En neier gleener Deitscher!

Guder Daag Blog Leser! Ich schick eich en Griess aus Hershey, Pennsylvaania, die siessede Blatz in re Welt. Fer was bin ich datt, froogt eich? Well, ich bin datt in em Grankehaus. Nee, ich bin net grank odder verletzt. Ich bin datt weil mei gleene Soh am Samschdaag datt in die Welt kumme iss.

Mir sin in Hershey weil, mei Soh, der Oscar, hot en Hatz Broblem. Mir henn sell schunn im Aaguscht rausgfunne. Fer September un Oktower hemmer gemisst datthie ee mol in re Woch zu faahre um mit en Bobblihatz Doktor zu schwetze. Der Oscar hot was die Medicineleit saage en 2:1 Hatzblock. Die owwere Halb vun sei Hatz glabt zwee mol schtarriger als die unnere Halb. As er in seinre Mammi ihr Bauch waar hot er Anti-bodies grickt die sei Hatz aagegriffe hen. Sell iss net so schlimm awwer, er muss do in Hershey fer ee paar Daage bleiwe. Die Doktors welle ihn iwwerschaue un die “All Clear” gewwe.

Ich un der Oscar.

Ich un der Oscar.

Er waar um 8:49 in de Mariye am Samschdaag, der 22. November, gebore. So bald as er rauskumme iss, iss er hoch in die Neonatal Intensive Care Unit (NICU) genumme mit drei Grankeschwester. Un datt iss er bis nau gebliwwe. Die Mammi iss gut un gsund un alles mit em Gebott iss gut gange. Nau iss er uff em 7. Schtock mit viel Wires un Machines uffgehooked. Ich weess nooch net wann er heem geh kennt, awwer ich hoff as es net zu lang sei waerr.

Er macht schunn en Faust. Er iss fer schurr en Kaempfer.

Er macht schunn en Faust. Er iss fer schurr en Kaempfer.

Un hab ken Bang, die aerschde Wadde die ich zu ihm gsaat hab waare nadierlich uff Deitsch! Er hot sofort geschmunzelt! Er iss nooch meim gross-gross-grossdaadi, der Oscar Rothermel Hoch, genaamt. Er waar en echde Deitscher der hot uff sei Bauerei in Richmond Taunschip gewuhnt. Mei Grossmammi saagt as er schier gaar ken Englisch schwetze kennt!

So bis naegschd Mol, macht’s gut un hoffetlich waerr ich bald raus aus em Grankehaus sei! Ich will mei Bu heem nemme!

Un aa, ich winsch eich un eier Familye en Hallicher Danksfescht!

Do iss en Audio Klip: En neier gleener Deitscher

Published in: on 25/11/2014 at 12:07  Comments (5)  

Die Deitsche Schprooch in re Regiering!

Guder Daag Blog Leser! Ich saag: Willkumm November! Die Luft iss kiehl, die Bledder sin uff em Grund, un die Nechte sin lenger. Awwer heit will ich nix meh iwwer Schpotyaahr schreiwe. Selle Woch will ich iwwer eppes as in mei Zeiding am Dinschdaag waar. Headline: “Amish language sparks policy shift for grants.” Sell waar in die Dinschdaag Schtick vun em Lock Haven Express. Sell iss en gleene Zeiding die aus Lock Haven, PA kummt. Do in Central PA hemmer aa viel viel Amische Familye. Die Artickel waar arrig inderessant, so ich hab gedenkt as ich es in Deitsch fer eich iwwersetze daet.

Deitsche Schprooch bringt Policy Wandling fer Grants

vun Jim Runkle

Lock Haven – En grosse Drupp vun de Leit in Clinton Kaunty hen en Broblem Englisch zu verschtehe, un sell verlangt die Kaunty Commissioners fer die Zukunft zu rischde, wann es zu de Community Development Block Grant Program umgeht.

Nochdem die American Community Survey, Greene Taunschip, mit 1,629 Leit, hot 10.4% vun ihre Leit die Englisch schwetze “wennicher as gut”. Lamar Taunschip hot 6.3% vun ihre Leit hen Druwwel mit Englisch, un Logan Taunschip hot 11.5%.

In all drei vun selle Taunschips, die Leit sin Deitsch Schwetzer, die all aus Amische Gemee kumme. Wann meh as 5% vun re Leit in en Taunschip Brobleme mit Englisch hen, muss die Kaunty en weitere Schritt mache mit en CDBG Brogramm.

Die Katie DeSilva, Grants Coordinator, saagt as 2015 waerr mit en neie Mandate via die federal Department of Urban Development aakumme. Taunschips un Kauntys misse ausfigere wu Leit mit Englisch Brobleme sin. 98% vun all die Leit in Clinton Kaunty sin gut in Englisch, awwer die Praesence vun en grosse Minderheet, mehnt as die Kaunty Placards in Municpal Gebeier in Deitsch poschde waerr. Die Placards waerre Information iwwer die Grant Program hawwe un aa Information hawwe mit wem in re Kaunty Regiering sie kontake solle.

Wann en Publick Versammling gebt, die DeSilva saagt, die Kaunty muss en Iwwersetzer datt hawwe. Der Iwwersetzer kann dann mit de Amische Leit schwetze so as sie alles recht verschtehe.

Ich hab sell arrig Indersannt gefunne. Nooch ich die Artickel gelese hab, hawwich die DeSilva en EPoscht gschriwwe un gfroogt ob die Kaunty Helfe braucht. Ich hab gsaat as ich Deitsch schwetze un schreiwe kann un waerr nadierlich mei Helf gewwe wann es gebraucht iss. Sie waar arrig froh as ich sie gschriwwe hab. Sie hot mich gsaat as die Kaunty hot net gewisst was sie mache daete wann en Iwwersetzer gebraucht waar. Ich glaab as ich fer schurr die Placards fer die Kaunty iwwersetze waerr. Wann sell so weit iss, waerr ich en Pickder vun ihne mache un do poschde!

Do iss en Audio Klip: Die Deitsche Schprooch in re Regiering!

Published in: on 01/11/2014 at 07:26  Comments (7)