Geb Acht! Die Insching kumme!

Guder Daag Blog Leser! As ich en Kind waar, hemmer en alde Insching Fort ghatt der net zu weit Weck vun unserer Bauerei waar. Zur selle Zeit waar es en Essblatz un Wattshaus. Mir sin datt efders fer Owedesse uff en Freidaag gange. Ich waar allsfatt geinderessed in Gschicht as ich yung waar (un immer nooch). So ich waar arrig froh datthiezugeh weil mir hen allsfat newwe der Fort geparkt. Mir hen gemisst graad vorbei der Fort zu laafe. In mei Gedenke hawwich ich immer uff en Insching Aagriff eigebildt. So selle Woch hawwich gedenkt as es Zeit waar um glee bissel iwwer der Fort un die Insching Grieg zu schreiwe.

Do iss en katze Ausleging vun re Gschicht. Ich hab aa Links reigeduh domit sie meh Information griege kenne wann sie so wolle!

Barricks Kaunty waar en neie Kaunty in de frieh Yaahre vun de 1700s un es waar am Raneft vun wu die Weissleit gewuhnt hen. Sie waare oft aagegriffe, normally darich die Nacht vun unfreindliche Insching. Die Insching hen iwwer die Bloh Barriye gewuhnt. Viel Weissleit waare dod gemacht un ihre Heiser un Scheier waare gebrennt. Weisse Weibsleit un Kinner waare as Schklaafe weggenumme. Der Haaptman vun selle Aagriffe waare der Tedyuscung, en Delware Insch der hen Ewwekummes gewollt. Barricks Kaunty hen Druwwel mit de Insching schunn zidder der Walking Purchase ghatt. As der William Penn nooch am Lewe waar, waar alles friedlich, awwer die Insching hen geglaabt as sie bschisse waare.

Die Franzeeser un die Englisch sin zur Grieg iwwer Land kumme (Franzeeser un Insching Grieg 1754-1763) un die Franzeeser hen die Insching gfroogt mit zu fechde um ihr alde Land widderzugriege.  Franzeese-Kanadaar, die in Nadd-Barricks Kaunty gewuhnt hen, hen die Insching Flinte un Kuwwel gewwe un hen sie oft geholfe uff die Pennsylvaanier zu fechde un schiesse.

Helflos, die Bauere vun Barricks Kaunty hen der Governor Morris gfroogt ihre Heiser zu beschitze. Weil der Grieg darich die naddliche Kolonies gloffe waare, en Zeil vun Forts, zwelf Meile vunenanner, waare vun der Susquehanna bis der Delaware Rewwer gebaut. Ee paar Forts waare in Nadde-Barricks Kaunty. Der Benjamin Franklin, dem Governor sei Agent, hot der Fort in Lehighton gebaut. Er hot der Gnadenhutten genaamt, dann iss er zerick zu Philadelphia gange. Fort Henry in Bethel Taunschip un Fort Northkill, zwee Meile Oscht vun Schtrausstaun in Upper-Doppelbock Taunschip, waare allebeed in Barricks Kaunty.

Uff der aerschde Oktower, 1757, die Bauere waare aagegriffe. Die Leit in die Forts hen en Mann nooch Redding gschickt um mit dem Conrad Weiser zu schwetze. Der Weiser un der Kaptain Oswald mit zwee Liutenants un vazich Soldaate sin datthiegloffe. Nooch en Laaf darich der Busch, die Soldaate hen die Insching gschlagge un hen die Weissleit errett. Yuscht vier Insching waare dod gemacht in Barricks Kaunty darich der Grieg, een Hundert un fuffzich Weissleit hen ihre Lewe verlore un dreissich Weibsleit sin as Schklaafe weggenumme.

Ich finn sell Schtick vun unsre Gschicht so inderessant. Ich hab en Pickder vun unser gleene Fort gemacht. Ich waar nimmi drin, awwer ich hoff ich kann iwwerdem reigeh. Heitzudaag iss sell immernooch en Essblatz. Do iss en Link zu ihr Website!

Do iss en Audio Klip: Geb Acht! Die Insching kumme!

Published in: on 28/09/2012 at 19:39  Leave a Comment  

En Bsuch zu en Deitschklaess!

Guder Daag Blog Leser! Geschder hawwich en arrig gude Erfaahring ghatt. Ich bin nooch historisch Schaefferschteddel in Lebanon Kaunty gfaahre. Datt hawwich der Alice Spayd ihr Deitschklaess bsucht. Fer mich waar es arrig cool weil selle Klaess yuust mei Textbuch .

Es Brendle Museum in Schaefferschteddel. Datt iss wu der Alice ihr Klaess zammekummt.

Ich hab glee bissel Zeit mit de Schieler zu schwetze ghatt. Ich hab sie viele Frooge gfroogt. Ich waar neigierig zu wisse fer was sie Deitsch lanne wolle. Dann hawwich aa Frooge iwwer es Buch un wie sie es gfunne hen gfroogt. Die Schieler hen viele gude Gedanke ghatt, fer was mir besser duhe kenne um Deitsch zu lanne un laerne. Die alle hen gewollt meh Videos uff em Internet hawwe. Ich glaab sell iss was ich darrich der Winder duhe muss! Sie hen aa gsaat as sie hen gewollt meh Dinge fer Kinner zu hawwe. Farewebicher, Flashkaarte un soddiche Dinge. Die sinn aa gude Gedanke. Mol sehne, vielleicht kann epper uff so was schaffe.

Ich mit re Klaess.

Nooch mei Zeit mit de Schieler hot die Alice, die Schulmeeschderin, aagfange. Sie hot en gleene Glockche gebellt un hot gsaat: “Die Schul nau fangt aa.” Die Schieler waare ready. Die Alice hot die Schieler gemacht sie selwer uff Deitsch bekanntzumache. Yede Schuler hot ihr Naame gsaat un vun wu sie herkumme. Dann sinn sie widder zu em Buch gange um meh Deitsch zu lanne.

Die Alice am schwetze.

Ich waar arrig froh zu seh wie uffgeregt die Schieler waare um Deitsch zu schwetze un zu lanne. Ich hoff as ee Zeit in re Zukunft kann ich widder datthiefaahre um die Klaess widder zu bsuche.

Do iss en Audio Klip: En Bsuch zu en Deitschklaess.

Published in: on 23/09/2012 at 10:07  Comments (1)  

En Daaf!

Guder Daag Blog Leser! Heit waar en arrig wichdiger Daag fer meine Familye un abbadich fer meine Dochder. Heit waar ihr Daaf. Ich will selle Woch schreiwe iwwer wie en Luddrische Daaf geht un wie alles gloffe waar. Do iss en Spolier Alert, alles iss arrig gut geloffe un meine Dochder hot gaar net gebrillt! Gott sei Dank!

In die Luddrische Karrich, daafe mir Bobblis, normally sin es Kind baut 6 Woche alt. Do iss wie es Goddesdinscht ausguckt:

1. Die Eldre, mit em Kind gehne vanne zu re Daafefont. Do waerr aa der Paare sei. Der Paare verzaehlt ferwas mir daafe. Er saagt as mit em Wasser sin mir widdergebore as Kinner vun em Gott un mir griege ewige Lewe. Die Eldre beschenke es Kind.

Mir un der Paare an re Daafefont.

2. Es gebt en Bede un die Eldre sin gfroogt ob sie ee Paar Dinge duhe waerre: Waerre sie es Kind zu re Karrich bringe, waerre sie em Herr sei Gebet laerne, waerre sie en Biewel zu ihr Kind gewwe? Mir henn nadierlich YA gsaat.

3. Dann der Paare verzaehlt die Gschicht aus re Biewel vun Wasser, er vaerzaehlt vun Noah un wie Yesus in em Jordan Rewwer bedaaft waar. Dann sin die Eldre un die Gemee gfroogt ob sie an Yesus glaabt, Sind absaage, un der Deiwel absaage? Nadierlich hemmer widder YA gsaat. Dann kummt es Glaawenserkenntnis.

4. Nau kummt es Wasser. Der Paare daaft es Kind in der Naame der Vadder, der Soh un es Heilige Geist. Dann er macht en Greitz uff die Schtann un saagt: “Estella, Kind vun Gott, du bischt mit em Heilige Geist verbunne un mit em Greitz vun Grischt fer ewig gemarickt.

Der Bischof marrickt sie mit em Greitz vun Grischt.

Es waar alles arrig schee Heit. Die Gemee waar arrig froh unser Dochder zu bewillkumme. Mir waare aa froh unser Dochder in re Familye vun Gott zu bringe. Ich hoff as in ihr Lewe, waerrd sie en guder Diener fer Gott un Yesus do uff re Welt sei.

Uns mit dem Paare nooch em Goddesdinscht.

Do iss en Audio Klip: En Daaf

Published in: on 16/09/2012 at 12:42  Comments (3)  

Gleichscht du Humbarriger?

Guder Daag Blog Leser! Well ‘sis Schaffleitsdaag. Sell iss en Wochend as mehnt viele Dinge. Eens, sell iss en lange Wochend fer viele Leit. Heit iss en Feierdaag fer all die Leit die schaffe. Fer annere Leit, selle Wochend iss die letze Meeglichkeet fer en Picknick zu hawwe und “Mach’s gut” zu em Summer saage!

Die Schtrosse waare voll bei em Humbarriger Fescht.

Fer en gleene Schteddel in Barricks Kaunty iss Schaffleitsdaag Wochend en grosse Fescht. Schunn sidder 9 Yaahre iss es Humbarrigerfescht in Humbarrig am laafe. Es Fescht iss en Gelegeheit fer viele Essbletze ihre Humbarrige zu verkaafe. Es gebt Schetze fer die beschde Humbarriger, die Humbarrige die arrig creative iss un viel annere Categories. Awwer nicht yuscht Essbletze kumme. Es gebt aa viele Karriche die Humbarrige verkaafe! Un fer Leit die keen Fleesch esst, gebt es aa Gaarde-sachebarriger!

Die Deitsch Eck in Lenhartsville hot Humbarriger verkaaft.

Es Fescht waar en echde Schtross-fescht. Es waar viele Handwarricker do die ihre Dinge verkaaft hen, es hot Schpiele fer die Kinner gewwe und viel Lewendig Myusick. Letschdes Yaahr hot es baut 21,000 Leit gewwe! Selles Yaahr hen die Leit gsaat as meh as 30,000 Leit kumme waerre! Sell iss doch eppes fer en gleene Schteddel wie Humbarrig! Ich find soddiche Feschte arrig wichdig. Die bringe viel Leit zamme un es gebt Schteddels en Gelegeheit all die Diere uffzumache. Viele gleene Gschefte in Humbarrig hot grosse Sales ghatt.

Die Turkey Hill Kuh waar aa datt mit Eisrahm un gude Eistee.

Mei Bruder hot en neie Freind datt gemacht.

Ich hab gedenkt as en Deitsche Ess-sach aa en Fescht hawwe soll. Awwer weller? Welschkannboi Fescht? Botboi Fescht? Seimaag Fescht? Panhaas Fescht? Es macht nix aus zu mir! Ich gleich sie all!

Do iss en Audio Klip: Gleichscht du Humbarriger?

Published in: on 03/09/2012 at 12:23  Leave a Comment