Uff en Sau Rooscht!

Guder Daag Blog Leser! Selle Woch hawwich widder en Video Poscht fer eich. Letschde Wochend hot mei Familye ihre yaehrliche Sau Rooscht uff ihr Land in Nadd Barricks Kaunty. Do iss mei Report vun sellem Daag. Viel Gschpass bei aaschaue!

VIDEO POSCHT: UFF EN SAU ROOSCHT!

Published in: on 27/09/2014 at 05:29  Comments (2)  

Gebet fer die Aerd!

Guder Daag Blog Leser! Well naegschde Woch iss es schunn Schpotyaahr! Wu iss es Yaahr gange? Schpotyaahr mehnt die Arntzeit un en wexsel vun em Wedder. Die Aerd iss allsfatt am drehe. Letschde Woch hawwich en Gedicht gelese un ich hab graad uff es Yaahreswexsel gedenkt. Ich find selle Gedicht, die aa en Gebet iss, arrig schee so ich hab es in Deitsch iwwersetzt. Es waar vun dem William Watkins Reed Jr. uff Englisch gschriwwe.

Gebet fer die Aerd

Bariye Grick mit rennedem Wasser, Adler gschtangt in owwerem Baam, blummende Hiwwel in em Friehyaahr, Hasch, wachtsam un frei.

Scheeheit, scheeheit iwwerall. Singt fer Freed! Helf uns, Gott, behalde re Aerd ihr Bracht fer Mariyes Welt zu seh.

Wellende Felder vun Weeze un Gerscht, grosse Eppel; rot un reif. Vieh weede in die Weed; vun Gott sei Arn, Mann iss verkeschdicht!

Gut versarigt, die Welt um uns rum. Singt fer Freed! Maege ken Gier odder griegerich Raaserei versenke die Aerd odder beraawe em Mann sei Brot.

Behalde uns Gedrei in em Fecht der Aaerd ihre gedrehte Arn zu verschpaare: as mir fechde dem Busch zu redde, reiniche der Schtrom, beschitze es Ufer.

Gott un Mann as Partner am schaffe. Singt fer Freed! Partner schaffe bis as Beschitzere mir saage kenne, “die Aerd iss gut,” nooch ee Mol.

Amen.

Do iss en Audio Klip: 

Published in: on 19/09/2014 at 15:40  Comments (1)  

Ee paar Witze!

Guder Daag Blog Leser! Selle Woch will ich eppes luschdig bringe. Uns Deitsche gleiche gschpassige Gschichte un Witze zu saage. Un nooch ee lange Arewetswoch, braucht mer eppes luschdig. So do sin drei Witze in re Mudderschprooch:

Zwee Bauere sin am schwetze:

Jake: “Ich hab en Gaul kaaft, sie fresst wie en Sau, saaft wie en Kuh awwer sie losst mich net reide.”

Johnny: “Gell? Sie kummt aus Lebnan?!”

Jake: “Ya, wie hoscht du sell gewisst?”

Johnny: “Mei Fraa iss aa vun datt.”

En alter Bauer waar naus ins Feld am schaffe bis es dunkel waar. Iwwer ihm hot es ganz hell grickt und wann er aa uffgeguckt hot, hot er aa en grosse Spaceschiff gsehne. Die Schiff iss nunner ins Feld kumme und die Dier iss uffgemacht. En grosse Creature iss rauskumme, mit en grosse Kopp, drei Aage und griene Haut. Der Bauer waar so ferschrogge , un saagt ‘Ay du Gott im Himmel!’ Der Spacemann dann schtoppt und hot gsaat ‘” Ach duhscht du aa Deitsch schwetze’!

En Mann waar vun de Polis weg’laafe un iss uff ‘ne Bauerei in Lengescher Kaundi kumme. Nooch so viel Laafe hot er nadierlich arrig Darscht g’hatt un hot sich am Wasserloch hieghockt um datt draus zu drinke. En Bauer hot ihn gsehne und ihn uff Deitsch gsaat: “Nix draus drinke, liewer Freind! Die Sei hen drinne gschisse!” Der Mann hot ihn ganz bees gantwadde: “Du dummer Hund! Dei deitsches G’babbl verschteh ich net! Schwetz mol Englisch!” Dann hot der Bauer ihm gsaat, selles Mol uff Englisch: “Zum Drinke sott du allebeed Haende yuuse, es geht viel besser!

Ich hoff as dihr glee bissel heit gelacht hett. Ich lieb Witze, so wann dihr meh Witze uffs Deitsch wisst, seid so gut un schick sie zu mir!

Do iss en Audio Klip:

 

Published in: on 13/09/2014 at 06:30  Comments (1)