Haikus uff Deitsch!

Guder Daag Blog Leser! Ya, dihr hett die Titel recht gelese. Selle Woch will ich eppes iwwer Haikus schreiwe. Fer die Leit, die net wisse was en Haiku iss, loss mich mol iwwer sie eppes saage. En Haiku iss en Satt vun Gedicht. Haikus kumme aus Yapan. En Haiku muss net reime (wie annere Gedichte). En Haiku muss 17 Syllables hawwe, un sie sin in drei Zeile gschriwwe. Die drei Zeile misse 5, 7 un 5 Syllables hawwe. En Haiku drickt viel aus un gebt meh mit am wennichschte Wadde meeglich aus. Heitzudaage, Haiku schreiwe iss arrig bekannt un beliebt in Yapan, un sie sin wie en feine Kunscht. Haikus sin effders nau in alle Schprooche gschriwwe. Ich weess as an meinre Schul, wu ich schaffe, misse die Kinner Haikus in ihre Englischklaesse schreiwe.

Ich weess net wann epper Haikus uff Deitsch schunn gschriwwe hot odder net. Awwer heit will ich zwee ganz neie Haikus uff Deitsch gewwe. Viel Gschpass bei Lese!

– Deitsch –

Meine Mudderschprooch

Siess klangt es an meinem Ohr

Schwetze bis der Dod

– Schpot November –

Bledder uff dem Grund

Die Zeit um dankbaar zu sei

Der Winder kummt bald

 

Well datt sin zwee Haikus fer eich. Nau seid dihr draa! Eire Hausarewet fer selle Woch, iss en Haiku zu schreiwe. Wann dihr en Haiku uff Deitsch schreibt, schickt es zu mir un ich waerr es naegschde Woch in mei Blog poschte! ‘Sis net zu schwer zu duh, un es macht Gschpass aa. Awwer net vergesse: drei Zeile mit 5, 7, 5 Syllables! Gut Glick mit eire Arewet un ich guck mit Freed uff eire Haikus!

Do iss en Audio Klip:

 

 

 

Published in: on 17/11/2013 at 12:34  Comments (3)  

The URI to TrackBack this entry is: https://deitscheblog.wordpress.com/2013/11/17/haikus-uff-deitsch/trackback/

RSS feed for comments on this post.

3 CommentsLeave a comment

  1. Haiku haww’ i uff d’r Schul’ g’lernt un au g’schriewwe! I glaub, däs isch au e gut’s Mittel, uff Deitsch (oder we’ma au no e annere Zielsprooch lerne will) mit d’r Sprooch’ kreativ zu sei! Alle Achtung nomols, Herr Madenford! Beschde Dank für Ihre Arweet!

  2. Gross Dank James, awwer wu iss dei Haiku? Du settscht een aa schreiwe!

    -Der Doug

  3. Hallo Doug, hiermit e Haiku! I bi’ doch kee Goethe od’r Schiller, bin e Kramer–deshalb isch’s net vom Gute däs Beschde, awwer hier isch’s sowieso!

    D’r Wint’r kummt bal’,
    Mit Eis un Schnee, Luft so kalt:
    Die Beem leer un kahl

    Wie i mi no erinnere, senn Haikus sowieso net immer so raffinierd, se senn eher wie e Skelett un solle e Gfühl vermittle statt e g’howene Aussage–Du hosch awwer viel meh Talent wie i!! Grosse Achtung, un beschde Dank nomols für Dei Blog! [Domit die Leit no wisse: mei Umlaute werde „entrundet“ we’ma se ausspreche duht: sellre Entrundung isch e Eegeschaft vun Schwowisch-Badisch, un au senn viele Wörde ziemli‘ ähnlich un abg’leitet vum Hochdeitsche].I wünsch Di un alle Leser/Leserinne e wunnerbar-gute Feier, esst no ruhig viel vum Truthähnle—sell isch gut. I ess liewwer mei Linsensuppe, wu i Vegetarier bi‘—un mei Brotknödele au dezu—e Rezept ka‘ i deele we’ma will: sell’r Rezept vun Knödele haww i no im Kopp—däs nenne mer Self-defense Cooking od’r wie i immer sag‘: Selbstverteidigungsküche! (I glaub‘ sell isch net e wohres Wort, awwer Spass hot ma au, we’ma „Erfindunge“ z’ammebaschdle duht!) Macht’s gut mitenand!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: