Advent: en aerschdes Vorleses!

Guder Daag Blog Leser! Well do bin ich widder mit en neien Poscht. Nau iss es November widder vorbei un mir fange mit Diesember aa. Sell mehnt as die Advent Zeit widder do iss. As viel vun eich schunn wisst, der Advent iss die vier Woch var Grischtdaag. Normally sin die Leseschticke fer Advent Denkzeddele an em Gott sei Verschpreches as er sei Soh zu re Aerd schicke waerrd un sei Soh waerrd die Leit ewige Lewe bringe. Fer die naegschde vier Woch, will ich vier verschiddliche Vorleses gewwe. Unser aerschdes Vorleses kummt vun em Lukas sei Buch, Kabiddel 25:

“Un in der Sunn, em Mond un de Schtaerne soll mer Zeeche sehne, un in der Welt solle die Leit vergelschdert sei un net wisse, was sie duh sotten, weil die Wasserwelle so wiescht brause. Un die Mensche solle aus Farricht schier umkumme un weil sie so waarde misse, bis allerhand Schreckliches iwwer die gans Welt kummt, un aa die Himmelsgreft solle wackliche warre.”

“Dann sehne sie der Menschesoh in re Wolk mit grosser Graft un Bracht kumme. Wann all des aafangt, guckt nuff in der Himmel un hebt eier Kopp, weil eier Erleesung neecher kummt. Un er hot ne en Gleichnis verzeehlt. Guckt seller Feigebaam aa un aa die annre Beem. Wann sie ausschlagge un ihr’s sehne, wissen dihr, as der Summer schier gaar do iss. So iss es aa, wann ihr des all sehne aagfange, ihr solle wisse, as es Reich Gottes schier gaar do iss. Ferhaftich, ich saag eich, die do Tschenereeschen soll net vergeh, bis all des gschehne iss.”

“Der Himmel un die Aerd solle vergeh, awwer mei Wadde vergehn net. Awwer hiet eich, as eier Hatz net schwer ward darrichs Fresse, Saufe, un es Sarriye ums Esse un seller Daag iwwer eich kummt wie en Fallschtrick. Seller Daag kummt yo unversehne iwwer all die Mensche in der Welt. Fer sell halt Wacht un beet, as ihr schtarrick warre solle un vun all dem weckgschpringe kenne, as gschehne soll, un as ihr var em Menschesoh schteh solle.”

Bis naegschde Woch, bleibt Gsund un schafft net zu hatt!

Do iss en Audio Klip:

 

Published in: on 30/11/2012 at 19:54  Leave a Comment  

ACTFL in Philadelphia!

Guder Daag Blog Leser! Well, ich bin graad zerickkumme vun drei Daage in Philadelphia. Fer was waar ich datt? Well, ich saag eich! Alle Yaahr in November iss en grosse Conference un Convention fer ACTFL. ACTFL iss die American Council for the Teaching of Foreign Languages. Selles Yaahr waar die Conference in Philadelphia. Sell iss en grosse Organization mit meh as 10,000 Mitglieder. Es waar baut 6,000 Leit in Philadelphia selle Wochend fer die Conference.

Wer kummt zu so en Conference? Well, Schulmeeschder un Brofessors vun Amerikaa un viel annere Lenner. Mir kumme zamme um neie Dinge zu lanne, Colleagues zu dreffe, neie Bicher un annere Materials zu sehne un kaafe un neie Research zu heere. Viele Schprooche sin datt verdrede. Nadierlich waare die groose Schprooche datt: Hochdeitsch, Schpanisch, Franzeesisch, Italeinisch un Chineesisch. Awwer es hot viel meh annere Schprooche aa datt gewwe, wie Arabic, Yapanische, Korean, Mohawk, un Deitsch. Ya, dihr hett es recht gelese. Deitsch waar aa datt verdrede!

Selles Yaahr hen der Josh Brown un ich en gleene Presentation iwwer Deitsch gemacht. Mir hen gemisst en Electronic Poster zu gewwe. Was iss en Electronic Poster? Gude Froog! Mir hen es aa net richdig verschtanne! Mir hen en katze Power Point gemacht un dann mir sin datt gschtanne un hen mit Leit iwwer unsre Mudderschprooch gschwetzt. Unser Topic waar: Preserving an Ethnic Language through Teaching: Pennsylvania Dutch. Viel Leit sin zu uns kumme un hen mit uns gschwetzt. En Brofessor vun Holmes Kaunty, Ohio hot mit uns iwwer die Amische datt in Ohio gschwetzt. Viel Hochdeitsch Schulmeeschdere vun ganz Amerikaa sin kumme, ich glaab as sie neigirig un wunnerfitzich waare. Viel Leit vun Amerikaa hen gaar net vun Deitsch un unsere Schtoss fer die Schprooche zu behalde gheert. Viele waare froh sell zu heere!

Der Josh un ich mit unsre Presentation.

Am End iss alles gut geloffe. Mir waare froh mit wie es gange iss un mir waare aa froh unsere Message uff die Welt Stage zu bringe.

Do iss en Audio Klip: ACTFL in Philadelphia!

Published in: on 18/11/2012 at 08:34  Leave a Comment  

Ferwas seid dihr Dankbaar?

Guder Daag Blog Leser! Well mir sin nau im Schpotyaahr un ‘sis widder November! Do in Amerikaa iss November der Munet vun Danksfescht. Ich gleich Danksfescht arrig viel, arrig gude Esse un ich kann Zeit mit meinre Familye rumbringe. Awwer oftmols, vergesse mir warricklich Dank zu gewwe.

As viel vun eich schunn wisst, bringe ich viel Zeit uff em Facebook rum. Ich glaab ich bin net der eenzicher! Neilich hawwich im Facebook gsehne as viel vun meinre Freinde poschte alle Daag im Novmeber ee Ding as sie Dankbaar zu sei. Ich finn sell en gude Gedenk. Ya, uff em Danksfescht denke mir uff was mir Dankbaar zu sei awwer, mir solle efders uff soddiche Dinge denke! Es Lewe iss zu katz un die Zeit geht zu schnell! So ich hab gedenkt as selle Woch in mei Blog Poscht waerr ich en katze Lischt gewwe vun was ich Dankbaar bin. Ich laade all meine Blog Leser aa ei eppes wie sell zu duh.

Ich bin Dankbaar fer:

1. Mei Familye. – Die sin warricklich em Lewe sei Leim. Mir helfe uns wann mir Druwwel hen. Mir kumme zamme fer die Feierdaage zu feiere. Mir sin unsere Vergangeheit, unsere Lewe nau un nadierlich aa unsere Zukunft. Wie waerr eier Lewe mitaus eiere Familye sei? Ich kann ehrlich saage as mei Lewe mitaus Familye waerr Mehningslos.

2. Mei Gsundheit. – Ich hab arrig viel Glick im Lewe ghatt. Ya, nadierlich waar ich ab un zu Grank. Baut drei Yaahre zerick hawwich gemisst mei Appendix rausgschnidde zu sei. Awwer, vun annere Grankheite kann ich net schreiwe. Ich hab Freinde die oft Grank sin, sell macht mich leedmiedich. Ich bin arrig Dankbaar as mei gleene neie Dochder aa Gsund iss un ich bede as sie so bleibt!

3. Mei Tschopp. – Widder hawwich ich Glick ghatt as ich en Tschopp hawwe. As dihr schunn wisst, kenne viele Amerikaaner sell net saage. Mei Daadi iss eens davun. Mir hen Brobleme do in Amerikaa un schier gaar 7% vun unsere Leit sin mitaus en Tschopp. Ich hoff as sell sich schtarrick verennert. Zu viel Amerikaaner misse lewe mitaus Sicherheit un hen net genunk Geld fer Ess-sache zu kaafe. Ich bede nooch widder fer unser Land un unsere Zukunft, en Zukunft mit viel meh Gedeihlichkeit.

4. Sell Blog. – Ya, ich bin Dankbaar fer sell Blog. Ferwas froogt dihr? Well, mit sellem Blog kann ich mich yede Woch hiehocke un eppes uff Deitsch schreiwe. Wu ich wuhn gebt es net zu viel Deitschschwetzer. Darrich sell Blog un die Internet kann ich mit annere Deitsche schwetze un neie Freindschafte mache. Ich weess net wie viel neie Leit ich gedroffe hab, un mitaus sell Blog hett ich kenne davun gedroffe! Deitschleser und Schreiwer vun re ganze Welt hen mich E-Poschts un Poschts do uff mei Blog gelosse…un alles uff Deitsch. Sell iss eppes was mich nooch net glaawe kann.

Well, datt iss mei katze Lischt vun Dinge die ich dafer Dankbaar bin. Wie guckt eier Lischt aus? Hockt eich mol hie, nemmt glee bissel Zeit un schreibt mol eier Lischt. Sell iss en gude Gefiehl es zu duh!

Do iss en Audio Klip: Ferwas seid dihr Dankbaar?

Published in: on 10/11/2012 at 12:03  Leave a Comment  

Frankenschtaerm Update!

Guder Daag Blog Leser!

Well ich will yuscht katz eppes iwwer wie ich un mei Familye mit em Schtaerm ausgemacht hen . Do, in de Barriye vun Central Pennsylvaania, hemmer viel Glick ghatt. Ya, mir hen Rege un Wind grickt, awwer alles waar zimmlich ruhig. Die Schule waare am Mundaag un Dinschdaag zugemacht awwer mir hen unser Leckdrick net verlore! Yippee! Mei Daadi, der in Barricks Kaunty wuhnt, hot net so viel Glick ghatt. Er hot meh Rege un viel schtarricker Wind ghatt. Aa, hot er sei Leckdrick am Sunndaag schpot verlore, un hot es net widder bis Mittwoch grickt! Er hot zwee Generators am laafe so as die Kiehlschrank un der Freezer ihre Esse net verliere daete.

Was am schlimmscht waar, waar meinre Fraa ihr Onkel un ihre Aent. Die wuhne in Brigantine, Nei Jersey, yuscht ee paar Minudde sud vun Atlantic City. Datt waar der Schtaerm arrig schlimm. Die Welle vun re See waare heecher as 10 Fiess! ‘Sis schunn zidder letschde Mundaag hen sie ihr Haus nooch net bsucht. Die Schtrosse sin nooch zugemacht un die Leit daerfe net rei in die Schtadt geh. Hoffetlich kenne sie mariyet ihr Haus seh. Ich denk as es net gut sei waerr. Viele Schtedt un Heiser sin kaputtgemacht. Die See hot viel viel Sand vun de Beaches in die Schtedt gebracht. Mir bede as sie nicht alles verlore hen, awwer es guckt net so gut aus. Viel Leit datt in Nei Jersey hen alles verlore odder schier gaar alles. Yawell, so geht es wann mer so naegscht zu re See wuhnt.

Wann du Geld zu de Opfer vun Hurrikane Sandy weckschenke witt, kannscht du es bei em Rote Greiz duh.

Published in: on 04/11/2012 at 14:17  Leave a Comment