Mei Movies Lischt – Aadeel 1!

Guder Daag Blog Leser! Letschde Woch hawwich en Poscht iwwer en Movie gschriwwe, der fer en Oscar uffgenumme waar. Dem Movie sei Gschicht hot mit en Deitsche Familye in de 1700s zu duh. Selle Woch un naegschde Woch will ich Poschde iwwer mei Top 10 Movies schreiwe. Schunn seit ich en Kind waar, bin ich en grosse Movie Fan. Abbadich, bin ich en Fan vun alde Movies. As ich yunger waar, hot mei Freinde sell net verschtanne, fer was ich Schwatz un Weiss Movies gegliche hab. Was aa net normal waar, waar as ich Silent Movies aa arrig viel gegliche hab. Ee paar Yaahre zerick hawwich en Lischt vun mei Leibmovies gemacht. Heit un naegschde Woch, in Ehre vun de Oscars, waerr ich mei Top 10 Movies gewwe un en katze Beschreiwing vun de Movies gewwe. Veilleicht, wann dihr Netflix hett, kennt dihr die Movies aagucke!

MV5BMzMwMTM4MDU2N15BMl5BanBnXkFtZTgwMzQ0MjMxMDE@._V1_SX214_

10. Schindler’s List (1993) – Fer viel Leit, seller Movie hot sie die Gschicht vun re Holocaust gelannt. Seller Movie iss die Gschicht vun Oskar Schindler, en Mann der browiert Yutte vun de Nazis zu redde. Er kaaft Yudde vun de Nazis un hot sie zu seinre Factorie gebracht. Der Liam Neeson hot der Schindler gschpielt, un was fer en Tschopp er geduh hot! Am End hot er meh as 1,100 Lewe gereddet. Wie der Movie saagt: “Wer een Lewe reddet, reddet die ganze Welt.” Der Movie hot der Oscar fer beschde Movie vun 1993 gewunne. Der Steven Spielberg hot der Movie gemacht un er hot aa beschde Moviemacher gewunne.

MV5BMTk5OTA4NTc0NF5BMl5BanBnXkFtZTcwNzI5Mzg3OA@@._V1_SY317_CR12,0,214,317_

9. One Flew Over The Cuckoo’s Nest (1975) – Der Jack Nicholson schpielt Ron McMurphy, en Dieb wer in Druwwel mit em Rescht iss. Er will net zu Bressen geh, so er saagt as er verrickt iss un iss nooch en Narrhaus gschickt. As er datt aakumme iss, muss er ausschtehe un sehne die Beschimpe vun Abwaardern Ratched (vun re Louise Fletcher gschpielt). Die Ratched griegt Macht darrich die Brobleme vun die annere verrickte Leit. Der McMurphy un die annere Mannsleit kumme zamme um en uffriehrische Schtand gege die greisliche Ratched zu mache. Der Movie hot beschde Movie, beschde Schpieler (Nicholson), beschde Schpielern (Fletcher),  un beschde Moviemacher gewunne.

MV5BMTg5MDY5NjgwM15BMl5BanBnXkFtZTYwNjg3Nzk4._V1_SY317_CR4,0,214,317_

8. Philadelphia (1993) – Der Andrew Beckett (vun dem Tom Hanks gschpielt), en gay Lawyer grank mit AIDS, iss vun sei Rechtfirm gefeiert in Bang as die annere Lawyers sei Grankheit vun ihm griege daete. In en Suchung fer Rechtheit un Fried, er verglaagt sei alde Rechtfirm mit Helf vun en homophobic Lawyer, der Joe Miller (vun dem Denzel Washington gschpielt). Darrich die Schlacht in Court, seht der Miller as der Beckett net anners vun eenich-epper schunscht iss. Er verliert sei Homophobia un helft der Beckett mit sei Case eb er vun AIDS schtarewbt. Der Tom Hanks hot der Oscar fer beschde Schpieler gewunne un der Movie waar fer beschde Movie uffgenumme.

MV5BMTY4MTk2MjQ4N15BMl5BanBnXkFtZTcwNzY3MDAzMQ@@._V1_SY317_CR5,0,214,317_

7. How Green Was My Valley (1941) – Es Lewe iss hatt in en Welsch Kohlegrub Schteddel un aa fer die Morgan Familye. Der Movie iss darrich die Aage vun re Familye ihr yingschde Soh gsehne, Huw (vun dem Roddy McDowall gschpielt). Mir sehne re Familye ihre Driebsaale. Der Daadi, Gwyllim (vun dem Donald Crisp gschpielt) un sei eldere Seh schaffe in re Kohlegrub awwer ‘sis gfahrlich un ungsund. Der Gwyllim hofft as der Huw in re Schul geh witt um en besseres Lewe zu hawwe, awwer der Huw hot sei eegne Gedenke. Die Dochder, Angharad (vun re Maureen O’Hara gschpielt) iss am scheenschde Maedel im Daal un iss arrig verliebt mit Mr. Gruffydd, der Schulmeeschder (vun dem Walter Pidgeon gschpielt). Die Zeide sin hatt un gude Menner finne sich mitaus Arewet un sin vun re Kohlegrub Besitzer beschimpt. Der Movie hot Oscars fer beschde Movie, beschde Schpieler (Pidgeon), un beschde Moviemacher (John Ford) gewunne.

MV5BMTMzMzY5NDc4M15BMl5BanBnXkFtZTcwMzc4NjIxNw@@._V1_SX214_

6. It’s a Wonderful Life (1946) – Der George Bailey (vun dem James Stewart gschpielt) hot sei ganzes Lewe zu de Leit vun Bedford Falls gewwe. Er hot gewollt zu reese awwer die Meeglichkeit iss nimmi kumme. Fer viele Yaahre hot er der reiche Mr. Potter (vun dem Lionel Barrymore gschpielt) gfochde um Mr. Potters Winsch die Schteddel iwwerzunemme zu schtoppe. Awwer uff em Hallicheowed, George’s Onkel Billy hot $8,000 verlore. Der Potter hot es Geld gfunne un verschteckelt es. As der Bankmann die Geld Kaerzing findt, denkt der George as er un sei Buisness verantwortlich sei waerr un er waerr ins Bressen gschickt sei. Denke uff sei Fraa un Kinner, glaabt er as alles waerr besser sei wann er dod waerr, so er browiert sich selwer dodzumache. Awwer die Bede vun seinre Familye bringt en Engel, mit der Naame Clarence, zu ihm zu helfe. Der Movie waar fer 5 Oscars uffgenumme awwer hot ken gewunne.

Naegschde Woch waerr ich iwwer mei Top 5 Movies schriewe. Hett dihr eene vun de Movies schunn gsehne? Was denkt dihr vun mei Waahle?

Do iss en Audio Klip:

 

Published in: on 25/01/2014 at 15:00  Comments (1)  

En grosse Verschtauning aus Hollywood!

Guder Daag Blog Leser! Selle Woch iss en grosse Verschtauning aus Hollywood kumme. Ya, du hoscht sell recht gelese, aus Hollywood. Nau was kann Hollywood un en Blog uff Pennsylvaanisch Deitsch in gleiche hawwe? Well, loss mich mol die Gschicht verzaehle.

Selle Woch sin die Uffnemminge fer die Oscars rauskumme. Die Oscars, fer die Leit die sell net kenne, sin die grosse Schetze fer Movies. Es gebt viele verschiddliche Oscar Deele wie beschde Schpieler, beschde Zwetteschpieler, beschde Gschicht, beschde Lichde, beschde Lied un beschde Movie. Amerikaa hot en grosse Lieb fer die Movies un fer die Oscars. Mannichmol sin gleene Movies uffgenumme fer Oscars, un dann saagt die Zeitdinge un die Guckbax Leit viel iwwer sie. “Fer was iss so en gleene Movie uffgenumme?” “Nimmi hot der Movie gsehne!” “So odder so henn uffgenumme solle.” Un so weider. Well, sell iss widder selles Yaahr gschehne.

Uff em Dinschdaag waar en arrig gleene Movie uffgenumme fer beschdes Lied. Es Lied kummt vun em Movie, “Allee awwer net allee.” Ya, du hoscht sell recht gelese. Vielleicht hoscht du nix vun sellem Movie gheert? Du bischt net allee, viel Leit henn gaar nix vun sellem Movie gheert. Un sell iss fer was so viel Leit in die Media so bees waare. Ok, so vielleicht denkscht du allsfatt nooch “fer was schreibt der Doug iwwer sell?” Well, was arrig inderessant fer uns Deitsche iss, as seller Movie mit en Schtick vun unsre Gschicht zu duh hot.

Alone-Yet-Not-Alone-Christian-Movie-Film-on-DVD-Jenn-Gotzon-CFDb

“Allee awwer net allee” kummt vun en echde Gschicht. Die Tracy Leininger Craven hot en Buch mit em gleichen Naame gschriwwe un die Gschicht folyt en Familye bei eenre wichdige Blatz in re Amerikaa ihr Gschicht. Am weckschpringe vun karrichliche Verfolging in Deitschland, die Leininger Familye guckt fer en neie Aafang in en unbekanndes Land – Amerikaa. ‘Sis in die mitt 1700s un Britische un Franzeesische Soldaade sin am fechde fer es Land, reich mit Grund, Busch un Schetze.

Unbescheedt vun die Fechde um sie, die Leiningers gebt Dank un Lob fer es glaares Wasser un der grosse Busch um Penns Grick un am meescht fer ihre Freiheit aazubeede. Ihr Lewe uff em Frontier waar net leicht awwer sie hen alles mit Freed geduh. Dann iss es Undenkbaar gschehne: in en Aagriff, Delaware Inschinge hen die zwee yungere Leininger Dochdere weckgenumme un hen browiert sie in ihre Kuldur reizubringe. Darrich de Dochdere ihre Gschicht, waere sie ihre Hoffining niemols verliere un ihr Glaawe waerr ihre Freiheit sei.

Es Lied, es uffgenumme fer en Oscar waar, heesst “Alle awwer net allee”, graad wie dem Movie sei Naame. Es iss vun re Joni Eareckson Tada gsunge. Der Dennis Speigel hot die Wadde gschriwwe un der Bruce Broughton hot die Myusick gschriwwe. Do iss en Link zu re Myusick Video:

Alle awwer net alle – Es Lied

Do iss en Link zu re Trailer fer der Movie:

Alle awwer net alle – Der Movie

Do iss en Link zu de Oscars ihr Website.

Die Oscars

Die Oscars waerre uff em 2. Matz, 2014 rausgewwe. Ich hoff as sell gleener Movie gewinne waerr, awwer wie viel Leit uff em Oscars saage: “”Sis en Ehre yuscht uffgenumme zu sei.”

Do iss en Audio Klip:

Published in: on 19/01/2014 at 12:55  Comments (2)  

En neie Gedicht!

Guder Daag Blog Leser! Ee paar Woch zerick hawwich en EPoscht vun dem Michael Clay grickt. Er wuhnt in Virginia. Nau es hot meh Deitsch Schwetzer datt Yaahre zerick gewwe, un heitzudaag gebt es allsfatt noch Amische un Mennischde un alde Deitsche, die nett zu weit Weck vun der Shenandoah Daal wuhne. Well der Michael hot mich gschriwwe um zu saage as er mei YouTube Videos gfunne hot. Er waar arrig froh zu wisse as es die Meeglichkeit gebt Deitsch zu lanne un zu browiere.  Schpeeder hot er mich zerickgschriwwe un hot gsaat as er viele Gedichte uff Englisch gschriwwe hot. Er hot mich gfroogt eb ich ee paar uff Deitsch iwwersetze wolle daet. Nadierlich, hawwich YA gsaat. Ich hab ihn gsaat as er sei beschde Gedicht schicke sott. Nooch ee paar Daag, hawwich en Gedicht grickt. Ihr Naame waar: “Die alte rote Scheier”, well nau, sell klangt glee bissel Deitsch gell? Ich bin graad uff re Arewet gange un hab es iwwersetzt. Selle Woch will ich zum aerchden Mol an eich es vordraage. Viel Gschpass beim Lese!

Die alte rote Scheier

vun: Michael Clay – iwwersetzt vun re Englisch vun Douglas Madenford

Die alte Sunnelicht hot sanftlich em roschtigen blechen Dach

Sei Gippel aageregt, es seie Daage schunn gsehne hot,

Bidder un siess, viel un drieb.

Ruhiche Duft schteigt vun em Broochland.

Es deckt gschplitt-Loguschde Poschde un roschtige Fens uff,

Es gmaahnt die scheierhofe Grapp, as es Zeit iss

Die Alarm zu klange.

———–

Wischli vun Cotton Candy Wolke sin bei dem rot-backeschteenichen

Schannschtee sei Maul gemacht, mit en

Konstant Laaf, die saagt an alli-epper as der Winder do iss.

In Dutch Hollow schteht farichtlos die alte rote Scheier,

Yuscht nunner vun em Busch, abblose vun seim

Teschtament an de Mannsleit sei Bschluss um

Chaos un Iwwerzeitlichkeit zu benniche.

———–

Kohl farewede Grappe hocke sich uff selle Loguschde Poschde,

Sie gaxe iwwer geschders Finne, un die Blanne

Fer heit. Vielleicht glee bissel vergessene Welschkann vun re

Gmeschde Sau ihr Drog, odder die Iwwerreschte vun em Coyote

Sei Schlacht; yuscht die Zeit waerr selle alte Grappe saage.

———-

Sanfte Gratze kumme vun re grumme Bauerhaus Dier,

As der gedreiliche Mann schtreckt sei Rick aus

Un schtraelt sei langer Baart, sei Aage am schiele,

Er nemmt en langsamer Guck nooch der Scheier

As sei Grossdaadi gebaut hot, un gmaahnt sich uff die gedreilichkeit

Vun sei Daadis sei Glaawe – un finnet sich zufridde.

———-

Nuff der gut-geworne Paad, geht er zu seine Freinde,

Um acht uff sie zu gewwe, wie sie acht uff ihn gewwe hen –

En Binne die yuscht die Leit die mit Mudder Aerd gebunne sin, verschtehe kenne.

Er fiehlt die gfrorne Luft in sei Lunge, un weess

As Zeit yuscht en Ochdem selwer iss, awwer er finnet nooch Drooscht

As yuscht ee paar die Blessier vun kenne ghatt hen.

Do iss en Audio Klip:

Published in: on 11/01/2014 at 10:00  Comments (2)  

Es Nei Yaahr = Neie Videos!

Guder Daag Blog Leser! Willkumm zu 2014! ‘Sis widder en neies Yaahr un mir misse neie Nummern uff unsere Babiere un Checks schreiwe. Es Yaahr iss mit en arrig kalter Wind do in Noord-Oscht Amerikaa aagfange. Heit, as ich selle Poscht schreiwe, iss es yuscht 4 Graad bei mir un mit dem Wind iss es viel kelter. Mir hen glee bissel Schnee schunn ghatt awwer net zu viel. Der Kalenner saagt as Yenner arrig kalt do sei sollte. Mir misse mol sehne was warricklich kummt.

Viel Leit mache Resolutions fer es Nei Yaahr. Selles Yaahr mach ich ken Lischt. In Blatz devun, mach ich meh Videos. In 2013 hawwich 41 Videos fer Deitsch Grammatik un die Schprooch zu lanne gemacht un uff en neie Website geposcht: PA Dutch 101. Die Videos un die neie Website waare arrig erfolgreich. Ich hab viel Comments un E-Poschts vun viel Leit vun re ganze Welt grickt. Nau bin ich widder am schaffe. Neilich hawwich meh Videos gemacht. Selles Mol mach ich Videos um meh Deitsche Wadde zu lanne. Zu re Zeit hawwich schunn 12 Videos gemacht. Die sin iwwer Gediere, Blanse, Blumme, Veggel, Wadde fer die Kich un viel annere Topics. Mei Zeil iss nadierlich meh Videos darrich es Yaahr zu mache. Awwer ich brauch eier Helf! Ich will wisse was fer Topics ich duhe soll.

Do iss en Link zu re Seit mit de Videos: NEIE VIDEOS. Bsucht es mol, zeigt eiere Freinde un Freindschafte, dann schreibt mich mol eppes iwwer Gedenke fer neie Videos.

Bis naegschde Woch, bleibt gsund, bleibt waarm un schreibt mich mol eppes….uff Deitsch nadierlich!

 

 

Published in: on 04/01/2014 at 10:39  Comments (2)