Escheputtel!

Guder Daag Blog Leser! Eb ee paar Woch zerick hawwich en Iwwersetzing vun dem Wilhelm Tell uff Deitsch geduh. Selle Woch will ich widder en gude bekannte Gschicht uff Deitsch iwwersetze: Escheputtel. Viel Gschpass bei Lese!

——————-

En Kutsch schtoppt var der Dier un die zwee Schweschder mache die Kutschdier uff. “Do sin die Eilaadinge fer den Dans in dem Keenich sei Haus. ‘Sis dem Keenichsoh sei Gebottsdaag!”

“Ich mach en Dansfrack,” saagt die Escheputtel. “Ich hab weisse Dicher, griene Bande un eppes Schnurr!”

“Ha, ha, ha”, lacht die dicke Schweschder vun Escheputtel. “Sell iss en Eilaading fer dem Keenichsoh sei Dans un net  fer den Marrick! Du kummscht net mit! Do, nemm en Bese un en Schtaablumpe un putz es Haus!”

Escheputtel iss arrig schee. Ihre Schweschdere sin awwer arrig hesslich. Die eene iss gross un darr, mit gschprutze Haar. Die annere iss glee un dick, mit graade Haar.

Escheputtel will der Keenichsoh sehne. “Ich helf dir”, saagt en gude Fee. Sie reecht die Dicher, Bande un Schnurr mit en Hexeschtang. Un bletzlich legt uff em Bett en wunnerbaare Dansfrack.

“Schtell zwee Glesser uff em Bodde”, saagt die gude Fee. Sie ennert sie in glessere Schuh. “Gross Dank”, saagt die Escheputtel frehlich, “nau kann ich aa zum Dans geh.”

Die gude Fee ennert en Karebs, weisse Meis in en Kutsch mit weisse Geil. “Kumm nooch eb Halbnacht widder Heem”, saagt die gude Fee.

Die Kutsch schtoppt var dem Keenichshaus. Die Escheputtel geht die Dreppe uff. Es Danzschtubb iss voll mit Leit un alle sin am danse.

“Sei so gut un dans mit mir”, saagt en yunge Mann. ‘Sis der Kennichsoh! Die Escheputtel un der Keenichsoh danse der ganze Owed. En glickliches Paar.

Der Keenichsoh froogt die Eschputtel viele Frooge, awwer die gebt ihn ken Antwadde. “Ich kann ihm net saage as ich aarm bin!” denkt die Escheputtel.

Ding, dong, ding, dong. “Ich muss Heem geh, ‘sis schier gaar Halbnacht!”, saagt die Escheputtel. “Schtopp, bleib do!” schreit der Keenichsoh, “Sei so gut, geh net!” Die Eschputtel tschumpt in ihr Kutsch un die Geil schpringe fatt.

Der Keenichsoh seht en glessere Schuh vun Escheputtel uff de Dreppe. “Ich bhald sell Schuh”, saagt er, “un ich such nach ihr!”

Ding, dong, ding, dong. “Oh Gott, ‘sis schunn Halbnacht”, saagt die Escheputtel. Ihr scheene Dansfrack ennert sich widder in Dicher un sie hockt sich uff en Karebs. Uff ihr Kopp sin en weisse Maus.

Uff em naegschde Daag kummt der Keenichsoh zu der Escheputtel ihr Haus. “Der Schuh basst mir!” saagt een Schweschder. “Ach, sei net so dumm”, saagt die annere Schweschder, “dei Fuss iss zu gross. Der Schuh basst mir!”

Die Escheputtel kummt in es Schtubb. “Sei so gut un browier der Schuh”, saagt der Keenichsoh. Der Schuh basst ihr fehlerfrei. Die Escheputtel un der Keenichsoh heiraate un lewe bis an ihr Lewesend glicklich un mitaus Druwwele.

Do iss en Audio Klip:

Published in: on 31/05/2014 at 06:22  Comments (3)  

Der Aerd ihr Lied!

Guder Daag Blog Leser! Selle Woch hawwich eppes abbadiches fer eich zu lese. Ee paar Woch zerick hawwich en E-Mail vun dem Jake Wentzel aus Knoxville, Tennessee grickt. Er hot mich gschriwwe weil er mei Blog un PA Deitsch Videos am yuuse waar um sei Deitsch zu verbessere. Ab un zu hot er mich Frooge gschriwwe iwwer deitsche Wadde un Grammar. Neilich hot er mich widder gschriwwe mit en Copy vun en Gedicht uff Englisch. Es Gedicht heesst “Song of the Earth” un waar vun seim Cousin, der Richard Wentzel, gschriwwe. Es Gedicht waar in en Buch mit dem gleiche Naame un iss im 1946 rauskumme. Es Buch waar vun dem Jake sei Onkel, der Fred Wentzel, gschriwwe. The Christian Education Press hot sell Buch rausgewwe. Der Fred un sei Familye hen uff en Bauerei uff em Route 73 yuscht oschtlich vun Stony Creek Mills gewuhnt. Dem Fred sei Daadi waar en Truckbauer un hot en Gaardesache-Schtand uff em Marick in Reading.

Ich hab sell Gedicht arrig schee gfunne un hab gewaehlt es uff Deitsch iwwerzusetze. Do iss was ich geduh hab:

Der Aerd ihr Lied

Sing net zu mir vun de aaschmeechliche Frehlichkeite,

Belowe die Luschte vun zeitlichem Waert –

Les zu mir es Buch vun em Feld un dem Busch;

Sing zu mir en Lied vun der Aerd.

 

Brumm der sanfte Laut vun der siesse Moiblumm;

Bau mir en Chord vun de Wiese ihr schtarricke Grick;

Bieg mir die Bog vun dem Beint, as die Sunnlicht

Fingert der Sunneunnergang in der Draam.

 

Verblick mich der Weis der Blug in die Zeitzubringe,

Grund frisch gschwolle mit der Erschaffing ihr helle Schmatze;

Schlagg mir die Cadence vun dem Wind in em Weezefeld;

Klang mir die Chorus vun em Rege.

 

Ye, sing net zu mir vun de aaschmeechich Frehlichkeite,

Belowe die Luschte vun zeitlichem Waert –

Mach dem grosse Korgsang der Gott un sei Waxe nuff:

Sing zu mir es Lied vun der Aerd.

– Richard C. Wentzel

Biography - Uff Englisch

Der Schriewer sei Biography

 

Do iss en Audio Klip:

Published in: on 18/05/2014 at 12:11  Comments (4)  

Es Freihyaahr iss die Blansezeit!

Guder Daag Blog Leser! Well, do bin ich widder mit eppes fer eich zu lese. Ich kann endlich saage as es Friehyaahr do iss. Fer uns in Pennsylvaania, iss es net schtarrick genunk kumme. Mir hen en arrig langer un harter Winder ghatt. Es waar kelter as normal un selles Yaahr hemmer Schnee…viel Schnee ghatt. Die letschde paar Yaahre hemmer viel Glick ghatt. Es waar net so kalt un schneeig, awwer 2013-2014  waar wie viel alde Leit zu mir gsaat hen: “En echde Winder…wie die gude alte Zeit, Yaahre zerick!”

Well, selle Woch sin die Temperatures glee bissel heecher gegraddelt. Eigetlich, waar es arrig waarm geschder. Mir hen 84 do bei mir ghatt! So ya, es Freihyaahr iss do. Manniche vun mei Blumme sin schunn uff un sie rieche so gut…abbadich mei Pingschtblumme. Pingschtblumme…burbel un siess…sell iss Friehyaahr zu mir. Friehyaahr meehnt aa as ich endlich in mei Gaarde gehe kennt. Ee paar Woch zerick hawwich mei Rototiller raus aus em Gratsch grickt un ich bin in die Gaarde gange um der Grund wacker vun sei Winderschloof zu bringe.

Selle Woch hawwich baut 3 Mol Schpaaregraass gepickt un graad in Budder gebrode. Mit Sals un Peffer….nix besser. O ya, mit en kaldes Bier iss es besser! Letschde Sunndaag hawwich mei Zwiwwele geblanst un geschder hawwich Buhne, Gehlriewe un Rotriewe Saame geblanst. Nau muss ich yuscht waarte bis sie waxe. Ich will aa Welschkann, Graut, Gummere, Chard, Kale, Peffer un Tomaets nooch blanse, awwer ich muss waarte fer die Blanse zu blanse bis Gedechtnissdaag. Do bei mir in de Bariye kann es nooch zu kalt darrich die Necht sei fer gleene Blanse.

Viel Leit hen ihr eegne Detox Regiment in unsere Gesellschaft. Viele schpringe odder gehe campe, annere lese odder schpiele en Schport, sie heere Myusick odder gucke Guckbax awwer fer mei Geld, gebt es nix besser fer dei Blutdruck nunner zu bringe un dei Schtress zu verliere as in der Grund zu schaffe. Fer uns Deitsche iss es in unsere Blut un Genes mit dem Grund zu schaffe. Es bringt uns neecher zu unsre Welt un ich glaab aa neecher zu unsrem Gott. Mei Rot fer all mei Blog Leser iss: blanst en Gaarde, ‘siss gut fer eiere Gsundheit un eiere Seele! Un nau iss graad die rechte Zeit fer sell zu duh!

Bis es naegschdes Mol, macht’s gut un schwetzt Deitsch!

Do iss en Audio Klip:

Published in: on 10/05/2014 at 05:32  Comments (2)