Zwee Yaahre alt!

Guder Daag Blog Leser! Well selle Woch muss ich iwwer mei Dochder schreiwe. Uff Dunnerschdaag hot sie ihr Gebottsdaag gfeiert. Nau iss sie zwee Yaahre alt. Ya, sie hot nooch en gude Rees um re Sunn gemacht. Awwer wie wisse mir as sie warricklich elter iss? Do iss en Lischt vun Dinge die ich gsehne un erlebt hab. Ich weess schunn as sie elter iss, was denkt dihr?

1. Sie iss greeser. Sell waar en leichter Ding zu saage. Ya, sie iss greesser un nadierlich wiegt sie meh. Awwer sell Fact bringt eppes mit: mer muss neier Gleeder kaafe. Sie waxt wie en Ungraut! Mer daetet denke as Kinnergleeder billiger sei waerre, sie sin gleener…..well, sell iss net Recht. Es macht nix as sie gleener sin, sie koschdet allsfatt nooch Geld!

2. Sie kann meh schwetze. As dihr schunn wisst, mei Dochder heert zwee Schprooche daheem. Ihre Mudder schwetzt Englisch mit ihr un ich schwetz Deitsch. Es geht eigetlich zimmlich gut. Un es hot en Vorteil, mei Fraa kann nau meh Deitsch schwetze un verschtehe weil sie es so oft vun mir heert. Ich weess aa as es schafft! Nadierlich, weil die Estella viel meh Englisch heert, kann sie meh Englisch verschteh. Sie heert Deitsch yuscht vun mir un mei Familye, awwer mei Familye wuhnt 2 Schtunn mit re Maschine weg, so sie heert es nicht so oft vun ihnne. Awwer, sie verschteht viel. Ich kann sie eppes uff Deitsch saage un sie kann es mache. Do iss en Beischpiel: “Schtell, gebt sell zu dei Mammi.” odder “Schtell, wu iss dei Naas?” odder “Schtell, kumm do.” Wann ich soddiche Dinge saage, duht sie eppes as zeigt mir as sie verschteht was ich saag. Neilich saagt sie meh uff Deitsch. Nau saagt sie Dinge wie: “Daadi Schuhe” odder “Ich Millich”. Ich weess as sie sin yuscht zwee Wadde Saetze awwer, ‘sis Deitsch!

3. Sie iss gscheiter. As sie waxt, kann sie meh mit uns “schpiele”. Fer die Blog Leser die Kinner hen, sie wisse was ich meehn. Die Estella iss yuscht zwee awwer sie weescht schunn was sie mache kennt um ihr Weg zu griege. As en Daadi, muss ich allsfatt schlau bleiwe. Ich kann net denke wie es in ee paar Yaahre vun nau waerrd!

So, do is en katze Lischt vun Dinge die mir zeigt as mei Dochder een Yaahr elter iss. Mol sehne was ich saage kennt wann sie drei Yaahre alt iss.

Do iss en Audio Klip: 

Ich, die Estella, un mei Fraa uff en Ride bei Knoebels Amusement Park.

Ich, die Estella, un mei Fraa uff en Ride bei Knoebels Amusement Park.

 

Published in: on 26/07/2014 at 06:54  Comments (1)  

Iss Fried yuscht en Watt?

Guder Daag Blog Leser! Well, selle Woch hemmer zwee grosse Gschichte in re Nei-ichkeede. Israel schickt Soldaate un Tanks nooch Gaza; es gebt widder en Grundgrieg in re Mittoscht. Die Woch bevor hot Gaza un Israel Missels uff enanner gschosse un viel unschuldige Leit sin gschtarewe. Mir wisse net wie weit selle Grundgrieg gehe waerre. Hoffetlich, net zu lang un hoffetlich mitaus zu viele Verletze.

En grossere Gschicht iss uff em Dunnerschdaag bassiert. En Malaysian Airways Luftschiff waar iwwer die Ukraine nunnergschosse. Baut 300 Leit, unschuldige Leit, sin gschtarewe. Zu re Zeit wisse mir net vollig recht wer es geduh hot. Die Amerikaanische Regiering glaabt as Leit im Oschtukraine, die unabhaengig vun re Ukraine sei welle, hot es geduh. Die Leit, die “Verdeele Rappelkeppicher”, hen Flinte un Missels, die waahrscheinlich aus Russland kumme.

Es waar arrig bedrauerlich fer Malaysian Airways weil eb 4 odder 5 Munet hen sie en annere Luftschiff in re Indian See verlore. Zu re Zeit wisse mir nooch net wu es Luftschiff iss. So viele Tragedies fer ee Kumpanie iss viel zu viel. Ich bin schurr as mit selle letschde Luftschiff Tragedy, waerr die Kumpanie net iwwerlewe. Wer welle mit ihnne fliege?

So nau kummt die grosse Froog: was kummt naegschd? Was waerr kumme wann Russland die Missels zu de Verdeele Rappelkeppicher gewwe hot? Odder die Russe hen sie gelehrt wie mer sie yuuse? Was iss unser Roll do in Amerikaa? Un was saage mir zu de Familye vun re Leit die uff em Luftschiff waare?

Die Naame vun selle Poscht iss en echde Froog fer mich heit. Ich hock mich do in mei Kich mit mei Kaffie un mei Waddefresser…..zimmlich friedlich. Awwer in re ganze Welt iss es net so. Eb ee paar Munet sin die zwee Griege in Irak un Afghanistan beendet. Ich hab gedenkt, endlich kenne mir glee bissel Fried uff re Welt hawwe. Well, as dihr schunn wisst, hawwich net Recht ghatt. Vielleicht in unsere Daage iss Fried yuscht en Watt mitaus en “echde Welt” Mehning. Ich hoff un ich beed as sell net die Waarichlichkeit iss, awwer ‘siss arrig hatt anners zu denke.

Ich geh fatt selle Woch mit zwee Schticke aus re Biewel iwwer selle Topic:

Aus re 34. Psallem: Dreh dich vun Iwwel un duh Gut; such Fried un geh nooch es.

Aus re 16. Kabiddel vun Yohannes: Ich hab dir selle Dinge gsaat, so as in mir du Fried hawwe kenntscht. In selle Welt waerrscht du Druwwel hawwe. Awwer nemm Hatz! Ich habe die Welt iwwerkumme.

Do iss en Audio Klip: 

Published in: on 19/07/2014 at 08:19  Comments (2)  

Die Beschde vun Summer!

Guder Daag Blog Leser! Well, nau iss es Summer do in Pennsylvaania. Fer viel Leit iss der Summer die Beschde Yaahreszeit im Yaahr. Ya, ich gleich aa der Summer awwer ich kann ehrlich saage as ich die annere drei Yaahreszeite aa gleich. Weil es Summer iss, hawwich gedenkt as ich en Lischt vun was ich am beschde vun dem Summer finn.

1. Die Fenschdere uff zu hawwe – Im Summer kann ich all mei Fenschdere in em Haus uff hawwe. Frische Luft kann darrich es Haus blose. Mer kann all die Geruche vun drause rieche: frisch gemaehte Graas, Blumme, die Beem un annere.

2. Draus uff em Bortsch zu hocke – Zidder ich en gleene Bu waar, hawwich arrig gaarn gegliche uff em Bortsch zu hocke. Nau as ich elder bin, hawwich es allsfatt nooch gaarn. Mir hen ee paar Schtiel un en Gaunsche uff meim Bortsch. Am Owed mit mei Fraa un en kaldes Bier uff em Bortsch zu hocke, sell iss hatt zu schlagge!

3. Picknicks un drause esse – Viel Leit hen Picknicks darrich der Summer. Mir aa. Drause zu esse iss eppes anneres. Mer kann warricklich eens mit der Nadur sei.

4. Frische Gaardesache – Was iss Summer mitaus frische Gaardesache? Tomaets un Welschkann frisch aus em Gaarde = nix besser. Wann ich mei letschde Iems auswaehle kennt, daete fer schurr frische Tomaets un Welschkann uff em Disch sei. Mer fiehlt sich arrig gut wann mer in em Gaarde gehe kennt, eppes roppe, es in re Kich bringe un butze un dann es esse.

Do sin yuscht vier Dinge die ich gut am Summer finn. Fer mich persaehnlich, gebt es viel meh. Was iss der Summer fer eich? Schreibt mich mol en Poscht un saagt mir! Schpeeder waerr ich sie in en Blog Poscht schreiwe! Bis es naegschde Poscht, macht’s gut un freht der Summer!

Do iss en Audio Klip: 

Published in: on 11/07/2014 at 09:40  Comments (3)  

Yankee Doodle!

Guder Daag Blog Leser! Ich will mit sell aafange: Hallicher Gebottsdaag Amerika! Ya, heit iss mei Land 238 Yaahre alt un sie guckt allsfatt nooch yung zu mir. Ich waar die letschde 11 Daage in Deitschland so ‘siss siess widder heem zu sei un zu feiere. Selle Woch will ich en katze Poscht schreiwe. Fer ee paar Daage hot en guder Leser mir en EPoscht gschickt. Er hot mich gfroogt Yankee Doodle in Deitsch zu iwwersetze. Weil heit der 4. Tschulei iss, find ich sell en gude Idea! So do iss es in Ehre vun Amerika ihr Gebottsdaag:

Yankee Doodle

Yankee Doodle iss zur Schteddel gange,

Reidet uff en Pony,

Hot en Fedder in sei Hut gschteckt

Un hot’s Macaroni genaamt!

Chorus:

Yankee Doodle hald es uff,

Yankee Doodle dandy,

Meind die Myusick un die Schritt,

Un mit de Maedle sei hendich.

Sell reimt net so gut uff Deitsch awwer mer kann es ennichau singe! Ich winsch all mei Leser en wunnerbaar 4. Tschulei. Hett viel Gschpass uff eiere Picknicks, esst viel un drinkt ee paar Biere uff dem John Adams, dem Thomas Jefferson, un dem Benjamin Franklin. Sie daete arrig gaarn aa mitdrinke wann es meeglich waar!

Do iss en Audio Klip: 

Published in: on 04/07/2014 at 05:29  Comments (4)