrig inderessant gfunne. Wie dihr schunn wisst, gleich ich amerikaanische Gschichte viel. Es waar gut die letschde Wadde vun all de Bresidents zu lese. Manniche waare mehningsvoll, annere waare yuscht Wadde zu ihre Familye un annere waare katz un karyos.

Dann hawwich iwwer dem Gedanke vun “letschde Wadde” gedenkt. Ich denk mir alle welle gude letschde Wadde uff em Dodesbett saage, awwer fer viele hemmer kenn Kontrol iwwer unsere letschde Minudde uff der Aerd. Nooch ich sell Link gelese hab, hab ich im Internet geguckt. Ich hab meh bekannte letschde Wadde gfunne. Heit will ich yuscht ee paar fer eich iwwersetze.

1. Raphael, Italienischer Kunschtler: “Froh.”

2. Rainer Rilke, Schreiwer: “Ich will ken Doktors Dod. Ich will mei Freiheit.”

3. Nostradamus, Seher: “Mariye, beim Sunneuffgang, waerr ich net meh do sei.”

4. Leonardo da Vinci, Kunschtler: “Ich hab der Gott un Mann aagschtosse. Mei Arewet waar net gut genunk.”

5. Benjamin Franklin, Renaissancemann: “En Mann am schtarewe kann gaar nix leicht duhe.”

6. Humphrey Bogart, Filmschpieler: “Mach’s gut Kind. Kumm bald widder!”

7. Eugene O’Neill, Schreiwer: “Ich hab es gwisst! In en Hotelschtubb gebore un Gott verdammt in en Hotelschtubb gschtarewe!”

8. Groucho Marx, Comedian: “Sell iss ken Weg zu lewe.”

9. Alfred Hitchcock, Filmmacher: “Mer kann sell End net wisse. Mer muss schtarewe um zu wisse was schpeeder kummt, awwer die Gadollischer hen ihre Hoffninge.”

10. Vladimir Lenin, Russischer Vorgenger: “Guder Hund.”

11. Emily Dickinson, Schreiwer: “Ich muss neigeh, fer der Newwel iss am schteige.”

12. Steve Jobs, Grunder vun Apple Inc: “O, wow.”

Do iss aa en Link zu en Website mit all unsere Bresidents un ihre letschde Wadde.

Mir wisse net fer schurr was unsere letschde Wadde waerre. Awwer ich hoff as mei sin gut un net “Watch this.”

Do iss en Audio Klip: Bekannte Letschde Wadde

Published in: on 21/03/2015 at 08:41  Comments (1)  

Nau bin ich am zippe!

Guder Daag Blog Leser! Des Woch will ich iwwer en neie Erfaahring schreiwe. Letschde Woch hawwich en Account mit Twitter uffgeduh. Wisst dihr was Twitter iss? Twitter iss en Social Media Platform wie Facebook. Awwer Twitter hot ee schtrenge Regel: mer kann yuscht 140 Buschschtaawe yuuse! Des iss hatt fer mich weil ich gleich zu schwetze un zu schreiwe!

twitter-logo

Twitter waar im Matz 2006 erschafft vun dem Jack Dorsey un drei annere Mannsleit un iss im Tschulei 2006 rauskumme. Die neie Site iss arrig bekannt in en katzi Zeit gewest. Bis Yaahr 2012 hot Twitter meh as 100 Millyonen Yuuser un sie hen meh as 340 Millyonen “Tweets” yeder Daag geposchdet! Uff Englisch saage die Leit “tweet” fer en Message, awwer ich gleich es deitsche Watt Zipp besser. Am Aafang 2015 hot Twitter meh as 500 Millonyen Yuuser. Sell iss 14% vun all die Leit in re Welt!

Mei Fraa waar net froh wann ich sie iwwer mei neie Twitter Account gsaat hab. Sie hot gsaat: “Du verbringscht schunn zu viel Zeit im Internet! Un nau nooch en annere Ding zu gucke! Du bischt verrickt!” Yawell, vielleicht bin ich verrickt. Awwer ich denk ass Twitter en gude Weg iss fer die Mudderschprooch auszubreite. Ich kann die Hashtag #padutch yuuse un wann epper sell sucht, waerrd er mei Zippe finne. Vielleicht kann ich meh Leit finne die unsere Schprooch lanne welle?

Fer nau iss es yuscht en Experiment, awwer ich denk ass es en gute Geleyeheit fer uns Deitsche iss. Wann du schunn zippscht, guck mol fer mich unnich em Handle: @djmadenford. Kumm zipp mit mir!

Do iss en Link zu mei Twitter: https://twitter.com/djmadenford

Do is en Audio Klip: Nau bin ich am zippe!

Published in: on 07/03/2015 at 06:50  Comments (1)