Wadde fer es Schpotyaahr!

Guder Daag Blog Leser! Well letschde Woch hemmer der aerschde Daag vun em Schpotyaahr ghatt. So ich hab gedenkt as es en gudi Idea waerr wann ich eich ee paar Wadde gewwe die alles mit Schpotyaahr zu duh hawwe. Viel Gschpass bei Lese un geht drauss un yuust selle Wadde selle Woch mit annere non-Deitsche Leit. ‘Sis allsfatt gut unsre Schprooch an neie Leit zu lehre!

1. der Appel (die Eppel) – Der Appel iss en Obscht der im Schpotyaahr ready iss zu picke un esse. Un mir Deitsche wisse viele Wege sie zu yuuse. Mir kenne Seider mache un drinke, mir kenne sie lang un langsam koche fer Lattwarick, un mir kenne sie mit Schinke backe as Schnitz un Gnepp. Der gude Appel – mir kenne so viel mit ihne duh! Un, sie sin arrig appeditlich!

2. es Blatt (die Bledder) – Ah Bledder, mir liewe sie, mir hasse sie. Im Schpotyaahr wexsel sie Bledder vun grien bis rot, arensch, un gehl. Die gucke so schee aus datt uff de Beem. Awwer….eventually, falle sie nunner un dann misse mir sie alle reche un uffpicke. Net vergesse en grosse Haufe zammezureche fer die Kinner reizutschumpe!

3. kiehl – Im Schpotyaahr kumme kiehlere Daage un kiehlere Nechte. Ya, mir uffwecke un ‘sis arrig kiehl, dihr kennt eier Ochdem seh! Awwer bis Middaag iss es widder waarm. So schee iss es Wedder im Schpotyaahr!

4. die Karebs (die Karebse) – Schpotyaahr bringt nicht yuscht der Appel, die Karebse kumme aa! Viel Leit kaafe sie vun de Bauere um Jack-o-lanterns zu schneide un dann uff ihre Bortsche zu schtelle. Karebse schneide macht Gschpass awwer Karebsboi find ich besser! En Schtick vun Karebsboi mit glee bissel Cool-Whip druff…nix besser!

5. es Schpinneweb (die Schpinnewewer) – Wann die Leit ihre Heiser fer Schpuckowed un Schpotyaahr uffschmucke, gebt es oft Schpinnewewer un grosse Schpinne. Ich muss ehrlich saage as ich Schpinnewewer hasse! Es gebt viele in mei Scheier un aa in mei Keller. Wann ich darrich laafe, un ich sie net seh, dann fiehl ich sie in mei Haar odder uff mei Gsicht…aye sell macht mich bees!

6. der Schpuck (die Schpucke) – Em Schpotyaahr hat zwee grosse Feierdaage: Schpuckowed un Danksfescht. Fer die Kinner (un fer viel Uffgewaxner) iss Schpuckowed arrig wichdig. Die Leit kaafe odder mache Koschtums un dann gleede sie sich as Schpucke uff! Aa, um Campfeiers rum, verzaehle viel Leit Schpuckgschichte. Sell iss verschrecklich awwer aa luschdig!

7. die Aern – Fer die Bauere iss em Schpotyaahr arrig busy. Viel vun ihre Blanse sin ready zu picke un roppe. Die Aern iss wichdig – datt iss wu viele Bauere ihr Geld fer es Yaahr verdiene. Im Schpotyaahr iss die Welschkann un Kecherli ready zu aernde.

8. der Insch (die Insching) – Wann mir uff Danksfecht denke, denke mir aa uff die Insching die die Pilgrims geholfe hen. Do in Pennsylvaanisch Deitschland hemmer viele verschiddliche Druppe vun Insching ghatt. mir hen die Iroquois, die Doppelhack, die Susquehannocks un die Delawares. Bedrauerlichewees iss ihre Gschicht net so gut gange. Uns weisse Leit hen ihr Land vun ihne gschtohle. Fer sell bin ich net schtols, awwer zum Glick gebt es allsfatt noch Insching in Amerikaa un sie browiere ihre Mudderschprooch aa zu behalde, graad wie uns Deitsche.

Do iss en Audio Klip:

Published in: on 28/09/2013 at 08:02  Comments (1)  

Gleichscht du deitsche Ess-sache?

Guder Daag Blog Leser! Well ich bin widder do mit en neie Buch mit eich zu deele. Ee paar Woch zerick, hawwich en Blog Poscht iwwer em Patrick Donmoyer sei nei Buch iwwer Scheier Schtanne gschriwwe. Selle Woch will ich en Poscht iwwer em William Weaver sei nei Buch schriewe. Em Weaver sei Buch iss iwwer Deitsche Ess-sache, ihre Gschichte, ihre Reseete un ihre Blatz in net yuscht unsre Kuldur awwer in die Amerikaanische Kuldur.

Der Weaver iss en arrig bekannte Kerl wann es zu Ess-sache un Reseete kummt. Er iss en Ess-sache Gschichter un en Schreiwer vun viele Bicher wie “Culinary Ephemera: An Illustrated History” un “Sauerkraut Yankees: Pennsylvania Dutch Food and Foodways”. Er iss aa der Direktor vun em Keystone Center for the Study of Regional Foods and Food Tourism un behaldet die Roughwood Saame Versammlung fer Heirloom Ess-sache Blanze.

Do iss em Weaver sei Buch.

Do iss em Weaver sei Buch.

Mir kenne alle eenich sei, as nooch unsre Mudderschprooch, unsere Ess-sache sin die Nummer Zwee Schtick vun unser Kuldur. Viele Amerikaaner, die net Deitsche sin, kenne unsere Ess-sache wie Melassichriwwelboi odder Schnitz un Gnepp odder Pannhaas. Em Weaver sei nei Buch heesst: “As American as Shoofly Pie: The Foodlore and Fakelore of Pennsylvania Dutch Cuisine.” Sei nei Buch saagt alles was es gebt zu saage iwwer unsere Ess-sache. Der Weaver schreibt viel iwwer die Reseete die unsere Voreldere vun Deitschland nooch Amerikaa gebrocht hen un dann wie mir sie in Amerikaa verennert hen. Er hot en ganze Kabiddel yuscht iwwer Gnepp gschriwwe un en Kabiddel iwwer Seimawe, en Kabiddel iwwer Graut, Waffels, Grundsau un die Idea vun em Amisch Disch. Sei Research iss arrig gut geduh un er gebt der Leser so viel Information.

Awwer sell Buch iss net yuscht en Gschichtbuch es ganz langweilich iss, nee, sell macht arrig viel Gschpass es zu lese. Oft hawwich gelacht un aa oft hawwich eppes vun sellem Buch gelannt . Es hot mich erinnert uff Ess-sache die mei Grossmudder gekocht hot. As ich am lese waar, kennt ich alles widder schmecke un rieche. Am End sei Buch hot der Weaver viele Reseete drinn gschriwwe, so der Leser alles fer sich selwer koche un backe kennte!

Do iss eppes vun em Buch, as ich arrig inderesannt gfunne hab: “Ess-sache, wie Kuldur, bleibt net schtill; selles Buch iss iwwer Ess-sache die am Geh sin, Ess-sache die gehne vun alde Wege nooch neie Identities, neie Authenticities, un vor allem nooch en neie kochliche Schtimm.”

Ich kann sell Buch net genunk empfehle. Wann du en Kopie kaafe witt, klick mol do: Dem Weaver sei Buch.

Do iss en Audio Klip:

Published in: on 21/09/2013 at 12:45  Leave a Comment  

Unsere Faahne!

Guder Daag Blog Leser! Well ich bin widder zerick. Letschde Wochend waar ich fatt. Ich waar daheem in Barricks Kaunty fer meim Bruder sei Hochzich. Es Wedder waar arrig schee un alles iss arrig gut gange. Nau hot er en Fraa! Selle Woch will ich eppes katz schreiwe iwwer unsere Faahne. Hett dihr schunn gwesst as uns Deitsche en Faahne hen? Nee, net die Amerikaanische Faahne (der alde Herrlichkeit, odder der rot, weiss un bloh), ich meehn en Faahne fer uns Deitsche! Ya, mir henn, schunn zidder es Yaahr 1989.

Do iss unsere Faahne.

Do iss unsere Faahne.

Unsere Faahne iss weiss un hot siwwe wichdige Dinge druff. In de vier Eck sin en Karrich, en Hatz mit Dulpe, en Conestoga Waage un en Blug. In de Mitt iss en Keystone mit en Schiff. Uff em Schiff sei Segel schteht es Yaahr 1683. Um re Keystone rum sin die Wadde: “Liewer Gott im Himmel drin, loss uns Deitsche was mir sin”. All die Pickders hen en Meehning.

Nadierlich sin all die Pickders vun Dinge die eppes iwwer uns Deitsche saagt.

Die Keystone – sell iss die Symbol vun unsere Schtaat: Pennsylvaani.

En Schiff mit 1683 druff – unsere Voreldre sin vun Deitschland uff soddiche Schiffe kumme. Die aerschde Deitsche in Amerikaa sin im Yaahr 1683 uff em Schiff “Concord” aakumme.

En Karrich – Mir sin grischtliche Leit mit grosse Lieb fer unser Herr un mir sin fromm.

En Hatz mit Dulpe – soddiche Dinge kann mer in unser Kunscht finne. Uff Gwilts, in Fraktur, uff Pickders un annere Dinge finn mer soddiche Modifs.

En Conestoga Waage – Eene vun de wichdigschde Dinge die mir gemacht hen waare die Conestoga Waage. Die Waage hen unsere yunge Land wachse gholfe. Sache kennte mit de Waage weit un breed gschickt waerre .

En Blug – Der Blug hot unsere Voreldere gholfe ihre neie Lewe in Amerikaa zu beginne. Un fer viele Yaahre sin mir Bauere. En Bauer kann sei Arewet net duh mitaus en Blug.

Die Wadde saage graad was sie saage solle. Mir sin schtolz Deitsche zu sei, mir bede zu unsrem Herr um unsre Kuldur un Schprooch zu bschitzte un behalde.

Die Faahne waar vun en Kommittee vun dem Eugene Stine, dem Carl Snyder, dem Richard Miller, dem Sterling Zimmerman, dem Peter Fritsch un annere Leit vun verschiddliche Grundsau Lodges erschafft. Ich bin arrig dankbar as selle Leit es geduh hen. Witt du en Faahne kaafe? Wann ya, Klick mol do: http://www.crwflags.com/page0860pa-dutch.html

Do iss en Audio Klip:

Published in: on 14/09/2013 at 10:32  Leave a Comment  

En neier Grieg?

Guder Daag Blog Leser! Der Titel vun sellre Woch iss net so gut. Ich bin sicher as viel vun eich die Nachrichte selle Woch gheert hett. Vielleicht kummt bald en annerer Grieg fer unser Land. Fer die letschde 12 Yaahre sin mir in Grieg. Aerschdens waar der Grieg in Irak. Mir hen gedenkt as es grosse Gewehr datt gewwe hot, so mir sin reigange un fer viele Yaahre gefochde. Wege die Zeit hemmer der Bresident Hussein runner vun der Greft gebrocht un en neie Regiering uffgschtellt. Dann sin Amerikaanische Soldaate nooch Afghanistan gschickt. Datt hemmer die Taliban rausgschmisse un der Deiwel, bin Laden, dotgemacht. Nau geht es zimmlich besser fer allebeed Lenner. Endlich kenne mir die Friede seh un schmecke….well vielleicht.

Fer die letschde paar Munet hemmer in die Nachricht gheert as vielleicht hot der Syrian Bresident Giftgewehr uff sei Leit geyuust. Fer lange kennte mir es net iwwerweise. Nau kummt Reports vun en Drupp Leit vun de UN die saage as sie sin schier gaar sicher as Giftgewehr geyuust waare. Nau kummt die Frooge, was iss naegscht?

Die Faahne vun Syria.

Die Faahne vun Syria.

Fer die letschde paar Munet, weil es so viel in die Nachricht iwwer Syria gewwe hot, hawwich viel iwwer es Land gelannt. Bevor, hawwich yuscht iwwer Syria vun re Biewel gewisst. Ich hab viel iwwer Damaskus (ihr Haaptschtadt) in re Sunndaagschul gelannt. Awwer wie iss Syria heitzudaage? Was wisse mir? Der Bresident vun Syria heest: Bashar al-Assad un er iss der Bresident zidder em Yaahr 2000. Syria as en Land hot sei Freiheit im Yaahr 1961 grickt. Bevor waar es en Schtick vun de United Arab Republic un frieher waar es en Schtick vun Frankreich. Damaskus iss der Haaptschadt awwer Aleppo iss der greeschte Schtadt mit meh as 2 Millyonen Leit. In Total hot Syria 22 Millyone Leit die datt wuhne. Es legt gschwischich Israel, Turkey, Lebanon, Irak un Jordan.

Der Bresident, Bashar al- Assad.

Der Bresident, Bashar al- Assad.

Der Bresident un sei Regiering kummt aus die Alawites, die sin die Minderheit mit yuscht 12% vun de Leit im Land. Es gebt en Drupp vun Leit die heest: Syrian National Coalition. Sie kumme aus re Mehrheit vun Leit, die sin Sunnis. Sie welle en neie Regiering un sie welle der al-Assad weg. Sie hen en gleene Army un schunn zidder em Yaahr 2011 sin sie un die Army vun al-Assad am fechde. Neilich iss es widder rauskumme as der al-Assad Giftgewehr uff sei eegne Leit geyuust hot. Er will all die Greft hawwe un ken Coalition hawwe.

Do iss wu Amerikaa in die Gschicht kummt. Der Bresident Obama hot schunn lang gsaat as wann es Wahr iss as al-Assad Giftgewehr geyuust hot, dann waerre mir in die Pickder kumme. So, nau sin mir so weit. Unsere alde Freinde, England, hot am Freidaag “Nee” in re Parliament gewaehlt. Sie welle net widder in Grieg geh. Frankreich schteht allsfatt nooch bei uns. Deitschland schteht allsfatt nooch uff em Fens. Mir wisse net was vun ihnne kumme waerr. Unser alde Feind, Russland, schteht uff der Seit vun al-Assad. Sell find ich gaar net gut fer die grosse Pickder. Nadierlich iss Israel aa mit uns. Sie hen grosse Angscht vun was vielleicht bassiere kennte.

Ich, persehnlich, bin gerisse. Ich find es vollig missfellich as al-Assad Giftgewehr geyuust hot, abbadich uff Fraa un Kinner un annere Unschuldige. Awwer ich will net widder in Grieg geh. Es iss so deier, net yuscht vun Geld awwer aa vun de Lewe unsere Soldaate. So do hock ich, un ich weess net was zu saage. Viele Amerikaaner denke as es endlich Zeit iss do in Amerikaa zu bleiwe un loss mol die Welt ihr eegne Brobleme fixe. Mir hen unsere eegne Brobleme do da heem. Ich bin eenich mit sell. Mir hen grosse Brobleme do in Amerikaa, net genunk Geld fer die Schule, Leit mitaus Arewet, Leit die ken Heem hen odder ken Esse hen. Awwer, Amerikaa hot allsfat fer Gerechtigkeit un Freiheit gschtanne. Kennte mir nau yuscht “Nee, net selle Mol” saage? Ich weess net. Der Obama hot gschder gsaat as er Missels schiesse will, awwer er hot aa gsaat as er en glaare Andwatt vun re Congress aa hawwe will. Sell find ich aa gut. Awwer mir misse erinnere, as yede Daag as mir nix duhe, waere meh unschuldige Leit in Syria schtarewe. Iss sell ok? Was denkt eich?

Geb Acht: Es waerd ken neie Blog Poscht naegschde Woch gewwe! Mei Bruder waerd naegschde Samschdaag sei Hochzich hawwe un ich bin “der Beschde Mann”. So mir sehne uns dann in zwee Woch!

Do iss en Audio Klip:

Published in: on 01/09/2013 at 13:46  Leave a Comment