En Schnee Gedicht!

Guder Daag Blog Leser! Des Woch hemmer do in Nadd-Oscht Amerikaa en grosser Schneeschtarm. So ich hab gedenkt as es en guti Zeit waar fer en Schnee Gedicht. Ich kenn schunn en arrig gude Gedicht vun dem Robert Frost, so ich hab es iwwersetzt. Des iss net es aerschdes Mol as der Robert Frost en Bsuch uff mei Blog gemacht hot. Letschdes Yaahr hawwich en annere Gedicht vun ihm iwwersetzt. Do iss en Link zu sellre Poscht:

Der Robert Frost Poscht 1

Awwer des Mol will ich sei bekannte Gedicht: “Stopping by the woods on a snowy evening” iwwersetze. Der Frost hot selle Gedicht im Yaahr 1922 gschreiwe. Viel Gschpass bei Lese.

winter-snowy-forest-wallpaper

Schtoppe in dem Busch uff en schneeige Owed

Wem sei Busch des sin, denk ich as ich kenn.

Sei Haus iss doch in em Schteddel;

Er waerr mich net sehne as ich do schtopp,

Um zu hiede as sei Busch mit Schnee ufffile.

 

Mei gleener Gaul muss denke as es eefeldich iss

Zu schtoppe mitaus en Bauerehaus bei

Gschwischich dem Busch un gfrorenes Wasserloch

Der dunkeleschte Owed im Yaahr.

 

Er gebt sei Geilsgscharrglocke en schiddele

Um zu frooge eb es en Fehler gebt,

Der eenzigschde Klang iss der Schwung

Vun leichtem Wind un Flock.

 

Der Busch iss lieblich, dunkel un dief,

Awwer ich hab Verschpreches zu behalde,

Un Meile zu geh eb ich schloff,

Un Meile zu geh eb ich schloff.

Ich hoff as all mei Blog Leser der Schtarm iwwerlebt. Bei mir hemmer 6 Zoll Schnee grickt. Un wann du ken Schnee grickt hoscht, mach dei Aaage zu un du kannscht es in dei Gedenke sehne. As ich schreib des Poscht, saage die Wettermannsleit as uff em Sunndaag solle mir widder en Schtarm griege, selles Mol 6-12 Zoll! As ich rumgeh mit mei Schneeschmeisser, waerr ich an des Gedicht widder denke.

Do iss en Audio Klip: En Schnee Gedicht

Published in: on 31/01/2015 at 08:28  Comments (1)  

En neier Governor.

Guder Daag Blog Leser! Des Woch iss eppes abbadiches in Pennsylvaania bassiert. Unser 47. Governor hot sei Eed genumme. Nau iss der Tom Wolf der “Grosse Mann” in Harrisbarrick. In des Poscht will ich eppse iwwer unserem neien Governor schreiwe.

Der Tom Wolf waar uff em 17. November in em Yaahr 1948 in Yarrick gebore. Er iss der Cornelia Westerman un dem William Trout Wolf ihr Soh. Er hot sei Bachelors vun Dartmouth College im 1972 grickt un dann sei Ph.D. vun Massachusetts Institute of Techonology im 1975 grickt. Er hot sei Fraa, die Frances, im 1975 gheiert un nau hen sie zwee Dechder. As er en Schtudent waar hot er zwee Yaahre in India mit de Peace Corps gebracht. Er iss en Demokraat.

Eb er in em Bolitikal Schpiel kumme iss, waar er der Besitzer vun sei Familye Building Supply Kumpani. As der Ed Rendell Governor waar, waar der Tom, der Secretary vun Revenue. So er kennt sich gut mit Harrisbarrick aus. In November 2014, hot er gege dem Tom Corbett in re Lecktion gschprunge.

Unser 47. Governor: der Tom Wolf.

Unser 47. Governor: der Tom Wolf.

Nau iss er der Governor un er hot schunn en neie Blann fer Pennsylvaania. Do sin ee paar Gedenke vun was er in Harrisbarrick mache will:

1. Geld fer die Schule. Meh as $1 Billion Dollaars waare vun de Schule unnich em alde Governor Corbett weckgnumme. Der Wolf will Geld an die Schule in Pennsylvaania gewwe so as die Kinner bessere Meeglichkeite hen.

2. Taxe. Der Wolf will es Tax System in PA uffbutze. Er glaabt as es viel besser sei kennt. Mol sehne was er un sei Cabinet mache waerre.

3. Pensions. De Schtaat Schaffleit ihre Pensions sin in Druwwel. Es gebt net genunk Geld in re Wutzlibank fer all die Schaffleit. Sell iss en Broblem as viel Acht griege muss.

4. En Moratorium uff Fracking in Schtaatparks un Schtaatbusch. Ich bin en grosser Fan vun sellem Gedenk. Die Parks un Busche sin fer uns Pennsylvaaniers. Sie solle net Gas Pads un Gas Brunne druff hawwe. Sell waerr en hatter Fecht mit de grosse un reiche Gas Kumpanies sei.

5. Meh Glaarheit in Harrisbarrick. Halleluya! Die Gebei in Harrisbarrick solle Glaas Wend hawwe, awwer mir wisse schunn as es net so sei iss. Mir, die Leit die die Taxe bezaahle, solle wisse was am aageh iss, gell?

So nau misse mir waarde un sehne was bassiere waerr. En grosse Broblem iss as der Wolf en Demokraat iss un die Leit in re General Assembly sin meh Republikaaner. Dihr wisst schunn wie sell geht. Awwer hoffetlich kennte sie zammekumme un zammeschaffe fer all die Leit in unsere Commonwealth.

Do iss en Audio Klip: En neier Governor

Published in: on 24/01/2015 at 12:36  Leave a Comment  

En Birgergrieg Gedicht!

Guder Daag Blog Leser! Es Yaahr 2015 iss es 150. Yaehrlichfescht vun em Amerikaanische Birgergrieg sei End. So des Woch will ich eich en bekanntes Gedicht aus em Birgergrieg gewwe. Es Gedicht waar vun em George Cooper in 1863 nooch em Schlacht in Gettysburg gschriwwe un dann der Stephen Foster hot en scheene Melodie gschriwwe. Die Wadde sin arrig schee un Mehningsvoll. In Ehr vun all die Soldaate, die in em Grieg gschtarewe sin, gewwich des Poscht.

En Drummerbu aus em Birgergrieg.

En Drummerbu aus em Birgergrieg.

Fer die liewe alde Faahne, schtarewe ich

Fer die liewe alde Faahne schtarewe ich, hot der verwundete Drummerbu gsaat.

Mudder, drick dei Lefts zu mei bei; O sie bringe mir Fried un Freed!

‘Sis es letschde Mol uff re Aerd, as ich dei Gsicht sehne soll,

Mudder nemm mich zu deinre Hatz, loss mich in dei Behaerz schtarewe.

Fer die liewe alde Faahne schtarewe ich, Mudder, drickel dei brillende Aage;

fer die Ehr unser Land, un die liewe alde Faahne schtarewe ich.

————-

Drauer net, mei liewe Mudder,

alle Schmatz waerr bald vorbei;

Ich kann die Engel Baend heere, sie rufe vun em schtannigen Ufer;

nau sehn ich ihre Faahne in es fehlerfreie Daageslicht schwenke,

awwer ‘sis hatt vun dir weckzugeh,

doch ich daet net do bleiwe.

Fer die liewe alde Faahne schtarewe ich, Mudder, drickel die brillende Aage;

fer die Ehr unser Land un die liewe alde Faahne schtarewe ich.

—————

Mach’s gut Mudder, em Dod sei kalte Hand wiege sich uff mei Geischt,

un ich fiehl sei peschdige Ochdem, fach mei bleechene Backe un Schtann.

Neecher! Neecher! zu dei Hatz, loss mich fiehle as du dobei bischt,

diweil mei Aablick waxt drieb, fer die liewe alde Faahne schtarewe ich.

—————-

Do iss en Link fer des Gedicht as en Lied uff Englisch: es Lied

Do iss en Link zu en Ardickel uff Englisch iwwer Dummerbuwe in em Grieg.

Do iss en Audio Klip: En Birgergrieg Gedicht

Published in: on 17/01/2015 at 11:54  Comments (3)  

Singe mir en Nei Yaahrs Winsch!

Guder Daag Blog Leser! Des Woch will ich eppes abaddiches bringe: en alde gsungene Nei Yaahrs Winsch. Es waar en Tradition in em 19. Yaahrunnert un aa in em friehere 20. Yaahrhunnert fer Leit rumzugeh un Nei Yaahr Winsche an Heiser un Bauerei zu singe. Mir sin arrig glicklich as mir dem Peter Fritsch hawwe. Dem Peter sei Daadi hot alle Yaahr Nei Yaahr Winsche in Deitsch in Longswamp Taunschip, Barricks Kaunty, gsunge un gschpielt. Zum Glick hot der Peter sei Daadis Winsch gelannt un nau mit re Helfe vun dem Mike Hertzog un sei Baend, schpiele sie un singe sie nooch der alde Nei Yaahr Winsch. Selle Woch will ich eich der Winsch gewwe un aa en Link so as dihr es sehne un heere kennte. Do iss der Winsch

Ich winsche dihr un deini Hausfraa so unser Dechder, Gnecht un Mechde, un alle die in dieses Haus ein glickseeliges Neies Yaahr.

Ich winsche eich all grosses Glick un alle Unglick weit zerick. Des 2014 Yaahr geht aus in Naames Yesus Grischt weil des 2015 Yaahr behanden iss. Des aldes Yaahr geht nun dohie dann fange mir en Neies aa.

Weiter winsch ich eich en hochgelobtes Neies Yaahr bis dihr bekummet grohen Haar.

Mir gehne in die Welt un wandern vun einem Yaahr zu annerem, darrich fiehle Aengscht un Plaegen, darrich ziddriche Zeit un Yegen. Darrich Grieg un grosse Schlechene, was uff unsre Welt bedecken.

Gott lob un dank das dieser Zeit des iss erlaabt in Ruh un Friede, Himmelsluscht, Gottes Willes, Gottes Geischt bleibt eich bewoge bis dihr kumme in die Himmel gfloge. Un eirem Sitz da bleibt bereit datt in die ewig Seeligkeit.

Mir schtehne do var eire Dier, uff eirem Land, die Inschtrumente in die Hand. Wann mir raus die Inschtrumente ziehe dann sollscht du heeren des Neies Yaahr anschpielen.

Do iss en Link zu en Live Performance vun sellem Winsch: BCTV PA German Hour (um der Winsch zu seh, muss mer fast forward duhne bis halbwegs darrich der Schau).

Do iss en Link um dem Peter un dem Mike ihre CD zu kaafe: Nei Yaahr CD . Ich kann ehrlich saage as selle CD arrig gut iss. Sie schpiele viele Deitsche Lieder un aa ee paar uff Englisch.

Published in: on 09/01/2015 at 17:26  Comments (3)  

En deitscher Eckschtee?

Guder Daag Blog Leser! Eb ee paar Munet hawwich en EPoscht vun dem Dean Lohr, en Blog Leser, grickt. Er hot mich gefroogt ob ich eppes iwwer der Herkimer Eckschtee schunn weess. Ich hab ihn gsaat, as sell waar eppes Neies zu mir. Dann hot er mich gsaat as ich en Blog Poscht iwwer sell Gschicht schreiwe daet. Die Gschicht iss arrig interesting, so do iss es!

Eb ich iwwer dem Eckschtee schreib, muss ich iwwer dem Mann sei Gschicht schreiwe. Der Nicholas Herkimer (Herchheimer) waar im 1728 gebore un waar en General in unser Widderschtand Grieg. Er iss vun Wunde nooch em Schlacht vun Oriskany gschtarewe.

Herkimer waar der Soh vun der Catherine Petrie un dem Johann Jost Herchheimer. Sie sin aus em Palz kumme un hen in es Mohawk Daal in Nei Yarrick gewuhnt. Der Nicholas kennt Deisch un Iroquois schwetze. Darrich der Franzeesisch un Insching Grieg hot er gefochte. Im Yenner 1758 iss er en Haaptman gemacht. Nooch em Grieg hot er en neies Haus in Little Falls gebaut.

In Tschulei un Aaguscht 1775 waar er en Colonel vun re Militia gemacht un im 1776 waar er zu dem Schtand vun General gemacht. In Tschunn 1776, hot er 380 Soldaate nooch Unadilla, Nei Yarrick, gfiehrt um die Britische zu dreffe. Zum Glick iss es net zu en Schlacht kumme.

In Tschulei 1777 waar der Fort Stanwix umgegreist. Der Herkimer hot sei Soldaate die 28 Meils vun Fort Dayton gfiehrt. Uff der Weck ,waare er un sei Menner vun Britische un Mohawk Insching aagegriffe. Sell waar die Schlacht vun Oriskany. Dem Herkimer sei Gaul waar geschosse un er waar hatt verwundet. Er hot sich gege en Baam aagschteibert, hot sei Peif aagschteckt, un hot sei Menner in re Schlacht gfiehrt. Zwee Mol hot er sie gerallyed so as sie net weckgeschprunge sin. Wann alles vorbei waar, hot sei Menner ihn Heem gedraagt.

Der Doktor hot sei Wunde aageduh. Sei Wund iss schtarrick aagschteckt. Nooch zehe Daage iss sei Beh abgschnitte. Die Operation iss net gut gange, die Wund hot arrig viel ausgeblutet un der Herkimer iss vun sellre Wund uff em 16. Aaguscht gschtarewe.

Dem Herkimer sei Haus in Little Falls, NY, iss nau en Historisches Blatz. Herkimer Kaunty, NY, iss in sei Ehr genaamt.

Herkimer uff em Schlacht vun Oriskany, Aaguscht 6, 1777.

Herkimer uff em Schlacht vun Oriskany, Aaguscht 6, 1777.

So nau wisse mir iwwer dem Herkimer, so nau kennt ich eich iwwer dem Herkimer Eckschtee saage. Der Herkimer Eckschtee iss en Naame fer en Double-Terminated Gwaarz Crystal der in Outcroppings vun Dolostone in un um Herkimer Kaunty, Nei Yarrick un es Mohawk Rewer Daal ausgfunne waar. In em 18 Yaahrhunnert sin viel Herkimer Eckschtee gfunne. Annere Herkimer Eckschtee sin in Tibet un Afghanistan aa gefunne! Die Herkimer Eckschtee sin gut bekannt fer ihre Glaarheit. Manniche Leit denke as sie geheeme Graft hen.

Herkimer Eckschtee - Middleville, Herkimer Kaunty, NY.

Herkimer Eckschtee – Middleville, Herkimer Kaunty, NY.

So, kenne mir saage as mir en Deitscher Eckschtee hen? Ich denk so, was denkt dihr?

Do iss en Audio Klip: En Deitscher Eckschtee

Published in: on 01/01/2015 at 09:36  Comments (3)