Daheem uff die alt Bauerei!

Guder Daag Blog Leser! Well, do bin ich widder mit en neier Poscht. ‘Sis nau Oktower do in Pennsylvaania un es Wedder iss am wexsele. Die Nechte sin kiehler un die Daage sin katzer, Schpotyaahr iss nau fer schurr do. Aa, mei Hof iss voll mit Bledder, iwwerdem muss ich mei Reche finne un sie zammereche. Sell macht Gschpass fer die aerschde paar Minudde, awwer dann iss es yuscht Arewet. Vielleicht waerr es anners selles Yaahr sei, as mei Dochder endlich gross un alt genunk iss in die Bledder zu schpiele un zu tschumpe.

Mei Poscht selle Woch hot nix mit em Schpotyaahr zu duh. Ich will en Lied in unsere Mudderschprooch deele. “Daheem uff die alt Bauerei” iss en bekanntes Lied in die Grundsau Lodsche un uff die Versammling Circuit. Die Wadde saage viel iwwer unser Kuldur un unser ewige Verbinnung mit re Bauerei un dem Bauer sei Lewe. Der G. Gilbert Snyder hot selles Lied gschriwwe un hot es zu re Melodie vun “Home on the Range” gsetzt. Der aerschde Vaersch iss iwwer es Lewe uff re Bauerei, awwer was ich gleich iss der zwette Vaersch. Der zwette Vaersch iss iwwer der nei Bauerei, die Bauerei im Himmel. Sell iss yo Deitsch, gell? Wann en Deitscher schtarebt, was wolle mer in Himmel finne? Nadierlich, en neies Lewe uff en Bauerei. Sell find ich so siess un gut. Ich hoff, wann ich die Rees nooch mei Gott macht, waerr ich en neie Bauerei finne wu ich in die Ewigkeit mit meinre Familye un all die Gediere un all die Heiliche mitaus Schtress un Druwwel in de Felder schaffe kennt.

Do iss der G. Gilbert Snyder’s Lied: “Daheem uff die alt Bauerei”

O ferwas bin ich vun die alt Bauerei?

Datt waar doch alles gedrei.

Wu gaar nix aageht, as mer nooch net verschteht,

daheem uff die alt Bauerei.

Die alt Bauerei! Datt waare die Kelwer un Sei.

Datt waar gaar nix letz, es waar niemand am gretz.

Daheem uff die alt Bauerei.

Ich kumm mol ee Daag zu der nei Bauerei,

Im Himmel wu alles iss fei.

Mei Freind sehn ich garn, es iss die letscht Arn,

daheem uff der nei Bauerei.

Die nei Bauerei! Datt sin die Leit haerlich un frei.

Die Freindschaft iss datt – sie gehn nimmi fatt.

Daheem uff die nei Bauerei.

Macht’s gut liewe Leit. Ich hoff ich waerr all vun eich iwwerdem in Himmel uff en nei Bauerei sehne.

Do iss en Audio Klip:

Published in: on 11/10/2014 at 09:46  Comments (2)  

The URI to TrackBack this entry is: https://deitscheblog.wordpress.com/2014/10/11/daheem-uff-die-alt-bauerei/trackback/

RSS feed for comments on this post.

2 CommentsLeave a comment

  1. Den Clip hab ich leider nit schpiele kenne awwer die Wadde selles Liedes g’falln mir arrig gud! Ich hoff aa, es giwwt ne scheene Bauerei im Himmel drinne, wu ich mei Hinkel hawwe kann!

  2. Hallo Liewer Doug!
    Danke nomols für so e schö’s Liedle! Ob ma im Himmel e „Bauerei“ finde od’r e „schö’s Stückele Land“ od’r sonnschd no eppes, ka‘ koin’r mit Sicherheet sage. Nu, deprimiernd soll’s net sei: Was Jesus Sei Kinnerle v’rsproche hot, isch no viel taudendmol schöner! Bei IHM isch lauter Freid‘ und Wonn‘, Mer solle leuchte wie die Sonn‘!

    Ee’mol haww‘ i mi Dr. J. Vernon McGee a’g’hört, wu er in d’r Sendung „Darrich die Biwel“ mol g’saa’t hot, mer bekomme e neie Sprooch‘, wenn Jesus z’rückkommt. Däs awwer hot mi a’fangs e bissele traurig g’macht, bis i zu mi g’saat hab‘ „Na, du, sei mol still! E Sprooch von Jesus selwer wird di no vielmeh‘ Freid mache wie Deutsch (Mundart), weil se von IHM kommt! Mit annere Worte: was ER mit sich bringt, duht scho alle Freid, die i an Deitsch so liebhab, scho bei Weitem no übertreffe! Däs geht so weit üwer mei Horizont, mei geischdliche „Kurzsichtigkeet“ isch rein menschlich, mit neie Äugele awwer werde mer sehe, alle Krankheete duhne verschwinne, un seller Lewe dort wird EWIG währe! Was könnt no schöner sei?!! Danke für Dei schöne Worte un Liewe zur Sprooch, i hoff‘ ja, Di, Dei liewwe Frau, Töchterle, Groβeldre, G’schwischder un alle Liewe nur beschdens geht!
    Mit schönschde Spootoktobergrüsse aus’m Groβstädtle (Bei uns wird e Stadt no zum Städtele, so senn halt die Schwowe, gell net?!!!)

    Dei

    Jim Kramer

    Seller Pittsburgher Kerl


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: