Alles in eenem Blatz!

Guder Daag Blog Leser! Well, do kummt en katze Poscht iwwer mei Video Project. Ich hab en neie Website gemacht wu alles fer mei Video Project iss. Datt sin Links zu de Videos un aa Links zu de Power Point Presentations. Wann dihr epper kennt der Deitsch lanne will, seid so gut un gebt en odder ihr selle Addresse: http://padutch101.wikispaces.com.

Bis es naegschdes Mol, macht’s gut!

Published in: on 27/01/2013 at 06:33  Comments (4)  

Aye yummer, ich bin arrig gscheffdich!

Guder Daag Blog Leser! Well as ich letschde Woch gschriwwe hab, bin ich am Videos mache. Eigetlich, bin ich Halsdief in sellre Project. Zu Zeit hawwich baut 14 Videos gemacht. Die aerschde 8 Videos sin schunn im Internet. Mariye will ich die neie 6 odder 7 aa ufflaade. Weil ich so viel Graft am Videos schpende muss, denk ich as ich en Break vun mei Blog nemme waerr bis all die Videos faddig sin. Ich glaab sell waerr baut zwee odder drei Woch ausdauere. Bis ich widder poschde, sei so gut un bsucht mol Hiwwe wie Driwwe! Datt sin all die Videos. Odder dihr kennt aa zu mir uff YouTube subscribe. Mei Yuusernaame iss: Douglas Madenford. Awwer wann du PA Dutch 101 suche, waerrt eich es finne, dann kennt dihr subscribe! Aa, seid so gut un saagt eppes an all eiere Freinde un Familye!

Bis ich widder schreiwe, macht’s gut un schreibt mich mol eppes!

Published in: on 18/01/2013 at 17:56  Leave a Comment  

Eppes Neies, eppes Grosses!

Guder Daag Blog Leser! Well do bin ich widder mit en neien Blog Poscht. Selle Woch hawwich en grosse Nei-ichkeite bekannt zu mache. Wann ich mit Leit schwetze die Deitsch am lanne sin, grick ich allsfat die gleiche Comments. “Mir brauche meh Videos uff Deitsch.” odder “Ich will Deitsch lanne, awwer ich wuhn zu weit weg vun en Klaess.” odder “Ich will Deitsch lanne, awwer ich hab wennich Freizeit um en Klaess zu bsuche.” So hawwich gedenkt, nau iss die Zeit Videos zu mache. Mei Blann waar en Deitsch Klaess in Video Format zu mache. Die Videos waerr katz sei un so leicht wie meeglich sei.

Well letschde Woch hawwich endlich mit de Videos aagfange. Mei Video Klaess waerr baut 40 Videos sei. Es gebt Grammar Topics un Vocabulary Topics. Ich hoff as selle Videos waerre die Leit helfe um Deitsch zu lanne un aa unsre Mudderschprooch zu verbreite un bschitze.

Dihr kennt die Videos uff YouTube seh. Ich froog all mei Leser die Video Links an eier Freinde weiter zu gewwe. Dihr kennt zu mir subscribe un dann wann ich en neie Video poscht, waerrd eich en E-Poscht griege. Sei so gut un guckt mol rei, dann schreibt mir en Poscht un losst mich mol wisse was dihr denkt! Zur Zeit hawwich 8 Videos schunn gemacht un uff YouTube geposchdet.

Bis naegschde Woch, macht’s gut, guckt mol ee Paar Videos aa un schreib mich mol!

Do iss en Link zu re aerschde Video: http://www.youtube.com/watch?v=IwFkpcKWo4w

Published in: on 12/01/2013 at 11:24  Leave a Comment  

Es feiere nemme!

Guder Daag Blog Leser! Well nau sin mer in em Nei Yaahr. Mir hen widder die Gelegeheit vun vanne aa aazufange. Hett eich ee paar Resolutions gemacht? Ich hab ee paar gemacht: eene devun iss as ich wennicher Zucker selles Yaahr esse will. Mol sehne wie sell geht.

Selle Woch will ich iwwer eppes anneres schreiwe. Schunn seit lang hawwich ghatt en Series vun Bicher die ich arrig gaarn lese. Die sin “Pennsylvania Fireside Tales” vun dem Jeffrey R. Frazier. Es gebt siwwe Bicher. Alle Bicher sin voll mit inderessande Gschichte vun Pennsylvaania un unsre Gschichte. Es gebt viel Schpuckgschichte, Gschichte vun bekannte Volksheld un alde Aawerglaawe. Viel vun de Gschichte kumme aus em 18. un 19. Yaahrhunnert. Die Bicher sin net deier un sie sin arrig gschpassig zu lese. Oft hock ich mol hie un begin zu lese, un zwee Schtund schpaeder bin ich immernooch am lese! Mei Schtick selle Woch kummt vun Buch 3 aus selle Series.

Viel Yaaahre zerick hen viel Deitsche geglaabt as en Hex “es feier” nemme kennt. Sell mehnt as em Mann sei Flint net meh schiesse kennt! Ya, en Hex odder en Powwower kennt en Schpell saage un me Paerson sei Flint waerd schaadlos sei. Die Leit hen gedenkt as sell losgebrocht waar wann die Hex es Pulwer vun aabrenne hinnert. Odder die Kuggel waerd yuscht aus re Flint rausrolle in Blatz vun weit zu fliege.

Viel vun sellre Gschichte kumme aus em 1700s wann Pennsylvaania die Frontier waar. Heitzudaage wisse mir schunn as es ken Hexe gebt un es Broblem waar meechlich as die Zindpulwerloch uffgschtoppt waar odder die Pulwer zu naas waar. Un fer die Leit welle Flinte schiesse kennte un nix geschosse hen, muss mer errinere as mit en Flintlock, hen Mann gemisst en arrig gude Schiesser zu sei. In de frieh 1800s, hot es so en gut bekannte Hex in Centre Kaunty gewwe. Sei Naame waar der Benny Ripka. Er hot oft abgeblost wie er “es feier” nemme kennt. Selles Buch hot ee paar Gschichte iwwer dem Benny.

Wann dihr meh wisse wollt, odder ee paar vun selle Gschichte lese wollt, sei so gut un kaaft selle Bicher. Do iss en Link um die Bicher zu kaafe: http://www.pafiresidetales.com/

Bis naegschde Woch, macht’s gut un ich hoff as niemand “eier Feier” nemmt!

Do iss en Audio Klip: Es feier nemme!

Published in: on 03/01/2013 at 18:44  Leave a Comment