En Reed in Gettysburg!

Guder Daag Blog Leser! Selle Woch waar en abbadiche Woch do in Amerikaa. Mir hen zwee grosse Yehrlichfeschts gfeiert. Uff em Freidaag, der 22. November waar es 50. Yehrlichfescht vun dem Breisdent Kennedy sei Dod. Im 1963 waar ich nooch net gebore so vun sell weess ich gaar nix, yuscht was ich gelese un im Guckbax gsehne hab. Awwer fer mei Daadi un mei Grosseldere iss alles ganz glaar. Sie kenne alles vun em Daag im 1963 erinnere. Awwer en grosseres Yehrlichfescht waar uff em Dinschdaag, der 19. November. Sell waar es 150. Yerhlichfescht vun em Gettysburg Address. Der Gettysburg Address waar en arrig wichdiger Reed vun dem Bresident Abraham Lincoln im 1863. Er waar in Gettysburg um der neie Graabhof vun em Schlachtfeld zu eiweide. Yuscht ee paar Munete bevor hen meh as 51,000 Soldaade ihre Lewe verlore. Meh as 157,000 Soldaade hen datt gfochde.

Der Lincoln waar eigelaade um ee paar Wadde zu gewwe. Der Haaptschwetzer waar der Edward Everett un er hot fer meh as zwee Schtunn gschwetzt. Dann waar der Lincoln draa, un er hot fer yuscht zwee Minudde gschwetzt. Sei Reed iss konsidered as eene der beschde Reede in unsre ganze Gschichte. Der Everett hot nooch der Reed gsaat, as der Lincoln hot gsaat in zwee Minudde meh as was ich in zwee Schtunn gsaat hot. Fer mei Blog Poscht selle Woch hawwich dem Lincoln sein wichdige Reed iwwersetzt uff Deitsch. Sei Wadde waare wichdig dann un ich denk as sie sin allsfatt nooch wichdig fer unsere Leit un unser Land.

Die Gettysburg Address

Vier Score un siwwe Yaahre zerick, unsere Vaddere hen uff selle Kontinent dahiegebrocht, en neies Land, in Freiheit begriffe, un eigweidt zu em Gedenk as alle Mannsleit gleich erschaft sin.

Nau, sin mir in en grosse Folksgrieg gedriwwe, nausfoddere eb sell Land, odder eenich Land so erschaft un so eigweidt, kann lang aushalde. Mir dreffe uns uff en grosse Schlachtfeld vun sellem Grieg. Mir sin kumme um en Schtick vun sellem Feld eizuweide, as en endlicher Ruhblatz fer die, die ihre Lewe gewwe hen so as selles Land lewe daet. ‘Sis allmenanner basslich as mir es duhne solle.

Awwer, in en greesere Sinn, mir kenne net eiweide – mir kenne net eisegne – mir kenne net heiliche – seller Grund. Die farichtlose Mannsleit, lewendich un dod, die do gfochde hen, hen es eigsegnet, viel weit owwe unser aarme Graft zu dezumache odder weckzunemme. Die Welt waerr bissel bemaricke, odder lang erinnere was mir do saage, awwer es kann nimmi vergesse was sie do gemacht hen. ‘Sis fer uns die Lewendige, eher, eigweidt zu sei do um die unfaddichgemachte Arewet, fer die wer do gfochde hen, so weit so edelig vorgebrocht hen. ‘Sis ehe fer uns do eigeweidt zu sei um die grosse Arewet die vanne uns schteht – as vun selle ge-ehrde Dode, nemme mir zugsetzte Aadacht zu sellre Ursach fer die as sie ihre letzte voll Maas vun Aadacht gewwe hen – as mir do heechlich bschlosse as selle Dode net in umsunscht gschtarewe sodde – as sell Land, unnich Gott, soll en neies Gebott vun Freiheit – un selle Regiering vun de Leit, an de Leit, fer de Leit, soll net vun re Erd umkumme.

Abraham Lincoln – 19 November 1863

Do iss en Audio Klip:

Aa nooch: Naegschde Woch waar ich ken neie Blog Poscht schreiwe, ich waerr in em Busch sei um hoffetlich en Haasch zu schiesse. Ich kumm zerick in Diesember mit eiere Haikus! Ich winsch all mei Leser en Hallicher Danksfescht uff em Dunnerschdaag!

Published in: on 24/11/2013 at 14:10  Comments (2)  

Haikus uff Deitsch!

Guder Daag Blog Leser! Ya, dihr hett die Titel recht gelese. Selle Woch will ich eppes iwwer Haikus schreiwe. Fer die Leit, die net wisse was en Haiku iss, loss mich mol iwwer sie eppes saage. En Haiku iss en Satt vun Gedicht. Haikus kumme aus Yapan. En Haiku muss net reime (wie annere Gedichte). En Haiku muss 17 Syllables hawwe, un sie sin in drei Zeile gschriwwe. Die drei Zeile misse 5, 7 un 5 Syllables hawwe. En Haiku drickt viel aus un gebt meh mit am wennichschte Wadde meeglich aus. Heitzudaage, Haiku schreiwe iss arrig bekannt un beliebt in Yapan, un sie sin wie en feine Kunscht. Haikus sin effders nau in alle Schprooche gschriwwe. Ich weess as an meinre Schul, wu ich schaffe, misse die Kinner Haikus in ihre Englischklaesse schreiwe.

Ich weess net wann epper Haikus uff Deitsch schunn gschriwwe hot odder net. Awwer heit will ich zwee ganz neie Haikus uff Deitsch gewwe. Viel Gschpass bei Lese!

– Deitsch –

Meine Mudderschprooch

Siess klangt es an meinem Ohr

Schwetze bis der Dod

– Schpot November –

Bledder uff dem Grund

Die Zeit um dankbaar zu sei

Der Winder kummt bald

 

Well datt sin zwee Haikus fer eich. Nau seid dihr draa! Eire Hausarewet fer selle Woch, iss en Haiku zu schreiwe. Wann dihr en Haiku uff Deitsch schreibt, schickt es zu mir un ich waerr es naegschde Woch in mei Blog poschte! ‘Sis net zu schwer zu duh, un es macht Gschpass aa. Awwer net vergesse: drei Zeile mit 5, 7, 5 Syllables! Gut Glick mit eire Arewet un ich guck mit Freed uff eire Haikus!

Do iss en Audio Klip:

 

 

 

Published in: on 17/11/2013 at 12:34  Comments (3)  

En neies Lied uff Deitsch!

Guder Daag Blog Leser! Letschde Woch waar ich in re Karrich un mir hen en arrig gudes Lied gsunge: Jersualem, my Happy Home. Ich gleich selles Lied viel weil die Melodie so schee iss. Es Lied iss zu re Melodie “Land of Rest” gsunge un gschpielt. As ich am singe waar, hawwich gedenkt: Ich will selles Lied aa uff Deitsch singe. So ich bin heem gange un hab es iwwersetzt. As ich faddig mit sell waar, hawwich die Chords fer es Lied gfunne un dann kennt ich es endlich singe un schpiele. Heit will ich die Iwwersetzung fer eich gewwe un as en gleenes Gschenk, hawwich es Lied aa recorded.

Die Englische Wadde waerre vun em Joseph Bromehead im Yaahr 1795 gschriwwe. Die Melodie: Land of Rest, iss en aldes Amerikaanisches Volkslied un mir wisse net wer es gschriwwe hot. Do iss mei Deitsche Iwwersetzung:

Yerusalem, mei frehlich Heemet.

1. Yerusalem, mei frehlich Heemet,

Wann soll ich zu dir kumme?

Wann soll mei Sariye en End hawwe?

Dei Freed, wann soll ich seh?

2. O frehlich Haffe vun de Heiliche,

O siess un lieblich Grund!

In dir, ken Sariye kann ich finne,

Ken Drauer, ken Acht, ken Block.

3. Ihr Gaarde un ihr mutliche Laaf,

Sin allsfatt so grien;

Datt waxe siess un liebliche Blumme,

As narieyets gsehne sin.

4. Datt die Beem gewwe Frucht,

Un ewich uffgwelle;

Datt hocke sich die Engel,

Un singe in Himmelsluft.

5. Yerusalem, mei frehlich Heemet,

Datt will ich mit Gott sei!

Daete mei Drauer en End hawwe,

Dei Freed, ich waerr seh.

Fer die Leit die es singe un schpiele welle, do iss en Vers mit de Chords:

G                            C             G

Yerusalem, mei frehlich Heemet,

……………………………..D

Wann soll ich zu dir kumm’?

………..Em                          C           G

Wann soll mei Sariye en End hawwe?

……………………….D           G

Dei Freed, wann soll ich seh?

Do iss en Recording vun mir am singe un am Banjo schpiele. Ich muss saage, as ich en bessere Microphone iwwerdem kaafe muss wann ich meh Myusick recorde will.

Viel Gschpass bei heere!

Published in: on 09/11/2013 at 15:34  Comments (3)  

Die Ephrata Cloister.

Guder Daag Blog Leser! Letschde Woch hawwich iwwer mei Austausch gschriwwe. Ee Daag mit de Hochdeitsche sin mir nooch Ephrata in Lengeschder Kaunty gfaahre. Sell Woch will ich glee bissel iwwer re Ephrata ihre Gschicht saage.

Der Conrad Beissel, der Grinder vun Ephrata, waar in Eberbach am Neckar, Deitschland, in Matz 1691 gebore. As er 8 Yaahre alt waar, waare allebeed vun seinre Eldere gschtarewe. As en yunger Mann hot er gelannt en Becker zu sei un hot gereest um sei Arewet besser zu lanne. Uff seine Reese hot er Pietism gedroffe, en Beweging um die Broteschtant Karriche zu verbessere. Er iss vun en Drupp vun Pietists aagenumme. Die Broteschtant Karrich in Deitschland hot ihn im Yaahr 1715  vun seinre Heemet rausgschmisse. Er iss in Deitschland  bis 1720 gebliwwe un dann iss er nooch Pennsylvaania gange, wu der William Penn Karrichliche Freiheit aagebodde hot.

Nooch ee Yaahr in Germantown, der Beissel iss an die Conestoga hiegezoge, yuscht glee bissel oschtlich vun Laengeschder. Datt iss er mit de Bruddern aagenumme. Die Bruddern waare en Anabaptist Drupp. Im Yaahr 1724, der Beissel waar aagschtellt as der Haaptmann vun de neie Conestoga Brudder Gemee. Sei radical Gedenke vun Gottesdienscht uff em Samschdaag un Celibacy hot en Schnitt in re Gemee gemacht un im 1728 hot der Beissel sei Gemeesnsglied zerickgezoge. Er waar en guder Schwetzer un viel Leit sin mit ihm gange as er an der Cocalico Grick hiegezoge iss. Datt hot er gewollt em Eensler sei Lewe zu hawwe. Awwer Leit sin nooch ihm kumme um meh vun seie Gedenke zu lanne un en bessere Verheltnis mit Gott zu hawwe.

Sell iss wie die Celibate Mitglieder sich vergleedet hen. Alles weiss.

Sell iss wie die Celibate Mitglieder sich vergleedet hen. Alles weiss.

Nooch glee bissel Zeit hot sei neie Karrich meh as 80 Celibate Mitglieder ghatt un en greftige Gemeeschaft waar am waxse. Mit de 80 Celibates waar aa baut 200 Familye Mitglieder. Darrich die Zeit, der Beissel waar der echde Haaptmaan. Sei Glaabheit: en hybrid vun Pietism un Mysticism, ruft fer Celibacy, Sabbath aabede, un Anabaptism. Er hot Blatz ghatt fer Familye, gleene Industry un kunschtliche Ausdruck. Die Gemeeschaft iss arrig bekannt fer ihre Myusick, Frakturschrift un en Druckerei, der en Babiermiehl un Buchbinner hot.

Sell iss die grosse Saal Gebei.

Sell iss die grosse Saal Gebei.

Darrich die Yaahre vun 1735 bis 1746, die Gemeeschaft hot acht groose Gebeier gebaut. Zu der Zeit, die groose Saal Gebei waar die greeschde Gebei im Schtaat Pennsylvaania! Im Yaahr 1768 iss der Beissel gschtarewe un die Gemeeschaft iss schtarrick nunnergange. Der Peter Miller, dem Beissel sei Noochfolyer, hot gsehne as der Monastic Lewe net meh beliebt waar. Im Yaahr 1813 iss der letschde Celibate gschtarewe un in em folyende Yaahr die annere Mitglieder vun re Familye hen die Deitsche Siwwende Daag Daafer Karrich gegrindt. Aa, darrich die Unabhaengigskeit Grieg, iss Ephrata as en Grankehaus fer Soldaate gewest.

Im Yaahr 1929 die iwwergebliwwene Gemeensglieder die nooch in Ephrata am wuhne waare hen ausgemacht alles zu verkaafe. Pennsylvaania ihr Regiering hot es Land un die Gebei im Yaahr 1941 kaaft. Die iwwergebliwwene Gebeier waare widdergebaut. Heitzudaag iss die Ephrata Cloister in Schtick vun de Pennsylvaania Historical un Museum Commission. Mer kann es daaglich bsuche un sie hen oft abaddiches Programs datt. Sie hen aa en Chor datt die die alde Lieder vun dem Beissel singe. Die Myusick iss arrig schee un siess.

Fer meh Information iwwer Ephrata bsuch mol: The Ephrata Cloister

Um viel meh zu lanne, kaaf selles Buch: Voices of the Turtledoves

Do iss en Audio Klip:

Published in: on 02/11/2013 at 09:40  Comments (2)