Videos sin faddig, nau saagt eiere Freinde!

Guder Daag Blog Leser! Well, ich bin endlich zerick. Uff em Freidaag hawwich mei letschde Video fer mei Series gemacht. Am End hawwich 41 Videos gemacht. Ich hab geschder in YouTube geguckt un hab gsehne as mei aerschde Video hot meh as 800 Views ghatt! Ich kann sell net glaawe. Ich bin aa erschtaunt as ich so viel E-Poschts un Comments grickt hab. Viel Leit, vun weit un breet hen mir eppes gschriwwe. En Bu vun Sudafrika, ya du hoscht sell recht gelese, Sudafrika, hot mir en E-Poscht gschriwwe. Er waar arrig dankbaar as ich die Videos gemacht hab. Nau kennt er sei Deitsch verbessere un yuuse. Ich weess net sei Gschicht, awwer Sudafrika, harriyessus!

Ich hab aa viel E-Poschts vun all iwwer Amerikaa un Deitschland aa grickt. Viel Leit sin froh as es endlich eppes uff re Internet gebt, wu sie eppes vun re Grammatik lanne kenne. Ich winsch as ich meh Geld hett um bessere (meh Professional) Videos zu mache, awwer ich bin aa froh mit was ich gemacht hab.

All die Videos un die Power Points fer die Lessons sin all in ee Blatz: padutch101.wikispaces.com. Seid so gut un saagt eppes an all eiere Freinde die Deitsch lanne wolle. Bsucht die Website un losst mich mol en Comment!

Naegschde Freidaag, der aerschde Matz, waerr ich widder daheem in Barricks Kaunty sei. Ich bin eigelaade uff em Pennsylvania German Hour uff em BCTV zu sei. Ich waerr iwwer die Videos schwetze un aa iwwer wie die Internet unsere Schprooch helfe kann. Naegschde Woch waerr ich en Link zu re Show poschde. Bis dann, macht’s gut un bleibt gsund!

Do iss en Audio Klip: Videos sin faddig, nau saagt eiere Freinde!

Published in: on 23/02/2013 at 15:24  Leave a Comment  

Deitsche Zammelaaf in Lebnan!

Guder Daag Blog Leser! Ya ich bin allsfatt nooch am Videos mache, awwer ich hab gewollt yuscht katz en neie Poscht schreiwe iwwer re Zammelaaf in Lebnan. Do iss all die wichdige Information:

PA Deitsche Zammelaaf

New Covenant Christian School,

452 Ebenezer Road, Lebanon, PA  17046

(Rt. 72 baut 2 Meil. naddlich vun Lebanon)

9:00 a.m. bis 4 p.m. am Samschdaag Matz 16, 2013.

Admission iss kostelos – Alliepper sin eigelaade!

Deitsche Handwarricke

Deitsche Esse

Gschichte, Schprooch un Familyegschichte

Kinnerschpiele un alde Schpielsache

9:30 a.m.   Der Nei Dolpehock Sanger Chor  — Deitsche Myusik un Lieder

10:45 a.m.   Lynn Otto – “Frontier Forts of the Blue Mountains”

12:00 noon   Die Schwadore Schalle – Kinner Lieder

1:00 p.m.   PA Dutch  auction  — George Moyer, Auctioneer

2:00 p.m.   Patrick Donmoyer – “House Blessings: A Pennsylvania Dutch Tradition of Establishment”

3:00 p.m.   The Miller Brothers —  Myusik in re Mudderschprooch

Fer meh Information: Email: Zammelaaf@hotmail.com

 

 

Published in: on 08/02/2013 at 07:19  Leave a Comment