En grosser Daag fer uns do in Amerikaa!

Guder Daag Blog Leser! Well ‘sis nau Tschulei un dihr wisst was sell mehnt: widder Zeit zu feiere! Uff em 4. Tschulei waerr unser Land 237 Yaahre alt sei! Ya, as dihr schunn wisst, zerick im Yaahr 1776 hemmer uns “Macht’s gut” zu England un ihr Keenich gsaat! So selle Woch waerre mir viel Picnics un Partys hawwe. Ich glaab ee paar Biere waerre aa gedrunke. Un nadierlich gebt’s Feierwerks!

Der Thomas Jefferson un de annere Daadis vun unser Land in Tschulei 1776. Selle Babier hot alles aagfangt.

Der Thomas Jefferson un de annere Daadis vun unser Land in Tschulei 1776. Selle Babier hot alles aagfangt.

Ich hab gedenkt ich waerr eich zwee Dinge gewwe um mit zu feiere. Yedes Kind do in Amerikaa muss ee Ding laerne: Es Verschprechnis Zum Faahne. Mir fange yede Schuldaag mit sell aa. Do iss es uff Deitsch:

Ich versprech gedrei zu sei, zu dem Faahne vun de Vereinigte Schtaaten vun Amerikaa un des Land, fer des es schteht; ee Land, unnich Gott, ewich vereinicht, mit Freiheit un Gerechtichkeit fer Alle.

Un mir misse aa en Lied hawwe, so do sin die Wadde zu en aldes gudes patriotisches Lied:

Amerikaa

Mei Land, ich sing vun dir

siess iss die Freiheit mit,

do will ich sei;

so wie die alde Leit,

so viel ich aa noch heit.

Sin dir zu yedre Zeit

allsfatt gedrei.

Dihr kennt die Melodie, so geht drauss un singt es arrig laut. Loss mol dei Nochbere wisse as du en schtolze Deitsche bischt! Un ich will yuscht katz en “Freehliche Kanada Daag!” an all mei kanaadische Leser winsche. Ich hoff as dihr en guder Feierdaag uff em aerschde Tschulei hawwe!

Published in: on 29/06/2013 at 07:08  Comments (1)  

Gude Myusick fer eich!

Guder Daag Blog Leser! Selle Woch will ich eppes iwwer glee bissel gude Myusick schreiwe. As viel vun eich schunn wisst, bin ich in Barricks Kaunty gebore un uffgwaxe. Un dihr aa schunn wisst as Myusick arrig wichdig in mei Lewe iss. Ich hab mei ganzes Lewe Inschtrumente gschpielt un hab gsunge. Heitzudaage bin ich in en gleene Baend. Ich sing un schpiel Mandolin un mei Freind schpielt Gitarr.  Mir schpiele Bluegrass un Amerikaanische Folks Myusick.

Well, heit will ich eich eppes saage iwwer en grosse Gelegeheet gude Bluegrass un Amerikaanische Folk Myusick zu heere. East Side Dave Klein (odder der Oscht-Seide Dave Klein) wuhnt sei ganzes Lewe in Barricks Kaunty. Er iss en bekannter un arrig guder Myusick-Schpieler. Er kann Banjo un Gitarr schpiele un nadierlich kann er aa gut singe. Un nooch, er kann aa yodele! Schunn zidder 30 Yaahre hot der Dave en Schow uff em Schwetzkaschde der heescht: Mountain Folk. Die Schow laaft alle Woch uff em WEEU in Reading un nau mit all die neie Technologie as mir hen, kann mer es uff em Internet heere. Alle Woch schpielt er gude alde Myusick un neie Bluegrass aa. Was arrig gut fer uns iss as er browiert Myusick-Schpieler vun Pennsylvaania zu bekanntmache un schpiele.

Do iss der Dave. En arrig guder Kerl!

Do iss der Dave. En arrig guder Kerl!

Mannichmol schpielt er aa Lieder die ganz beliebt zu unse Deitsche sin. Alde Folkslieder, die so gut un siess sin. Mer kann die Schow uff em iTunes runnerlaade, koschdeloss! Ya, mir misse net fer eppes so gut bezaahle! Ich laade alle mei Blog Leser ei um selle Schow zu heere.

Der Dave hot aa en arrig gude Baend. Sie heescht: The Mountain Folk Band. Sie schpiele oft do rum Barricks Kaunty un die Gegend. Vielleicht kennt eich sie iwwerdem sehne. Ich versprech as es en gudi Zeit waerr.

Do iss en Link zu seinre Heemseide uff em Internet: http://www.mountainfolk.com/

Uff selle Heemseide kann mer Myusick heere un aa viel lese un laerne.

Do iss aa en Link zu en Video. Selle Video hot der Dave un die Yodeling Betty Naftzinger drin. Ich kenn die Betty schunn seit ich en gleene Bobbli waar. Normally, schwetzt die Betty meh Deitsch as Englisch! https://www.youtube.com/watch?v=mmgDrNdTYT8

So nau hawwich eich glee bissel gewwe zu lese, sehe un heere. Viel Gschpass! Alde traditional Myusick iss en Schtick vun unser Kuldur un mir misse es behaalde, graad wie unsere Schprooch!

Published in: on 23/06/2013 at 12:37  Leave a Comment  

En alte Freind!

Guder Daag Blog Leser! Die letschte Woch waar eppes abbadich fer mich un mei Familye. Mei gute alte Freind, die Elsa vun Schpain iss do kumme fer en Bsuch. Ich kenn die Elsa schunn seit College, so meh as 10 Yaahre. Sie waar do in Amerikaa as en Austauschschtudente an mei College. Ich hab sie datt kennengelannt un seiddem sin mir Freinde.

In College waar sie do yuscht fer ee Yaahr awwer mir hen en gute Freindschaft ghatt un hen es allsfatt nooch. Yaahre zerick, eb es all die wunnerbaare Dinge mit re Internet gewwe hot, waar es net so leicht in Contact zu bleiwe. Mir hen Briefe un Grsichtdaagskaarde gschickt. Nau, mit Facebook un E-Poscht iss es so leichter unsere Freindschaft zu behalde. Die Internet iss nix fer en See, die Messages kenne die Atlantik in Segunde fliege. Die Elsa kann Pickders uff Facebook schtecke un ich kann mich in mei Kich hocke un sie sehne. En Virtual-Freindschaft iss gut, awwer ‘siss nix wie die echde Ding. Wann mer zammehocke kenne un schwetze un lache.

Zum Glick hemmer die Gelegeheit selle Woch so zu duh. Die Elsa hen en billiger Flugkaart im Internet kaaft un iss do gfloge. Sie waar bei uns daheem die ganze Zeit. Es waar es aerschde Mol as sie mei Fraa un mei Dochder aagedroffe. Es letschdes Mol as mir uns gsehne hen waar zerick in 2007 wann ich nooch Schpain gange bin um sie zu bsuche. Sell waar aa en abbadiche Ding. Ich hab gekannt ihre Familye aazudreffe un Zeit mit ihnne zu verbringe.

Darrich selle Woch hemmer viel geduh. Mir sin Eikaafe gange (weil die Gleeder so billig do in Amerikaa sin), mir hen ee paar Amische Schtors bsucht, mir sin in en Essblatz gange fer en echde Amerikaanische Erfaahring: Wings zu esse un Bier zu drinke. Awwer was am beschd waar, as alle Owed sin mir uff meim Bortsch ghockt un yuscht Zeit mit einanner verbracht. Mir hen Gschichte verzaehlt, gelacht un yuscht do im Schtill ghockt. Yuscht Freinde kenne Zeit verbringe mitaus Wadde zu saage.

Ich un mei alte Freind.

Ich un mei alte Freind.

Heit hawwich sie zerick nooch Nei Yarrick Schtadt gefaahre fer ihr Flug zerick nooch Schpain. Es waar bedriebt “Adios” zu saage. Mir wisse net wann mir uns widdersehne. Vielleicht in ee paar Yaahre? Vielleicht balder odder vielleicht laenger. Yuscht der Gott weesscht. Uff em Aerport hemmer uns umaarmt un glee bissel gebrillt. Mir hen net “Mach’s gut” gsaat, yuscht, “Mir sehne uns bald.”

So geht es mit gute Freinde, die Freindschaft bringt uns allsfatt zerickzamme, ee Zeit, irgendwie, ariyets.

Do iss en Audio Klip:

Published in: on 16/06/2013 at 16:20  Leave a Comment  

Dem Johnstown sei Flut!

Guder Daag Blog Leser! Geschder waar en wichdiges Yaehrlichsfescht do in Pennsylvaania. Viel Leit hen davun in re Schul gelannt awwer viel Leit denk nimmi dorauf. Dem Johnstown sei Flut (odder die Grosse Flut vun 1889) iss uff em 31. Moi, 1889 bassiert. Es iss bassiert wann der South Fork Damm kaputt gange iss. Der Damm waar uff der Little Conemaugh Rewwer, baut 14 Meils nuffschtrom vun Johnstown. Ee paar Daage bevor es kaputt gange iss, hen die Gegend arrig viel Rege grickt. Es hot vun 6-10 Inches Rege in yuscht 24 Schtunn gewwe! Wann der Damm losgange iss, iss 20 Millyonen Tunne vun Wasser (4.8 Billyonen Gallunne) vun em Lake Conemaugh rausgange. Der Schtrom waar so gross un graftig wie der Mississippi Rewwer. Der Flut hot 2,209 Leit dotgemacht un hot $17 Millyonen Schaade geduh (baut $425 Millyonen in 2013 Daalers).

5cover

Es waar der aerschde grosse Unglick Helfe, der vun dem neien American Red Cross behandelt waar. Unnerschtitzing fer die Opfer sin vun ganze Amerikaa un 18 fremde Lenner kumme. Nooch re Flut, Iwwerlewere hen viele law-meesich Schwuppe ausgschtanne, in ihre Versuch Schaade vun dem Damm sei Besitzere zerickzugriege. Buplicke Zann um die Verfehle, hot die amerikaanische Gesetz vun en Schuldenabhengig zu en Schtreng-Liability System gemacht.

johnstown_main_street_1889_flood

Uff em Mariye vun em 31. Moi, 1889, uff en gleene Bauerei yuscht naddlich vun dem South Fork Damm, der Elias Unger (en Deitscher fer schurr), der Bresident vun re South Fork Fische un Yaage Klub, hot gsehene wie gross der Lake Conemaugh waar. Der Unger is rausgschprunge un hot gsehne as es Wasser schier gaar iwwer em Damm laaft. Er hot en Drupp vun Mannsleit zammegrickt um dem Damm zu rette. Sie hen browiert die Spillway freizumache. Nix hot geholfe. Es waar zu schpeet un es hot zu viel Wasser gewwe.

JohnstownFlood

Baut 3:10 am Nummidaag, der Damm iss kaputt gange, un es Wasser iss rausgange. Es hot yuscht 40 Minudde genumme bis die ganze Lake abgerunne iss. Es Wasser iss arrig schtarrick die 14 Meils bis Johnstown gange. Uff der Weg hot es Beem, Heiser un Gediere weggenumme. Die gleene Schteddel vun Mineral Point waar vollig weckgewascht. 99 Familye sin in re Flut gschtarewe, 396 davun waare Kinner. 124 Weibsleit un 198 Mannsleit waare gewittet sei. 98 Kinner waare nau Waisekinner. Baut 777 Leit waare nimmi bekanntgemacht, ihre Kareber sin in re “Plot of the Unknown” in Grandview Karrichhof in Westmont begraabt. 1,600 Heiser waare verhaust un 4 Square-Meiles vun re Schtadtmidde Johnstown waare vollig verhaust.

Dem Johnstown sei Flut waar eppes arrig. Mir solle es errinnere, aa wenn es yuscht uff all die Leit die alles verlore hen un aa abbadich an die Leit die ihre Lewe verlore hen. Ich hab en ganze Documentary uff YouTube gefunne. ‘Sis in vier Schticke gschnidde un do hawwich die Links gewwe. Wann du meh lanne witt, guck mol die Videos aa. Sie sin arrig gut gemacht un es gebt viel Pickders vun re Flut.

Dem Johnstown sei Flut Video 1

Dem Johnstown sei Flut Video 2

Dem Johnstown sei Flut Video 3

Dem Johnstown sei Flut Video 4

Do iss en Link zu dem Johnstown sei Flut National Memorial un Museum. Sell iss doch eppes zu seh (wann du in re Johnstown Gegen bischt).

Un do iss en Audio Klip vun sellre Poscht!

 

 

Published in: on 01/06/2013 at 08:58  Leave a Comment