Guder Daag Blog Leser! Well es gebt yuscht zwee Woch bis Grischtdaag. Un as viel vun eich, die Deitsche seid, schunn wisst, fer uns Deitsche gebt es en abbadicher Paerson zu re Zeit: der Belsnickel. Ya, fer uns Deitsche gebt es ken Santa Claus un sei fliegende Hasch. Mir hen unser eegene Gschenkbringer.
Der Belsnickel kummt uff em 24. Diesember un er bringt Sache fer die Kinner, awwer ken XBox odder Videoschpiele. Nee, er bringt eppes gleener. Un wann en Kind net darrich’s Yaahr gut waar, dann grickt er odder sie ken Gschenk awwer in Blatz vun sell griege sie en Blatsch vun seinre Zweig! In Ehr vun en grosser Mann in unser Kuldur, hawwich en katze Gedicht gschriwwe.
Der Belsnickel
Datt drauss blost es arrig kalt. Nau gebt Acht!
Epper kummt do darrich der Windernacht.
Er gloppt an yedre Dier un dann geht nei,
er iss net sauwer un aa net fei.
Der iss schmutzig un draagt en Belsrock,
Aye, sell iss der Belsnickel mit seim Sack!
Was iss den in dem Sack drin?
Eppel, Arensche un Reesin
aa Walniss fer en gutes Kind;
die annere, die net manierlich sin, Grache!
Blatscht er uff die Hinnerbacke!
Do iss en Audio Klip: Der Belsnickel – En Gedicht
PA Dutch 101 
Hallo Liewwer Doug!
Nomols hosch eppes Ee’malig’s g’machd! Grosse Achtung, un i hoff, ‘s Chrischdkindele (bei mein’re Vorfahre kummt’s statt d’r Belsnickel) Di un Dei Familie viele wunnerbare G’schenkele bringe wird!
Wie ma’ sagt, “Gross Dank”!!
Dei
Jim (Jakob) Kramer
(seller Pittsburgher Kerl, wu glaww i Kohle statt G’schenke v’rdient hot, doch isch’s Chrischdkindle epper, wu vieles vergebe duht!!!)