En neier gleener Deitscher!

Guder Daag Blog Leser! Ich schick eich en Griess aus Hershey, Pennsylvaania, die siessede Blatz in re Welt. Fer was bin ich datt, froogt eich? Well, ich bin datt in em Grankehaus. Nee, ich bin net grank odder verletzt. Ich bin datt weil mei gleene Soh am Samschdaag datt in die Welt kumme iss.

Mir sin in Hershey weil, mei Soh, der Oscar, hot en Hatz Broblem. Mir henn sell schunn im Aaguscht rausgfunne. Fer September un Oktower hemmer gemisst datthie ee mol in re Woch zu faahre um mit en Bobblihatz Doktor zu schwetze. Der Oscar hot was die Medicineleit saage en 2:1 Hatzblock. Die owwere Halb vun sei Hatz glabt zwee mol schtarriger als die unnere Halb. As er in seinre Mammi ihr Bauch waar hot er Anti-bodies grickt die sei Hatz aagegriffe hen. Sell iss net so schlimm awwer, er muss do in Hershey fer ee paar Daage bleiwe. Die Doktors welle ihn iwwerschaue un die “All Clear” gewwe.

Ich un der Oscar.

Ich un der Oscar.

Er waar um 8:49 in de Mariye am Samschdaag, der 22. November, gebore. So bald as er rauskumme iss, iss er hoch in die Neonatal Intensive Care Unit (NICU) genumme mit drei Grankeschwester. Un datt iss er bis nau gebliwwe. Die Mammi iss gut un gsund un alles mit em Gebott iss gut gange. Nau iss er uff em 7. Schtock mit viel Wires un Machines uffgehooked. Ich weess nooch net wann er heem geh kennt, awwer ich hoff as es net zu lang sei waerr.

Er macht schunn en Faust. Er iss fer schurr en Kaempfer.

Er macht schunn en Faust. Er iss fer schurr en Kaempfer.

Un hab ken Bang, die aerschde Wadde die ich zu ihm gsaat hab waare nadierlich uff Deitsch! Er hot sofort geschmunzelt! Er iss nooch meim gross-gross-grossdaadi, der Oscar Rothermel Hoch, genaamt. Er waar en echde Deitscher der hot uff sei Bauerei in Richmond Taunschip gewuhnt. Mei Grossmammi saagt as er schier gaar ken Englisch schwetze kennt!

So bis naegschd Mol, macht’s gut un hoffetlich waerr ich bald raus aus em Grankehaus sei! Ich will mei Bu heem nemme!

Un aa, ich winsch eich un eier Familye en Hallicher Danksfescht!

Do iss en Audio Klip: En neier gleener Deitscher

Published in: on 25/11/2014 at 12:07  Comments (5)  

The URI to TrackBack this entry is: https://deitscheblog.wordpress.com/2014/11/25/en-neier-gleener-deitscher/trackback/

RSS feed for comments on this post.

5 CommentsLeave a comment

  1. Hallo, Doug!
    I gratulier‘ Di un Dei Frau, Töchderle, Grosseldre, Eldre—kurz g’fasst Di un Dei ganze Familie zu G’burt vun Deim Soh’!!! Sell isch wunnerbar. I bete au awwer, dass es ‘m Büwele bal’ besser gehe, un dass Du un Dei Familie bal’ wied’r heemkumme könnt! I haww‘ Gutes üwer’s Hershey Krankehaus g’hört, es hot e gute Ruf. I weess awwer au g’nau: d’r BESCHDE Arzt drowe im Himmel, ons’r Herr Gott, hot Kinnerle lieb, un i bete, dass Er Eich alle segne un b’hüte.
    Danke beschdens, dass Du in Dein’re Mundart weitermachscht, un i hoff, die gleene Tochter Estella wird au mit’m „Oscarle“ (so däte mer `n nenne, sell isch e schwäbisch-badischer Brauch) no Deitsch schwätze. Se wird sich wohl as gutes Schweschderle b’währe, un e liewe Familie seid Ihr ja, däs glaub‘ i ja.
    E frohes Dankfeschd wünsch‘ i Di un all‘ Dei Liewe au—un was für e Sege hoscht do! D’r Oscar isch wie die Estella e „Glückskindle“: liewe Eldre, die wisse, was schö‘ isch un was im Lewe wichdig isch: die Liewe.

    Nu, i bi‘ sicher, Du bekommsch no viele Gratuliere un gute Wünsche no vun annere Leit au, also will i diesmol net „e Roman“ schreiwe-ha ha.
    Nomols schönschde Grüβe aus’m weschdliche Deel vun Pennsylvania

    Sendet

    Jim (Jakob) Kramer
    (Seller Pittsburgher Kerl)

  2. Gross Dank fer dei Wadde Jim!

  3. Doug, ich gratelier vun Hatze un winsch eich es allerbescht!

  4. Gross Dank Michel! Nau hemmer en annere Schwetzer!

  5. Liewer Doug,

    Heit bin i in grosser Eil’, ma hat ja nur zwee Hände awwer von ee‘m wird immer wied’r v‘rlangt, dass `r uff Eemol zehe Sächele mache muss!!

    I wollt’ Di un Dei Liewe all’ nomols gratuliere un Di saage, i schliess Di un Dei Familie ins G’bet un vor allem, dass es Eich nur beschdens gehe un dass Gott Eich segne un b’hüte. I hoff, as es ‘m gleene Oscar un nadierlich au Dei Fraa bal’ nur beschdens gehe wird!

    Dei Online-Friend aus’m „Groβstädtele im Weschde”

    Jim Kramer
    Seller Pittsburgher Kerl


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: