Der Robert Frost uff Deitsch!

Guder Daag Blog Leser! Well, letschde Woch hawwich glee bissel iwwer die Emily Dickinson gschriwwe. Ich hab aa en bekannte Gedicht vun ihr iwwersetzt. Selle Woch will ich sell widder duh, awwer eppes iwwer en annere Amerikaanischer Dichder. Selle Woch will glee bissel iwwer der Robert Frost schreiwe.

Der Dichder, Robert Frost.

Der Dichder, Robert Frost.

Robert Lee Frost (Matz 26, 1874 – Yenner 29, 1963) waar en Amerikaanischer Dichder. Viel vun seine Gedichde waare iwwer es Lewe uff em Land, abbadich es Lewe in lendlich Nei England in em friehere Yaahre vun em 20. Yaahrhunnert. Er iss een vun de wichtigischde Amerikaanische Dichder. Er hot vier Pulitzer Preize fer Gedichde gewunne un hot aa die Congressional Gold Medal im em Yaahr 1960 fer sei Arewet grickt.

Do iss mei Iwwersetzing vun een vun seinre bekannteschde Gedichte:

Die Schtross net genumme.

Zwee Schtrosse sin in en gehle Busch vunenannergange.

Un drauerichliche, kennt ich net allebeed nemme.

Un een Laefer sei, lang hawwich ich gschtanne.

Un hen een nunnerguckt so weit as ich kennt

Nooch wu es in em Unnerhols geboge hot;

Dann hawwich die annere genumme, graad so schee wie die annere,

Un hot vielleicht der bessere Aaschpruch,

Weil es graasich waar un hen Waere gewollt;

As fer sell, die Verweile datt

Hot sie baut die gleiche gewore,

Un allebeed sell Mariye ewe lege

In Bledder, die ken Schritt schwatz gedappelt hot.

Oh, ich hab die aerschde fer en annere Daag behalde!

Awwer ich weess wie Weg nooch Weg geht,

Ich hab gezweifelt eb ich iwwerdem zerickkumme soll.

Ich soll sell mit en Seifzer saage

Ariyets Alder un Alder schpeeder:

Zwee Schrtosse sin in en Busch vunenannergange, un ich –

Ich hab die eener genumme, die wennicher genumme waare,

Un sell hot all die Unnerschitt gemacht.

Do iss en Audio Klip:

Published in: on 28/03/2014 at 18:24  Comments (3)  

Die Emily Dickinson uff Deitsch!

Guder Daag Blog Leser! Selle Woch will ich en arrig bekannte Gedicht ins Deitsch iwwersetzte un es kummt vun epper die aa arrig bekannt iss, die Emily Dickinson.

Emily Elizabeth Dickinson (Diesember 10, 1830 – Moi 15, 1886) waar en Amerikaanische Dichderin. Sie waar in Amherst, Massachusetts, gebore un ihr Familye waar glicklich. Sie hot an die Amherst Academy schtudiert un dann hot glee bissel Zeit an Mount Holyoke Weibsleit Seminary gebrocht eb sie zerick zu ihr Familye gange iss. Sie waar net zu uffne un hot viel Zeit in ihr Haus gebrocht. Ihre Freinde hen yuscht mit Briefe mit ihr gschwetzt.

483px-Emily_Dickinson_daguerreotype

Die Emily hot meh as 1,800 Gedichde in ihr Lewe gschriwwe awwer yuscht baut 12 waare gedruckt.  Viele vun ihre Gedichte sin iwwer Dod un Unschtarewelichkeit. Viele hen ken Naame un waare net wie die annere Gedichte vun sellre Zeit.

Es aerschde Buch vun ihre Gedichte iss im Yaahr 1890 rauskumme. Es waar vun zwee vun ihre Freinde gedruckt, awwer sie hen die Gedichte viel verennert. Die aerschde Versammling vun ihre Gedichte (mitaus Enneringe) iss yuscht im Yaahr 1955 rauskumme! Die Dickinson, heitzudaage, iss een vun die wichdigschde Amerikaanische Dichderin.

Heit will ich een vun ihre beschde Gedichte ins Deitsch iwwersetze:

Weil ich net fer der Dod schtoppe kennt,

Iss er gutmiedich fer mich gschtoppt;

Die Kutsch hot yuscht uns ghowe

Un die Unschtarewelichkeit.

Langsam sin mir gfaahre, er hot ken Dummele gwisst,

Un ich hab weggschtellt

Mei Arewet, un mei Freizeit aa,

Fer sei Hoflichkeit.

Mir sin die Schul vorbeigange, wu Kinner browiert hen

Uff Recess, in re Ring;

Mir sin die Felder vun Frucht vorbeigange,

Mir sin die Sunneunnergang vorbeigange.

Odder, er iss uns vorbeigange;

Die Daa hen ziddere gewaxse un waar kiehl,

Fer yuscht Gossamer mei Frock,

Mei Koppduch yuscht Tulle.

Mir hen var en Haus gschtoppt, es scheint

En gschwelle vun re Grund;

Es Dach waar schwerlich sichtbaar,

Der Sims awwer yuscht en Grundhiwwel.

Seiddem ‘siss Yahrhunnert, un yede

Fiehlt katzer as der Daag

As ich gsehne hab as die Geil ihre Kepp

Im Richting Ewigkeit waare.

 

Do iss en Audio Klip: 

 

Published in: on 22/03/2014 at 16:29  Comments (4)  

Dem Sankt Patrick sei Daag!

Guder Daag Blog Leser! Well uff em Mundaag iss en arrig bekannter Feierdaag do in Amerikaa. Fer uns Deitsche iss es yuscht en annere Daag, odder vielleicht en Daag wu mer en Bier drinke kennt. Mundaag iss dem Sankt Patrick sei Daag. Fer die irische Leit iss es ihr Daag im Yaahr. In sellre Poscht will ich glee bissel iwwer der Mann, Sankt Patrick, schreiwe.

Der Patrick as Bischoff.

Der Patrick as Bischoff.

Sankt Patrick iss een vun de bekannteschde Heilichi in re Welt. Er iss der Apostel vun Irland. Er waar bei Kilpatrick, net weit Weg vun Dumbarton, Schottland in em Yaahr 387 gebore. Er iss uff em 17. Matz im Yaahr 461 bei Saul, Downpatrick, Irland gschtarewe. Sei Eldere waare Caplurnius un Conchessa, allebeed waare Reemer die im Reemische Britain gewuhnt hen.

As der Patrick 14 Yaahre alt waar, waar er nooch Irland as en Schklaaf genumme. Zu re Zeit waar Irland en Land vun Druids un Heide. Er hot ihre Schprooch un ihre Kuldur gelannt. As er en Schklaaf waar, iss er nooch Gott gedreht. Er hot gschriwwe:

“Dem Gott sei Lieb un sei Bang in mir sin meh un meh gwaxse, so as mei Glaawe, un mei Seel  nuffgange iss. Ich hab in em Busch un uff de Bariye gebet. Ich hab ken Schnee, ken Eis odder ken Rege gfiehlt.”

Dem Patrick sei Gfangnerzeit iss bis er 20 Yaahre alt ausgedauert. Er hot en Draam, in dem die irische Leit gsaat hen “Mir beddle dir, heiliche Yung, kumm un laaf um uns rum.” Awwer der Patrick iss vun Irland fattgange un hot aagfange mit sei Lanning fer en Briescht zu sei. Schpeeder iss der Patrick en Bischoff aagsetzt un iss zerick nooch Irland gange um re Watt vun Gott an die irische Leit beizubringe.

Der Patrick hot viele irische Leit bekehrt. Er un sei Yinger hen oft gebreddicht un hen dausende bekehrt. Viele Karriche sin darrich es Land uffgebaut. Keeniche un ihre ganze Familyes sin zu Grischt bekehrt as sie dem Patrick sei Wadde gheert hen.

Der Patrick hot gebreddicht un hot es ganze Irland fer 40 Yaahre bekehrt. Er hot viele Wunner geduh un hot viel iwwer sei Lewe mit Gott gschriwwe.

Ferwas en Glee? Der Patrick hot der Glee geyuust um die Dreieenichkeit auszulege un nau iss es en bekannte Aazeeche vun Irland.

En Glee, en Aazeeche fer die Dreieenichkeit: Gott, der Soh un der heiliche Geischt.

En Glee, en Aazeeche fer die Dreieenichkeit: Gott, der Soh un der heiliche Geischt.

Der Patrick waar en demiedicher, frommer, sanfter Mann, der sei Lieb un Andenk an Gott en Beischpiel fer all vun uns sei soll. Er hot gaar nix gefarricht, aa net dem Dod. Sei Verdrauer an Gott waar so vollschtendich as es hatt iss fer uns zu verschteh.

So uff em Mundaag, denkt glee bissel an der Mann der an so viel Leit denke….un drink mol glee bissel Guiness in sei Ehr.

Do iss en Audio Klip:

 

 

Published in: on 15/03/2014 at 06:26  Comments (4)  

‘Sis widder Faasnacht Zeit!

Guder Daag Blog Leser! Well, ich bin arrig mied. Ich hab der ganze Daag mit Faasnachts gebrocht. Dinschdaag iss Faasnacht, un weil ich muss uff re Arewet geh, hawwich mei Faasnachtkuche heit gemacht. Eigetlich, hawwich gschdrowed aagfange. Do sin ee paar Pickders vun Aafang bis es End.

Do sin die Dinge die mer braucht: Mehl, Millich, Grummbiere, Budder, Oier, Zucker, Sals un Satz.

Do sin die Dinge die mer braucht: Mehl, Millich, Grummbiere, Budder, Oier, Zucker, Sals un Satz.

Ich un der Deeg am aariehre.

Ich un der Deeg am aariehre.

Der Deeg am naegschde Mariye.

Der Deeg am naegschde Mariye.

Die Mammi am ausdreele un schneide.

Die Mammi am ausdreele un schneide.

Sie sin ready fer die Eel.

Sie sin ready fer die Eel.

Ich am brode. 'Sis waar glee bissel kalt in re Gratsch.

Ich am brode. ‘Sis waar glee bissel kalt in re Gratsch.

25 Dutzend ready zu esse!

25 Dutzend ready zu esse!

Nau iss all unsre Arewet widder faddig fer en anneres Yaahr. Mariye ess ich ee paar mit mei Kaffie.

 

 

 

 

 

Published in: on 01/03/2014 at 19:35  Comments (3)