Der “Frankenschtaerm” kummt!

Guder Daag Blog Leser! Well, do hock ich widder var mei Waddefresser un bin am schreiwe. ‘Sis Samschdaag Mariye un ich hab glee bissel Bang. Frieh naegschde Woch do in Pennyslvania (un die ganze Oschtkoast) waerre mir en Schtaerm hawwe. Die Wedderleit hen selle Schtaerm “Frankenschtaerm” benaamt. Ya, du hoscht recht gelese “Frankenschtaerm”. Ich finn sell arrig luschdig, aerschdens weil es Schpuckowed uff em Mittwoch gebt un zweittens weil selle Schtaerm een grosser Schtaerm der vun annere gleene Schtaerme gemacht iss (graad wie dem Frankenstein sei Monschter).

Die Hurrikane Sandy kummt naddlich vun der Karribbean un bringt viel Rege un schtarricke Wind. Die Sandy waerrd mit en gleenere Schtaerm, der vun der Wescht kummt, dreffe un dann am End kummt en kalde Front aus Kanadaa. Alle drei waerre zammekumme un BAM! Un mir sin unnich alles do in Pennsylvania! Sell kann arrig schlimm sei wann alles richdich laaft!

Die Leit im Guckbax schwetze vun nadierlich die schlimmsde Meeglichkeite awwer wann es so sei iss, waerrd es viel Druwwel gewwe. Ich weess schunn as viel Leit schunn zum Supermarrick gange sin um Brot, Millich un was weess ich nooch zu kaafe. Die Leit in Pennsylvania mache sell yedes Mol as es en Schneeschtaerm gebt.

Was arrig schlimm sei kennt, iss as viel vun usnere Beem hen ihre Bledder nooch. Wann es so viel Rege (manniche Leit hen vun 4-10 Inches gsaat) gebt un schtarricke Wind gebt, waerre die Beem breche un dann kenne viel Leit ihr Leckdrick verliere. Oh yummer yea! Sell iss net gut! Zum Glick iss es net so kalt do as die Leit ihr Hitz brauche.

Nau misse mir yuscht waarde bis der Schtaerm kummt. Dann kenne mir sehne was warricklich bassiere waerre. Winsch eich Glick un saag en Bede fer uns do im Oschtamerikaa!

Do iss en Audio Klip: Der Frankenschtaerm kummt.

Published in: on 27/10/2012 at 07:45  Leave a Comment  

En Waddelischt fer die Leckschen!

Guder Daag Blog Leser! Well ‘sis widder Leckschen Zeit do in Amerikaa. Selles Yaahr iss es en arrige wichdige Leckschen, weil mir fer der Bresident waehle waerre. As viel vun eich schunn wisst, do in Amerikaa waehle mir alle vier Yaahr fer en Bresident. Selles Yaahr hemmer en echde Grieg do. Der Demokraat un Bresident, Barack Obama laaft gege der Republikaaner, der Mitt Romney. Mir hen yuscht 17 Daage bis der Leckschendaag do iss! In em Guckbax, in re Zeitding un uff em Schwetzkaschde gebt es yuscht Advertisements fer die zwee Mannsleit. Die Polls saage as es arrig dicht iss. Mir hen kenn glaare Gewinner. Ich hab gedenkt as es en gude Zeit waar fer en Waddelischt mit Wadde die in selle Leckschen wichdig sin zammezubringe. Do iss mei Lischt:

1. Vote / Voter – abschtimme / der Schtimmgewwer

2. Political Party – die Balledickal Barty

3. Ballot – die Ballot

4. Politics – die Balledicks

5. Jobs – der Tschapp

6. Debt – die Schuld

7. Economy – die Economie

8. Energy / Clean Energy – die Graft / die Widderneilichegraft

9. War – der Grieg

10. Gas Prices – es Gaasbreis

11. Immigration – die Eiwandering

12. Health Care – die Gsundheitsarge

13. Environment – die Umgegend

14. Guns – die Flinte

15. Education – die Lanning

16. Conservative / Liberal – konservative / liberaal

17. Debate – der Dischbedaat

18. Win / Lose – gewinne / verliere

Nau seid dihr ready fer die Leckschen mit selle Wadde! Net vergesse uff em 6. November abzuschtimme! Ich waer fer schurr mei Abschtimme gewwe!

Published in: on 20/10/2012 at 16:05  Leave a Comment  

Die Barricke Mariche.

Die bekannteschde Braucher alle Zeit waar fer schurr die Fraa, “Barricke Mariche” odder “Mountain Mary” in Englisch. Sie waar en Eensler un “heiliche Fraa” die in die Oley Barricke baut fimf Meile nadd-oscht vun Pikeville un zwee Meile naddlich vun Hiwwel Karrich in oscht Barricks Kaunty gewuhnt hot. Ihr Gebottsnaame waar Anna Maria Jung.

Sie waar in Deitschland gebore un iss mit ihrer Familye nooch Philadelphi katzlich bevor em Freiheitsgrieg kumme. Ihre Gschicht eidruckt die Leid die sie darrich der Grieg erfaahre hot. Ihr Mann, der Theodore Benz, iss im Grieg in die Kontinental Armee  gschtarewe.

Ya, es gebt en Schtrooss mit ihr Naame.

Die Mary Young, as ihr Englisch Naame waar, iss nimmi nooch dem Benz sei Tod widder gheiert. Eher, sie hot leenich in die Barriye mit ihr “hexerisch” Greide Gaarde  gewuhnt. Es waar gsaat as sie en “weit un erschtaunliche Kunscht vun de arzneische Waert vun ihre Watzel un Greide” hot. Manniche Leit hen gsaat as sie wunnerliche Heilmiddele geduh hot.

Datt iss wu ihr Haus waar.

Vun en friehe Alder iss sie as en “heiliche Fraa” bekannt. Sie hot die Bibel glese un hot Grischtliche “gude Daade” geduh. Bede waar en arrige wichdige Aadeel vun ihre Iewing. Ihr Ruhm iss weit vun de Oley Barriye ausgebreet un sie hot Leit vun weit un breit gsehne. Sie hot nimmi Geld vun ihne genumme. Die Barricke Mariche iss im Yaahr 1810 gschtarewe. Sie waar 70 Yaahre alt.

Der Mountain Mary ihr Graab.

Heitzudaage, die Barricke Mariche iss en bekannte Paerson. Viel iss iwwer sie gschriwwe. Es gebt zwee Gedichte, en Lewensgschicht vun dem Benjamin Hollinshead, en Buch vun dem Ludwig Wollenweber im 1880 un viele Zeiding Artikel.

Im Yaahr 1934, die Barricks Kaunty Chapter vun die Dochder vun der Amerikaanische Freiheitsgrieg hot en Denkmol uffgebaut. Die Barricke Mariche, was ewwer ihr echde aaheele waar, iss nau as die stereotypical Braucher gsehne. Es gebt annere Leit die bekannte Braucher waar wie der John Georg Hohman, der hot “The Long Lost Friend” im 1819 gschriwwe, der Peter Bausher, un der “Doktor” John Rhoads.

Do iss en Audio Klip: Die Barricke Mariche

Published in: on 06/10/2012 at 07:48  Leave a Comment