Wie mer Dillgummere macht un weckduht!

Guder Daag Blog Leser! Well letschde Woch hawwich en Poscht iwwer mei Gaarde gschriwwe. Selle Woch hawwich gedenkt as ich eppes meh iwwer mei Gaardesache schreiwe sott. Ee Ding as ich yedes Yaahr blanz sin Gummere. Ich gleich Gummere arrig viel. Sie sin gut as Gummereselaat, as Dillgummere un aa as Siessgummere. Dihr wisst schunn as mer allsfatt eppes siess un eppes sauer uff dem Disch hawwe sott. Fer mei Familye hot es allsfatt Gummere gewwe. So heit will ich beschreiwe wie mer Dillgummere macht un weckduht. Wann mer sie weckduht, dann kann mer gute Gummere in Yenner un Hanning hawwe!

1. Aerscht muss mer Gummere finne! Wann mer ken Gaarde hot, kann mer Gummere in em Supermarrick odder uff en Gaardesachmarrick griege. Geb Acht! Sie misse gewascht sei!

Datt sin die Gummere, frisch aus em Gaarde.

2. Nau muss mer die Gummere abschneide. Mer kennt sie as “Chips” odder as “Schpies” schneide. Es macht nix, die alle schmacke gleich.

Zeit zu schneide. En gutes Messer helft!

3. Wann mer sie weckduh will, muss mer die Glasskanne sauwer mache. Fer sell muss mer sie ins Wasser koche. Net vergesse die Ringe un die Deckele aa zu koche!

Die Kanne sin ready zu koche.

4. Nau muss mer die Brieh koche. Normally, kaaf ich eppes fer mei Brieh, awwer es gebt viel verschiddliche Reseete fer es selwer zu mache. Fer mei Brieh, koch ich Wasser, Essich un die Mischung die ich kaaft hab.

Sell iss was ich fer mei Brieh kaafe. Wolfel un gut!

5. Nau dei Kanne sin sauwer un dei Brieh iss faddig, schtell die Gummere in die Kanne un leffele die Brieh in die Kanne.

Schtell die Gummere in die Kanne!

Nau kummt die Brieh aa rei!

6. Wann alles in die Kanne iss, misse die Kanne widder gekocht sei. Schtell die Ringe un die Deckele uff die Kanne un koche sie fer baut 15 Minudde.

7. Nooch baut 15 Minudde misse sie rausgenumme sei. Wann sie raus sin, zieh die Deckele aa. Schtell sie ariyets wu sie abkiehle kenne. Nau kannscht du fer die “pop” hariche. Wann sie poppe, sin sie faddig un ready fer dei Kaltkellar!

Geb Acht! Sie sin arrig hees. Ich muss mei Hensching aahawwe.

Nau sin sie faddig. Guckt arrig gut, Gell?

Ich hab sell frieher gheert: Was iss die beschde Deel vun en Sandwich? Die Gummere! Ich finn sell arrig richdig.

As ich fleissig an schaffe waar, hot mei Dochder gschlofe!

Do iss en Audio Klip: Wie mer Dillgummere macht un weckduht!

 

 

Published in: on 22/08/2012 at 12:59  Comments (2)  

The URI to TrackBack this entry is: https://deitscheblog.wordpress.com/2012/08/22/wie-mer-dillgummere-macht-un-weckduht/trackback/

RSS feed for comments on this post.

2 CommentsLeave a comment

  1. […] Wie mer Dillgummere macht un weckduht! […]

  2. Hi Doug
    Ich duh yuscht ein Gummerwein blannze (ein Wein is genunk) weil mei Frau frische Gummere mag, ich awwer nit! Ich finne, sie schmecke nit gud! Awwer sell is yuscht meine Meining. Un sell kann aa sei, weil ich mich als Junge aaf ne Gummerscheibe beinahe erstickt hab. Geschtern hawwich Broccoli un Kohl g’blanzt. In Georgia zu lewwe hot den Vorteil, ass mer Gaardesache fast bis Keerschtfescht griege kenne.
    Mach’s gut un viel Gschpass beim Dillgummere mache! Dillgummere un kalt Gummeresuppe gleich ich eigentlich, yuscht frische odder Salatgummere nit.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: