Zammelaaf in Lepnan!

Guder Daag Blog Leser! Selle Woch hawwich en grosse Bekanntmaching zu gewwe. Alle Yaahr in Lepnan gebt es en Pennsylvaanisch Deitsch Fescht. Selles Yaahr iss der Pennsylvaanisch Deitsch Zammelaaf uff der 22. Matz, 2014. Es waerr uff re New Covenant Grischtliche Schul (452 Ebenezer Schtross, Lepnan, PA) sei. Es koschdet nix reizugeh! Alles fangt um 9 Uhr aa.

Sie waerre Deitsche Handwarricks un Kunscht zu kaafe un aa nadierlich appeditliches Deitsches Esse. Selles Yaahr gebt es aa Kinnerschpiele! Es gebt ee paar Schwetzer un Leit die en Presentation mache waerre:

9:30 – Die Schwadore Schalle waerre singe. Die Schalle iss en Drupp vun Kinner un Uffgwaxeni die in re Mudderschprooch singe. ‘Sis arrig schee die Schprooch mit Myusick zu heere, abbadich wann es vun Kinner gsunge iss. 

10:45 – Der Dr. Robert Kline waerr die Presentation “Schweschder Schprooche: Pennsylvaanisch Deitsch un Yiddisch” gewwe. Sell klangt arrig inderessant. Ich hoff as epper es uff Video uffnemme kennt.

12:00 (Middaag) – Der Dolpehock Sanger Chor waerr singe. Der gut bekannte Chor vun BCTV waerre en gleene Koncert gewwe. Die singe allsfatt siess un ihre Schticke sin vun Kaerrichliche Schticker bis luschdige Schticker.

1:00 – Pennsylvaanisch Deitsche Vendue. Ich weess net was mer datt kaafe kennt, awwer ‘sis allsfatt Gschpass en guder Groier zu heere.

2:00 – Der Brofessor Joerg Meindl waerr die Presentation “Graad wie heem? En Pelzer guckt uff de Pennsylvaanisch Deitsche.” Sell waerr aa arrig gut un inderessant zu heere. Mir brauche en Report odder Video vun sell hawwe!

3:00 – Der gut bekannte Keith Brintzenhoff waerr en Koncert un Reed gewwe iwwer Deitsche Myusick, Dans un Inschtruments gewwe. Er dutt allsfatt en guder Tschopp. Ich bin schurr as mer kennt aa mitsinge wann er eppes schpielt.

So as mer sehne kennt, gebt es viel zu erfaahre uff em 22. Matz. Wann du en freie Samschdaag hoscht, geh mol datt, lann eppes, ess eppes, sing eppes un sei so gut un saag “Guder Daag!” zu re Alice Spayd. Sie hot mich all die Information fer der Zammelaaf gschickt.

Do iss en Flyer fer seller Daag: Zammelaaf

Published in: on 22/02/2014 at 09:23  Comments (1)  

Der Wilhelm Tell

Guder Daag Blog Leser! Selle Woch bring ich eich eppes anneres. Ich hab die gut bekannte Gschicht “Der Wilhelm Tell” iwwersetzt in Deitsch. Do iss die Gschicht mit Pickders vun der Ruth Beitat. Viel Gschpass bei Lese!

Der Wilhelm Tell

Der Kaiser Albrecht von Austria will die bis nau Unabhaengige Swiss Kantons Uri, Unterwalden un Schwyz fer sich gewinne, awwer die Leit wolle kenner Kaiser hawwe. Sie wolle frei sei. Der Kaiser schickt der Governor Gessler nooch Switzerland, um die Leit zu iwwerweise.

Da er mit Gutmiedlichkeit nix grickt, will der Gessler die Leit hatt behandele. Ee Daag schtellt er eene hohe Schtang uff em Blatz vun Altdorf uff un haengt sei Hut druff.

T2

All die Leit misse sich vor der Schtang nidderbicke un sie griesse. Zwee Wachtmenner gewwe Acht, un wann epper net grieest, schtroft mer ihn.

T3

Ee Daag kummt der Schiesser Wilhelm Tell mit seim gleenen Soh Walter nooch Altdorf un geht an der Schtang vorbei, mitaus sie zu griesse. Da kumme die Wachtmenner un wolle ihn uffschliesse.

T4

Der Gessler seht der Tell mit seinre Crossbow un de Feile un hot en schlechtes Gedenk. Er geht zu dem Tell un saagt: “Du griesst die Schtang net? Dann schmeiss ich dich in Bressen.” Der Tell lacht un andwattet: “Ich kann net glaawe, as du een so en dumme Befehl gebscht, en Schtang zu griesse.”

T5

“Ich will dir nooch en Gelegeheit gewwe,” saagt der Governor zu dem Tell, “wann du uff achtzig Schridde deinem Soh en Eppel vum Kopp schiesscht, bischt du frei.”

T6

Der Tell hot Bang un saagt: “Ich schiess net!” “Wann du net schiesscht,” saagt der Gessler, “odder wann du der Eppel verfehlscht, waerr ich dich un dei Soh dodmache.”

Tell1

Der Tell nemmt zwei Feile un schteckt sie uff die Crossbow. Er zielt, schiesst un drefft der Eppel. Die Leit schreie mit Freed.

Tell2

“Ferwas hoscht du zwee Feile bei dir?” froogt der Gessler. “Wann ich der Eppel net gedroffe hett, waer der zwette Feil fer dich gewest,” saagt der Tell zum Governor. Der Gessler iss bees un saagt: “Ich mach dich net dod, awwer ich schmeiss dich in Bressen, wu du weder die Sunn odder der Mond sehscht.”

Tell3

Dann hot der Gessler der Tell aagebunne un uff seim Schiff gebrocht. Er bringt ihn uff sei Castle in Kussnacht un dann in Bressen.

Tell4

Awwer mitte uff dem Wasser kummt en hatter Schtaerm. Es wedderleecht un dunnert un reggert. Der Fuhrmann verliert sei Weg.

Tell5

Alli-epper wisse, as der Tell net yuscht en guder Schiesser waar, awwer aa en guder Fuhrmann waar. Yuscht er kann es Schiff un die Leit redde. Der Governor macht der Tell frei un der Tell bringt es Schiff sicher ans Land.

Tell6

Am Land in Kussnacht sin sie aakumme, der Tell tschumpt schtarrick uff en Schtee un schiewt es Schiff widder in die Welle zerick. Aerscht viel schpeeder iss der Governor ans Land kumme, awwer der Tell hat sich verschteckt un waardet uff der Gessler.

Tell7

Der Governor schteigt aus em Schiff un will der Tell suche un in Bressen schmeisse. Da schiesst der Tell der zwette Feil in es Hatz vun em Gessler un er iss dod uff em Grund gfalle.

Tell8

Die Leit freet sich, as endlich der Governor dod iss. Sie wolle kenne annere Governor hawwe un schliesse en Bund, um fer ihre Freiheit zu fechde. Sell iss der Aafang der Swiss Confederation.

Tell9

Do iss en Audio Klip:

Published in: on 15/02/2014 at 17:38  Comments (1)  

Meim Grossdaadi sei Yaahr – 1925!

Guder Daag Blog Leser. Am Mundaag hot mei Grossdaadi Madenford Gebottsdaag. Er waerr 89 Yaahre alt sei, un er behaevt sich wie er yuscht 40 Yaahre alt waar. Er hot viel Glick as er so gsund iss, un mir sin aa dankbaar as er so aktiv un allsfatt nooch rutschig iss. Im Ehre vun sei Gebottsdaag, hawwich gedenkt as ich en Blog Poscht iwwer sei Gebottsyaahr, 1925, schreiwe. Do sin die wichdige Dinge die im Yaahr bassiert sin.

Yenner

3 – Der Benito Mussolini (Il Duce) hot bekannt gemacht as er der neie Diktator in Italy waar.

5 – Die Nellie Tayloe Ross waar die aerschde weibliche Governor (Wyoming) in Amerikaa.

Die Nelly Tayloe Ross, aerschde weibliche Governor in Amerikaa.

Die Nelly Tayloe Ross, aerschde weibliche Governor in Amerikaa.

Hanning

10 – Mei Grossdaadi, der Ray Henry Madenford, iss in State Hill, Barricks Kaunty gebore.

21 – The New Yorker Magazine gebt sei aerschde Schtick raus.

Matz

4 – Dem Bresident Calvin Coolidge sei Inauguration waar die aerschde Inauguration die mer uff em Schwetzkaschde heere kennt.

Der 30. Bresident: Calvin Coolidge.

Der 30. Bresident: Calvin Coolidge.

18 – Die Tri-State Tornado, die deedlichschde in Amerikaanische Gschicht, schpringt darrich Missouri, Illinois un Indiana. 695 Leit sin gschtarewe un 2,027 Leit sin beschaedicht.

Abrill

10 – Der F. Scott Fitzgerald gebt The Great Gatsby raus.

Dem F. Scott Fitzgerald, sei bekanntes Buch: The Great Gatsby.

Dem F. Scott Fitzgerald, sei bekanntes Buch: The Great Gatsby.

Moi

5 – In Dayton, Tennessee, Biology Schulmeeschder, der John Scopes, iss feschtgenumme fer sei Laerne vun dem Charles Darwin sei Gedenk vun Evolution.

Tschunn

6 – Die Chrysler Corporation iss vun dem Walter Percy Chrysler erschafft.

29 – En 6.8 Aerdbeewing beschaedicht Santa Barbara, Kalifornia.

Tschulei

10 – In Dayton, Tennessee, die so genaamte “Monkey Trial” faangt mit dem John T. Scopes aa.

Schulmeeschder, John T. Scopes.

Schulmeeschder, John T. Scopes.

18 – Der Adolf Hitler gebt sei paersehnliche Manifesto “Mein Kampf” raus.

21 – Der John T. Scopes iss schuldig gefunne vun re Laerne vun Evolution un muss $100 bezaahle.

Aaguscht

8 – Die Ku Klux Klan zeigt wie bekannt sie sin mit en grosse Schtrutz in Waschington DC. 40,000 Mannsleit un Weibsleit (Mitglieder vun re Klan) sin uff em Pennsylvaania Avenue gschtrutzt. Im Yaahr, ‘sis gerode as baut 5 millyonen Leit sin in re Klan. Zu re Zeit, waar es die greeschde Fraternal Organization im Land.

Die Ku Klux Klan in Waschington DC.

Die Ku Klux Klan in Waschington DC.

September

3  – Die Dirigible Shenandoah iss iwwer Caldwell, Ohio uffgebroche. 14 Leit sin gschtarewe.

Oktower

1 – Mount Rushmore National Memorial in Sudd Dakota iss eigweidt.

November

28 – Die wochliche Country Myusick Brogramm, Grand Ole Opry, iss fer die aerschde Mol uff em WSM Schwetzkaschde in Nashville, Tennessee gschpielt.

Diesember

1- Die Locarno Teaties sin in London unnergschriwwe.

Der Gustav Stresemann, der Austen Chamberlain un der Aristide Briand in Locarno.

Der Gustav Stresemann, der Austen Chamberlain un der Aristide Briand in London.

Bekannte Leit die aa im 1925 gebore waare: Paul Newman, Jack Lemmon, Malcolm X, Tony Curtis, Barbara Bush, Medgar Evers, Merv Griffin, Bill Haley, Peter Sellers, Mel Torme, B. B. King, Margaret Thatcher, Angela Lansbury, Johnny Carson, Robert F. Kennedy, Sammy Davis Jr., un Dick Van Dyke.

Bekannte Leit die im 1925 gschtarewe sin: Sun Yat-sen, John Singer Sargent, Pancho Villa, William Jennings Bryan, un Christy Matthewson.

Mir kenne sehne as viel im Yaahr 1925 bassiert iss. Awwer fer mich, yuscht ee Ding iss wichdig: meim Grossdaadi sei Gebottsdaag! Mitaus sell, waerr ich net do sei! Hallicher Gebottsdaag Grossdaadi!

Ich, mei Grossdaadi, un mei Bruder im Schpotyaahr 2013.

Ich, mei Grossdaadi, un mei Bruder im Schpotyaahr 2013.

Published in: on 08/02/2014 at 08:42  Comments (3)  

Mei Movies Lischt – Aadeel 2!

Guder Daag Blog Leser! Well, letschde Woch hawwich aagfange en Lischt vun mei Top Movies zu deele. Ich hab Nummer 10 bis 6 gsaat un en katzer Beschreibing vun yede Movie gewwe. Selle Woch will ich Nummer 5 bis 1 gewwe. Uff em Facebook, hawwich ee paar Comments grickt. Was cool waar, waar as ee paar Leit hen gsaat, as mei Movies waerre aa uff ihre Lischte sei! Gscheite Leit hen gude Gschmack! Ok, genung babbele….do sin mei Top 5 Movies!

MV5BNzYzMDkzNDQ0N15BMl5BanBnXkFtZTcwNzQ0NDQyNA@@._V1_SX214_

5. Some Like it Hot (1959) – Zwee Chicago Myusickschpieler, der Joe (vun Tony Curtis gschpielt) und Jerry (vun Jack Lemmon gschpielt) seh die Sankt Valentinsdaag Vermetzling, sie wolle graad raus em Schteddel fliege un aa weg vun dem Gangster, der verantwortlich waar, dem Spats Colombo. Sie sin arrig verzweifelt um en Gig weg vun Chicago zu griege, awwer die eenzige Tschopp iss in en all-Maedel Baend uff der Weg nooch Florida. Sie kumme um der Riggelweg Schtation aa as Josephine un Daphne, zwee neie Saxophone un Bass Schpieler. Sie gleiche arrig viel mit all die annere Maedels zu sei, abbaddich die Sugar Kane Kowalczyk (vun Marilyn Monroe gschpielt), wer singt un schpielt die Ukulele. Der Joe browiert sie zu gwinne, awwer Jerry/Daphne iss vun en Millyonaire, der Osgood Fielding III,  noochgange. Mayhem kummt wann die zwee Menner browiert ihre rechte Identities verschteckelt zu behalde un Spats Colombo un sei Drupp kumme um en Versommling mit annere Crime Lords zu hawwe. Der Movie is arrig arrig luschdig.

MV5BODQxMzMyNTY5Nl5BMl5BanBnXkFtZTcwMDMyNTk3OA@@._V1_SX214_

4. The General (1926) – Ich muss aerscht saage as ich en grosse Buster Keaton un Charlie Chaplin Fan bin. Ich find die zwee as die luschdigschde Schpieler alle Zeit. Allebeed waare schportlich, luschdig, gscheit un Perfektionists. Alle ihre Movies sin fer mich, mitaus Fehler. Deswege sin allebeed in mei Top 5 Lischt. Die aerschde iss The General vun Buster Keaton.  Johnnie (vun Buster Keaton gschpielt) liebt sei Riggelweg, Der General, un die Annabelle Lee (vun Marion Mack gschpielt). As der Burgergrieg ausgebrochen iss, iss er net erlaabt in der Armee zu geh, weil er hot meh Wert as en Engineer. Die Annabelle denkt as er gehlbeenich iss. Spies aus dem Nadde fange Der General mit re Annabelle uffboard. Der Johnnie muss dann sei zwee Liewe redde.

MV5BODQwOTc5MDM2N15BMl5BanBnXkFtZTcwODQxNTEzNA@@._V1_SX214_

3. 12 Angry Men (1957) – Die Defense und die Prosecution sin faddig un die Jury geht in ihr Schtubb um zu waehle eb en yunge Schpanisch-Amerikaaner schuldich odder unschuldich vun re Maerderei sei Daadi iss. Es fangt as en “Uff un Zu Case” vun Maerder zu sei. Awwer es waerrd en Mini-drama vun yede Juror ihre Vorurteile un Friehgedenke iwwer die Trial, der Geglaagte un yeder anner sei. In sellem Movie kann mer alle Seite vun dem Mensch sehne. Der Henry Fonda hot en arrig gut Tschopp geduh as eener vun de Jurors.

MV5BMTY5MjM1OTAyOV5BMl5BanBnXkFtZTgwMDkwODg4MDE@._V1._CR52,57,915,1388_SX214_

2. The Sting (1973) – Wann en unneranner Freind iss vun Mob Boss dodgemacht, zwee Con Menner, een mit viel Erfaahring, der Henry Gondorff (vun Paul Newman gschpielt) un en yunger, der Johnny Hooker (vun Robert Redford gschpielt) browiere Ewe zu griege. Sie browiere en grosse Con uff dem Mob Boss zu schpiele. Die Gschicht laaft mit viel Drehinge un Enneringe uff em letschde Minudde. Ich winsch as ich seller Movie noocheemol zum aerschde Mol sehne kennt. Was en gude Gschicht! Der Movie hot beschde Movie, beschde Moviemacher, beschde Gschicht un beschde Myusick Oscars gewunne.

MV5BOTE4MzEwMTkzMV5BMl5BanBnXkFtZTcwNTg4NzU2OQ@@._V1_SY317_CR6,0,214,317_

1. The Gold Rush (1925) – Wenn mer en Lischt macht, iss es allsfatt hatt die Nummer Eens zu finne odder zu saage. Ich kann ehrlich saage, as ich selle Broblem net ghatt hab. Mei Nummer 1 Movie iss fer mei Geld, der beschde Movie alle Zeit. Wer kann “Nee” zu dem Charlie Chaplin saage? In dem Movie, en alleenicher Prospector (vun Chaplin gschpielt) geht nooch Alaska um Gold zu finne. Er drefft viel Leit die browiere ihm zu verschenne. Er fallt ins Lieb mit re scheene Georgia (vun Georgia Hale gschpielt). Er griegt en Partner in Big Jim McKay (vun Mack Swain gschpielt). Er browiert Georgia zu gwinne un aa Gold zu finne. Der Movie hot Action, Drama, Liewe un viel Lache. Es hot es all!

So nau hett dihr mei Lischt vun mei Top 10 Movies. Was denkt dihr? Hot eenich-epper Nummer 4 odder Nummer 1 schunn gsehne? Wann Nee, sei so gut un gucke sie mol aa!

Do iss en Audio Klip:

Published in: on 02/02/2014 at 09:40  Comments (3)