En Widderschpiel!

Guder Daag Blog Leser! Selle Wochend bin ich arrig busy am Gaardesache weckzuduhe. So fer mei Poscht selle Woch mach en Widderschpiel vun Aaguscht 2012. Heit muss ich Dillgummere weckduh un do iss en Link zu mei Poscht iwwer wie mer sell duhne. Viel Gschpass bei lese. Naegschde Woch kummt eppes Neies….ich verschprech!

Wie mer Dillgummere macht un weckduht!

Published in: on 31/08/2014 at 11:07  Comments (3)  

Ich un Du!

Guder Daag Blog Leser! Selle Woch bring ich eich en Myusick Video vun meinre Baend: The Broken Spokes. Well, eb ee paar Daage hemmer en Video Myusick Video gemacht vun em alten deitschen Volkslied: Ich un Du. Ich lieb selles Lied. Die Melodie iss schee un die Wadde sin luschdig un gut. So, do sin die Wadde un unnich iss en Link zu re Video. Viel Gschpass bei lese un aagucke!

– Ich un Du –

Ich kann Deitsche Wadde singe, hoff so kannscht du;

Welle dann mitnanner singe, sing ich un du.

Ich bin froh un ich bin hallich, wie bischt dann du?

Ich geh regler nooch die Kaerrich, hoff so duhscht du.

CHORUS:

O, mir singe, sing ich un du;

O, mir blatsche, blatsche dezu.

Vers 2

Fiehl wie en Hutschli in em Feld, wie fiehlscht dann du?

Geb dem Doktor gaar ken Geld, was gebscht dann du?

Rum flungiere duh ich net, hoff net duhscht du;

Ich geh zeitlich nooch im Bett, hoff so duhscht du. – CHORUS

Vers 3

Ich du allsfatt was ich sett, hoff so duhscht du.

Wann ich bees bin, fluch ich net, hoff net duhscht du.

Ich hab so gut gesse heit, hoff so hoscht du,

Blendi Gschpass un Hallichkeit, hoff so hoscht du! – CHORUS (zwee Mol)

 

Link zu re Video: Ich un Du

Published in: on 24/08/2014 at 06:52  Comments (1)  

En neies Schulyaahr!

Guder Daag Blog Leser! Well, ‘sis schpaed Aaguscht un fer mich sell mehnt yuscht ee Ding: en neies Schulyaahr iss ready aazufange. Ya, fer mich fangt es am Dunnerschdaag widder aa. Selles Yaahr waerd mei 13. Yaahr as en Schulmeeschder sei. Ich glaab nau bin ich en “Seasoned Veteran”. Fer viele Yaahre waar ich der neie, der yunge, awwer nau bin ich een vun de alten “Guard.” Die yingere Schulmeeschder un Schulmeeschderin kumme zu mir fer Rat un Gedenke. Mit viele Yaahre voll mit Erfaahring, nau kann ich ihne eppes saage. Ich kann ihne saage was gut geht, un was net gut laaft. Wie sie mit Eldere sich benemme odder wie sie mit Eldere schwetze solle. Ich kann sie aa saage wie sie mit en schlechdem Kind umgehe solle.

Alles was ich weess, hawwich net in en Buch gelese odder in en Klaess vun en Brofessor gelannt. Nee, ich hab viel vun was ich weess vun meinre selwere Erfaahring gelannt. As ich en yingere Schulmeeschder waar, hawwich Dinge gemacht, die net so gut gange sin. Ich hab Lessons gemacht, die ich gedenkt hab, waerr arrig gut sei, un dann hawwich sie gelehrt un sie waare total Flops gewest. Mer lannt am beschde vun unsere Fehler, gell? So nau, mit dreizeh Yaahre vun Erfaahring, fiehl ich, as ich alles aanemme kennt.

Viel Leit saage mir, “Aye, nau dei grosse Vacation iss vorbei. Bischt du draurig?” Ich saag allsfatt, “Nee, ich bin net draurig. Ich bin froh.” “Huh, wie kannscht du sell saage?”, frooge sie. “Well, ‘sis allsfatt uffgeregt mit en neien Schulyaahr aazufange. Neie Schtudente, neie Bicher, neie Gedenke, neie Meeglichkeite. Alles iss so uffgeregt!” saag ich graad. Un sie sin ken Liege. Ich fiehl mich eigetlich so….yedes Yaahr.

Um en guder Schulmeeschder zu sei, muss mer en Feier drin hawwe. Sell Feier brennt un gebt mer die Graft wieter zu geh, mit de schlechte Schtudente zu arewe, mit schtoppkeppiche Eldere zu schwetze un mit dumme Schulraatleit umzugeh. Heitzudaag, geht es net so gut fer Schule in Pennsylvaania. Mir hen wenniche Geld mit zu arewe, die Schtudente misse allsfatt meh un meh Standardized Tests schreiwe, un yedes Yaahr sin die Kinner fauler un fauler. Sie denke sie kenne meh vun ihre Smartphones lanne as vun re Schul. Awwer ich geh weiter. Yede Mariye, schteh ich uff ready zu geh. ‘Sis eefach en draurige Gefiehl zu hawwe, ich denk sell iss wie Grebs. Wann ich aafang so zu denke, dann geht es die Hiwwel arrig schtarrick nunner. Ich will net so fiehle un denke.

Fer dreizeh Yaahre hawwich sell Philosophy ghatt, un ich waerr browiere es fer dreizeh meh Yaahre zu behalde! Nau schmeiss ich mei Hut in die Heh uff en gudes Yaahr mit mei Schtudente!

*** Ich hab browiert en Audioklip reizuduh, awwer es hat net gut geklappt. Es dutt mir leed!

 

 

Published in: on 16/08/2014 at 07:23  Comments (2)  

Uff re Bauerei!

Guder Daag Blog Leser! Selle Woch hawwich widder en Video Blog Poscht gemacht. Ich waar selle Wochend heem uff re Bauerei un ich hab en katze Video gemacht. Nau kannscht du mei Heemet sehne! Do iss en Link zu re Video:

VIDEO UFF RE BAUEREI!

 

Published in: on 10/08/2014 at 19:12  Comments (7)  

Net wie ausgemacht!

Guder Daag Blog Leser! Es gebt en Schpruch der saagt: “Die beschde gemachte Blaane vun Meis un Mannsleit gehne oft schepp.” Selle Wochend hawwich sell erlebt. Mei Bruder un sei Fraa sin zu uns kumme um en Wochend Bsuch zu mache. Die ganze Woch bevor hawwich viel fer sie ausgemacht. Meim Bruder sei Fraa waar nimmi bei Penns Cave gewest. So ich hab gedenkt as mir datthie gehne kennte. Dann hawwich ausgemacht as mir en Picknick bei R.B. Winter Schtaat Park mache kennte un dann zu en scheene Barrick Ausblick gehne. Ich hab aa gedenkt, as wann es Zeit gewwe daet, vielleicht kennte mir en gudes Bier bei Elk Creek Aleworks in Millheim griege kennte. So die ganze Woch hawwich uff mei Blaane gedenkt un gedraamt.

Uff em Freidaagowed sin mei Bruder un sei Fraa vun Barricks Kaunty fattgefaahre. Allebeed hen gemisst uff em Freidaag zu schaffe, so es waar gschwischich sex un siwwe Uhr bis sie fattgange sin. Die Rees vun Heem nooch wu ich wuhn dauert baut zwee un en halwer Schtunn aus. Baut nein Uhr iss mei Cell Phone geklangt. Mei Schwei hot mir en Text Message gschickt. Es saagt: “Mir sin uff Interstate 80 mit en flachen Raad.” O nee, hawwich gedenkt! Es waar dunkel un sie waare im midde der Busch vun Pennsylvaania! Viele Meilen vun I-80 laafe darrich der Busch un die Bariye. Zum Glick hen sie Cell Service! “Ok, mir sin do. Wann dihr eppes braucht, saagt mol.” hawwich gschickt. Sie hot widder gschickt, “Es geht. Mir schtelle die Spare Raad druff un dann kumme mir nooch eich.” Well es Spare Raad waar so en gleenere Raad as der rechte, so sie kennte yuscht 45 MPH faahre! Sie sin endlich um 11 Uhr in die Dier kumme. Besser schpot as nie, gell?

Well, nau unser Samschdaag Blaane misse geennert sei. Mir hen die ganze Mariye versucht ihre Raad zu fixe. Mir sin nooch Bellefonte gfaahre nooch en Gratsch. Dann hemmer gemisst zu waarde. Uff em Middaag waar es endlich faddich un mir waare ready zu geh. Nau hemmer gemisst widder uff die Blaane zu denke. Mir hen gewaehlt nicht nooch Penn’s Cave zu faahre, es gebt nicht genug Zeit. In Blatz vun sell sin mir nooch der Barriye Ausblick gange un dann hemmer ee paar gude Freinde vun mir die in Zucker Daal wuhne bsucht. Sie hen uns eigelaade fer Owedesse zu bleiwe. So hemmer. Es Esse waare arrig gut un es Bier waar frisch un kalt. Uff em Daag sei End waar es en arrig guder Samschdaag. Net was ich ausgemacht hab, awwer nooch gut. Was allsfatt am wichdichgschde iss, as ich Zeit mit meim Bruder un meinre Familye gebracht hab.

So was kenne mir vun sellre Gschicht lanne? Es ist gut Blaane zu mache, awwer vielleicht solle mir aa en Blaan B hawwe!

Do iss en Audio Klip: 

Published in: on 03/08/2014 at 12:37  Comments (1)