Shakespeare uff Deitsch!

Guder Daag Blog Leser! Selle Woch hawwich eppes abbadich mit eich zu deele. Frieher selle Woch hawwich en Poscht uff em Facebook vun dem Andrew Smale grickt. Er hot en Iwwersetzung vun dem Shakespeare sei Schtick: The Merchant of Venice gfunne. Im Yaahr 1940 hot der Dr. Ralph Schlosser der Gericht Scene iwwersetzt un dann er hot es aa uffgenumme. Do iss  en Audio Klip. Ich waar arrig froh Shakespeare uff Deitsch zu heere. Dann hawwich gedenkt, ferwas gebt es net meh Shakespeare uff Deitsch? As ich in der High School waar, hawwich Shakespeare arrig garn ghatt. Ich gleich ihn un sei Gschichte allsfatt nooch. Dann hawwich glee bissel Inspiration grickt. Mittwoch, der 23. April iss dem Shakespeare sei Gebottsdaag. En Schtimm vun dem Himmel hot zu mir gschwetzt: “Iwwersetz eppes vun Shakespeare uff Deitsch.” Wann en Schtimm vun dem Himmel zu dir schwetzt, muss mer es hariche. As ich en Senior in High School waar, hawwich dem Shakespeare sei Henry V glese. Ich hab es so gut gfunne as ich em Henry seine wichdichste Red auswennich gelannt hab. So, ich hab gewisst was ich duhe muss. Ya, ich hab die ganze Scene uff Deitsch iwwersetzt. Ich hoff as eich es gleicht.

Akt 4 Scene 3: Der Englische Laager

Gloucester:

Wu iss der Keenich?

Bedford:

Der Keenich iss gridde um ihr Schlacht aazublicke.

Westmoreland:

Vun Soldaate hen sie drei Zech Dausend.

Exeter:

Sell macht es fimf zu eens; un sie sin all frisch.

Salisbury:

Em Gott sei Arem globbt mit uns! ‘Sis engschderiche Odds.

Gott sei mit eich, all dihr Keenichssoh: Ich ge zu meim Befehl.

Wenn mir uns net meh dreffe daete, bis mir uns im Himmel dreffe daete,

Dann, frehlich, mei edel Herr vun Bedford,

Mei liewer Herr Gloucester, un mei guter Herr Exeter,

Un mei freindliche Freindschaft, Grieger all, Hatyee!

Bedford:

Mach’s gut, guter Salisbury; un viel Glick geh mit dir!

Exeter:

Faerriwell, freindlicher Herr; fechd tapfer Heit:

Un nooch duh ich dich letz um dich uff es zu meinde,

Fer dich, du bischt gschtellt vun der feschte Waahrheit vun Mut.

Salisbury geht fatt.

Bedford:

Er iss voll vun Mut un aa vun Freindlichkeit.

Keenichsohlich in allebeed.

Der Keenich kummt rei.

Westmoreland:

O, as mir do hett

Awwer yuscht zehe dausend vun de Mannsleit in England,

Die heit net schaffe!

Keenich Henry V:

Wer winscht so eppes?

Mei Gschwischderkind Westmoreland? Nee, mei guter Gschwischderkind:

Wenn mir gemarrickt zu schtarewe sin, sin mir genunk

Unser Land en Verluscht zu duh; un zu lewe,

Die wenniche Mannsleit, die greesere Deel vun Ehr.

Gottes Wille! Ich bed dir, winsch net fer ee Mann meh.

Ich bin net geizich uff Gold,

Un es mach’s nix wer uff mich esst.

Un aa net wenn Mannsleit mei Gleeder draage;

Soddiche ausserliche Dinge lewe net in mei Luschde:

Awwer, wenn es en Sind waerr die Ehr zu hawwe welle,

Bin ich es aaschtossescht Seel am Lewe.

Nee, Gedrei, mei Gschwischderkind, winsch net fer ee Mann vun England:

Gottes Fried! Ich daet net verliere so gross en Ehr

As ee Mann meh, ich denk, daet vun mir deele

Fer die beschde Hoffning hawwich. O, winsch net ee meh!

Eher ruf es ab, Westmoreland, darrich mei Host,

As er, der ken Bauch fer selle Schlacht hett,

Loss ihn fattgeh; sei Pass sett gemacht waerre

Un Geld der sei Rees in sei Backebuch gschteckt waerre:

Mir daete net in sellem Mann sei Gsellschaft schtarewe,

Der faerichdt sei Gmeinschaft mit uns zu schtarewe.

Seller Daag iss es Fescht vun Crispian:

Er, der selle Daag iwwerlebt, un sicher heemkummt,

Waerr graad uffschteh wann der Daag gsaagt iss,

Un erweckt sich uff der Naame Crispian.

Er, der seller Daag iwwerlebt, un en alte Alder seht,

Waerr yaahrlich uff der Wachtfescht sei Noochberschaft,

Un saagt ‘Mariye iss Sankt Crispian’:

Dann waerr er sei Aermel ausziehe un sei Narewe weise.

Un saagt ‘selle Narewe hab ich uff em Crispin sei Daag grickt’.

Alde Mannsleit vergesse: awwer all soll vergesse sei,

Awwer er waerr mit Vaertel erinnere

Was fer Daade er gemacht hot: Dann soll unsere Naame,

Bekannt in sei Mund wie Hauswadde sei

Harry der Keenich, Bedford un Exeter,

Warwick un Talbot, Salisbury un Gloucester,

Sei in ihre fliessende Koppche frisch erinnert.

Selle Gschicht soll der gute Mann sei Soh laerne;

Un Crispin Crispian soll nimme vorbeigeh,

Vun sellem Daag bis re Welt ihr End,

Awwer mir in es solle erinnert sei;

Mir wenniche, mir glickseliche wenniche, mir Band vun Brieder;

Fer er, der sei Blut mit mir heit vergiesst

Soll mei Bruder sei; sei er nimme so nidderbeenich,

Seller Daag soll sei Umschtand gelind mache:

Un Scheenemannsleit in England, die nau in Bett sin,

Solle sich verflucht finne, as sie do net waare,

Un ihre Mannheit billich halde, wann eenichepper schwetzt

Der mit uns uff em Sankt Crispin sei Daag gefochde hot.

————–

Im Yaahr 1989 hot der Kenneth Brannaugh en Movie vun sellem Schtick gemacht. Do iss en Link zu en Klip vun dem Kenneth Brannaugh un wie er selle Red gschpielt hot: Keenich Henry seine Red.

Published in: on 25/04/2013 at 19:40  Comments (2)  

Schlechte Leit duhe schlechte Dinge.

Guder Daag Blog Leser. Well selle Woch waar widder en schwere Woch fer uns do in Amerikaa. Mir hen zwee grosse Catastrophes ghatt. Uff Mundaag hot es widder en Terroristische Aagriff gewwe un dann uff Dinschdaag iss en Fertilizer Plant in Wescht Texas in die Luft gange. 14 Leit sin in Texas gschtarewe. Sell waar en Unglick awwer der Terroristiche Aagriff waar ken Unglick.

Uff em Mundaag waar der Boston Marathon. Am End der Marathon (bei re Faddig Lein) sin zwee Bombs in die Luft gange. Dausende vun Leit waare do um die Laafer zu seh un ‘Ya, du kannscht es schaffe’ greische. Baut drei Uhr Mundaag iss die aerschde Bomb in die Luft gange un dann baut 15 Minudde schpeeder iss en annere in die Luft gange. Drei Leit waare dodgemacht un 55 Leit waare schwer beschaedicht. Viele davun hen Beh un Erem verlore.  Am Aafang hemmer gaar net gwisst wer sell gemacht hot. Zum Glick iss alles bassiert wu viele Surveilance Kameras waare. Mir hen all die Video un Pickders aageguckt un hen zwee Buwe gsehne. Die zwee hot schwatze Ricksacks aa. Die zwee Bombs waare drin. Die FBI un Boston Polies sin graad uff em Yaag gange um die zwee zu finne.

Mir hen meh Information iwwer die zwee darrich der Woch gelannt. Die waare zwee Brieder, die nooch Amerikaa vun Chechnye, Russland baut 10 Yaahre zerick eigewandert hen. Um halwer elf, Dunnerschdaagowed hen die zwee Brieder en Poliesmann gschosse un sin in en Feierkampf mit annere Polies gewest. Der eldere Bruder, Tamerlan Tsarnev, iss darrich der Kampf gschosse awwer sei yungere Bruder iss weckgeloffe.

Endlich, schpeet Freidaagowed, iss alles zu me End kumme. Der yunge Bruder, Dzhokhar, iss in en Boot gfunne. Die Polies un die FBI hen ihn lewendig gfunne un hen ihn gfange. Mir wisse nooch net ferwas die zwee Mannsleit sell geduh hen. Hoffetlich, as der Dzhokhar nooch am lewe iss, waerr er eppes saage. Wege es Mannyaag iss die ganze Schtadt Boston in Lockdown gange. Leit waare net erlaabt ihre Heiser zu verlosse. Die Busse un Subways sin aa zugemacht. Un unser ganzes Land sin var em Guckbaxe ghockt um alles zu seh.

Nau iss alles vorbei un Lewe kann zerick zu normal kumme. Awwer, do hock ich widder mit viele Frooge un kenne Antwadde. Ferwas? Ferwas muss Leit annere Leit dodmache? Wann die zwee Mannsleit Amerikaa net gut genunk gfunne hen, ferwas sin sie net ariyetsanners gange. Die drei Leit die uff re Marathon dodgemacht sin, waare alle unschuldig. Een waar en 8 Yaahre alt Bu! Sie waare datt yuscht fer die Laafe zu seh un in en Blinse hen sie ihre Lewe verlore.

Fer die letschde 5 Daage iss Amerikaa zammekumme. Mir hen en Feind zu finne un Gerechtkeit zu bringe. Nau iss alles vorbei un ich bin arrig schurr as mir widder zerick zu en aagschplittertes Land gehe waerr. Ich hab schunn heit damariye im Internet glese: “Wann waerr die Regierung saage as alles en “Inside Job” waare?” odder “Der Obama un sei Mannsleit hen alles so gewollt.” WAS? Wie kann soddiche Leit so denke? Mir hen so viele Tragedies in unserem Land, un wann sie bassiere, sin mir allsfatt Een Leit awwer so ball as sie vorbei sin, sin mir allsfatt widder viel Leit un nett meh Een. Mol sehne was von sellre Tragedy rauskumme waerr.

Do iss en Audio Klip:

Published in: on 20/04/2013 at 08:09  Comments (2)  

Witt du eppes uff Deitsch schreiwe?

Guder Daag Blog Leser! Well ‘sis widder Zeit uff eppes wichdig zu denke: Es Pennsylvaanisch Deitsch Schreiwers Fescht! Es Kutzeschteddel Volks Fescht waerrd es siwweder yaahrliche Pennsylvaanisch Deitsch Schprooch Schreiwers Fescht halde. Sie gucke fer Leit die neie Beischpiele vun Pennsylvaanisch Deitsch Schreiweschticker schreiwe un lese wolle. Die Schticke kenne Katzgschichte, Gedichte, Skits, odder eppes nooch sei.

Selles Yaahr waerrd es Fescht uff em 2. Tschulei um 1:30 uff em Seminar Stage sei. Schticke solle bis der 1. Tschunn gschickt waerre. Die Schticke solle aa en Englische Iwwersetzung hawwe.

Wann dihr eppes schreiwe wollt, schickt es mol aa:

Der  William Donner

Pennsylvania German Language Exposition

Anthropolgy Department

Kutztown University

Kutztown, PA 19530

Dihr kennt aa ihn aarufe: 1-610-683-4249 odder en E-Poscht schreiwe: donner@kutztown.edu

Nau sei so gut un schreibt eppes!

Published in: on 12/04/2013 at 17:39  Leave a Comment  

Was kummt vun Nadd Korea?

Guder Daag Blog Leser! Well selle Woch iss viel in re Nachricht weeich Nadd Korea un ihr neier Vorgenger, der Kim Jong Un. Er und sei Regiering mache viele Drehinge gege Amerikaa un Sudd Korea. Sie saage as sie ihre Nuclear Missiles schiesse welle. Amerikaa, un unser Bresident Obama saage as mir wisse eigetlich net was Nadd Korea kann un net kann. Des macht mich glee bissel verschrocke. Ich glaab as Nadd Korea hot die Technologie en Missile net die ganze Weg nooch Amerikaa zu schiesse, awwer sie hot vielleicht die Technologie um eens nooch Sudd Korea zu schiesse!

Sell iss die Faahne vun Nadd Korea.

Sell iss die Faahne vun Nadd Korea.

Nadd Korea iss en Land zidder baut 1948. Sell iss wann die Korea Penninsula in zwee Schticke verdeelt waar. Sudd Korea iss en Demokracie warre un der Nadd Korea iss en Socialist Dictatorschip warre. Der aerschde Vorgenger vun Nadd Korea waar der Kim Ill Sung, dem Kim Jong Un sei Grossdaadi. In sei neie Land waar alles darrich die Regiering gange. Die Regiering waar in voller Graft. Die Leit hen kenne Schtimm. Unnich der Kim Jong Ill, der zwette Vorgenger, hot alles was sei Daadi geduh hot schtarricker gemacht un hot aa en neie Gedenk gebracht: “Songun” sell mehnt: Armee aerscht. Schier gaar alle Mannsleit in Nadd Korea misse in die Armee geh. Zur Zeit ihr Armee hot baut 1 Millyon Soldaate. Das Broblem iss, as der Kim Jong Il sei Armee am baue waar, hot er sei Rick uff sei Leit gedreht. Viel Leit in Nadd Korea sin arrig aarm un viel Leit verhungere sich. Die Regiering hot net genunk Geld fer Ess-sache un Fleesch fer ihre Leit, awwer sie hen genunk Geld fer Flinte un Missiles. Ich kann sell gaar net verschteh. Aa hen sie en grosse Gefaengnis System fer die Leit die eppes gege die Regiering saage. Wann epper eppes gege die Regiering saagt, iss er odder sie un sei odder ihre ganze Familye ins Gefaengnis gschickt un datt bleiwe sie fer drei Generations!

Sell iss en Pickder vun en Military Schtrutz in Pyongyang, die Haaptschtadt.

Sell iss en Pickder vun en Military Schtrutz in Pyongyang, die Haaptschtadt.

Sell iss en Pickder vun Kim Jong Un, der Vorgenger.

Sell iss en Pickder vun Kim Jong Un, der Vorgenger.

Der Kim Jong Il iss im Yaahr 2011 gschtarewe un sei Soh, der Kim Jong Un, iss as neier Vorgenger gemacht. Nau hot er die Graft un er will es weise. Er macht viele Drehinge gege uns in Amerikaa un abaddich gege Sudd Korea. Ich hoff as alles kann friedlich ausgefiggert sei. Ich will net en annere Grieg hawwe. Viel hochgelannte Leit saage in de Zeidinge un in em Guckbax as Nadd Korea kann yuscht schwetze, sie hot die Meeglichkeit so en Aagriff net zu duh. Mir welle Hoffe as es so iss.

Do iss en Audio Klip:  Was kummt vun Nadd Korea?

Published in: on 06/04/2013 at 07:36  Leave a Comment