Die Welt hot en Party!

Guder Daag Blog Leser! Selle Woch hot en grosse Ding aagfange: Es Welt Koppche. Fer die naegschde 4 Woch gebt es in Brazil es Welt Koppche. Fer die Leit, die net wisse was sell iss, es Welt Koppche iss es greeschte Tournament fer Soccer in re Welt. Alle vier Yaahre kumme die 32 beschde Soccer Teams in re Welt zamme um en Champion zu naame.

As viel vun eich schunn wisst, Soccer iss der Schport fer am menschde Leit in re Welt. Awwer, do in Amerikaa schloofe mir weiter. Nau, nadierlich gebt es Leit in Amerikaa die Soccer gleicht, awwer net so viel wie in Deitschland odder Suddamerikaa. Amerikaa hot en Team in re Tournament selles Yaahr, awwer sie sin in en harte Drupp in em aerschde Rund. Amerikaa muss gege Deitschland, Portugal un Ghana aerscht schpiele. Portugal un Deitschland sin allsfatt arrig gut un Ghana iss ken Witz. Yuscht zwee Teams kenne raus vun em aerschde Rund kumme.

upload-1387551996934822365

Geschder hawwich Schpain gege Holland im em Guckbax gsehne. Wow, was fer en Schpiel! Schpain hot es letschde Welt Koppche in 2010 in Suddafrikaa gewunne. Awwer geschder waare die Schpieler aus Holland viel besser! Sie hen 5-1 gewunne! Die Schpieler aus Schpain hen nooch em Schpiel viel gebrillt.

Der Soccer iss viel Gschpass zu schaue un es macht viel Gschpass fer en Team zu greische, awwer alle sell Gschpass koschdet viel Geld, viel Geld. Brazil hot meh as $11 Billion Daalers schunn ausgewwe. Sie hen neie Stadiums gebaut mit neie Schtroosse un Hotels un Restaurants. Die Leit in Brazil sin net so froh as ihre Regiering so viel Geld ausgewwe hot. Sie saage as viel Leit sin mitaus en Heem, die Schule brauche Geld, die Schtroosse un Bricke in em Land sind gebroche. Sie welle wisse ferwas ihres Land Billions vun Daalers hen fer es Welt Koppche awwer nix fer ihre Leit. Awwer die Tournament geht weiter. Viel viel Leit waerre nooch Brazil kumme um die Schpiele zu seh. Sie waerre viel Geld ausgewwe fer Hotels, Esse un Souvenirs.

So nau hemmer vier Woch vun Soccer. Ich waerr weiter fer Holland un Deitschland greische. Ich glaab Amerikaas Team iss net gut genunk zu gewinne. Es Endschpiel waerr uff em 13. Tschulei sei. Mol sehne welle zwee Lenner fer es Koppche schpiele waerre.

Do iss en Audio Klip:

Published in: on 14/06/2014 at 07:02  Leave a Comment  

Der Pingschde ihr Gschicht!

Guder Daag Blog Leser! Heit iss Pingschde in em Grischtliche Kalenner. As en Grischt iss heit en abbadicher Daag, as en Schulmeeschder vun Schprooche iss es aa en abbadicher Daag. Heit feiere mir re Karrich ihr Gebott. Der Heilige Geischt iss zu re Aerd kumme un hot die Yinger vun Yesus die Gaab gewwe Fremdschprooche zu kenne un zu schwetze. Der Gott kennt alle Schprooche vun Englisch zu Franzeesisch zu Yapanisch un nadierlich Deitsch! Schprooche verdeele Leit net, in viele Schtelle bringe Schprooche Leit zamme. Wie der Nelson Mandela gsaat hot: “Wenn du schwetzscht zu en Mann in en Schprooch die er verschteht, geht sell zu sei Kopp. Wenn du schwetzscht zu ihm in seinre Schprooch, geht sell zu sei Hatz.”

Pentecost

Heit will ich der Pingschde ihr Gschicht uff Deitsch gewwe. Es kummt aus em zwette Kabbidel es Buch vun Acts. Viel Gschpass bei lese!

Wann der Daag vun Pingschde kumme iss, waare sie alle in ee Blatz zamme. Bletzlich, en Klang wie en greftiger Wind iss vun der Himmel kumme un hot es ganze Haus, wu sie waare, aagfillt. Sie hen gsehne, was gscheint hen, as Zunge vun Feier die abgedeelt hen un hen uff die Leit gschtoppt. Alle vun ihne waare mit dem Heilige Geischt aagfillt un sie hen aagfange in annere Schprooche zu schwetze, as der Geischt sie geholfe hot.

Zu re Zeit waare in Yeruslaem Gott-farriche Yudde vun alle Land unnich Himmel. Wann sie sell gheert hen, en Drupp vun Leit sin verschtaunt zammekumme, weil alli-epper ihr eegne Schprooch gheert hen. Vollig verschtaunt, hen sie gfroogt: “Sin sie, die am schwetze, Galileans? Wie iss es as yede vun uns sie in unsere Schprooch heere un verschtehe kennte? Parthians, Medes un Elamites; Leit aus Mesopotamia, Yudea un Cappadocia, Pontus un Asia, Phrygia un Pamphylia, Egypt un Aadeele vun Lybia net weit weg vun Cyrene; Bsucher aus Rome; Cretans un Arabs – mir heere sie die Wunner vun Gott in unsere eegne Schprooche saage! Verschtaunt un verwart, hen sie enanner gfroogt, “Was mehnt sell?” Manniche, awwer, hen Gschpass iwwer sie gemacht un hen gsaat, “Sie hen zu viel Wei gedrunke!”

Dann der Peter iss mit de Elfe uffgschtanne, er hot sei Schtimm nuffgemacht un hen zu re Leit gsaat: “Mityudde un all vun eich die in Yersualem wuhne, loss mich sell zu eich auslege; harrich mol achtsam uff was ich saag. Selle Leit sin net gsoffe, wie dihr denkt. ‘Siss yuscht nein Uhr am Mariye!

Nee, sell iss was der Brofeet Yoel gsaat hot: “In die letschde Daage, der Gott saagt, Ich waerr mei Geischt uff all die Leit ausschenke. Eier Seh un Dechder waerre weissaage, eier yunge Menner waerre Visions sehne, eier eldere Menner waerre Draame draame. Aa mei Abwaarde, Menner un Weibsleit, waerr ich mei Geischt in selle Daage ausschenke, un sie waerre weissage. Ich waerr Wunner in Himmel un uff re Aerd, Blut un Feier un Rauch zeige. Die Sunn waerr dunkel sei un der Muun waerr Blut sei eb die Aakumme vun dem gross un herrliche Daag vun dem Herr. Un alle, wer ruft uff dem Herr sei Naame, waerr gerett sei.”

Do iss en Audio Klip:

Published in: on 08/06/2014 at 12:30  Comments (2)