Nei Yaahr Video!

Guder Daag Blog Leser! Well es Yaahr 2012 iss schier gaar  vorbei, so ich hab mei Nei Yaahr Video fer 2013 gemacht. Klick uff em Link um es zu seh!

NEI YAAHR VIDEO!

Bis Yenner, bleibt gsund un schafft net zu viel!

Published in: on 27/12/2012 at 11:10  Leave a Comment  

Advent: en vierdes Vorleses!

Guder Blog Leser! Well selle Woch bring ich mei Advent Vorleses zu en End. Sundaag iss der letschde Sundaag in Advent un uff em Mundaag Owed kummt der Bobbli Yesus zu unsre Welt. Ich hoff as all vun meinen Blog Leser ready sin, net yuscht fer physically awwer geistlich aa. Unsre Welt iss gebroche, un darrich der Yesus un unsere Lewe kennte es widder besser sei. Ich winsch alli-epper en Hallicher Grischtdaag. Ich hoff as es eich Zeit mit eire Familye verbringe kennte. Naegschde Woch mach ich mei yaahrliches Blog Video Winsch an all meine Leser! Bis dann, macht’s gut un schafft net zu viel!

Lukas 2: 1-20

Un zu sellre Zeit iss en Befehl vum Kaiser Auguschdes kumme, as die gans Welt gesesst warre sott. Un selli Sessment waar die aerscht un hot schtattgfunne, wie der Cyrenius Govener in Syria waar. Un en yeders iss hiegange, fer sich sesse losse, yeders in sei Daadischteddel.

Un Joseph hot sich uff der Weg gemacht vun Galilaea in der Schteddel Nazareth noch em yiddische Land un der Schteddel vum David, as Bethlehem heesst, weil er en Noochkemmling vum David waar un sich datt hot schetze losse solle mit der Maria, seinre Fraa, as schwanger waar. Un wie sie datt aakumme sin, iss ihre Zeit kumme un sie hot ihre aerschder Buh gebore, hot en in Windle gewickelt un in en Fuderdroog geleegt, weil sie sunscht ken Blatz im Wattshaus hen ghatt.

Un es waare Schoofhieder in sellre Gegen im Feld, die hen in der Nacht ihre Schoof ghiet. Un sehnt, em Harr sei Engel iss zu ne kumme un die Glori vum Harr hot um sie geleicht un sie hen sich arrig gefarricht.

Awwer der Engel hot ne gsaat: “Farricht eich net. Sehnt, ich verkindich eich groossi Freed, as fer all die Leit in der Welt bschtimmt iss. Fer heit iss eich der Heiland gebore, Grischdus der Harr, in em David seinre Schteddel. Un des nemmt fer en Zeeche: ihr finne es Kindche in Windle gewickelt un in em Fuderdroog leie.” Un dann waare beim Engel viele vun der himmlische Kompanie, hen Gott gelobt un gsaat:

“Ehr sei Gott in der Heh, un Friede uff der Aerd bei de Mensche in seim Wohlgfalle.”

Un noochdem as die Engel in der Himmel zerickgange sin, hen die Schoofhieder zuenanner gsaat: “Geh mir nooch Bethlehem un gucke mir des aa, was der Harr uns bekannt gemacht hot.” Un gschwindt sin sie hiegange un hen die zwee, die Maria un der Joseph , gfunne, un aa es Kind im Fuderdroog leie.

Noochdem as sie’s gsehne hen, hen sie’s weit un breet verzaehlt, was sie iwwer sell Kind gheert hen. Un all die Leit, wu des grickt hen ze heere, hen sich iwwer die Schtori gwunnert, as ne die Schoffhieder verzaehlt hen. Awwer die Maria hot selli Wadde fer sich bhalde un in ihrem Hatz iwwergedenkt. Die Schoofhieder sin widder heemgange un hen Gott fer alles gelobt, as sie gheert un gsehne hen, wie’s ne yo varderhand iss gsaat warre.

Do iss en Audio Klip: Advent- en vierdes Vorleses!

Published in: on 20/12/2012 at 18:40  Leave a Comment  

Advent: en drittes Vorleses!

Guder Daag Blog Leser! Well ‘sis so weit kumme as es die dritte Woch vun Advent do iss. Ich bin ready fer es Grischtkind zu bewillkumme, ich hoff as eich aa ready seid. Heit, der 14. Diesember, iss en drauriger Daag fer uns do in Amerikaa. Heit hot es widder en Schiesserei uff en Schul gewwe un meh as 20 Leit, viele devun Kinner, sin gschtarewe. Mei Hatz un Bede sin mit de Familiye die ihre Kinner heit verlore hen. Oft kann ich net verschteh ferwas es iewele Leit in re Welt gebt, heit denk ich aa an soddiche Gedenke. Mir misse allsfatt nooch an Gott glaawe un die grosse Pickder vun sei grosse Gschenk fer uns seh un denke. Ich winsch eich en hatzvoller Woch un Fried uff unsre Welt.

Lukas 2: 26-45

Un im segschde Munet iss der Engel Gabriel vun Gott in en Schteddel in Galilea gschickt warre, as Nazareth heesst, zumme Meedel, as mit me Mann naames Joseph verschproche waar un Maria gheesse hot. Der Engel iss zu re kumme un hot gsaat: “Ich griess dich, du Seelichi! Der Harr iss mit dir.”

Awwer sei Wadde hen sie verschrocke un sie hot gedenkt: Was fer en Gruss iss des? Un der Engel hot re gsaat: “Farricht dich net, Maria; du hoscht Gnaade bei Gott gfunne. Nau meind, du sollscht schwanger warre un en Buh griege un du sollscht em der Naame Yesus gewwe. Der soll en Groosser waare un en Soh vum Heechschte heesse, un Gott der Harr will em der Droon vun seim Vadder Daavid gewwe. Er soll en Keenich iwwers Haus Yakob in Ewichkeit sei un sei Reich soll ken End hawwe.”

Noh hot die Maria em Engel gsaat: “Wie kann des sei? Ich hab yo seilewe nix mit me Mann zu duh ghatt.” Der Engel hot re geantwatt: “Der Heilich Geischt soll iwwer dich kumme un die Graft vum heechschte Gott soll dich iwwerschadde. Dewege soll es heilich Wese, as vun dir kummt, Goddes Soh heesse. Un die Elisabeth, weescht, as in deinre Freindschaft iss, draagt aa en Buh unnich em Hatz un iss schunn alt. Nau geht sie schunn im segschde Munet, die wu die Leit gsaat hen, sie waerr unfruchtbaar. Bei Gott iss ken Ding unmeeglich.”

Un die Maria hot gsaat: “Ya, ich duh, was der Harr heesst. Es soll mer so geh, wie du gsaat hoscht.” Un der Engel hot sie verlosse.

Net lang druff hot sich die Maria gschwint uff der Weg in die Barrye nooch re Schteddel in Yudea gemacht, iss ins Haus vum Zacharias kumme un hot die Elisabeth gegriesst. Wie die Elisabeth ihre Gruss gheert hot, iss es Kind in ihrem Leib ghupst. Un die Elisabeth iss voll vum Heiliche Geischt warre un hot laut gerufe: “Seelich bischt du as Weibsleit un seelich iss die Frucht vun deim Leib! Wuher kummt mer’s Glick, as meim Harr sei Mudder zu mer kummt. Weescht, wie ich dei Gruss gheert hab, iss es Kind in meim Leib aus Freed ghupst. Seelich bischt du, weil du geglaabt hoscht. Was dir der Harr gsaat hot, soll vollfillt waerre.”

Do iss en Audio Klip: Advent – en drittes Vorleses!

Published in: on 14/12/2012 at 16:45  Leave a Comment  

Advent: en zwettes Vorleses!

Guder Daag Blog Leser! Well letschde Woch hawwich en katze Schtick aus em Bibel fer die aerschde Woch vun Advent gewwe. Selle Woch will ich eich en zwette Schtick gewwe. Nau Diesember iss schier gaar halb rum. Ich muss nooch ee paar Gschenke fer mei Familie kaafe. Ich weess net wann sell gemacht sei waerr! Hett dihr schunn alles fer eier Grischtdaag kaaft? Unser Vorleses fer die zwette Woch in Advent kummt vun em Lukas sei Buch, Kabiddel 3. Net vergesse liewe Blog Leser, Advent iss die Zeit wann mer uff en neie Aabeginn denke solle.

Lukas 3: 1-6

Im fimfzeede Yaahr vum Kaiser Tiberius seinre Haarschaft, wie der Pontius Pilatus Govener in Yudea waar, der Herodes Tetrarch in Galilea, un Annas un Kaiphas Hohebrieschder, iss en Bfehl Gottes zum Yohannes, em Zacharias sei Soh, in die Wilderniss kumme, un er iss iwwers ganz Land um der Yordaan rumgange un hot die Daaf gebreddicht, as meent, wann Sinde uns verleet sin, waare sie uns vergewwe.

Des schteht im Buch vum Yesaye gschriwwe, wu er saagt:

Des iss en Schtimm vumme Breddicher in der Wilderniss:

Macht em Haar sei Weg zerecht, un macht sei Schtroosse in Adder. Yedes Daal soll gehowwe waare un yeder Barrick un Hiwwel runnergermacht. Was grumm iss, soll ewe waare, un was net graad iss, soll en eewner Weg waare. Alles was lebt, soll der Heiland Gottes sehne.

Ich guck freehlich uff em Daag wann alles nei gemacht waerre. Seid dihr ready? Net yuscht fer Grischtdaag un die Feierdaagezeit, awwer sin eier Seele aa ready fer die neie Aabeginn? Kaaft eier Gschenke un backt eier Kichli awwer ab un zu denk mol uff die grosse Grund fer der kummende Feierdaag!

Do iss en Audio Klip: Advent- en zwettes Vorleses.

Published in: on 07/12/2012 at 06:12  Leave a Comment