Gebt Acht!

Guder Daag Blog Leser! Ich hab gewollt arrig katz en Poscht schreiwe, so as dihr eppes wisst. Mariye flieg ich nooch Detischland fer 10 Daage. Sell meehnt as es ken neie Blog Poscht fer zwee Woch gewwe waerr. Awwer ich versprech as wann ich zerickkumm waerr ich graad eppes Neies schreiwe. Ich hab schunn en Lischt vun Topics. Un nadierlich waerr ich fer schurr ee paar Pickders vun meinre Rees hawwe.

Ich flieg vun Newark, Nei Jersey nooch Düsseldorf un dann nooch Berlin. Ich nehm en Drupp vun 17 annere Leit. Viel vun re Drupp sin Mitglieder an mei Kaerrich. Mir bsuche “Lutherland” (Wittenberg, Eisenach, Eisleben), Dresden, Erfurt un dann faahre mir in re alde Heemet (Rheinland-Pfalz). Mir bleiwe drei Nechte in Cochem an der Mosellrewwer. Ich bin froh as widder nooch re Pfalz zu faahre. Datt kann mer unser Mudderschprooch schwetze! Cochem iss en gleene Schteddel so ich bin sicher as ich datt Deitsch schwetze kann.

So bis ich zerrickkumm, bleibt gsund un macht’s gut!

Published in: on 17/07/2013 at 13:30  Comments (2)  

Eppes abbadiches selle Woch!

Guder Daag Blog Leser! Selle Woch bin ich arrig froh eppes anneres fer eich zu hawwe. En guder Friend vun mir iss nau in Deitschland. Er iss en Schtudent an der University in Marburg, Hessen. Er iss datt um sei Hochdeitsch zu verbessere. Er iss aa en Deitscher wie ich un nadierlich waar er schtolz sei Deitsche Herrkunft die Hochdeitsche Schtudente zu zeige. Er, der Chris, hot die folyende Blog Poscht fer eich gschriwwe. Ich glaab as dihr es inderessant finne waerrt.

————

Vun em Chris LaRose:

As ich en Senior an der College waar, hawwich mich eigschriwwe fer en ee Yaahr lang an der Phillips University in Marburg, Deitschland mitzumache. In mei zwette Semester datt, hawwich gemusst en Schluss Project zu schreiwe. Do saage sie en “Hausarewet”. Die Topic kennt ich waehle. Ich hab en Ardikel iwwer die Wirkinge vun Accents un Dialekts uff Dutch (die Schprooch in Holland) gelese.

Die Ardikel hot en Study gemacht um zu finne was die Stereotypes un Prejudices sin wann Leit schwetze mit epper der mit en verschiddliche Accent vun ihr eegene schwetzt. Was rauskumme ist, hot aagwisse, as Leit mit en landliche Accent sin oft verbunne as dumm un eefach, awwer arrig ehrlich un nett. Leit, die mit en normal Accent schwetze, sin verbunne as gscheit awwer unehrlich un net so freindlich. Die Study hot yuscht mit verschiddliche Accents un Dialekts in Holland zu duh.

Mei Ziel waar zu finne ob die gleiche Stereotypes un Prejudices sin aa in annere Lenner um die Welt die die gleiche Kuldur un Gebreich hen. Ich hab gewaehlt my Study uff Deitschland un nadierlich weil ich in en Pennsylvaanisch Deitsche Familye uffgwaxne waar, hawwich gemusst unser Mudderschprooch in die Study eizubringe.

Aerscht hawwich Dialekts in Deitschland unnersucht, un aa Polls gelese iwwer welle Dialekts die Hochdeitsche Leit am beschde gegliche hen. Ich hab gefunne as die Mehrheet vun de Dialekts, vun de unser Mudderschprooch kumme, waare arrig nidder in die Polls. Mei Hypothesis waar as sell kennt en Verbinding mit landliche Dialekts hawwe.

Ich hab en guder Freind vun mir aagerufe, der Doug Madenford, un hot ihm gfroogt en Gschicht in Deitsch uffzunemme. Dann hawwich die Audiofile fer en grosse Nummer vun Hochdeitsche gschpielt un hen sie Frooge gfrogt. Ich hab gfroogt: Welle Dialekt schwetzt er? Was fer en Tschopp hot er? Wie alt iss er? Iss er gscheit, nett, freigewwich, ehrlich?

Noch ich all die Antwadde grickt hab, hab ich gsehne as sie mei Hypothesis 100% unnerschtitzt waar.

Viele vun de Hochdeitsche (19 aus 20) hen geahnt as der Mann am schwetze waar en Bauer. Die Character Traits hen die Source Ardikel gschpiggelt. Deitsch hot arrig hoch in Nettheit, Ehrlichkeit un Freigewwichkeit hiegerechelt, awwer arrig nidder in Gscheitheit hiegerechelt.

Viel Leit hen gschriwwe as sie hen gedenkt as der Mann am schwetze kummt vor as er froh waar, arrig freindlich, as er en Gfalle fer epper mitaus Frooge mache daet, awwer sie hen aa gedenkt as er net so gscheit waar un ee paar hen gschriwwe as er yuscht dumm waar.

Yuscht die Helft vun die Leit hen gewisst as es Deitsch waar. Annere Leit hen gaar nix davun gewisst un kennte die Dialekt net verschtehe.

Ich denk as die Unnersuchung waar arrig erfolgreich un aa eensichtsvoll in wie die Gsellschaft denkt un wie mir bewusstlose richde un wie mir uff Leit beachde. Ich hab aa en Ardikel gelese die saagt as Leit sin net so verdrauensvoll vun epper der mit en Accent odder en Dialekt (die verschiddlich iss) schwetzt.

Ich waar froh Deitsch zerick zu em Mudderland zu bringe un es basst gut mit de annere Dialekts datt wu ich waar. Viel Leit hen gsaat as sie alles arrig gut verschtanne hen un as es glingt wie ihr Dialekt daheem. Annere hen gsaat as es glingt wie an alde Dialekt der verlore in en gleene Hochdeitsche Bauerschtedel waar un es waar net so leicht es zu verschteh. Zu alle, die Dialekt waar nooch en Schtick vun ihre Kuldur.

———

Do iss der Chris. In selle Pickder iss er in Heidelberg, Deitschland.

Do iss der Chris. In selle Pickder iss er in Heidelberg, Deitschland.

Ich bedanke mich arrig viel fer dem Chris sei Poscht. Ich denk sei Unnersuchung waar inderessant un aa creative. Ich hab mit ihm uff Skype gschwetzt un er waar aa froh as er die Unnersuchung gemacht hot.

Do is en Audio Klip: Eppes Abbadiches selle Woch!

Published in: on 11/07/2013 at 07:44  Leave a Comment