Widder Erfolg ghatt!

Guder Daag Blog Leser! Well endlich bin ich widder do mit en neier Blog Poscht. As ich eb ee paar Woch gschriwwe, waar ich arrig gscheffdig mit meinre Austausch Drupp vun Deitschland. Well, nau sin sie widder abgflogge un zerick in re alte Heemet. Un ich kann ehrlich saage as alles so gut gloffe iss. Gott sei dank! Ya, mir hen widder Glick ghatt. Loss mich mol glee bissel vun ihre Zeit do in Amerikaa schreiwe.

Unsere Drupp vun Buchen (Baden-W├╝rttemberg) sin uff em 8. Oktower nooch Waschington DC gflogge. Sie sin dann datt fer zwee Daage gewest. Leider waar unser Regiering uff von re Arewet so sie hen all die Monuments un Smithsonians vun drausse gsehne. Sie kennte net reigeh! Ich bin mit en Bus uff em 10. datthiegange un hab sie nooch Pennsylvaania gebracht. Mei Schtudente waare arrig froh ihre neie Freinde zu dreffe un nooch Heem zu nemme.

Darich ihre Zeit mit uns hemmer viel geduh. Nadierlich hen sie ee paar Daage in die Schul verbracht. Ich glaab es waar glee bissel langweilig awwer es iss allsfatt inderessant die Unnerschidde gschwischich die zwee Systems zu sehne. Dann hemmer ee paar gleene Reese gemacht. Mir sin ee Daag nooch Penn’s Cave gange. Datt iss nadierlich en Hehling un sie hen aa en Safari Park. Mir hen allebeed Tours gemacht. Die Kinner hen die Hehling gut gfunne awwer die Safari Park waar eppes. Sie hen Gediere gsehne, die vun Nadd-Amerikaa kumme. Sie hen Hasch, Elk, Bison, Bender un Schwatz Baere gsehne. Sell waar yo eppes fer sie. Nooch Penn’s Cave sin mir nooch en Schtaat Park gange um en Picknick zu mache. Mir hen drausse in re Busch ghockt, gesse un glee bissel Football gschpielt. Die Hochdeitsche hen alles gut gfunne.

En annere Rees waar ee Daag nooch Lengeschder Kaunty. Sell iss zimmlich weit vun wu mir wuhne, awwer ich hab gewollt die Hochdeitsche Deitscherei zeige. Mir waare ee Daag uff em Ephrata Cloister. Der Conrad Beisel, re Cloister ihr Grunder, sin vun en Schteddel yuscht 20 Meile vun de Hochdeitsche ihre Schteddel kumme. Sie hen die Gschicht vun re Cloister arrig inderessant gfunne. Nooch re Cloister sin mir nooch Shady Maple gange. Sell waar yo eppes fer die Kinner. So viel Ess-sache un so en grosse Waahl un mer kennte so viel esse wie mer will! Sie alle hen gsaat, as so eppes wie sell gebts gaar nix in Deitschland!

Do sin all die Schtudente: 14 Hochdeitsche un 14 Amerikaaner.

Do sin all die Schtudente: 14 Hochdeitsche un 14 Amerikaaner.

Fer 10 Daage sin die Hochdeitsche bei uns gebliwwe. Mir hen zamme gelacht, gelannt un neie Freindschefte gemacht. Es macht mich so froh selle Austausch zu mache. Ich hoff as in re Zukunft kann es weiter lewe. Nooch ihre Zeit mit uns sin die Hochdeitsche nooch Nei Yarrick gfaahre um ee paar Daage in re “Grosse Appel” zu verbringe. Dann sin sie widder heemgflogge. Nau sin sie zerick in Deitschland, awwer sie bleiwe in Kontakt mit ihre Amerikaanische Freinde via Facebook, Twitter un Skype. Nau gucke mir mit freed uff Tschunn wann mir riwwerfliege kennte um unsere Freinde zu bsuche.

Do iss en Audio Klip: Widder Erfolg ghatt!

Published in: on 28/10/2013 at 18:52  Comments (5)  

Neie Freindschafte mache!

Guder Daag Blog Leser! Well do bin ich widder mit en neier Blog Poscht. As viel vun eich schunn wisst, bin ich en Hochdeitsch Schulmeeschder do in Amerikaa. Mei Schul hot en Partnerschaft mit en Schul in Deitschland. Selle Partnerschaft iss schunn meh as 20 Yaahre alt. Ich bin der zwette Schulmeeschder fer selle Partnerschaft. Unser Partnerschaft geht alle zwee Yaahre. Im Oktower vun em ungraad Yaahr kumme Schtudente aus unsere Partnerschaftschul un dann in Tschun vun em graad Yaahr gehne ich un mei Schtudente nooch Deitschland sie zu bsuche. Unsere Partnerschul iss in Buchen (Odenwald) in sudd-wescht Deitschland. Viele vun uns Deitsche Voreldere sin vun sellre Schtick Deitschland kumme.

Wann die Hochdeitsche do sin, wuhne sie mit en Amerikaanische Partner. En Bu mit en Bu un en Maed mit en Maed. Selles Yaahr kumme die Hochdeitsche am Dunnerschdaag schunn! 8 Buwe un 6 Maede kumme mit ihre zwee Schulmeeschdere. Die Schulmeeschdere wuhne mit meinre Familye. Die Hochdeitsche waerre 10 Daag mit uns bleiwe un ich hab schunn en volle Plan fer sie gemacht. Mir waerre ee paar gleene Reese mache un sie waerre ee paar Daage in unsere Schul verbringe.

Mit all die Technologie heitzudaage, hen die Schtudente enanner schunn Online kennengelannt! Ya, sie hen en Facebook Drupp gemacht un sie hen Pickders schunn getauscht! Mei Schtudente kenne net waarte bis ihre neie “Brieder” un “Schweschdere” do sin! Was ich arrig gut mit alles finne iss as die Schtudente neie Freindschafte mache kennte un ich hoff as sie Freindschafte fer es ganze Lewe sei waerre. Was aa gut iss as die Schtudente kennte erlewe wie Amerikaaner un Hochdeitsche eeigentlich wuhne.

Weil ich arrig busy fer die naegschde zwee Woche sei waerr, waerrd es ken neie Blog Poscht fer ee Weil gewwe. Wann die Hochdeitsche widder uff em Rutsch nooch heem sin, dann schreib ich eppes Neies! Bis dann, mach’t gut un denke an ich un mei Schtudente un ihre neie Freindschafte!

Do iss en Audio Klip:

Published in: on 07/10/2013 at 18:33  Comments (2)