75th Barricks Kaunty Versommling!

Guder Daag Blog Leser! Do kummt widder en Video vun mir. Letschde Mundaag waar der 75th Barricks Kaunty Versommling. Es waar en Owed voll mit gude Esse, gude Myusick, gude Gschichte un viel PA Deitsch. Do iss en Video Iwwerguck vun sellem Owed.

75 Barricks Kaunty Versommling Video!

Viel Gschpass bei aagucke!

 

Published in: on 26/04/2014 at 06:58  Comments (2)  

Versommling Schwetz 2014!

Guder Daag Blog Leser! Yuscht eppes katz fer eich. Geschder waar der Barricks Kaunty Versommling un ich hab glee bissel gschwetzt. Ich will mei katze Schwetz do uff re Blog poschde. Ich hab aa en katze Video gemacht. Hoffetlich kann ich sell bis Samschdaag poschde. Awwer bis dann, do iss was ich geschder gsaat hab:

————–

Gude Owed liewe Leit. Ich will aafange mit en Gross Dank an die Barricks Kaunty Versommling Raad fer die Gelegeheit denowed zu schwetze. Ich bin der Douglas J. Madenford un ich waar in em Reading Grankehaus gebore un bin uffgewaxne uff en gleene Bauerei in Centre Taunschip, un ich bin en Pennsylvaanisch Deitscher.

Ich bin do denowed fer zwee Reasons: 1. Um alli-epper wisse zu losse wie unsere Schprooch schteht do in selle Gebei un aa drausse in re Welt un 2: um alle vun eich en Gfalle zu frooge, awwer ich waerr sell fer schpeeder in mei Schwetz verschpaare.

Wu schwetze Leit unsre Schprooch? Ya, ‘sis allsfatt nooch do in Barricks Kaunty gschwetzt, nee ‘sis net wie es waar, awwer ‘sis nooch gschwetzt. Ich bin arrig froh zu saage as unsre Schprooch iss aa viel in der Internet gschwetzt. Die letschde paar Yaahre, hawwich mich eigweidt, um alles zu duh fer unsre scheene Schprooch zu behalde. Ich schreib en Blog alli Woch, der alles uff Deitsch iss. Nooch zwee Yaahre, hawwich en Website gemacht. Sell hot Online Videos fer Leit die Deitsch lanne welle, die Videos koschde nix zu begucke. Es gebt 41 grammar Videos un 20 Videos um Deitsche Wadde zu lanne. Dazu selle zwee Websites, gebt es drei Druppe uff der Facebook die yuscht uff Deitsch sin.

Bis heit iss mei Video Series meh as 8,000 Mol aabeguckt. Die Begucker kumme aus ganze Amerikaa un aa Leit die aus Euorpe un Afrika kumme. Unsere Schprooch geht um re ganze Welt rum. Alli Woch grieg ich Emails vun Leit die arrig uffgeregt sin um Deitsch zu lanne. Viele sin Leit die die Schprooch as en Kind gheert hen, awwer ihre Eldre odder Grosseldere hen es net zu ihnne gelaernt. Annere Leit sin arrig uffgeregt um meh iwwer die Amische un Mennischde Leit zu lanne un mit ihnne zu schwetze. Ich bin do zu saage as es gebt Leit die unsere Schprooch lanne un Leit die unsere Schprooch nooch schwetze.

Geschder waar Oschder: en Daag in dem unsere Grischtliche Leit die Ufferschtehung vun unser Herr feiere. Ich find es arrig basslich as mir do denowed zammekumme. Viel Leit saage as unsere Schprooch schtarewbt odder as es schunn Dod iss. Ich bin do zu saage as es nooch am Lewe iss. Es iss yuscht Dod, wann mir alle glaawe as es Dod iss. Un so lang as mei Zung bewege kann, iss Deitsch net dod. Mir misse weiter geh. Schwetz Deitsch zu eier Kinner un eier Kinskinner. Sei schtolz uff wer dihr seid, uff wer mir sin, uff unsere Kuldur un uff unsere scheene Schprooch. Sankt Lukas saagt: Ferwas guckscht du fer die Lewende dabei die Dode? Geh naus, mit Verdraue as kummende Gschlechte waerre wisse Wadde wie “Verhuddelt” un “Schusslig”.

Unsere Schprooch iss net dod un mir versommelt do, denowed, waerre sehne as es net ausschtarewebt. Ich mach sell Verschprech un ich froog eich mit mir aazunemme um Deitsch am Lewe zu behalde. Zamme kenne mir es duhe.

Gross Dank. Nau, macht’s gut un schwetzt Deitsch!

Published in: on 22/04/2014 at 17:27  Comments (1)  

En Gschicht fer alle!

Guder Daag Blog Leser. ‘Sis Karfreidaag am Mariye un ich hab gedenkt, as en guder Poscht die Gschicht vun em Yesus sei Dod un sei Uffschtehung waerr. Sell kummt vun dem Ralph Wood sei Iwwersetzung vun es Evangelium vun Matthaeus.

Aus em achtunzwansichscht Kabiddle:

“Un wie der siwwet Daag verbei waar, sin Maria Magdalena un die annere Maria kumme in der Helling vum aerschde Daag, fers Graab zu sehne. Un sehnt, die Aerd hot aagfange gewaldich zu wackle, en Engel vum Herr iss vum Himmel runnerkumme, iss ans Graab gedrede, hot der Schtee weggerollt vun der Dier un hot sich druffgsetzt. Sei Gschtalt waar so hell wie der Blitz un sei Gleeder waare schneeweiss. Die Wechter waare vergelschtert, un hen wie dod datt gelege. Awwer der Engel hot die Weiwer gsaat: Farricht eich net. Ich weess yo. ass ihr Yesus suche wu sie gegreizicht hen. Er iss net do, er iss vun de Dode uffgschtanne, yuscht wie er’s gsaat hot. Sehnt, do iss der Blatz, wu der Herr gelege hot. Nau geht gschwint un verzehlt seine Yinger: Er iss uffgschtanne vun de Dode, un sehnt, er geht eich varnenaus nooch Galilea hie. Datt sollt ihr ihn sehne.”

Ich winsch all mei Blogleser en hallicher un friedliche Oschder!

Published in: on 19/04/2014 at 06:18  Leave a Comment  

Oschder uff der Bauerei!

Selle Woch hawwich eppes anneres fer eich! Samschdaag waar ich in Kutzschteddel fer Oschder uff der Bauerei. Ich hab en Video Poscht gemacht. Du kannscht selle Video do sehne:

Oschder uff der Bauerei Video

Viel Gschpass bei gucke!

Published in: on 13/04/2014 at 19:02  Comments (2)  

En Psalm fer eich!

Guder Daag Blog Leser! Well die Faschzeit iss schier gaar vorbei schunn. Wu sin die Daage gefloge? Nau kumme mir arrig schtarrick uff die Heiliche Woch. Naegschde Sunndaag iss Pallemsunndaag un dann hemmer Griendunnerschdaag un Karfreidaag. Naegschde Woch waerr ich net daheem sei, so es waerr ken neie Poscht gewwe. Deswege schreib ich mei Varoschder Blog Poscht selle Woch. As mir uff re Heiliche Woch denke, denke mir uff alles was der Gott un der Yesus fer uns geduh hen. En Schtick aus em Biewel der wichdich zu mei Glaawe iss, kummt aus em Buch vun de Psalme. So fer selle Woch un fer die naegschde Woch hawwich der 23. Psalm uff Deitsch iwwersetzt. Ich winsch eich en guti Woch un ich hoff as dihr dem Gott sei Fried in selle Heilichezeit finne kennt.

Der Herr iss mei Schaefer, ich fehle nix.

Er macht mich in griene Weede hiezuliege,

er fiehrt mich newwe ruhiche Wasser,

er frischt mei Seel uff.

Er fiehrt mich um die rechte Wege rum,

fer seinre Naame die Wille.

Yea, as ich darrich es Daal vun em Dod sei Schadde laaf.

Ich waerr ken Iwwel farriche, weil du mit mir bischt;

dei Schtang un dei Schtaab, sie dreeschde mich.

Du machscht en Disch var mich graad var meine Feinde.

Du salwscht mei Kopp mit Eel ei; mei Kuppche laaft ab.

Fer schurr waerr dei Gude un Lieb mich folgye,

all die Daage vun meim Lewe,

un ich waerr in dem Herr sei Haus fer ewich wuhne.

 

Do iss en Audio Klip:

 



Published in: on 05/04/2014 at 07:30  Comments (3)