Eppes iwwer Gedechtnisdaag!

Guder Daag Blog Leser! Well uff em Mundaag iss es widder Gedechtnisdaag do in Amerikaa. Do sin ee paar Wadde iwwer selle Feierdaag:

Uff selle Gedechtnisdaag, bin ich dankbar fer der Opfer, der so viele darrich unsre Gschicht gemacht hen, der die Mannsleit un Weibsleit, die es heechschte Opfer gemacht hen un fer ihre Familye, wer weiter mitaus sie geh misse.

‘Sis en Opfer, der leicht zu vergesse iss. Fer die, die es hawwe, die Freiheit iss wie Luft. ‘Sis eppes as mir yuscht hen. Viele waerre net verschteh yuscht wie wertvoll es iss bis es en Fender iss wecknemme zu sei.

Heit erinner mich an en Opfer, der gemacht waar un en Schuld die ich net zerickbezaahle kann. Ich bed fer der Gott im Himmel, die Familye zu segne vun selle wer ihre Geliebte, die unser Land bedient hen, verloren hen. Ich bed fer ihn die Verwundete zu segne un zu dreeschde die, die nooch mit uns sin, un aa ihre Familye zu segne.

‘Sis aa mei Bed, as mir sell Opfer yede Daag erinnere un es wertvolle Gschenk vun Freiheit, net yuscht ee Mol im Yaahr odder wann sie in Gfaahr sin.

Ich bedank mich fer all was die Soldaate fer mich un alle vun uns gewwe hen. Endlich, bed ich fer Fried uff unsre Welt as en nimmi meh Greige gewwe. Mir kenne friedlich mitenanner wuhne un lewe. Ich will so eppes un ich glaab as viele vun eich wollt aa so eppes.

Do iss en Audio Klip:

Nie vergesse was sie fer uns gemacht un gewwe hen.

Nie vergesse was sie fer uns gemacht un gewwe hen.

Published in: on 24/05/2013 at 06:25  Leave a Comment  

Nau bin ich draa!

Guder Daag Blog Leser! Selle Woch hawwich eppes gschriwwe as ich schunn lang schreiwe gewollt hab. Viel Gschpass bei Lese!

As ich en Kind waar, hawwich viel Glick ghatt. Ich hab zwee Eldere die mei ganze Lewe zamme waare. Mei Kindheit waar frehlich un friedlich. Ich bin uff en gleene Bauerei in Centre Taunschip uffgwaxse. Meinre Mudder ihre Eldere hen yuscht ee Meil vun uns gewuhnt un meim Daadi sei Eldere hen baut 10 Meil weck gewuhnt. Ich hab viel Zeit mit allebeed meine Grosseldere rumgebrocht. Ich hab gekennt drause zu geh un ich hab viel Blatz zu schpiele. Mir hen Gaarde ghatt, so ich hab gelannt wie mer Gaardesache blanst un bauert. Mir hen Hinkel un Siesshinkel ghatt. Ich hab gelannt wie mer uff Gediere uffbasse muss. Es Grass waar grien, die Luft waar frisch un sauwer, die Noochber waare freindlich….es waar so fehlerfrei as es sei kennt.

As ich en Kind waar, hawwich viel Zeit mit meinre Familye rumgebrocht. Ich waar net en Kind der allsfatt mit sei Freinde sei misse daete. Ich hab gemisst in der Gaarde zu schaffe, es Grass zu maehe un aa in es Haus zu helfe. Nadierlich hawwich glee bissel gegrext awwer net zu viel un aa net zu oft. Mei Eldere waare alles zu mir. Mei Mudder hot mich viel in es Haus gelaernt. Ich hab gelannt wie mer kocht un backt un aa wie mer die Wescherei drause haengt. Mei Daadi hot mich alles iwwer Blanse, Umgraut, Tracktors, Yaage un der Gaarde gelaernt. Er hot versucht mich wie en gleene Schreiner zu sei, awwer sell waar net mei Koppche Tee. Mit Holz zu schaffe hot mich gaar net geinderesst. Awwer was mei Daadi un meine Mudder mich am menschde gelaernt hen, iss as hatte Arewet arrig wichdig iss. Es macht nix aus was fer en Tschopp mer hot, yuscht schaff hatt un duh die beschte was du kannscht.

As ich en Kind waar hawwich sell net gewisst, awwer nau as ich en Mann bin, kann ich alles glaar seh. Ich kann sie net genunk bedanke, as sie sell mich gelaernt hen.

Nau hawwich mei eigni Dochder, ya nau bin ich der Daadi. Ich will alles fer mei Dochder gewwe un hawwe. Awwer ich weess aa as alles was Materialistic iss, iss net wichdig. As ich en Kind waar, hawwich net all die modern un neie Dinge ghatt. Un sell waar ok. Ich weess net wie mei Eldere es gemacht hen, awwer ich will aa so en Exempel fer mei Dochder sei. Ich will as sie en gude Schaffethic hot, ich will as sie nett un hofflich iss. Ich will as sie unsere alde Traditions behalde witt. Ich will as sie Deitsch schwetzt un schreibt. Ich will as sie Gsund un frehlich iss. Ich will as sie an der Gott glaabt un aa en schtarricke Glaawe hot.

Zu viele Kinner in unserem Land hen gaar nix. Sie hen ken Eldere, es gebt niemand die sie liebt. Sie wuhne mit verbrochene Famliye. Es gebt net genunk zu esse, es Haus iss alt un ihre Gleeder sin yuscht Lumpe. Fer die Kinner, bed ich oft. Ich bin glicklich as mei Dochder net so lewe muss.

Ich hoff as meine Dochder uff mich gucke un denke waerr as ich uff meim Daadi geguckt un gedenkt hab. Es gebt ken Buch um sell zu lanne. Ich glaab es kummt vun ariyets in unsere Hatze un unsere Kepp. Vun nau aa waerr ich so hatt wie meeglich fer sie schaffe, un ich waerr versuche der beschde Daadi in re Welt zu sei. Ich weess wie so en Mann sei muss, as ich en Kind waar hawwich so eens ghatt.

Do iss en Audio Klip:

 

 

Published in: on 05/05/2013 at 10:55  Leave a Comment