Grischtdaag 2014 un Nei Yaahr Winsch Video!

Guder Daag Blog Leser! Well, ‘sis widder Zeit fer mei yaehrliches Grischtdaag un Nei Yaahr Winsch Video. Do iss en Link zu dem Yaahr sei Video: 2014 Grischtdaag un Nei Yaahr Video!

Bis 2015, macht’s gut un schwetzt Deitsch!

Published in: on 19/12/2014 at 20:06  Leave a Comment  

Der Belsnickel – En Gedicht!

Guder Daag Blog Leser! Well es gebt yuscht zwee Woch bis Grischtdaag. Un as viel vun eich, die Deitsche seid, schunn wisst, fer uns Deitsche gebt es en abbadicher Paerson zu re Zeit: der Belsnickel. Ya, fer uns Deitsche gebt es ken Santa Claus un sei fliegende Hasch. Mir hen unser eegene Gschenkbringer.

belsnickel1

Der Belsnickel kummt uff em 24. Diesember un er bringt Sache fer die Kinner, awwer ken XBox odder Videoschpiele. Nee, er bringt eppes gleener. Un wann en Kind net darrich’s Yaahr gut waar, dann grickt er odder sie ken Gschenk awwer in Blatz vun sell griege sie en Blatsch vun seinre Zweig! In Ehr vun en grosser Mann in unser Kuldur, hawwich en katze Gedicht gschriwwe.

Der Belsnickel

Datt drauss blost es arrig kalt. Nau gebt Acht!

Epper kummt do darrich der Windernacht.

Er gloppt an yedre Dier un dann geht nei,

er iss net sauwer un aa net fei.

Der iss schmutzig un draagt en Belsrock,

Aye, sell iss der Belsnickel mit seim Sack!

Was iss den in dem Sack drin?

Eppel, Arensche un Reesin

aa Walniss fer en gutes Kind;

die annere, die net manierlich sin, Grache!

Blatscht er uff die Hinnerbacke!

Do iss en Audio Klip: Der Belsnickel – En Gedicht

Published in: on 12/12/2014 at 20:43  Comments (1)  

Rischdet die Keenichliche Landschtross!

Guder Daag Blog Leser! Heit iss der Zwette Sunndaag in re Adventzeit. Ich hab gedenkt as selle Woch waerr ich en Adventschtick schreiwe mit glee bissel aus re Biewel un dann en Iwwersetzung vun meim Leibadventlied. Uff sellem Sunndaag in Advent heere mir as mir uns der Weg rischde solle:

As es in Brofeet vun Isaiah gschriwwe iss, “Guckt, ich schick mei Bote vannedraa vun eich, wer eier Weg rischde waerr; die Schtimm vun eener der in der Busch greischt: ‘Rischdet der Weg vun em Herr, macht sei Paedel graad.’” Der Yohann der Daafer iss in em Busch gscheint, un ruft en Daaf vun Rei fer die Vergebniss vun Sin aus. – Markus 1:2-4

En arrig scheenes Karrichlied vun sell iss: Rischdet die keenichliche Landschtross. Es iss vun dem Frans Michael Franzen in de freihe 19 Yaahrhunnert gschriwwe. Er waar in Oulu, Finland, gebore un waar en arrig bschaffigte Dichder un Schreiwer. Selles Lied uff Schwedisch (er hot lang in Schweden gewuhnt) heesst: Bereden väg för Herran. Mir singe es yede Advent in re Luddrische Karrich. Die Wadde sin mehningsvoll un die Melodie iss schee. Do iss mei Iwwersetzung aus em Englisch:

Rischdet die keenichliche Landschtross

Rischdet die keenichliche Landschtross; der Keenich vun Keeniche iss naegschd!

Losst yede Hiwwel un Daal en ewene Schtross erschein!

Dann griesst der Keenich vun Herrlichkeit, vorrausgsaat in heilige Gschicht:

Hosanna zu dem Herr, fer er vollendet sei Watt!

 

Dem Gott sei Leit sehne ihn am kumme: eier eegene ewige Keenich!

Legt Pallemnescht ihn davor! Breidet Gleeder, greischt un singt!

Sei Verschprech waerr eich net fehle! Net meh sollt Zweifel eich aagreife!

Hosanna zu dem Herr, fer er vollendet sei Watt!

 

Dann schmeisst die Diere weit nuff un griesst eier Herr un Keenich,

As unseres un yedes Land ihre Ehrung do bringe daerfe.

All Lenner waerre var ihn nidderbicke; mit singe nau ihn verehre:

Hosanna zu dem Herr, fer er vollendet sei Watt!

 

Seins iss net en aerdliche Keenichreich; es kummt vum Himmel owwerei.

Sei Herrsch iss Fried un Freiheit un Gerechtigkeit, Waahrheit un Lieb.

So losst eier Lob laut glange fer Barmhatzichkeit so reichlich:

Hosanna zu dem Herr, fer er vollendet sei Watt!

—————————————-

Ich winsch all mei Blog Leser en scheene Zwette Advent!

Do iss en Audio Klip: Rischdet die keenichliche Landschtross!

Published in: on 07/12/2014 at 09:43  Comments (2)