Karebs Schmeisse 2014!

Guder Daag Blog Leser! Well, do bin ich widder mit en neiem Poscht. Alle Yaahr in Oktower gebt es en abbadiches Fescht do wu ich wuhn: Punkin’ Chunkin’. Zerick in 2011 hawwich en Poscht iwwer selles Fescht. Do iss en Link zu em Poscht:

2011 Poscht – Karebs Schmeisse!

Selles Yaahr bin ich widder uff em Fescht gange un selles Mol hawwich en Video Blog geduh. So, hockt eich hie un guckt mol do!

2014 Karebs Schmeisse Video Poscht!

In re Video hawwich iwwer mei Freind, der Pickders macht, gschwetzt. Do iss en Link zu seinre Website:

Pairodox Photography Blog

Macht’s gut bis es naegschdes Mol!

 

Published in: on 18/10/2014 at 12:38  Comments (2)  

Daheem uff die alt Bauerei!

Guder Daag Blog Leser! Well, do bin ich widder mit en neier Poscht. ‘Sis nau Oktower do in Pennsylvaania un es Wedder iss am wexsele. Die Nechte sin kiehler un die Daage sin katzer, Schpotyaahr iss nau fer schurr do. Aa, mei Hof iss voll mit Bledder, iwwerdem muss ich mei Reche finne un sie zammereche. Sell macht Gschpass fer die aerschde paar Minudde, awwer dann iss es yuscht Arewet. Vielleicht waerr es anners selles Yaahr sei, as mei Dochder endlich gross un alt genunk iss in die Bledder zu schpiele un zu tschumpe.

Mei Poscht selle Woch hot nix mit em Schpotyaahr zu duh. Ich will en Lied in unsere Mudderschprooch deele. “Daheem uff die alt Bauerei” iss en bekanntes Lied in die Grundsau Lodsche un uff die Versammling Circuit. Die Wadde saage viel iwwer unser Kuldur un unser ewige Verbinnung mit re Bauerei un dem Bauer sei Lewe. Der G. Gilbert Snyder hot selles Lied gschriwwe un hot es zu re Melodie vun “Home on the Range” gsetzt. Der aerschde Vaersch iss iwwer es Lewe uff re Bauerei, awwer was ich gleich iss der zwette Vaersch. Der zwette Vaersch iss iwwer der nei Bauerei, die Bauerei im Himmel. Sell iss yo Deitsch, gell? Wann en Deitscher schtarebt, was wolle mer in Himmel finne? Nadierlich, en neies Lewe uff en Bauerei. Sell find ich so siess un gut. Ich hoff, wann ich die Rees nooch mei Gott macht, waerr ich en neie Bauerei finne wu ich in die Ewigkeit mit meinre Familye un all die Gediere un all die Heiliche mitaus Schtress un Druwwel in de Felder schaffe kennt.

Do iss der G. Gilbert Snyder’s Lied: “Daheem uff die alt Bauerei”

O ferwas bin ich vun die alt Bauerei?

Datt waar doch alles gedrei.

Wu gaar nix aageht, as mer nooch net verschteht,

daheem uff die alt Bauerei.

Die alt Bauerei! Datt waare die Kelwer un Sei.

Datt waar gaar nix letz, es waar niemand am gretz.

Daheem uff die alt Bauerei.

Ich kumm mol ee Daag zu der nei Bauerei,

Im Himmel wu alles iss fei.

Mei Freind sehn ich garn, es iss die letscht Arn,

daheem uff der nei Bauerei.

Die nei Bauerei! Datt sin die Leit haerlich un frei.

Die Freindschaft iss datt – sie gehn nimmi fatt.

Daheem uff die nei Bauerei.

Macht’s gut liewe Leit. Ich hoff ich waerr all vun eich iwwerdem in Himmel uff en nei Bauerei sehne.

Do iss en Audio Klip:

Published in: on 11/10/2014 at 09:46  Comments (2)  

En neies Kinnerbuch uff Deitsch!

Guder Daag Blog Leser! Selle Woch hawwich en arrig gute Bekanntmaching zu bringe! Letschde Woch hawwich en E-Poscht vun meim guten Freind in Deitschland, der Michel Werner, grickt. Fer die Leit, die ihn net kennt, loss mich ihn beschreiwe! Der Michel, iss en arrig grosse Freind vun unsere Mudderschprooch. Er iss der Editor vun Hiwwe wie Driwwe, die Deitsche Zeiding. Er, mit Helf vun dem Walter Sauer, en annere gute Mann, sin am schaffe um en neies Kinnerbuch in re Mudderschprooch rauszubringe. Es Buch heesst “Kumm, mer gehne Baere yaage” un sell iss en arrig gutes Kinnerbuch. Ich weess, weil ich en Daadi mit en gleene Kind bin. Zur Zeit les ich viele Kinnerbicher!

Do iss en Link zu en Video die saagt alles iwwer die neie Project:

Video iwwer neiem Buch!

Um es neie Buch zu mache, brauche sie nadierlich Helfe un Geld. Wollt dihr mithelfe? Wann ya, do iss en Link zu ihre Project:

Die Project Website

Seid so gut un denkt glee bissel iwwer was dihr gewwe kennt! So en Project iss graad was mir brauche um unsere scheene Mudderschprooch zu behalde un unnerschtize!

 

 

Published in: on 03/10/2014 at 18:44  Comments (1)