Yehrliche Grischtdaag Video 2013!

Guder Daag Blog Leser! Well do kummt mei yehrliche Grischtdaag Video. Viel Gschpass bei aagucke. Ich winsch all vun eich en arrig hallicher Grischtdaag!

Do iss en Link zu re Video: Grischtdaag Video 2013

Bis em Yaahr 2014, macht’s gut!

Published in: on 22/12/2013 at 12:16  Comments (5)  

En Schneeschtaerm!

Guder Daag Blog Leser! Well do bin ich widder mit en neiem Blog Poscht. Selle Woch hemmer viel Uffreging do in Pennsylvaania ghatt. Frieh in re Woch hen die Weddermannsleit gsaat as mir en Schneeschtaerm uff em Wochend griege kennte. So bald as eppes so gsaat iss, geh die Leit verrickt! ‘Sis allsfatt luschdig zu seh wie die Leit sich verhalde. As die Woch am laafe waar, iss der Schtaerm greeser un greeser gwaxe. Bis Freidaag hen die Weddermannsleit gsaat as mir gschwichich 4 un 8 Inches griege kennte. In manche Bletze kennte sie meh griege. Nau, fer die Leser die net in Pennsylvaania wuhne, muss ich eppes auslege. Es Watt Schnee hot zwee Bedeitinge do in Pennsylvaania:

1. der Schnee – weisses, gefrornes Wasser, dass vun re Himmel runnerfallt.

2. der Schnee – en Watt dass fer viel Leit iss en Befehl nooch der Schtor zu geh. Datt misse sie Millich, Brot un Oier kaafe.

Unglicklicherwees, hen ich un mei Fraa uff em Freidaag gemisst nooch der Schtor zu geh um unsere Ess-sache zu kaafe. Aye aye aye, die Leit waare do un die waare all in “Griegmode”. Mann kennt denke as re Welt ihr End am kumme waar! Awwer so iss es do in Pennsylvaania wann es Watt Schnee gsaat iss! Mei Fraa un ich hen es Eikaafe iwwerlebt, awwer yuscht bloss.

Dann iss der Samschdaag kumme. Un ya, es hot gschneet. Es hot der ganze Daag gschneet un bis Sunndaagmariye hemmer do bei uns baut 6 Inches grickt. Nooch em Schtaerm gebt es en annere Wunder do in Pennsylvaania. Wann es Schnee uff em Grund un die Schtrosse gebt, vergesse all die Leit wie mer faahrt! ‘Sis waerricklich en Wunder. Normally, kann die Leit zimmlich gut faahre (ausser de Leit vun Nei Jersey). Awwer wann es Schnee gebt, all die Weddes sin weck! Zum Glick, hemmer net gemisst uff die Schtrosse zu geh.

Ich un mei Schneeschmeiser am schaffe.

Ich un mei Schneeschmeiser am schaffe.

Nooch en gudes Mariyeschtick bin ich drauss mit mei Schipp gange. Bevor ich mei Schipp geyuust hab, hab ich mei Schneeschmeiser geyuust. Sell iss so en wunnerbaar Ding. Es macht so en guder Tschopp. Wann ich mei Schneeschmeiser yuust, dann muss ich net so viel schaufele. Nau bin ich widder in em Haus un all die Arewet iss faddich. Nau kann ich mich dohiehocke un en Bier drinke…well bis der naegschde Schtaerm kummt odder bis die Fraa saagt as ich eppes duhe muss.

Mei Dochder iss froh as sie net drausse gehe muss um zu helfe!

Mei Dochder iss froh as sie net drausse gehe muss um zu helfe!

Wie viel Schnee hett dihr grickt? Seid dihr drauss gange um zu schlitte?

Do iss en Audio Klip:

Published in: on 15/12/2013 at 11:03  Comments (2)  

Eiere Haikus!

Guder Daag Blog Leser! Well, ich hoff as alle vun eich en scheenes Dankfescht ghatt hett. Mei waar gut un es Esse waar nadierlich appeditlich. ‘Sis allsfatt gut Zeit mit re Familie zu hawwe. Mir hen viel gesse, gedrunke un viel Kaarde gschpielt. Nooch em Danksfescht, bin ich in der Busch mit mei Flint gange. ‘Sis waar kalt un schneeig, un ich hab ken Hasch gsehne! Ich hab ken Glick ghatt, awwer mei Bruder hot en grosse 6 Schpitzer gschosse. So mir waerre Haschfleesch in 2014 hawwe!

Ee paar Woch zerick, hab ich en Blog Poscht iwwer Haikus gschriwwe. Am End es Poscht hawwich gsaat, as dihr Haikus uff Deitsch schreiwe daetet. Ich bin froh zu saage as ich ee paar grickt hab! So, selle Woch will ich drei devun uff mei Blog poschte.

– Es Verschpreche –

Ball kummt der Winter
Awwer Gott hot verschproche
as Friehyaahr kummt trick.

–  vun dem Jack Speese

– Faul –

Ich will net schaffe!!
Ich bin ins Bett am schlofe
Losse mich in Ruh!

–   vun den Jay Bigornia

– Der Winter –

Der Winter kummt ball,
Mit Eis un Schnee, Luft so kalt:
Die Beem leer un kahl.

–    vun dem Jim Kramer

Gross Dank an all die drei Schreiwer! Sie hen en guder Tschopp geduh. Well, heit gebt es yuscht 12 Daage bis Grischtdaag. Hett dihr all eiere Gschenke schunn kaaft? Ich brauch nooch ee paar bevor ich faddig bin. Heit iss aa em Pearl Harbor sei Daag do in Amerikaa. Sei so gut, un nemmt ee paar Minudde un denkt an all die Soldaate die ihre Lewe im Yaahr 1941 verlore hen.

Do iss en Audio Klip:

Published in: on 07/12/2013 at 09:25  Comments (3)